Ukufa kunjengokulala, okutsho ukuthi abafileyo abazi lutho njalo abenelisi ukwenza loba yini. Lanxa kunjalo, uMdali wokuphila angabavusa abantu abafayo, baphile. Ukuze atshengise ukuthi angakwenza lokhu, uNkulunkulu wanika uJesu amandla okuvusa abantu abafileyo abanengi.​—Bala umTshumayeli 9:5; uJohane 11:11, 43, 44.

UNkulunkulu uthembisa ukuthi abafileyo abasemkhumbulweni wakhe bazavuswa baphile emhlabeni omutsha olokulunga. Abazavuswa baqhubeka befile kuze kube yilapho uNkulunkulu esebanika ukuphila futhi. UNkulunkulu uSomandla uzimisele ukusebenzisa amandla akhe ukuze avuse abafileyo.​—Bala uJobe 14:14, 15.

Nxa uNkulunkulu esevusa abantu, bazabe bezazi ukuthi bangobani njalo bazabakhumbula abangane babo kanye lezimuli zabo. Lanxa umzimba womuntu ubola uphele, uNkulunkulu angamvusa lowomuntu amnike umzimba omutsha.​—Bala u-1 Khorinte 15:35, 38.

Balutshwana abantu abavuswa besiyaphila ezulwini. (ISambulo 20:6) Abanengi abazavuswa bazaphila epharadayisi elizaphinda libe khona emhlabeni. Laba bazakuba lesiqalo esitsha, belethemba lokuphila kuze kube nini lanini.​—Bala iHubo 37:29; ImiSebenzi 24:15.