1. Kuyini u-Isaya ayekucacisela ama-Israyeli?

 UMPHROFETHI u-Isaya wathi uJehova “nguNkulunkulu weqiniso.” Ibala lesiHebheru elihunyutshwe ngokuthi ‘qiniso’ evesini le ngelithi ameni. (Isaya. 65:16) Ibala elithi “ameni” litsho ukuthi “akube njalo” kumbe “kuliqiniso.” Nxa ibala elithi “ameni” lisetshenziswa kukhulunywa ngoJehova kumbe ngoJesu liyabe liqinisekisa ukuthi into okukhulunywa ngayo iliqiniso. Ngakho lokho u-Isaya ayekutshela ama-Israyeli ngamazwi la yikuthi okukhulunywa nguJehova kuyenzakala loba sekutheni. UJehova ukutshengisile ukuthi lokho kuliqiniso ngoba konke akuthembisayo kuyagcwaliseka.

2. Kungani singakuthemba lokho uJehova asitshela khona ngekusasa njalo yiphi imibuzo esizaxoxa ngayo?

² Kuyini okungenza lathi singathandabuzi ukuthi esikuthenjiswa nguJehova mayelana lekusasa kuzagcwaliseka? Kwathi sekudlule iminyaka engaba ngu-800 u-Isaya efile, umphostoli uPhawuli wachasisa ukuthi kuyini okwenza siqiniseke ukuthi okuthenjiswa nguNkulunkulu kuyagcwaliseka loba sekutheni. UPhawuli wathi: “UNkulunkulu angeke aqambe amanga.” (Heb. 6:18) Njengoba nje umthombo owodwa ungeke ukhiphe amanzi amnandi lamanzi alesawudo, loJehova okuvela kuye iqiniso ngeke aqambe amanga. Yikho singakuthemba konke uJehova akutshoyo, okugoqela lakho konke asithembisa khona  ngekusasa. Esihlokweni lesi sizaphendula imibuzo le: UJehova uthembisa ukuthi uzasenzelani esikhathini esizayo? UJehova usiqinisekisa njani ukuthi lokho asithembisa khona kuzakwenzakala?

3. (a) Yisiphi isithembiso esithandwa kakhulu yizinceku zikaNkulunkulu? (ISambulo 21:3, 4) (b) Abanye abantu baphendula njani nxa sibatshela ngesithembiso leso?

³ Sizaxoxa ngesithembiso esithandwa kakhulu yizinceku zikaJehova emhlabeni wonke. (Bala iSambulo 21:3, 4.) UJehova uthembisa ukuthi esikhathini esizayo “ukufa akusoze kuphinde kubekhona, loba ukulila loba ukukhala loba ubuhlungu ngeke kusabakhona.” Abanengi bethu sijayele ukubalela abantu esibatshumayezayo amavesi la ukuze sibaduduze futhi sibatshele lokuthi impilo izabe injani epharadayisi. Kodwa uyake unanzelele yini ukuthi abantu baphendula njani nxa sibatshela ngesithembiso lesi? Abanye bathi, “Angiboni ukuthi lokhu kungenzakala.”

4. (a) Kuyini uJehova ayekwazi? (b) UJehova wenzani ukuze singathandabuzi lokho asithembisa khona?

⁴ Ngesikhathi uJehova ephefumulela umphostoli uJohane ukuthi abhale ngesithembiso esimayelana lokuthi impilo izabe isinjani epharadayisi, wayekwazi ukuthi lathi sasizatshela abanye ngesithembiso lesi nxa sibatshumayeza ngoMbuso. UJehova wayekwazi ukuthi kwakuzaba nzima ukuthi abantu abanengi bakukholwe ukuthi izithembiso lezi zizagcwaliseka. (Isaya. 42:9; 60:2; 2 Khor. 4:3, 4) Kuyini okungasinceda ukuthi sincedise abanye ukuthi bangathandabuzi ukuthi izithembiso okukhulunywa ngazo kuSambulo 21:3, 4 zizagcwaliseka? Thina kuyini okungasinceda ukuthi singathandabuzi? UJehova kazange acine ngokusithembisa kuphela kodwa wasinika lezizatho ezingenza sithembe ukuthi uzakwenza lokho asithembisa khona. Yiziphi lezozizatho?

