Biblia okinpatili innemilis

¿TLEN okipaleui se tlakatl tlen okatka rastafari a ayakmo makichiua tlen okichiuaya uan ayakmo matechikoita? ¿Tleka se telpochtli ayakmo omoteui uan ayakmo otekipano inmiuan akinmej okinemakayaj drogas? Matikitakan tlen kijtouaj.

“Onikka seki tlamantli” (HAFENI NGHAMA)

KIPIA: 34 XIUITL

UEYI ALTEPETL: ZAMBIA

OKSEKI TLAMANTLI: OKATKA RASTAFARI

TLEN ONIKCHIUAYA: Nonantsin okiski itech ueyi altepetl Namibia porque ompa okatka guerra uan omosetili itech nechikol Organización del Pueblo de África del Suroeste (SWAPO). Yejuan okixnamikiayaj akin otlanauatijtoka altepetl Namibia. Nonantsin oajsito kanin miakej omopaleuitoj ompa Zambia uan ompa onineski.

SWAPO okipiaya kanin miakej uelis mopaleuiskiaj, ik non, 15 xiuitl ompa onichantik. Ompa noijki okinmachtiayaj telpochmej itech política uan noijki okinmiluiayaj makinkokolikan akinmej ixchipajkej.

Ijkuak onikpiaya 11 xiuitl oniknekiaya nimochiuas nicristiano, ik non, onikitato pastor tlen otlamachtiaya ompa kanin otimopaleuitoj, ompa omonechikouayaj católicos, luteranos, anglicanos uan oksekimej pero pastor amo okinek nechpaleuis. Tlen onechilui okichi ayakmo manikneltoka toTajtsin Dios. Ik non, ijkuak onikpiaya 15 xiuitl onimosetili inmiuan rastafaris, yejuan omokajkalakiayaj itech política uan okipiayaj inreligión. Opejki inmiuan nimouika porque onechpaktiaya tlasotsonal reggae pero noijki oniknekiaya nitlapaleuis para ayakmo makintlajyouiltikan akinmej ochantiayaj África. Opejki nimoyektlalia ken yejuan, onikchichinaya marihuana, ayakmo onikkuaya nakatl uan onikinpaleuiaya akinmej amo ixchipajkej. Pero ok oniauilnemiaya uan onikinmitaya películas kanin mota ken moteuiaj uan onitlajtouaya pitsotik.

BIBLIA OKIPATLAK NONEMILIS: Itech xiuitl 1995, ijkuak onikpiaya kanaj 20 xiuitl, opejki nimokuayejyekoua tlen nikchiuas satepan. Onikintlajtoltiaya amochmej rastafaris tlen onikinseliaya pero amo oajsiayaj itech noyolo maski okipiaya seki textos. Ik non, onikijto noselti nimomachtis Biblia.

Se noyolikni rastafari onechmakak se amatlajkuilol tlen inmiaxka iTlaixpantijkauan Jehová, san niman opejki niktlajtoltia uan onikintemouaya textos tlen ompa oijkuilitokaj. Satepan onimotlapoui iuan se iTlaixpantijka Jehová uan opejki nechmachtia uan maski ayamo onechmachtiayaj ayakmo onikchiuaya seki tlamantli tlen amo kuali.

Oui onikitak ayakmo nitlachichinas uan nitlauanas (2 Corintios 7:1). Onikpatlak ken nimoyektlalia uan hasta onikmotekili notsonkal, ayakmo onikitaya películas kanin moteuiaj uan kanin mota auilnemij uan ayakmo onitlajtouaya pitsotik (Efesios 5:3, 4). Satepan ayakmo onikinchikoitak akinmej ixchipajkej (Hechos 10:34, 35). Para ayakmo nikchiuas tlen amo kuali, ayakmo onikkakiaya tlakuikali kanin okijtouayaj matitechikoitakan uan ayakmo onimouikaya inmiuan noyolikniuan.

Ijkuak ayakmo onikchiuaya seki tlamantli tlen amo kuali, oniktemo kanin omonechikouayaj iTlaixpantijkauan Jehová. Ijkuakon opejki okachi nimomachtia Biblia uan satepan onimoapolakti. Nofamiliares amo okinpakti manimomachti Biblia. Nonantsin onechilui uelis nimomachtiskia itech okse religión pero amo manimomachti iuan iTlaixpantijkauan Jehová uan notío tlen otekipanouaya iuan tekiua san onechpinauiaya.

Maski nofamiliares okualaniayaj uan onechpinauiayaj, onitlaxiko porque onimochijchikauaya nikchiuas ken Jesús okichi uan otlamachti. Onikmatiaya iTlaixpantijkauan Jehová tlamachtiayaj tlen melauak porque nochi tlen okijtouayaj okikixtiayaj itech Biblia. Noijki okichiuayaj tlen kijtoua Biblia uan okintlapouiayaj oksekimej (Mateo 28:19, 20; Hechos 15:14). Uan amo omokajkalakiayaj itech política (Salmo 146:3, 4; Juan 15:17, 18).

TLATEOCHIUALISTLI TLEN YONIKSELI: Yonechpaleui Biblia porque niktlakamati tlen ompa kijtoua. Itech se metstli miak tomin onikpolouaya porque onikchichinaya marihuana pero axkan ayakmo nitlachichina. Axkan kuali nimokuayejyekoua, ayakmo nimokokoua uan kuali nimomachilia.

