1 Vakorinte 8:1-13
8 Wari, ngo pamusoro po zvokuha zvakapihwa ku zvithombi ndinoti: Itusu tinoziva kuti tese tino zivo. Ruzivo hunoita kuti mundhu ajitundhumaje, asi rudo hunovaka.
2 Kudari ariwese ecirangarira kuti anoziva ciri cese, mundhu wakadaro aato aziva inga zvaanodikana kuciziva.
3 Asi mundhu anoda Mwari, anozivika ndiyena.
4 Ngo pamusoro po zvokuha zvakapihwa ku zvithombi, tinoziva kuti cithombi acishandi ciro mu nyika. Asi kuna Mwari umwe basi.
5 Ngokuti pikija variyo vanodanijwa kuti mwari, kungava kudenga kana pasi pano, ngokuti kuno vazinji vanodanijwa “mwari” no vazinji vanodanijwa “mambo.”
6 Itusu tina Mwari umwe basi, Baba wo zviro zvese, ndiyena wakatisika. Kuna Mambo umwe, Jesu Kristu. Zviro zvese zvakavepo ngo ndava yake, itusu takasikwa pecishandiswa iyena.
7 Ngo kudaro, asipi vese vano zivo iyi. Asi vamweni vaimbonamata cithombi, vakambhera ngo kuha zvokuha zvakapihwa ku cithombi, hana javo jinosvipiswa ngokuti jakaremba.
8 Zvokuha andizvopi zvinotiita kuti tigare phedo na Mwari. Atingavoniwi kuti tinoshaisha maningi kudari tikatama kuha, pikija tikaha, atiganyi ciri cese.
9 Asi ngwariranyi kuti kutendehwa kwenyu kusana ciri cese, kutame kuita cikhugu kuna vaya vakarembejeka.
10 Kudari ari wese akakuvona kuti uno zivo, weciha muthemberi muno cithombi ciri cese, hana ya wiya wakarembejeka aikweviwi kuti ihevo zvokuha zvakapihwa ku zvithombi here?
11 Ngo kudaro, uzivi hwako huri kuparaja mundhu wakarembejeka. Mundhuwo ndiyena hama yako yakafihwa ndi Kristu.
12 Mukashaishira kudeya hama jenyu, mecikhugunya hana javo jakaremba, muri kushaishira Kristu.
13 Kudari zvokuha zveciita kuti hama yangu ikhugunyike, inini andicaizohepi nyama, kuti nditame kukhugunya hama yangu.