5. Yiwaphi amavesi enza sikholwe ukuthi izithembiso zikaNkulunkulu zepharadayisi zizagcwaliseka njalo athini?

⁵ Emavesini alandelayo yikho esithola khona izizatho ezingenza sisithembe isithembiso sikaJehova esimayelana lepharadayisi. Amavesi lawo athi: “Lowo owayehlezi esihlalweni sobukhosi wathi: ‘Khangela! Ngenza izinto zonke zibe zintsha.’ Waphinda wathi: ‘Bhala ngoba amazwi la athembekile futhi aliqiniso.’ Wasesithi kimi: ‘Sekwenzakele! Mina ngingu-Alfa lo-Omega, isiqalo lesiphetho.’ ”—Isam. 21:5, 6a.

6. Amazwi akuSambulo 21:5, 6 asinceda njani ukuthi singathandabuzi ukuthi lokho esikuthenjiswa nguNkulunkulu kuzagcwaliseka?

⁶ Amavesi la asinceda njani ukuthi singathandabuzi ukuthi esikuthenjiswa nguNkulunkulu kuzagcwaliseka? Emavesini la kungathi uJehova usifakela isiginetsha ukuze asiqinisekise ukuthi lokho asithembisa khona uzakwenza loba sekutheni. b Lokho uNkulunkulu asithembisa khona kukuSambulo 21:3, 4. Kodwa kuvesi 5 lo-6 sithola isiginetsha kaJehova esiqinisekisa ukuthi lokho asithembisa khona kuzakwenzakala. Ake sihlolisise amazwi uJehova awasebenzisayo ukuze asiqinisekise ukuthi lokho akuthembisayo kuzagcwaliseka.

7. Amazwi asekuqaliseni kukavesi 5 aveza ukuthi ngubani owayesezakhuluma njalo ukwazi lokho kusinceda ngani?

⁷ Uvesi 5 uqalisa ngamazwi athi: “Lowo owayehlezi esihlalweni sobukhosi wathi.” (Isam. 21:5a) Amazwi la aqakathekile ngoba atshengisa ukuthi uJehova nguye ngokwakhe owayezakhuluma. Wakhuluma kathathu kuphela ebhukwini leSambulo. Amazwi la aveza ukuthi okusemavesini la akukhulunywanga yingilosi kumbe nguJesu owayesevusiwe kodwa kwakhulunywa nguJehova ngokwakhe.  Lokho kwenza sikuthembe kakhulu okwatshiwo nguJehova. Ngenxa yani? Ngenxa yokuthi uJehova ‘ngeke aqambe amanga.’ (Tit. 1:2) Ngakho amazwi la asekuqaliseni kukavesi 5 enza sikuthembe lokho okukuSambulo 21:5, 6.

8. UJehova wakugcizelela njani ukuthi isithembiso sakhe sizagcwaliseka? (U-Isaya 46:10)

⁸ Khathesi asixoxeni ngebala elithi “Khangela!” (Isam. 21:5) Ibala lesiGrikhi elihunyutshwe ngokuthi “khangela!” lisetshenziswa kanengi ebhukwini leSambulo. Elinye ibhuku lithi ibala leli lisetshenziswa “ukunceda obalayo ukuthi ananzelele amazwi ayabe elandela.” Yiwaphi lawomazwi? Ngamazwi kaNkulunkulu athi: “Ngenza izinto zonke zibe zintsha.” UJehova uzakwenza izinto zibe zintsha esikhathini esizayo. Kodwa evesini le ukhuluma angathi usezenza zibe zintsha ngoba kathandabuzi ukuthi uzakwenza lokho akuthembisileyo loba sekutheni.—Bala u-Isaya 46:10.

9. (a) Umutsho othi “Ngenza izinto zonke zibe zintsha,” utsho ziphi izinto ezimbili ezizakwenziwa nguJehova? (b) Kuzakwenzakalani ‘ngezulu lomhlaba’ okukhona khathesi?

