Onineski itech se altepetsintli tlen kajki Roma, ompa amo otikpiaya tomin. Sapanoua onitlajyoui. Amo onikixmatki nonantsin uan amo kuali onimouikaya iuan notajtsin. Onikchiuaya tlen amo kuali porque ijkon onimomachti.

Opejki nitlachteki ijkuak onikpiaya 10 xiuitl, uan ijkuak onikpiaya 12 xiuitl onikiski nokalijtik uan onicholo. Miak uelta notajtsin onechkixtito kanin onechtsakej. Nochipa san onikualantoka, ik non, amo kuali onimouikaya iuan oksekimej. Ijkuak onikpiaya 14 xiuitl onikiski nokalijtik uan ayakmo onimokopki. Amo onikpiaya kanin nichantis uan onikmotlaliliaya drogas. Ijkuak otlayouaya, oniktlapouaya se carro uan ompa onikochiaya; uan ijkuak otlanesiaya oniktemouaya kanin uelis nimochipauas noso nimaltis.

Kuali onikmatiaya ken nitlachtekis. Onikintlachtekiliaya akinmej oyaya itech ojtli uan ijkuak otlayouaya onitlachtekiaya tekalijtik. Miakej opejki nechixmatij, ik non, onechyolejkej ma nipoui itech se pandilla. Ken inmiuan onikatka opejki nitlachteki itech bancos. Sapanoua onikualaniaya, ik non, opejki nechtlakaitaj. Nochipa onikuikatinemiaya notepos; noijki onikpixtoka ijkuak onikochiaya. Oniknekiaya nitlateuis, onikmotlaliliaya drogas, onitlachtekiaya, oniauilnemiaya uan onikijtouaya tlajtoli pitsotik. Policías nochipa onechtemojtinemiaya uan miak uelta onechtsakej. San oninentinemiaya itech ojtli uan nochipa san onitsaktoka.

Se tonal ijkuak onechkixtijkej kanin onitsaktoka oniktlajpaloto notía. Amo onikmatiaya pero ye iuan ome ikoneuan omochijkej iTlaixpantijkauan Jehová. Yejuan onechyolejkej inmiuan ma nimonechiko, onikinkakili porque oniknekiaya nikitas tlen okichiuayaj. Ijkuak otiajsitoj kanin omonechikouayaj, onikijto nimotlaliskia kanin oualkalakiayaj ijkon nikitaskia akinmej okalakiayaj uan okisayaj. Ne nochipa onikpixtoka notepos.

Opejki nikpatla nonemilis ijkuak onikitak tlen okichiuayaj. Ne onimokuayejyeko: “¡Nikan okse tlamantli kichiuaj!”. Onikitaya nochtin oyolpakiayaj uan kuali omouikayaj. Axkan ok nikilnamiki ken iTlaixpantijkauan Jehová kuali onechselijkej. ¡Sapanoua onechtlajtlachialti nochi tlen onikitak!

Opejki inmiuan nimomachtia. Ijkuak onimomachtijtoka onikitak omonekiaya nikpatlas nochi nonemilis. Tlen kijtoua Proverbios 13:​20 oajsik itech noyolo, ompa kijtoua: “Akin nemi iuan akin ixtlamatki ye noijki yetos ixtlamatki uan akin mouika iuan akinmej amo yolkualmej kipanos tlen amo kuali”. Onikajsikamatki ayakmo omonekiaya niyetos iuan akinmej okichiuayaj tlen amo kuali. Maski oui onikitak nochi onikka, Jehová onechpaleui.

Onikpatlak nonemilis, ayakmo onikmotlalili drogas uan ayakmo onitlachichinki. Onimotsonkalti, ayakmo onikmotlalili pipilolmej uan ayakmo onikijtouaya tlen pitsotik. Onikitak onikchijtoka tlen kuali.

Amo onechpaktiaya nimomachtis nion itlaj niktlajtoltis, ik non onikmachili oui nimomachtis Biblia uan itech nimokuayejyekos. Pero satepan opejki niktlasojtla Jehová. Noijki opejki nechyolkokoua tlen achto onikchi. Opejki amo kuali nimomachilia porque onechkuejsouaya notlalnamikilis uan onikijtouaya Jehová amo nechtlapojpoluiskia. Ijkuak ijkon onimomachiliaya oniktlajtoltiaya Biblia kanin kijtoua Jehová okitlapojpolui David ijkuak otlajtlakolchi, non onechyolseuiaya (2 Samuel 11:⁠1–12:13).

Noijki onikitaya oui nitetlapouis (Mateo 28:​19, 20, TNM). ¡Onimomojtiaya porque onimokuayejyekouaya nikajsiskia ikaj tlen yiuejkika onikchiuili tlen amo kuali! Pero satepan ayakmo onimomojtiaya uan opejki niyolpaki porque onikintlapouiaya oksekimej ken toTajtsin Dios techtlapojpoluia ijkuak timoyolkopaj.

Axkan ok niyoltok porque onikixmatki Jehová. Miakej tlen inmiuan onimouikaya yoixpolikej uan oksekimej tsaktokej. Pero ne niyolpaki porque nikneltoka satepan okachi kuali tiyetoskej. Axkan niyolyamanki, nitetlakamati uan ayakmo san niman nikualani, ik non, kuali nimouika iuan oksekimej. Niyolpaki porque onimonamikti iuan Carmen uan sapanoua niktlasojtla. Tikintlapouiaj akinmej nikan chantij para ma momachtikan Biblia.

Para nikmotlanilis notomin, axkan nitlachipaua itech banco uan ayakmo nitlachteki.