Biblia okinpatili innemilis

¿Tleka se tlakatl escocés tlen okipiaya se kuali tekitl okachi okipatioitak tlen kijtoua Biblia? ¿Tlen okipaleui se tlakatl tlen ochantiaya Brasil ayakmo maauilnemi uan ayakmo makichichina cocaína? ¿Tlen okipaleui se telpochtli esloveno ayakmo matlauana? Matikitakan.

“Amitlaj onechtekipachouaya” (JOHN RICKETTS)

ONESKI ITECH XIUITL: 1958

UEYI ALTEPETL: ESCOCIA (REINO UNIDO)

OKSEKI TLAMANTLI: OKIPIAYA SE KUALI TEKITL

TLEN ONIKCHIUAYA: Ijkuak onimoskalti amitlaj onechtekipachouaya porque otikpiayaj tomin. Notajtsin okiyekanaya ejército británico, ik non, miak uelta ompa otiajkej. Noijki otichantitoj itech altepemej Inglaterra, Alemania, Kenia, Malasia, Irlanda uan Chipre. Ijkuak onikpiaya chikueyi xiuitl opejki nimomachtia itech tlatlamantli escuelas tlen okatkaj Escocia uan otlanki onimomachti itech Universidad tlen kajki Cambridge.

Ijkuak onikpiaya 20 xiuitl opejki nimomachtia para nikmatis tlen kichiuaj itech industria petrolera uan onimomachti chikueyi xiuitl. Achto onitekipano itech altepemej tlen katej América del Sur, satepan onia África uan saiktlami Australia Occidental, ompa oniktlali se empresa kanin okitlatiayaj intomin uan satepan oniknemakak.

Ijkuak onikpiaya 40 xiuitl ayakmo onitekipano porque onikpiaya tomin tlen onikseli ijkuak oniknemakak empresa. Ayakmo onikpiaya tlen nikchiuas, ik non, opejki nio itech miakej altepemej, ome uelta onipanok ik altepetl Australia ipan nomotocicleta. Amitlaj onechtekipachouaya.

BIBLIA OKIPATLAK NONEMILIS: Achto nikkauaskia nitekipanos oniknekiaya niktlasojkamatilis toTajtsin Dios nochi tlen onechmakak. Ik non, opejki nimonechikoua itech teopan Anglicana kanin oniaya ijkuak onikatka nichokotsin, pero ompa amo miak otlamachtiaya itlajtol toTajtsin Dios. Satepan opejki nimomachtia iuan mormones uan onimoyolkoko ijkuak onikitak amo okipatioitayaj Biblia.

Se tonal iTlaixpantijkauan Jehová onechtlapouijkej, san niman onikitak nochi tlen okineltokayaj uan otlamachtiayaj okisaya itech itlajtol toTajtsin Dios. Onechititijkej tlen kijtoua 1 Timoteo 2:3, 4 ompa kijtoua toTajtsin Dios “kineki mamomakixtikah nochteh iwa makixmatikah tlan milák”. Onechtlajtlachialti yejuan amo san okipatioitayaj Biblia noijki otlamachtiayaj tlen melauak.

Ijkuak opejki inmiuan nimomachtia opejki nikmati tlen melauak. Onechpakti ijkuak onikmatki Jehová uan Jesús amo san se ken kijtouaj akinmej tlaneltokaj itech trinidad (Juan 14:28; 1 Corintios 11:3). Miak xiuitl amo onikajsikamatki tleka otlamachtiayaj itech trinidad. Pero ijkuak onechmachtijkej tlen melauak amo oui onikajsikamatki.

Satepan opejki nimonechikoua iuan iTlaixpantijkauan Jehová. Onechpakti nikitas nochtin kuali mouikaj uan kichiuaj tlen kijtoua Biblia. Onikitaya nochi kuali okichiuayaj, nochtin omotlasojtlayaj, ijkon onikitak melauak okiueyichiuayaj toTajtsin Dios (Juan 13:35).

TLATEOCHIUALISTLI TLEN YONIKSELI: Satepan ijkuak onimoapolakti onikixmatki se siuatl yolkuali tlen itoka Diane, ye okimatiaya tlen melauak porque itatajuan okatka iTlaixpantijkauan Jehová. Onechpakti ken okipiaya inemilis, ik non, otimonamiktijkej. Onikitak Jehová onechteochi porque nosiua onechpaleui uan onechyolchika.

Otiknekiayaj titlapaleuitiuij kanin omonekiaya mamotetlapoui kuali tlajtolmej, ik non, xiuitl 2010 otiajkej altepetl Belice tlen kajki Centroamérica. Ompa otikintlapouijkej akinmej okitlasojtlayaj toTajtsin Dios uan okinekiayaj kixmatiskej.