⁹ Asihloleni amazwi alandelayo akuSambulo 21:5. UJehova wathi: “Ngenza izinto zonke zibe zintsha.” Kutshoni lokhu? Esahlukweni lesi umutsho lo ukhuluma ngezinto ezimbili ezizakwenziwa nguJehova. Kulokunye azakukhipha alethe okutsha, kuphinde kube lokunye azakuvuselela. Kuyini uJehova azakukhipha? USambulo 21:1 uthi: “Izulu lakuqala lomhlaba wakuqala kwasekudlulile.” “Izulu lakuqala” litsho ohulumende abangaphansi kukaSathane lamadimoni akhe. (Mat. 4:8, 9; 1 Joh. 5:19) Kwamanye amavesi ibala elithi “umhlaba” litsho abantu. (Gen. 11:1; Hubo. 96:1) Ngakho ‘umhlaba wakuqala’ utsho abantu ababi abasemhlabeni khathesi. UJehova kasoze aphonguguqula kumbe alungise ‘izulu lomhlaba’ okukhona khathesi kodwa uzakubhubhisa kungasaphindi kube khona. Ngemva kwalokho uzaletha “izulu elitsha lomhlaba omutsha,” okutsho ukuthi kuzakuba lohulumende omutsha ozabe ubusa abantu abalungileyo.

10. Kuyini uJehova azakwenza kube kutsha?

¹⁰ KuSambulo 21:5 uJehova uyasitshela ngezinto azazenza zibe zintsha. Nanzelela ukuthi uJehova kazange athi: “Ngenza izinto ezintsha.” Kodwa wathi: “Ngenza izinto zonke zibe zintsha.” UJehova uzakwenza ukuthi umhlaba labantu kube kutsha ngokususa isono ebantwini langokwenza ukuthi umhlaba ube muhle. Njengoba u-Isaya watsho, umhlaba wonke uzakwenziwa ube muhle njengensimu yase-Edeni. Lathi sizavuselelwa senziwe sibe batsha. Abayizigoga labayiziphofu labayizacuthe bazasiliswa njalo abafileyo bazavuswa.—Isaya. 25:8; 35:1-7.

11. UJehova wathi uJohane enzeni futhi kungani wathi enze njalo?

¹¹ Kuyini okunye uNkulunkulu akukhulumayo okusenza siqiniseke ukuthi uzakwenza akuthembisileyo? UJehova watshela uJohane wathi: “Bhala ngoba amazwi la athembekile futhi aliqiniso.” (Isam. 21:5) UJehova kazange amtshele ukuthi ‘abhale’ kuphela kodwa wamtshela lokuthi kungani kwakumele abhale. Wathi: “Ngoba amazwi la athembekile njalo aliqiniso.” Lokho kutsho ukuthi amazwi kaNkulunkulu singawathemba sibili. Kuhle ukuthi uJohane wamlalela uNkulunkulu, ‘wabhala.’ Yikho lamuhla sisenelisa ukubala ngesithembiso sikaNkulunkulu esimayelana lepharadayisi siphinde sicabangisise ngezibusiso ezinhle esizazithola.

12. Kungani kuqondile ukuthi uJehova athi: “Sekwenzakele!”

¹² UNkulunkulu waqhubeka wathi, “Sekwenzakele!”  (Isam. 21:6) Lapha uJehova ukhuluma angani zonke izinto azikhulumayo ngepharadayisi sezenzakele. UJehova uqondile sibili nxa ekhuluma ngendlela enjalo ngenxa yokuthi akulalutho olungamvimba ukuthi enze lokho akuhlosileyo. UJehova waphinda wakhuluma amanye amazwi enza singathandabuzi ukuthi lokho akuthembisileyo kuzagcwaliseka loba sekutheni. Yiwaphi lawomazwi?

13. Kungani uJehova wathi ‘ungu-Alfa lo-Omega’?

¹³ Njengoba sike satsho, uJehova ngokwakhe wakhuluma kathathu loJohane embonweni. (Isam. 1:8; 21:5, 6; 22:13) Kuzo zonke izikhathi lezo kulamazwi afananayo uJehova awakhulumayo athi: “Ngingu-Alfa lo-Omega.” U-alfa libala lokuqala ku-alifabhethi yesiGrikhi, u-omega ngelokucina. Nxa uJehova esithi ‘ungu-Alfa lo-Omega,’ utshengisa ukuthi nxa angaqalisa into uyayenza aze ayiqede, kameli endleleni.

