MOTLAPOUIAJ ITECH BIBLIA
¿Tleka toTajtsin Dios kitekauilia ma titlajyouikan?
Para tikmatiskej ken ikaj motlapouiskia iuan se iTlaixpantijka Jehová, ma timokuayejyekokan se iTlaixpantijka Jehová tlen itoka Michelle motlapouijtok iuan se siuatl tlen itoka Sofía.
¿KEN MOMACHILIA TOTAJTSIN DIOS IJKUAK TITLAJYOUIAJ?
Michelle: Panolti Sofía, nipaki nimitsajsis mokalijtik.
Sofía: Noijki nipaki nimitsitas oksepa.
Michelle: Okse tonal oniuala uan otimotlapouijkej ken momachilia toTajtsin Dios ijkuak titlajyouiaj. * Nikilnamiki otechilui ijkon timotlajtlania uan okachi ijkuak monantsin itlaj okipanok. Pero ¿ken kajki monantsin?
Sofía: Ualeua amo kuali momachilia pero axkan kuali kajki.
Michelle: Kuali, maski ualeua xamo timoyolkokoua.
Sofía: Kema uan nimotlajtlania kox nochipa titlajyouijtoskej.
Michelle: Teyolkoko nochi tlen panoua pero xamo tikilnamiki okse tonal onimitstlajtlani tla toTajtsin Dios uelis tlayektlalis, ¿tleka kitekauilia ma titlajyouikan?
Sofía: Kema, nikilnamiki.
Michelle: Ma tikilnamikikan tlen otimotlapouijkej okse tonal uan tikitaskej tlen kijtoua Biblia.
Sofía: Kuali.
Michelle: Otimomachtijkej se tlakatl yolyamanki okitlajtlani toTajtsin Dios tleka kitekauilia ma titlajyouikan, toTajtsin Dios amo okajuak ijkuak ijkon okitlajtlani nion okilui kox amo tlaneltoka.
Sofía: Non amo onikmatiaya.
Michelle: Noijki otimomachtijkej Jehová amo kipaktia ma titlajyouikan. Biblia kijtoua yiuejkika ijkuak ialtepe “otlajyouijkej ye noijki otlajyoui”. * Techyolchikaua tikmatiskej Jehová tlajyouia touan.
Sofía: Kema.
Michelle: Tlen otikitakej technextilia toTajtsin Dios uelis kitlajtlamis ijkuak kinekis nochi tlen kichiua ma titlajyouikan.
Sofía: Non amo nikajsikamati, tla toTajtsin Dios uelis kitlajtlamis nochi ouijkayotl, ¿tleka amo ijkon kichiua?
¿AKIN OKIJTO TLEN MELAUAK?
Michelle: Ma tikitakan achto tlen kijtoua Génesis, ¿tikmati akin Adán, Eva uan tlakilotl tlen toTajtsin okinmilui amo ma kikuakan?
Sofía: Kema, onechmachtijkej teopan. ToTajtsin Dios okinmilui amo ma kikuakan itlakilo se kuauitl pero yejuan amo otetlakamatkej.
Michelle: Kuali tlen otikijto, pero axkan ma tikitakan tlen achto opanok uan non okichi ma titlajyouikan. ¿Uelis tiktlajtoltis Génesis capítulo 3 versículo 1 hasta 5?
Sofía: Kema, kijtoua: “Kouatl san okitemojtoka ken kichiuas tlen amo kuali amo ken okseki yolkamej tlen toTajtsin Jehová okinchijchi. Ijkuakon, kouatl okilui siuatl: “¿Kox melauak Dios onamechilui amo xikkuakan itlakilo nochi kuauitl tlen kajki itech xochitlali?”. Siuatl okilui kouatl: “Uelis tikkuaskej itlakilo nochi kuauitl tlen onka itech xochitlali. Pero itlakilo kuauitl tlen kajki itlajkotia xochitlali, toTajtsin Dios okijto: ‘Amo xikkuakan itlakilo, amo, amo xikkitskikan, tlamo nanmikiskej’”. Ijkuakon, kouatl okilui siuatl: “Amo melauak nanmikiskej. Porque Dios kimati ijkuak nankikuaskej, motlaposkej namoixtololouan uan nanyetoskej ken Dios, nankimatiskej tlen kuali uan tlen amo kuali”.
Michelle: Tlasojkamati. Ma tikitakan tlen kijtosneki nin texto. Achto kijtoua se kouatl okitlapoui Eva. Se texto kijtoua Diablo noso Satanás okichi se kouatl ma motlapoui iuan Eva. * Kouatl okitlajtlani Eva kox melauak toTajtsin Dios okinmilui amo ma kikuakan itlakilo se kuauitl. ¿Tlen okinmilui toTajtsin Dios kinpanoskia Adán uan Eva tla amo tetlakamatiskiaj?
Sofía: Mikiskiaj.
Michelle: Kema ijkon. Satepan Diablo okijto itlaj tlen amo melauak itech toTajtsin Dios. Okijto: “Amo melauak nanmikiskej”. Ijkon okijto toTajtsin Dios san tlakajkayaua.
Sofía: Non amo onikmatiaya.