Kuali nimomachilia porque nikmati tlen melauak tlamachtia Biblia uan nikixmati toTajtsin Dios. Axkan okachi nitetlapouia uan miakej yonikinpaleui makixmatikan tlen melauak tlamachtia Biblia. Niyolpaki porque akinmej nikinmachtia kipatlaj innemilis ijkon ken ne onikchi. Ijkon niktlasojkamatilia Jehová porque yonechmakak miak tlamantli.

“Yejuan kuali onechtlapouijkej” (MAURÍCIO ARAÚJO)

ONESKI ITECH XIUITL: 1967

UEYI ALTEPETL: BRASIL

OKSEKI TLAMANTLI: SAPANOUA ONIAUILNEMIAYA

TLEN ONIKCHIUAYA: Onimoskalti itech se altepetsintli tlen itoka Avaré tlen kajki itech altepetl São Paulo, akinmej ompa ochantiayaj otekipanouayaj itech fábricas.

Notajtsin oixpoliuik ijkuak ayamo oninesiaya. Ijkuak onikatka nichokotsin onikmotlaliliaya itlaken nonantsin ijkuak ye amo okatka tokalijtik. Opejki nikchiua ken siuamej, ik non, miakej okijtouayaj onimosiuakopaya, satepan opejki nimoteka iuan telpochmej uan oksekimej tlakamej.

Ijkuak onikatka nitelpochtli oniaya kanin miakej omoyolpaktiayaj uan otlauanayaj, noijki oniaya itech seki religiones uan onikintemouaya tlakamej uan siuamej para iuan nimotekas. Ijkuak oiluichiuayaj onimotlakentiaya ken se siuatl uan onimijtotiaya samba. Miakej onechixmatiaya.

Onimouikaya iuan akinmej omotlakakopaya noso omosiuakopaya, siuamej tlen oauilnemiaya uan miakej tlen okitekitiltiayaj drogas. Yejuan onechyolejkej manikchichina crack noso cocaína uan opejki nochipa ijkon nikchiua. Ualeua otitlachichinayaj nochi youak uan noijki ijkon onikchiuaya ijkuak onikatka noselti. Amo kuali onimotaya, ik non, okijtouayaj onikpiaya sida.

BIBLIA OKIPATLAK NONEMILIS: Ijkuakon onikinmixmatki iTlaixpantijkauan Jehová. Yejuan kuali onechtlapouijkej uan onechtlajtoltilijkej tlen kijtoua Romanos 10:13 kanin kijtoua “nochi akin kijtos itoka Jehová momakixtis”. Ijkon onikajsikamatki moneki matiknotsakan Dios ika itoka. Miak uelta ijkuak onitlachichinaya, oniajkotlachiaya uan onikiluiaya toTajtsin Dios manechpaleui.

Nonantsin omoyolkokouaya porque okitaya amo kuali tlen onikchiuaya, ik non, onikijto ayakmo nikchichinas drogas. Satepan onikijto nimomachtis iuan iTlaixpantijkauan Jehová. Yejuan onechiluijkej tla nimomachtiskia Biblia, nechpaleuiskia manikpatla nonemilis uan melauak onechpaleui.

Ijkuak onimomachtijtoka tlen kijtoua Biblia onikitak omonekiaya nikpatlas miak tlamantli. Onikitak oui ayakmo nimosiuakopas, porque ijkon opejki nikchiua ijkuak onikatka nichokotsin. Pero ijkuak onikijto ayakmo ijkon nikchiuas, onechpaleui ayakmo nimouikas iuan akinmej onimouikaya, noijki ayakmo oniaya kanin omoyolpaktiayaj uan otlauanayaj.

Oui onikitak nikpatlas nonemilis pero onechpaleui nikmatis Jehová nechtlasojtla uan kipatioita tlen nikchiua (1 Juan 3:19, 20). Itech xiuitl 2002, onikpatlak nonemilis uan ayakmo onimosiuakopaya. Ik non, onimoapolakti uan opejki niktekichiuilia Jehová.

TLATEOCHIUALISTLI TLEN YONIKSELI: Nonantsin omotlajtlachialti ijkuak okitak onikpatlak nonemilis, ik non, noijki opejki momachtia Biblia. Pero okipixki se kokolistli itech itsonteko. Maski ijkon okipanok, momachtijtok Biblia uan okachi kitlasojtla Jehová.