14. (a) Kunini lapho uJehova ayengani uthi ‘Alfa’ njalo kunini lapho azabe engathi uthi ‘Omega’? (b) UGenesisi 2:1-3 utshengisa njani ukuthi uJehova uzakwenza konke akuhlosileyo?

¹⁴ UJehova wathi esedale u-Adamu lo-Eva wakhuluma inhloso yakhe ngabantu lomhlaba. IBhayibhili lithi: “UNkulunkulu wababusisa wathi kubo: ‘Zalani lande ligcwalise umhlaba liwubuse.’ ” (Gen. 1:28) Ngalesosikhathi kufanana lokuthi uJehova wayesithi ‘Alfa.’ UJehova wakhuluma inhloso yakhe ngendlela ecacileyo: Kwakuzafika isikhathi lapho izizukulwane zika-Adamu lo-Eva ezingelasono futhi ezilalelayo, ezazizagcwalisa khona umhlaba ziwutshintshe ube lipharadayisi. Nxa inhloso yakhe isigcwalisekile kuzabe kungathi uJehova uthi ‘Omega.’ UJehova wathi esedale ‘amazulu lomhlaba lakho konke okukukho,’ wakhuluma amazwi atshengisa ukuthi inhloso yakhe izagcwaliseka loba sekutheni. Amazwi la atholakala kuGenesisi 2:1-3. (Bala.)  UJehova wathi usuku lwesikhombisa lungcwele. Kutshoni lokho? Kutsho ukuthi usuku lwesikhombisa wayezalusebenzisa ukuthi agcwalise inhloso yakhe. Ngakho wayesiqinisekisa ukuthi lokho akuhlosileyo ngabantu langomhlaba uzakwenza loba sekutheni. Ekupheleni kosuku lwesikhombisa uJehova uzabe esekwenzile konke akuhlosileyo.

15. Kungani kwakungakhanya angani uSathane usefadalalise inhloso kaNkulunkulu ngabantu?

¹⁵ U-Adamu lo-Eva bathi sebehlamukile baba yizoni futhi banika abantwababo isono lokufa. (Rom. 5:12) Kwasekukhanya angani uSathane useyifadalalisile inhloso kaNkulunkulu yokuthi emhlabeni kugcwale abantu abalalelayo futhi abangelasono. Kwasekungani uSathane usevimbele uJehova ukuthi agcwalise inhloso yakhe kumbe ukuthi athi ‘Omega.’ USathane wayengabe ecabanga ukuthi kulutshwana kakhulu uJehova ayengakwenza ngendaba le. Okokuqala ayengabe ekucabanga yikuthi uNkulunkulu wayezabulala u-Adamu lo-Eva, abesedala eyinye indoda lomfazi abasebenzise ukuthi agcwalise inhloso yakhe ngabantu. Kodwa aluba uNkulunkulu wenza njalo, uSathane wayengamsola athi ungumqambimanga. Ngenxa yani? Ngenxa yokuthi kuGenesisi 1:28 uJehova wayetshele u-Adamu lo-Eva ukuthi izizukulwane zabo yizo ezazizagcwalisa umhlaba.

16. Kuyini okwakungenza uSathane acabange ukuthi uJehova useyehlulekile ukugcwalisa inhloso yakhe?

¹⁶ Kuyini okunye uSathane ayengabe ecabanga ukuthi uNkulunkulu angakwenza? Kungenzeka ukuthi wayecabanga ukuthi uJehova wayezavumela u-Adamu lo-Eva ukuthi babe labantwana, kodwa abantwana labo babezahlala belesono. (Umtshu. 7:20; Rom. 3:23) Lapho-ke uSathane wayezathi uJehova useyehlulekile. Ngenxa yani? Ngenxa yokuthi inhloso kaNkulunkulu eyokuthi izizukulwane zika-Adamu lo-Eva ezingelasono futhi ezilalelayo zigcwalise umhlaba oyipharadayisi yayingasoze igcwaliseke.

