1. Abafundisi bamansonto babesenzani ngesikhathi sempi?

 KUYINTANDO kaNkulunkulu yini ukuthi amaKhristu eqiniso ahambe ezimpini esiyakulwa labantu bezinye izizwe? Eminyakeni engu-100 eyadlulayo abantu abanengi ababezibiza ngokuthi ngamaKhristu babekwenza lokho. Nxa amasotsha esiyakulwa lamanye amaKatolika awesizwe esithile, abafundisi bamaKatolika babewathandazela baphinde bathandazele lezikhali zawo. Kanti njalo abafundisi bamanye amansonto aphuma kweyamaKatolika labo babekwenza lokhu. Yikho kwachitheka igazi elinengi eMpini Yomhlaba Wonke Yesibili.

2, 3. OFakazi bakaJehova babesenzani ngesikhathi seMpi Yomhlaba Wonke Yesibili langesikhathi isidlulile, njalo kuyini okwakusenza ukuthi benze njalo?

² OFakazi bakaJehova bona babesenzani ngesikhathi sempi le? Abezembali bathi oFakazi abazange bangenele empini. Ngenxa yani? Ngenxa yokuthi babelandela izimfundiso zikaJesu kanye lesibonelo abatshiyela sona. Wathi: “Bonke abantu bazakwazi ukuthi lingabafundi bami uma lithandana.” (Joh. 13:35) Kanti njalo babesebenzisa lokho umphostoli uPhawuli akubhalela amaKhristu aseKhorinte.​—Bala u-2 Khorinte 10:3, 4.

³ Yikho-ke amaKhristu eqiniso alomzwangedwa ofundiswe liBhayibhili awafundeli izinto eziphathelane lempi njalo kawahambi  empini. Izinkulungwane zaboFakazi ezigoqela abancane labadala, amadoda labesifazana, ziyahlukuluzwa ngenxa yokuthi zingamaKhristu angangeneliyo kwezombangazwe. Abanengi bayahlupheka emajele lasezinkambeni lapho abanikwa khona imisebenzi enzima okumangalisayo. Ngesikhathi kubusa amaNazi eGermany abanye babulawa sibili. Lanxa oFakazi base-Europe babehlukuluzwa kabuhlungu, kabazange bayekele ukutshumayela izindaba ezinhle zoMbuso kaJehova. Babetshumayela emajele, ezinkambeni lapho ababehlukuluzwa khona lasezindaweni ababethathwa bahanjiswe kuzo. * Ngo-1994 eRwanda, oFakazi abazange bangenele ngesikhathi kulempi yokulwisana kwemihlobo. Kanti njalo abazange bangenele lapho kubulawa abantu abanengi kakhulu ngesikhathi kudilika ilizwe elalibizwa ngokuthi yiYugoslavia.

4. Ukungangeneli kwaboFakazi bakaJehova kwezombangazwe kwenza ukuthi abanye babakhangele njani?

⁴ OFakazi bakaJehova kabangeneli kwezombangazwe loba sekutheni. Lokhu kwenze izigidi zabantu emhlabeni wonke zangathandabuzi ukuthi bayamthanda ngenhliziyo yonke uNkulunkulu kanye lomakhelwana wabo. Ngamanye amazwi singathi oFakazi benza lokho okutshengisa ukuthi bangamaKhristu eqiniso. Kanti njalo kulezinto ezinengi eziphathelane lokukhonza kwethu esezenze ukuthi nxa abanengi besikhangele bangathandabuzi ukuthi babona amaKhristu eqiniso.

5. Umsebenzi wabalandeli bakaKhristu bokuqala wantshintsha njani?

⁵ Kusukela uJesu eqalisa inkonzo yakhe wagcizelela ukuthi kuqakatheke kakhulu ukutshumayela izindaba ezinhle zoMbuso kaNkulunkulu. Wakhetha abafundi abangu-12 ukuthi babe ngabaqali besiziba emsebenzini wokutshumayela owawuzakwenziwa emhlabeni wonke. Ngemva kwalokhu waqeqetsha abafundi abangu-70. * (Luk. 6:13; 10:1) Basebekulungele ukuyatshela abanye izindaba ezinhle njalo baqala ngokuzitshela amaJuda kuphela. Kodwa kakucinanga khonapho. Abafundi bakaJesu kwasekumele bazitshele labezizwe ababengasokwanga. Lokhu kumele ukuthi kwakuluntshintsho olukhulu kakhulu kubafundi abangamaJuda ababetshiseka.—ImiSeb. 1:8.

