Esdhra 10:1-44
10 Esdhra paainga eciita mukumbiro, ecidekeca no kucema akasikimara pamberi po nyumba ya Mwari wo cokwadi, Vaiziraeri vakawanda vaibatanija vanarume, vanakaji no vana vadoko vakaungana pamberi pake vecicema maningi.
2 Ecivona izvi, Shekaniya mwana wa Jehiyeri umwe wo vana va Erami wakati kuna Esdhra: “Itusu atizivi kugondeka kuna Mwari wedu, ngo kucadha no vanakaji vo nyikanja vo nyika jakatitendeneja. Pikija zvakadaro, Iziraeri icino vetero.
3 Wari ngatiite citenderano na Mwari wedu kuti tipindise vanakaji vese no vana vavo, mukuzwirana no ndhungamiriro ja Jehovha no jo vaya vanoreremeja* mupango ja Mwari wedu. Ngatiite mukuzwirana no mutemo.
4 Mukai, ngokuti ndiwe unodikana kuita izvi, itusu tinozokubesera. Cungai uite zviri zvese.”
5 Ngo kudaro, Esdhra wakamuka woita kuti vatungamiriri vo vapiri, Varevhi no Vaiziraeri vese vapike kuti vaizoita mukuzwirana no zvaperaro kunangwa. Ivona vakaita mbhiko.
6 Esdhra wakamuka pamberi po themberi ya Mwari wo cokwadi, woenda ku nyumba yo kuhira ya Jehohanani mwana wa Eriyashibhi. Pikija hake wakaenda kondhoyo, iyena aazivi kuha nee kumwa-kumwa ngo kucema ngo ndava yo kutama kugondeka ko vandhu vainga vavha ku uranda.
7 Ngo kudaro, vakazivisa mu Judha no mu Jerusarema kuti vese vaya vainga vakavha ku uranda vaidikana kuungana ku Jerusarema.
8 Perapo, mukuzwirana no zvainga zvasungwa ngo vatungamiriri no vakuru, mundhu wiya waizotama kuguma mukati mo njiku ndhatu, waizotorehwa zviro zvake zvese no kujingwa pakati po ungano yo vandhu vainga vakavha ku uranda.
9 Ngo kudaro, mukati mo njiku ndhatu, zvinoreva njiku yo makumaviri yo mweji wo cipfumbamwe, vanarume vese vo ku Judha no vo ku Bhenjamini vakaungana ku Jerusarema. Vandhu vese vakagara pa ruvanje wo themberi ya Mwari wo cokwadi, vecitetemera ngo ndava yo shwiro iyi, ngo ndavazve yo nvura yainga yecina maningi.
10 Ngo kudaro, mupiri Esdhra wakamuka wonanga kudari: “Imwimwi makaita zviro mu njira icizivi kugondeka pamakarovora vanakaji vo nyikanja. Ngo kuita izvi, makaengejera ndava yo Iziraeri.
11 Wari dekecanyi kuposa kwenyu kuna Jehovha Mwari wo majibaba enyu muite kuda kwake. Parajananyi no vandhu vo nyika jakamutendeneja kubatanijavo no vanakaji vo nyikanja.”
12 Ungano yese yakadavira ngo izwi guru kudari: “Tinodikana kuita kamare zvamuri kunangaro.
13 Asi pano, pano vandhu vakawanda maningi, wari tiri pa mukuvo wo nvura. Azvikwanisiki kugara kunja. Cimwenizve, shwiro iyi aizoperi kutongwa mukati mo njiku imwe kana mbiri, ngokuti takapanduka maningi pa shwiro iyi.
14 Waro, tapota, itanyi kuti vatungamiriri vese vaimirire ungano yese. Itanyizve kuti vese vari mu madhorobha edu vakacadha no vanakaji vo nyikanja vaviye pa njiku yakagajwa, pamwepo no vakuru no vatongi vo dhorobha rimwe nga rimwe. Mbhera kuthuruke kunyangajwa kwa Mwari wedu kwakabahwa ngo ndava yo shwiro iyi.”