17. UJehova wayilungisa njani indaba yokuhlamuka kukaSathane labantu bokuqala futhi kuyini okuzenzakala ekucineni? (Khangela lomfanekiso.)

¹⁷ UJehova walungisa indaba yokuhlamuka kukaSathane labantu bokuqala ngendlela eyayingabe yatshiya uSathane elesithuli. (Hubo. 92:5) Wavumela u-Adamu lo-Eva ukuthi babe labantwana. Lokhu kwatshengisa ukuthi wayekhulume iqiniso, wayengayisuye usomangase. Kanti njalo uJehova watshengisa ukuthi wayengeke ehluleke ukwenza loba yini athi uzayenza. Waba leqiniso lokuthi ayekuhlosile kwakuzagcwaliseka.  Wenza ukuthi kube “lenzalo” eyayizasindisa izizukulwane zika-Adamu lo-Eva ezilalelayo. (Gen. 3:15; 22:18) Kumele ukuthi uSathane wamangala ebona ukuthi uJehova wayesehlele ukuthi inzalo le inikele ngokuphila kwayo ukuze ihlawulele abantu! Kungani sisitsho njalo? Kungenxa yokuthi inhlawulo yayitshengisa ukuthi uJehova uyabathanda kakhulu abantu. (Mat. 20:28; Joh. 3:16) Phela uSathane yena kalalo uthando, ulolunya. Inhlawulo yona izanceda njani? Izakwenza ukuthi ekupheleni kweminyaka engu-1 000 umhlaba ube usulipharadayisi. Uyabe usuhlalwa yizizukulwane zika-Adamu lo-Eva ezilalelayo futhi ezingelasono, njengoba nje uJehova wayehlosile. Ngalesosikhathi uJehova kuzabe kungathi uthi ‘Omega.’

18. Yiziphi izizatho ezintathu uJehova asinika zona ezenza sikholwe ukuthi uzazigcwalisa izithembiso zakhe? (Khangela ibhokisi elithi “ Izizatho Ezintathu Ezenza Sikholwe Lokho UJehova Asithembisa Khona.”)

¹⁸ Nxa sikhangela lokho esesixoxe ngakho, kuyini okungasinceda siqinisekise abathandabuzayo ukuthi isithembiso sikaNkulunkulu sepharadayisi sizagcwaliseka? Okokuqala, uJehova nguye osithembisayo. Ibhuku leSambulo lithi: “Lowo owayehlezi esihlalweni sobukhosi wathi: ‘Khangela! Ngenza izinto zonke zibe zintsha.’ ” UJehova ulenhlakanipho lamandla kanye lesifiso sokwenza lokho akuthembisileyo. Okwesibili, uJehova uyakwazi ukuthi lokho akuthembisileyo kuzagcwaliseka loba sekutheni. Kuye kufanana lokuthi sekugcwalisekile. Yikho esithi: “Amazwi la athembekile futhi aliqiniso,” aphinde athi: “Sekwenzakele!” Okwesithathu, uJehova engaqalisa into kameli endleleni, uyayenza ayiqede njengoba esithi: “Mina ngingu-Alfa lo-Omega.” UJehova uzatshengisa ukuthi uSathane ungusomangase lokuthi uSathane ngeke enelise ukumvimba ukuthi agcwalise akuhlosileyo.

19. Ungenzani nxa ungahlangana lomuntu othandabuzayo ukuthi isithembiso sikaNkulunkulu sepharadayisi sizagcwaliseka?

¹⁹ Khumbula ukuthi zikhathi zonke nxa utshela abantu ngalokho okwenziwe nguJehova ukuze asiqinisekise ukuthi izithembiso zakhe zizagcwaliseka, lawe uyabe uqinisa ukholo lwakho. Ungenzani nxa ungathi utshela umuntu ngesithembiso sepharadayisi esikuSambulo 21:4 yena athi, “Angiboni ukuthi lokhu kungenzakala”? Mhlawumbe ungambalela uvesi 5 lo-6 umtshengise njalo umchasisele amazwi kaJehova ayisiginetsha asiqinisekisa ukuthi lokho kuzakwenzakala.—Isaya. 65:16.