1 Vakorinte 14:1-40
14 Psakanyi rudo, endereranyi mberi mecivangisira kuti muwane zvipo zvo mujimu, asi cikuru-kuru, icipo co kuporofeta.
2 Ngokuti mundhu anovereketa ngo ndumi, aavereketi ecivhunja vandhu, asi anonga ecivhunja Mwari, ngokuti apana mundhu anomuzwa pikija ecivereketa cakafisika ca Mwari ngo mujimu.
3 Ngo kudaro, wiya anoporofeta, anovaka, anovangisa, anonyaraja vandhu ngo masoko ake.
4 Wiya anovereketa ngo ndumi anojivaka pacake, asi wiya anoporofeta anovangisa ungano.
5 Inini ndaida kuti mwese mubhuye ngo ndumi, asi ndinodakarira kuti muporofete. Zvokadi, wiya anoporofeta, mukuru kupinda wiya anovereketa ngo ndumi, asi anodikana kusanduja kuti ungano ivangiswe.
6 Hama, kudari ndikaviya kuzomuvona ndecibhuya ngo ndumi, kunja ko kubhuya na imwimwi ngo zvandakavoneswa no zvandinoziva ngo uporofeti kana ngo jijiso, ndinonga ndamubeserenyi?
7 Ndizvona zvondhozvo zvinoitika no zviro zvicina upenyu zvinorira, zvingava mutoriro kana cimadangari. Kudari pakatama kuva no musiyano pa maririro azvo, mundhu angazvizivisa kudini kuti uri kurirari wari mutoriro kana cimadangari?
8 Kudari mbhayapaya ikatama kunasa kurira, ndiyani anozonasirira kuti aende kohwa?
9 Mukufananavo, mukabhuya zvinonesa kuzwisisa, mundhu angazivisa kudini zvomunonangaro? Zvokadi, imwimwi munonga mecibhuya no mbhepo.
10 Kungava no ndumi jakawanda mu nyika, asi jese jino zvajinoreva.
11 Ndikatama kuzwisisa zvinoverekethwa, ndinova mu nyikanja ka wiya anoivereketa, asi wiya anoivereketaro, anova mu nyikanja kwandiri.
12 Ngo kudaro, zvecivoneka kuti imwimwi munoda kuwana zvipo zvo mujimu, psakanyi kuva no zvipo zvakawanda zvinovaka ungano.
13 Mundhu anovereketa ngo ndumi imweni, ngaaite mukumbiro kuti akwanise kusanduja.
14 Kudari ndeciita mukumbiro ngo ndumi imweni, cipo candakapuwa co mujimu ndicona cinondiitira mukumbiro, asi murangariro wangu unonga ucikaiti ciri cese.
15 Waro ngozvapi zvandinodikana kuita? Ndinozoita mukumbiro no cipo cangu co mujimu, ndozoitazve mukumbiro pamwepo no murangariro wangu. Ndinozoimba ndumbo yo kusimba no cipo cangu co mujimu, asi ndinozoimbazve ndumbo yo kusimba no murangariro.
16 Ngo divi rimweni, kudari iwewe ukasimba ngo cipo co mujimu, mundhu acizivi kujijiswa ari pakati penyu, anganangisa kudini kuti “Ameni” ngo mukumbiro waithwa wokubonga kuveni iyena aazivi kuzwa zvawainga wecinanga?
17 Zvokadi, iwewe wanasa kuita mukumbiro, asi mundhu umweni aazivi kuvangiswa.
18 Ndinobonga Mwari ngokuti ndinovereketa ndumi jakawanda kupinda imwimwi mwese.
19 Ngo kudaro, mu ungano ndingada kuvereketa magama mashanu no murangariro kuti ndijijise vamweni, kuciripi kuvereketa gumi ro zviuru* zvo masoko o ndumi jakawanda.
