2 Pedhru 2:1-22
2 Ngo kudaro, kare vaingeyo vaporofeti vokunyepa pakati po vandhu no pakati penyuvo, vanozowanikavo vajijisi vokunyepa. Ivona vanozoviisa ngo cifise-fise jijiso jinoparaja, veciramba kamare wiya wakavatenga, vecijiviisira kuparajwa ngo kukasika.
2 Kusiyapo izvo, vazinji vanozotevera mufambiro wavo unopseruja,* vandhu vanozoshora gwanja ro cokwadi ngo ndava yavo.
3 Cimwenizve, vecindundihwa ngo makaro, vanozomucengeja ngo masoko okunyepa. Asi kutongwa kwavo kwakanangwaya kare, akumbononoki no kuparajwa kwavo kunoviyadi kamare.
4 Zvokadi, Mwari aazivi kuregera kupanica ngirozi jakashaishaya. Iyena wakajikhandira mukadheya inozwi Tartaro,* wojisunga ngo magaragajero* mu cidima cikuru kuti jiimire kutongwa.
5 Iyena aazivizve kuregera kupanica nyika yo kare, asi wakaponesa Nowa, mucumaeri wo ururami no vamweni vanomwe vaainga navo, paakaviisa ndambi huru panyika yo vandhu vakashata.
6 Perapo, iyena wakagaja muezaniso wo zviro zvinozoithwa vandhu vakashata kumbejiyo, ngo kupisa madhorobha o Sodhoma no Gomora oita marota.
7 Asi wakaponesa Roti, mundhu wakarurama, waihwajihwa ngo mufambiro unopseruja wo vashaishi
8 (ngokuti paaigara pakati pavo, njiku ngo njiku, mwanarume wakarurama uwu, waihwajihwa, ngo kuvona no kuzwa zviro zvinohwisana no mutemo.)
9 Jehovha* anoziva kuvhisa vatendi vake mu zviejo, asi iyena anoita* kuti vakashata vazoparajwe* pa njiku yo kutongwa,
10 maningi-ningi vaya vanoita zvo uhure no vamweni kuti vavasvipise no kushora utongi.
Vecicunga no kuita hasha, ivona avathyi kubhuya zvakashata ngo pamusoro po vandhu vano nduma,*
11 pikija ngirozi jino simba rakakura no kuvanga, ajibhuyi masoko anotuka ngo pamusoro po vajijisi vo kunyepa, ngokuti jinoreremeja Jehovha.*
12 Asi vandhu ava, vakaita inga zvinyama zvinoita ciro zvicikarangariri, zvakabahwa kuti zvibathwe no kuparajwa. Ivona vanobhuya zvinotuka ngo pamusoro po zviro zvavacikazivi. Vanozojiviisira kuparajwa ngo pamusoro po maitiro avo akashata,
13 vecitambujika ngo pamusoro po zvishaishi zvavo.
Ivona vanovona kuti zvinodakajisa kuita zvinoda muviri no masikati. Ivona vakaezana no mavara ari pa nguvo no kumeso kwakaremara, vecidakara ngo jijiso javo jinocengeja pavanonga vecibusa na imwimwi.
14 Majiso avo akazara ngo upombo, nokutizve avakwanisi kuregera kuita cishaishi, vecicengeja vakaremba. Mwoyo yavo yakarovejwa mu kudisisa zviro zvakawanda. Ivona i vana vakatukwa.
15 Vakasiya gwanja rakarungama, vopauswa. Vakatevera gwanja ra Bharamu mwana wa Bheori, waidaya mupfupo wo kuita zvakashata,
16 asi wakapangihwa ngo kuposa kwake mutemo. Cinyama cinothwara mujiyo, cicikavereketi, cakavereketa ngo izwi ro mundhu conyisa upenji hwo muporofeti uwo.
17 Vandhu ava i mwimbo* jicina kumwa, mbhute inomburuswa ngo dutu,* ivona vakavigihwa cidima cikuru.
18 Ivona vanobhuya masoko o kujikuja abiresi. Veciita zviito zvo mufambiro unopseruja no kuita kuti vandhu vavezve no zvido zvakashata no kuvacengeja kuti vaite zviro zvavavha kuregera.
19 Ivona vanogondesa rusujunuko, kasike ivona kamare, varanda vo uvori; ngokuti wiya anonyiswa ngo mundhu ari wese, anova muranda wo mundhu wamunyisaro.*
20 Zvokadi kamare, sure ko kutiza zviro zvinosvipisa zvo nyika ino ngo ndava yo kuziva Mambo no Muponesi wedu Jesu Kristu, vanotendazve kucengejwa ngo zviro zvondhozvo. Ngo kudaro magariro avo o kupejisira anozoita akashata kupinda o kutanga.
21 Zvaizova zviri nane kwavari kutama kuziva gwanja ro urungami, kupinda kuriziva perepo kakusiya mutemo wakacena wavakapuwa.
22 Zvakaitika kwavari zvinozwirana no mazwi akangwara anoti: “Imbhwa inohwirirazve koha maruco ayo. Sure ko kusambijwa, nguruve inohwirira koburukuta mu matope.”
Masoko o Pasi
^ Kana: “vanozotevera zviito zvavo zvinopseruja.”
^ Vonanyi Kudurujihwa ko Magama .
^ Kangaije: “wojidira mu gomba.”
^ Vonanyi Kudurujihwa ko Magama.
^ Gama ngo Gama: “iyena anovigira.”
^ Gama ngo Gama: “vazourawe.”
^ Kana kuti: vandhu vano mutoro mukuru mu ungano.
^ Vonanyi Kudurujihwa ko Magama.
^ Kana: “sime, dima.”
^ Kana: “mbhepo; zibepo.”
^ Kana: “ngo ciro ciri cese, anova muranda wo ciro camunyisaro.”