Michelle: Satanás okijto toTajtsin Dios san tlakajkayaua uan nin amo san niman tikmatiskiaj kox melauak. ¿Tikmati tleka?
Sofía: Mmm... Amo nikmati.
Michelle: Matikijtokan se tonal niuits uan nimitsiluia ne okachi nichikauak. ¿Ken tikteititis san nitlakajkayaua?
Sofía: Xamo tla nimitsiluis itlaj xikchiua.
Michelle: Kema, uelis tiktemoskej itlaj etik uan tikajkokuiskej, ijkon motas akin okachi chikauak.
Sofía: Non melauak.
Michelle: Pero tla nimitsiluis titlakajkayaua, ¿uelis san niman momatis kox melauak?
Sofía: Amo.
Michelle: San niman tikitaj akin chikauak pero akin tlakajkayaua amo san niman mota.
Sofía: Kema.
Michelle: Para tikmatiskej kox titlakajkayaua moneki kitaskej oksekimej tlen tikchiua uan non xamo uejkauas.
Sofía: Kema, ijkon momatiskia.
Michelle: Ma tikitakan oksepa tlen kijtoua Génesis. ¿Okijto Satanás ye okachi chikauak?
Sofía: Amo.
Michelle: Tla ijkon kijtoskia, toTajtsin Dios san niman uelis kiteititiskia non amo melauak. Satanás okijto toTajtsin Dios san tlakajkayaua. Yetoskia ken okilui Eva: “ToTajtsin Dios mitskajkayaua, ne nimitsiluijtok tlen melauak”.
Sofía: Non amo onikmatiaya.
Michelle: ToTajtsin Dios ixtlamatki, ik non, okimatiaya moneki panos miak xiuitl para moteititis akin tlakajkayaua.
MIAK IPATI TLEN OPANOK
Sofía: Pero ijkuak oixpoliuik Eva, ¿amo omoteititi toTajtsin Dios okijto tlen melauak?
Michelle: Kema, pero Satanás okijto okseki tlamantli, xikita versículo 5. ¿Tlen okseki tlamantli okilui Eva?
Sofía: Tla kikuaskia tlakilotl motlaposkiaj inmixtololouan.
Michelle: Kema uan yetoskiaj ‘ken Dios, kimatiskiaj tlen kuali uan tlen amo kuali’. Satanás okijto toTajtsin Dios amo techkauilia ma tiyolpakikan.
Sofía: Non melauak.
Michelle: Ijkuak ijkon okijto san okistlakaui toTajtsin Dios.
Sofía: Amo nikajsikamati.
Michelle: Ma tikitakan Diablo okinekiaya ma kineltoka Eva —noijki tejuan— okachi kuali yetoskia tla toTajtsin Dios amo kiyekanaskia. Jehová okimatiaya para motas kox melauak tlen okijto Satanás omonekiaya panos miak xiuitl. Ik non, okikauili Satanás ma tlanauati ipan tlaltikpak pero san panoua tlen amo kuali porque amo tlanauatijtok toTajtsin Dios. * Pero satepan kuali tiyetoskej.
Sofía: ¿Kuali tiyetoskej?
Michelle: Kema, Biblia kijtoua tlen kichiua toTajtsin Dios. Kijtoua toTajtsin Dios amo techkauaj ijkuak titlajyouiaj. Ma tikitakan tlen okijto David itech Salmo 31:7. Ye okipanok miak tlamantli amo kuali pero xikita tlen okilui toTajtsin Dios. ¿Uelis tiktlajtoltis nin versículo?
Sofía: Kijtoua: “Melauak niyolpakis porque techtlasojtla uan amo keman techkaua, otikitak ken nitlajyouia; otikmatki tlen nechtekipachoua”.
Michelle: Maski David sapanoua otlajyoui, omoyolseui porque okilnamiktoka Jehová okitaya tlen okipanotoka. Uan tejuatsin, ¿mitsyolseuia tikmatis Jehová mitsajsikamati maski oksekimej amo mitsajsikamatij?
Sofía: Nechyolchikaua uan nechyolseuia.
Michelle: Biblia kijtoua toTajtsin Dios amo kikauas nochipa ma titlajyouikan. Noijki ayakmo kikauilis Satanás ma tlanauatijto uan kiyektlalis nochi tlen okijtlakojkej. ¿Uelis oksepa timomachtiskej chikome? Tikitaskej tleka tikneltokaj toTajtsin Dios san niman kipojpolos nochi tlen amo kuali. *
Sofía: Kema, nimitschia.
¿Tikneki tikmatis tlen tlamachtia Biblia? ¿Tikneki tikmatis itlaj tlen kichiuaj iTlaixpantijkauan Jehová? Ijkuak oksepa mitstlajpalotiuij xikintlajtlani yejuan kinpaktis mitspaleuiskej.
^ Xiktlajtolti “Motlapouiaj itech biblia” tlen kipia revista Akin tetlapouijtok 1 de julio 2013.
^ Xikita Isaías 63:9.
^ Xikita Apocalipsis 12:9.
^ Xikita Juan 12:31 uan 1 Juan 5:19.
^ Tla tikneki tikmatis okachi, xikita amochtli ¿Tlen techmachtia Biblia? itech tlamachtil 9 tlen kichijchiuaj iTlaixpantijkauan Jehová.