20 Hama jangu, mucaita vana vadoko mukuzwisisa kwenyu, asi ivanyi vana vadoko mu zvakashata. Kuranyi mu kukwanisa kwenyu kuzwisisa.
21 Mu Mutemo makatahwa kuti: “Jehovha* anonanga kuti, ‘ndinozobhuya ngo ndumi jo nyikanja ndozoshandisa muromo jo vandhu vacikaziviki kuti ndibhuye no vandhu ava, asi pikija zvakadaro, ivona vanozoramba kundipurukira.’”
22 Ndumi asipi citatijo ku vandhu vanotenda, asi citatijo ku vandhu vacikatendi. Ciporofeti asipi citatijo ku vandhu vacikatendi, asi citatijo ku vandhu vanotenda.
23 Kudari ungano yese ikaungana, yovereketa ngo ndumi jakasiyana-siyana, vandhu vacizivi kujijiswa kana vandhu vacikaripi vatendi vonghwinavo pakati penyu, avanangi kuti vandhu ava vari kupenga here?
24 Asi kudari mwese meciporofeta wonghwina mundhu acizivi kujijiswa kana acikatendi, iyena anozopangihwa no kunasa kupopohwa ngo vese.
25 Zviri mu mwoyo mwake zvinozobuda pambhene, zvokuti anozogwadama pasi ecinamata Mwari eciti: “Mwari zvokadi, ari pakati penyu.”
26 Hama jangu, zvinofanera kuithwa ngo zvapi? Pamunonga makaungana pondhopo, umwe ano nduyo, umweni ano jijiso, umweni zvivoniso, umweni anovereketa ngo ndumi, umweni anosanduja. Itanyi zviro zvese kuti muvangisane.
27 Kudari pano vandhu vanobhuya ndumi jimweni, vandhuvo avavhiri kupindirija vaviri kana vatatu, ivona vanodikana kucinjana, mundhu umweni ecisanduja.
28 Kudari pakatama kuwanika musanduji, iyena anodikana kunyarara mu ungano, ecivereketa ngo mu mwoyo mwake na Mwari.
29 Vaporofeti vaviri kana vatatu ngavaverekete, vamweni ngavazwisise revo yazvo.
30 Kudari umweni akaashira zvivoniso paanonga akagara pondhopo, wokutanga ngaanyarare.
31 Ngokuti mukaporofeta mwese meciita ngo kucinjana, vese vomuungano vanojija no kuvangiswa.
32 Cipo co mujimu co kuporofeta, cinodikana kungwaririhwa ngo vaporofeti.
33 Ngokuti Mwari, asipi Mwari wo mapope, asi ndi Mwari wo runyararo.
Inga zvinoithwa mu ungano jese jo vandhu va Mwari.
34 Vanakaji vanodikana kunyarara mu ungano ngokuti avatendehwi kuvereketa. Kusiyapo izvo, vanodikana kuzwira, mukuzwirana no zvinonangwa ngo Mutemo.
35 Kudari vakada kujija ciri cese, ngavavhunjise majimwamuna avo kanyi, ngokuti zvinopseruja* mwanakaji kuvereketa mu ungano.
36 Soko ra Mwari rakatanga na imwimwi here? Imwimwi ndimwi basi makagumihwa ndirona kani?
37 Kudari mundhu ecirangarira kuti muporofeti ano cipo co mujimu, iyena anodikana kuziva kuti zviro zvandiri kumutarirari ndiyona mupango ya Mambo.
38 Asi wiya anorerusa zviro izvi, anozoreruswavo.
39 Ngo kudaro, hama jangu, endereranyi mberi meciporofeta, asi mucarambisa kuvereketa ngo ndumi.
40 Asi zviro zvese ngazviithwe ngo njira inofanera* no yakarongeka.
Masoko o Pasi
^ 10.000.
^ Vonanyi Kudurujihwa ko Magama.
^ Kana: “zvinonyoweja.”
^ Kana: “inotendehwa.”