15 Ngo kudaro, Jonatani mwana wa Asaheri na Jazeya mwana wa Tikivha vakaphikiza zvakasungwaro. Varevhi vaviri ava, Meshuramu na Shabhetai vakavabesera.
16 Asi vaya vainga vakavha ku uranda vakaita zvakasungwaro. Mupiri Esdhra no musoro jo mbhuri jo kudivi ro kumajibaba pamwepo no vese vaya vakagajwa mukuzwirana no mazina avo, vakaungana pa mutivi pa njiku yo kutanga yo mweji wo cigumi kuti vapsakisise ngo pamusoro po shwiroyo.
17 Pa njiku yokutanga yo mweji wokutanga vakapeja kutonga shwiro jo vanarume vainga vakacadha no vanakaji vo nyikanja.
18 Kwakapfumbuhwa kuti vana vamweni vo vapiri, vainga vakacadha no vanakaji vo nyikanja. Ivona vainga vana va Jeshuwa mwana wa Jehozadhaki no hama jake. Ijona jainga iji: Maaseya, Eriyezeri, Jaribhi na Gedhariya.
19 Asi ivona vakathembesa kuti vaizopindisa vakaji vavo no kuita mupiro yo mavhuta o mushambi ngo ndava yo kuposa kwavo.
20 Pa vana va Imeri painga na Hanani na Zebhadhiya;
21 pa vana va Harimu painga na Maaseya, Eriya, Shemaya, Jehiyeri na Uziya;
22 Pa vana va Pashuri painga na Eriyoenai, Maaseya, Ishimaeri, Netaneri, Jozabhadhi na Ereyasa.
23 Pakati po Varevhi painga na Jozabhadhi, Shimei, Keraya (zvinoreva, Kerita), Petahiya, Judha na Eriyezeri,
24 pakati po vaimbi painga na Eriyashibhi, pakati po vangwariri vo musuvo painga na Sharumi, Teremi na Uri.
25 Pakati po Vaiziraeri pa vana va Paroshi painga pana Ramiya, Iziya, Marikija, Mijamini, Eriyazari, Marikija na Bhenaya;
26 pa vana va Erami painga pana Mataniya, Zakariya, Jehiyeri, Abhidhi, Jeremoti na Eriya;
27 pa vana va Zatu painga pana Eriyoenai, Eriyashibhi, Mataniya, Jeremoti, Zabhadhi na Aziza;
28 pa vana va Bhebhai painga pana Jehohanani, Hananiya, Zabhai na Atarai;
29 pa vana va Bhani painga pana Meshuramu, Maruki, Adhaya, Jashubhi, Sheari na Jeremoti;
30 pa vana va Pahati-mowabhi painga pana Adhinaa, Kerari, Bhenaya, Maaseya, Mataniya, Bhezareri, Bhinuyi na Manase;
31 pa vana va Harimu painga pana Eriyezeri, Ishija, Marikija, Shemaya, Shimiyoni,
32 Bhenjamini, Maruki na Shemariya;
33 pa vana va Ashumi painga pana Matenai, Matataa, Zabhadhi, Erifereti, Jeremai, Manase na Shimei;
34 pa vana va Bhani painga pana Maadhai, Amirami, Uweri,
35 Bhenaya, Bhedheya, Keruhi,
36 Vhaniya, Meremothi, Eriyashibhi,
37 Mataniya, Matenai na Jaasu;
38 pa vana va Bhinuyi painga na Shimei,
39 Sheremiya, Natani, Adhaya,
40 Makinadhebhai, Shashai, Sharai,
41 Azareri, Sheremiya, Shemariya,
42 Sharumi, Amariya na Josefa;
43 pa vana va Nebho painga na Jeiyeri, Matitiya, Zabhadhi, Zebhina, Jadhai, Joweri na Bhenaya.
44 Vese ava vainga vakarovora vanakaji vo nyikanja. Ivona vakavapindisa pamwepo no vana vavo.
Masoko o Pasi
^ Kana: “vanothya.”
