Kulezindaba eziseBhayibhilini ezikhuluma ngokutshiswa kwamathambo kanye lezidumbu zabantu abathile. (Josh. 7:25; 2 ImiLan. 34:4, 5) Kukhanya angani abantu laba babengafanelanga ukuthi bangcwatshwe ngendlela elesithunzi. Kodwa akusikho ukuthi zonke izidumbu ezazitshiswa zazingezabantu ababengafanelanga ukungcwatshwa kuhle.

Lokhu sikubona endabeni ephathelane lokufa kweNkosi uSawuli kanye lamadodana ayo amathathu ngesikhathi besilwa lamaFilisti. Omunye wamadodana la kwakunguJonathani, umngane omkhulu kaDavida owayehlala emsekela. Lapho amaqhawe ako-Israyeli ayehlala eJabeshi Gileyadi esizwa ngomonakalo lo, ahamba ayathatha izidumbu zabo, azitshisa asengcwaba amathambo. UDavida wawancoma ama-Israyeli la ngalokho akwenzayo.​—1 Sam. 31:2, 8-13; 2 Sam. 2:4-6.

IMibhalo isinika ithemba lokuthi uNkulunkulu uzabavusa sibili abantu abafileyo. UJehova ulamandla amakhulu okuvusa umuntu ofileyo abe lomzimba omutsha kungelani lokuthi isidumbu sakhe satshiswa kumbe hatshi. INkosi uNebhukhadinezari yalaya ukuthi amaHebheru amathathu abulawe ngokutshiswa esithandweni somlilo olavuzayo. Kodwa babengelasizatho sokuthi besabe ukuthi nxa bangabulawa ngumlilo lo, uNkulunkulu kasoze enelise ukubavusa. (Dan. 3:16-18) Lasemajele amaNazi lapho okwakubulawa khona abantu besebetshiswa, izinceku zikaJehova ezithembekileyo zazingathandabuzi ukuthi uNkulunkulu uzazivusa. Kanti njalo ezinye izinceku zikaNkulunkulu eziqotho zabulawa ngamabhomba kumbe ngokunye, kwasala kungakhanyi lokuthi bekulomuntu. Lanxa kunjalo, asithandabuzi ukuthi zizavuswa.​—Isam. 20:13.

Ukuze uJehova avuse umuntu, akutsho ukuthi kufunakala umzimba umuntu lo ayelawo kudala. Lokhu kucaciswa yikuthi nxa evusa amaKhristu agcotshiweyo ukuthi ayephila ezulwini, kawantshintshi abe ngabanye abantu. Kodwa uwavusa eselomzimba womoya njengoJesu ‘owavuswa sengumzimba womoya.’ Awahambi lemizimba yawo yenyama nxa esiyaphila ezulwini.​—1 Khor. 15:42-53; 1 Joh. 3:2.

Ukuvuswa kwabafileyo akuyi ngokuthi isidumbu sitshisiwe kumbe singcwatshiwe. Okwenza sibe lethemba lokuthi bazavuswa sibili yikuthi siyakholwa ukuthi uNkulunkulu ulamandla lesifiso sokugcwalisa izithembiso zakhe. (ImiSeb. 24:15) Singabe singakuzwisisi ngokugcweleyo ukuthi uNkulunkulu wabavusa njani abafileyo endulo kanye lokuthi uzabavusa njani kwelizayo. Kodwa siqhubeka simthemba ngoba wasivezela “ubufakazi” ngokuvusa uJesu.​—ImiSeb. 17:​31; Luk. 24:2, 3.

Yikho-ke akulamthetho obekiweyo, umuntu munye ngamunye kumbe imuli yinye ngayinye iyazikhethela ukuthi ifuna isidumbu sitshiswe kumbe singcwatshwe. Kodwa kuhle ukuthi amaKhristu acabange ngokujayele ukwenziwa emphakathini, ngemibono yabantu langemithetho kahulumende.​—2 Khor. 6:3, 4.