Yikipia chikueyi xiuitl nikinpaleuia oksekimej makimatikan tlen melauak tlamachtia Biblia. Ualeua ok nechyoltilana tlen amo kuali onikchiuaya pero nimochijchikaua amo ijkon nikchiuas porque nikneki nikyolpaktis Jehová.

Kuali nimomachilia porque nimouika iuan toTajtsin Dios uan nikchiua tlen ye kipaktia. Axkan melauak niyolpaki.

“Nochipa san onitlauantinemiaya” (LUKA ŠUC)

ONESKI ITECH XIUITL: 1975

UEYI ALTEPETL: ESLOVENIA

OKSEKI TLAMANTLI: SAPANOUA ONITLAUANAYA

TLEN ONIKCHIUAYA: Onineski itech altepetsintli Liubliana tlen kajki itech altepetl Eslovenia. Kuali otikatka, pero satepan ijkuak ne onikpiaya naui xiuitl, notajtsin omomikti. Ik non, nonantsin opejki tekipanoua para uelis techmakaskia tlen ika timopanoltiskiaj ne uan nokni.

Ijkuak onikpiaya 15 xiuitl, onichantito iuan nositsin. Onechpaktiaya iuan nichantis porque akinmej okatka noyolikniuan ik ompa ochantiayaj. Ijkuak onikpiaya 16 xiuitl, opejki nimouika iuan akinmej otlauanayaj itlamian semana. Ayakmo onikmotekiliaya notsonkal, amo kuali onimotlakentiaya uan opejki nitlachichina.

Onikinchichinki miakej drogas pero okachi onechpaktiaya nitlauanas. Achto onikoniaya san tepitsin alcohol, pero satepan opejki sapanoua nitlauana. Amo omotaya kox onitlauanaya pero omoijnekuiaya, amikaj okimatiaya ijkuak onikoniaya miak vino, cerveza noso vodka.

Maski sapanoua otitlauanayaj, ne onikinpaleuiaya noyolikniuan ijkuak ayakmo ueli onejnemiaya. Se tonal sekimej noyolikniuan okijtojkej ne san onitlauantinemiaya, onechyolkoko tlen okijtojkej porque ompa Eslovenia ijkon kinmiluia akinmej sapanoua tlauanaj.

Opejki nimoyolkokoua porque onikitak onikchiuaya tlen amo kuali uan amo oniyolpakiaya.

BIBLIA OKIPATLAK NONEMILIS: Ijkuakon onikitak akin iuan onimomachtiaya okipatlak inemilis. Oniknekiaya nikmatis tlen okipaleui, ik non, onikilui matikonitij café. Onechilui opejki momachtia iuan iTlaixpantijkauan Jehová uan noijki onechilui seki tlamantli tlen omomachtijtoka. Nochi tlen onechilui onechtlajtlachialti porque ne amo onikmatiaya tlen tlamachtia Biblia. Ik non, opejki nimomachtia uan nimonechikoua iuan iTlaixpantijkauan Jehová.

Nochi tlen onikajsikamatki onechyolchika, ken ijkuak onikmatki tikatej “itech iksemi tonatijmeh” uan ayakmo miak poliui toTajtsin Dios kinpojpolos akinmej amo yolkualmej, pero akinmej yolmelajkej chantiskej itech xochitlali (2 Timoteo 3:1-5; Salmo 37:29). Ne oniknekiaya niyoltos, ik non, opejki nikpatla nonemilis.

Ijkuak onikinmilui noyolikniuan tlen onimomachtijtoka san onechpinauijkej. Ijkon onikitak yejuan amo melauak okatka noyolikniuan, noijki onikajsikamatki yejuan amo onechpaleuiayaj porque san okichiayaj matlami semana para tlauanaskej uan opejki nitlauana porque inmiuan onimouikaya.

Opejki nikpatla nonemilis uan onikintemo noyolikniuan tlen okatka iTlaixpantijkauan Jehová. Yejuan okitlasojtlayaj toTajtsin Dios uan okiyolpaktiayaj uan ne noijki ijkon oniknekiaya nikchiuas. Yejuan nochipa nouan okatka uan non onechpaleui porque satepan ayakmo onitlauanki.

TLATEOCHIUALISTLI TLEN YONIKSELI: Niktlasojkamatilia Jehová porque ayakmo moneki nikonis alcohol para niyolpakis. Tla amo nikpatlaskia nonemilis xamo axkan amo niyoltoskia. Pero axkan kuali nimomachilia uan niyolpaki.

Axkan niiTlaixpantijka Jehová uan yikipia chikome xiuitl nitlapaleuia itech kali Betel tlen kajki altepetl Eslovenia. Niyolpaki porque axkan nikixmati Jehová uan niktekichiuilia.