6. Kuyini okwenza uPhetro wananzelela ukuthi uJehova kakhethi?

⁶ Umphostoli uPhetro wathunywa emzini kaKhoneliya, indoda yeZizweni eyayingasokwanga. Yikho uPhetro wahle wananzelela ukuthi uNkulunkulu kakhethi. UKhoneliya labendlu yakhe babhaphathizwa. Yikho-ke abantu abavela ezizweni zonke basebengalizwa iqiniso balamukele ngoba kwasekutshunyayelwa ensimini entsha njalo enkulu. (ImiSeb. 10:9-48) Insimu yayisingumhlaba wonke.

7, 8. Kuyini okwenziwa yinhlanganiso kaJehova? (Khangela umfanekiso osekuqaliseni.)

⁷ Lamuhla abakhokhelayo kuboFakazi bakaJehova bayatshiseka ukuze umsebenzi wokutshumayela lowokufundisa abanye izindaba ezinhle uqhubeke usenziwa emhlabeni wonke. OFakazi abangaba yi-8 000 000 basebenza gadalala ukuze batshele abanye umlayezo kaKhristu ngezindimi ezedlula 600 njalo inani lezindimi lezi lizabe lilokhu likhwela. Abantu bajayele ukubabona betshumayela endlini ngendlu lasemigwaqweni, kwezinye izikhathi besebenzisa izinqola zamabhuku ezifuqwayo kumbe amatafula.

⁸ Sekwaqeqetshwa abahumutshi abedlula 2 900 ukuze bahumutshe iBhayibhili kanye lamabhuku asekelwe eBhayibhilini. Kodwa kulokuthi bahumutshe izindimi ezaziwayo  njalo ezikhulunywa ngabantu abanengi kuphela, bahumutsha lezindimi ezingamakhulu ezikhulunywa yizigidi zabantu lanxa zingazakali ezindaweni ezinengi. Ngokwesibonelo izigidi zabantu baseSpain ezihlala esabelweni okuthiwa yiCatalonia zilukhuluma nsuku zonke ulimi lomdabuko wazo okuthiwa yisiCatalan. Eminyakeni esanda kudlula, ulimi lolu lwavuselelwa njalo selukhulunywa elizweni lase-Andorra, emadolobheni ase-Alicante laseValencia kanye lasezihlengeni zaseBalearic. Khathesi oFakazi bakaJehova sebehumutsha amabhuku asekelwe eBhayibhilini ngesiCatalan njalo imihlangano yobuKhristu ibathinta inhliziyo abantu baseCatalonia ngoba isisenziwa ngolimi lomdabuko wabo.

9, 10. Kuyini okutshengisa ukuthi inhlanganiso kaNkulunkulu ifuna ukuthi abantu bonke bathole ulwazi oluseBhayibhilini?

⁹ Lasezindaweni ezinengi amabhuku ethu ayahunyutshwa njalo abantu abanengi bayafundiswa. EMexico kukhulunywa ulimi lwesiSpanish kodwa abanye abathe xaxa abadabuka kulelo bakhuluma ezinye izindimi. Abanye bakhona ngamaMaya. Igatsha laseMexico lathi abahumutsha isiMaya bahlale lapho okukhulunywa khona ulimi lolu ukuze balukhulume nsuku zonke njalo bahlale beluzwa. Kanti njalo elizweni laseNepal kuhlala abantu abedlula 29 000 000. Elizweni leli kukhulunywa izindimi ezingaba yi-120 kodwa abantu abedlula 10 000 000 bakhuluma ulimi lwesiNepali, kuphinde kube labanye abanengi abaluzwisisayo lanxa lungayisilo lomdabu wabo. Kanti njalo amabhuku ethu asekelwe eBhayibhilini asehunyutshwa ngolimi lolu.

¹⁰ Umsebenzi wokuhumutsha olokhu uqhubekela phambili utshengisa ukuthi inhlanganiso kaJehova iyawuqakathekisa kakhulu umlayo wokutshumayela izindaba ezinhle zoMbuso emhlabeni wonke. Izigidi lezigidi zamaphetshana, amabhukwana kanye lamamagazini zinikwa abantu mahala emhlabeni wonke. Imali esetshenziswayo ukuze umsebenzi lo uqhubekele phambili ivela eminikelweni yaboFakazi bakaJehova abalandela umlayo esawuphiwa nguJesu othi: “Lamukeliswe kungelambadalo, lani phanini kungelambadalo.”​—Mat. 10:8.

11, 12. Kuyini abantu abangakuthandabuziyo nxa bebona oFakazi bakaJehova besenza umsebenzi wokutshumayela?