Ijkuak onikatka nichokotsin oniknekiaya niyolpakis uan axkan melauak niyolpaki uan kuali nimouika iuan toTajtsin Dios (Santiago 4:8).

“Ayakmo sapanoua nikualani” (MARTINO PEDRETTI)

KIPIA: 43 XIUITL

UEYI ALTEPETL: AUSTRALIA

OKSEKI TLAMANTLI: OTEMIKTIAYA UAN OKINNEMAKAYA DROGAS

TLEN ONIKCHIUAYA: Ijkuak onikatka nichokotsin, nofamilia uan ne otichantiayaj itech seki altepetsitsintin, noijki itech se ueyi altepetl uan itech se altepetsintli kanin okatkaj protestantes. Nikilnamiki kuali onimouikaya iuan noprimos uan notíos. San sekan otikinkitskiayaj michimej, otikinmiktiayaj yolkamej itech kuajyo uan otikinchijchiuayaj bumeranes noso tlen ika otimauiltiayaj.

Onechpaktiaya nimoteuis, porque notajtsin okatka boxeador uan ye onechmachti manitlateui ijkuak onikatka nichokotsin. Ijkuak onikatka nitelpochtli opejki nitlauana. Noyolikniuan uan ne otechpaktiaya timoteuiskej, nochipa otikuikayaj navajas uan bates de beisbol noijki otimonechikouayaj kanaj veinte noso okachi para timoteuiskiaj.

Para nikpias tomin oniknemakaya drogas uan seki tlamantli tlen okichtekiayaj akinmej otekipanouayaj kanin omoketsayaj barcos. Onitekipanouaya iuan akinmej okinemakayaj drogas, ne onikintlajtlaniliaya tomin akinmej okikouayaj drogas uan okiteuikiliayaj uan onikinmojmojtiaya ika pistola. Nochipa onikijtouaya: “Nitemiktis noso nimikis”. Ne oniknekiaya nitemiktis.

BIBLIA OKIPATLAK NONEMILIS: Nikilnamiki ijkuak onikatka nitsikitsin otlapouayaj itech iTlaixpantijkauan Jehová pero hasta ijkuak onikpiaya kanaj veinte xiuitl oniknek nikmatis tlen okichiuayaj, ik non, oniktlajtlani nonantsin. Ome tonal satepan onechtlajpaloto nokalijtik se iTlaixpantijka Jehová tlen itoka Dixon. Uejkika otimotlapouijtokaj uan onechyole maniuia nechikol, axkan yikipia veinte xiuitl nimonechikoua. Onechpaktiaya nimomachtis inmiuan porque ijkuak itlaj onikintlajtlaniaya onechnankiliayaj ika Biblia.

Onechmachtijkej toTajtsin totech motekipachoua maski miakej amo kitlakamatij (2 Pedro 3:9). Noijki onimomachti, ye se teta tlen sapanoua tetlasojtla uan nechmaluiskia maski oksekimej amo. Onechyolchika ijkuak onikmatki tla nikpatlaskia nonemilis, Jehová nechtlapojpoluiskia. Itlaj tlen onechpaleui ayakmo manikchiua tlen amo kuali ye tlen kijtoua Efesios 4:22-24, ompa kijtoua “xikkawakah tlan achto ononkichitinemiah” uan “ximoyolpatlakah, ika se yankuik nomonemilis kemi Ye inewia yetoskia”.

Oui onikitak ayakmo nikchiuas tlen achto onikchiuaya. Opanouaya miak tonal amo onikchichinaya drogas pero ijkuak onimonechikouaya inmiuan noyolikniuan oksepa onikchichinaya. Onikajsikamatki tla ok nimouikaskia iuan noyolikniuan amo keman nikkauaskia tlen amo kuali. Ik non, onikijto ayakmo inmiuan nimouikaskia uan onia itech okse altepetl. Sekimej nouan oyajkej, pero itech ojtli okinekiayaj nechmakaskej marihuana, onikinmilui ayakmo oniknekiaya nikchichinas drogas, ik non, ayakmo nouan oyajkej. Satepan onechiluijkej yejuan otlachtekej itech se banco uan okiuikayaj se escopeta.

TLATEOCHIUALISTLI TLEN YONIKSELI: Ken ayakmo onimouikaya iuan noyolikniuan okachi amo oui onikchi tlen onimomachtiaya. Itech xiuitl 1989 onimoapolakti ken iTlaixpantijka Jehová, satepan noijki omoapolakti nokni siuatl uan notatajuan.

Yikipia 17 xiuitl onimonamikti uan nikinpia eyi nokoneuan. Axkan ayakmo sapanoua nikualani maski oksekimej itlaj nechchiuiliaj. Noijki nikintlasojtla nochtin maski tlatlamantli inmialtepe noso okse intlajtol (Apocalipsis 7:9). Nochipa nikilnamiktok tlen Jesús okijto: “Tla nomejwah nochipa nonkitlakitaskeh notlajtol, milák nonyetoskeh notlamachtijkawah. Iwa nonkixmatiskeh tlan milák, iwa tlan milák nomechmakixtis” (Juan 8:31, 32).

[Tlen moijtoua]

Para nikchiuaskia tlen onimomachtiaya, ayakmo onikkak tlakuikali tlen okijtouaya matitechikoitakan

[Tlen moijtoua]

Otechpaktiaya timoteuiskej inmiuan oksekimej. Nochipa otikuikayaj navajas uan bates de béisbol, noijki otimonechikouayaj kanaj veinte uan otimoteuiayaj

[Nota]