¹¹ OFakazi bakaJehova kabathandabuzi ukuthi balithola iqiniso. Yikho bezinikele ukutshumayeza abantu kanye lokubafundisa iqiniso leli njalo benza konke abangakwenza ukuze balitshele abantu bezinye izizwe kanye lemihlobo etshiyeneyo. Abanengi bakhetha  ukuphila bengelazinto ezinenginengi, ukufunda olunye ulimi kanye lokuphila ngendlela abangayijayelanga ukuze benze umsebenzi lo wobuKhristu oqakatheke kangaka. Umsebenzi lo wokutshumayela lokufundisa owenziwa emhlabeni wonke ngokunye kwalokho okwenza abantu abanengi bangathandabuzi ukuthi oFakazi bakaJehova yibo sibili abalandeli bakaJesu.

¹² OFakazi benza konke lokhu ngoba kabathandabuzi ukuthi balithola iqiniso. Kodwa kuyini okunye osekwenze izigidi zabantu zangathandabuzi ukuthi oFakazi bakaJehova baseqinisweni?​—Bala uRoma 14:17, 18.

13. Kuyini okwenziwa ngoFakazi ukuze inhlanganiso ihlale ihlanzekile?

¹³ Okwakhulunywa ngamanye amaKhristu azinikeleyo njalo angathandabuziyo ukuthi alithola iqiniso kungasinceda. Enye inceku kaJehova esileminyaka eminengi iseqinisweni yathi, “Kwenziwa imizamo yonke ukuthi inhlanganiso kaJehova ingangcoliswa lokuthi ihlale ilabantu abaziphatha kuhle kungelani lokuthi ngubani okumele aphiwe iseluleko kumbe akhuzwe.” Kuyini okwenziwayo ukuze ibandla lihlale lihlanzekile? Kulandelwa izimiso eziseLizwini likaNkulunkulu kanye lesibonelo esasitshiyelwa nguJesu labalandeli bakhe. Yikho-ke, abanye oFakazi bakaJehova bayasuswa ebandleni lobuKhristu nxa besala ukulandela izimiso zikaNkulunkulu. Kodwa abanengi baziphethe kuhle njalo balandela izimiso zikaNkulunkulu. Abanye babo ngabantshintsha izimpilo zabo ukuze baphile ngendlela emukelwa nguNkulunkulu.​—Bala u-1 Khorinte 6:9-11.

14. Kuyini osekwenziwe ngabanengi ababesusiwe, njalo lokhu kuncede ngani?

¹⁴ EMibhalweni kulomlayo othi singazihlanganisi lasebasuswayo. Pho singathini ngabo? Izinkulungwane zabantu laba ziyaphenduka zitshiye ukuziphatha okungahambelani lobuKhristu besezisemukelwa futhi ebandleni. (Bala u-2 Khorinte 2:6-8.) Ukubambelela kulokho okutshiwo liBhayibhili sekwenze ukuthi ibandla lobuKhristu lihlale lihlanzekile njalo lilabantu abangathandabuziyo ukuthi baseqinisweni. Emansontweni amanengi kwenziwa umathanda. Kodwa oFakazi bakaJehova babambelela ezimisweni zikaNkulunkulu njalo lokhu sekwenze abantu abanengi babona ukuthi benza izinto ezihambelana leqiniso.

15. Kungani omunye umfowethu engathandabuzi ukuthi useqinisweni?

¹⁵ Kuyini okwenza ukuthi abanye asebeleminyaka eminengi bengoFakazi bakholwe ukuthi balithola iqiniso? Omunye umfowethu oleminyaka engu-54 wathi: “Kusukela ngisakhula bengingathandabuzi ukuthi ukholo lwami lume ezisekelweni lezi ezintathu: (1) ukuthi uNkulunkulu ukhona; (2) ukuthi waphefumulela iBhayibhili; (3) lokuthi lamuhla usebenzisa ibandla lobuKhristu elibunjwa ngoFakazi bakaJehova njalo uyalibusisa. Iminyaka yonke le ngitaditsha, bengilokhu ngizama ukuhlola izisekelo lezo njalo ngikhangela lokuthi zime emhlabathini oqinileyo yini. Ubufakazi engibuthola ezisekelweni lezi ezintathu buqhubeka busengezeleleka  umnyaka lomnyaka njalo buqinisa ukholo lwami, buphinde benze ukuthi ngingathandabuzi lakancane ukuthi silalo sibili iqiniso.”

16. Omunye udadewethu wathini ngokuba seqinisweni?

¹⁶ Omunye udadewethu otshadileyo osebenza emawofisini ethu amakhulu eNew York wakhuluma ngenhlanganiso kaJehova wathi: “Yiyo kuphela ememezela ibizo likaJehova loba sekutheni. Lokhu kulengqondo sibili ikakhulu nxa sicabanga ngokuthi ibizo likaNkulunkulu litholakala okwezikhathi ezingaba ngu-7 000 eBhayibhilini! Ngiyawathanda amazwi akhuthazayo aku-2 ImiLando 16:9 athi: ‘Amehlo kaJehova athungatha umhlaba wonke ukuze aqinise labo abanhliziyo zabo zizimisele kuye.’ ” Waqhubeka wathi: “Iqiniso selingitshengise ukuthi ngingenzani nxa ngifuna ukuthanda uJehova ngenhliziyo yonke ukuze aqhubeke engiqinisa. Ngiyabuqakathekisa kakhulu ubuhlobo bami loJehova. Kanti njalo ngiyambonga kakhulu uJesu ngakwenzayo ukuze ngenelise ukuthola ulwazi olunengi ngoNkulunkulu oluyilo olungenza ngibe lapha engikhona.”

17. Kuyini okungathandabuzwa ngomunye umfowethu owaqala engakholwa kuNkulunkulu, njalo ngani?

¹⁷ Omunye umfowethu owaqala engakholwa ukuthi uNkulunkulu ukhona wathi: “Indalo yenza ngingathandabuzi ukuthi uNkulunkulu ufuna abantu bakholise impilo futhi yikho engasoze abayekele behlupheka kuze kube phakade. Okunye yikuthi abantu bakaJehova baqhubekela phambili beqinisa ukholo lwabo, betshiseka njalo besiba lothando lanxa umhlaba lo ulokhu ucwila ezintweni ezingafunwa nguNkulunkulu. Umoya kaJehova yiwo kuphela ongenza into le emangalisa kangaka.”​—Bala u-1 Phetro 4:1-4.

18. Uthini ngamazwi akhulunywa ngabanye abafowethu ababili?

¹⁸ Omunye uFakazi oseleminyaka eminengi ekhonza wakhuluma ngalokho okwenza alikholwe iqiniso, wathi: “Eminyakeni yonke le, engikuthole ngitaditsha kungenze ngangathandabuzi sibili ukuthi oFakazi bebesebenza gadalala ukuze balandele lokho okwakusenziwa ngamaKhristu ekhulu lokuqala. Ngizibonele ngawami ukumanyana kwaboFakazi bakaJehova emhlabeni wonke ngesikhathi ngivakatshela izindawo ezitshiyeneyo. Iqiniso eliseBhayibhilini selingenze ngasuthiseka njalo ngathokoza.” Omunye umfowethu oleminyaka edlula 60 wakhuluma ngoJesu Khristu lapho ebuzwa ukuthi kungani engathandabuzi ukuthi walithola iqiniso. Wathi: “Besilokhu siyihlolisisa impilo kaJesu kanye lenkonzo yakhe njalo sesibona ubuhle besibonelo asitshiyela sona. Sesintshintshe izimpilo zethu ukuze kube lula ukuthi sisondele kuNkulunkulu ngoJesu Khristu. Sesikwazi ukuthi okungasenza sithole insindiso ngumhlatshelo wenhlawulo kaKhristu. Kanti njalo siyakwazi lokuthi wavuswa kwabafileyo. Kulabofakazi abazibonela ngawabo lokhu kusenzakala.”​—Bala u-1 Khorinte 15:3-8.

19, 20. (a) UPhawuli wagcizelela wuphi umsebenzi oqakathekileyo ebandleni leRoma? (b) AmaKhristu azinikeleyo alasiphi isibusiso?

¹⁹ Nxa singamaKhristu athanda omakhelwana, asingeke sigoqe izandla, sizigcinele iqiniso esesilitholile. UPhawuli watshela abazalwane ababesebandleni leRoma wathi: “Uma uvuma ngomlomo wakho usithi, ‘UJesu uyiNkosi,’ njalo ukholwa enhliziyweni yakho ukuthi uNkulunkulu wamvusa kwabafileyo, uzasindiswa. Ngoba ukholwa ngenhliziyo yakho njalo ulungiswa ngayo, njalo kungomlomo wakho ovuma ngawo usindiswe.”​—Rom. 10:9, 10.

²⁰ Thina oFakazi bakaJehova abazinikeleyo asithandabuzi ukuthi siseqinisweni njalo asisithathi lula isibusiso esilaso sokufundisa abanye izindaba ezinhle zoMbuso kaNkulunkulu. Yikho-ke nxa sisenza umsebenzi wethu wokutshumayela, kumele kukhanye ebantwini ukuthi liyasithokozisa kakhulu iqiniso eliseBhayibhilini esilifundisayo kanye lokuthi asithandabuzi ngitsho lakancane ukuthi siseqinisweni.