Esdhra 3:1-13
3 Pawakaguma mweji wocinomwe, Vaiziraeri pavainga vaamumadhorobha avo, vakabatana voungana vese mu Jerusarema.
2 Jeshuwa mwana wa Jehozadhaki no vadoni vake vainga vapiri, kubatanijavo na Zorobhabheri mwana wa Saratiyeri no hama jake, vakatanga kuvaka artari ya Mwari wo Vaiziraeri, kuti vaitirepo mupiro jo kupiswa mukuzwirana no zvakatahwa mu mutemo wa Mosi, mundhu wa Mwari wo cokwadi.
3 Pikija ivona vecithya vandhu vo nyika jainga jakavatendeneja, ivona vakavaka artari pa ndau yayo yokare, votanga kuitira Jehovha mupiro yokupiswa. Vaiita mupiro yokupiswa comangwanani no comadeko.
4 Perapo, ivona vakaita mutambo yo mucaca mukuzwirana no zvainga zvakatahwa. Njiku jese ivona vaiita mupiro yo kupiswa mukuzwirana no mutengo waiithwa njiku no njiku.
5 Tevere, vakaita mupiro yo kupiswa yaigara yeciizwa njiku jese, voita mupiro yo kugara ko mweji mupsa, voitazve mupiro jese jo mutambo jakacena ja Jehovha kubatanijavo no mupiro jakaviiswa ngo vese vaiita mupiro kuna Jehovha ngo kuda kwavo.
6 Kuvhira pa njiku yokutanga yo mweji wo cinomwe, vakatanga kuita mupiro yo kupiswa kuna Jehovha, pikija maambo o themberi ya Jehovha ainga acito adihwa.
7 Ivona vakapa mare vandhu vaiphwanya mapuwe no vavezi. Vovapa zvokuha, vhinyu no mafuta ku vandhu vo Sidhoni no vo Tiro, ngokuti ivona vainga vakaviisa matabwa o sedhro ngo mujombe kuvha ku Rebhanoni mbhera ku Jope mukuzwirana no zvavainga vakatendehwa ndi Siro mambo wo Persiya.
8 Mu gore rocipiri pasure po kuguma kwavo ku Jerusarema ku themberi ya Mwari wo cokwadi, mu mweji wo cipiri, Zorobhabheri mwana wa Saratiyeri, Jeshuwa mwana wa Jehozadhaki, hama javo jimweni, vapiri no Varevhi kubatanijavo no vese vainga vakavha ku uranda voenda Jerusarema, vakatanga kuita basa. Ivona vakagaja Varevhi vainga no makumaviri o makore kana kupindirija kuti vave vavonereri vo basa ro kuvaka themberi ya Jehovha.
9 Ngo kudaro, Jeshuwa, vana vake no hama jake, Kadhimiyeri no vana vake avo vainga vana va Judha,* vakabatana kuti vavonerere basa mu themberi ya Mwari wo cokwadi. Kubatanijavo no vana va Enadhadhi, vana vavovo no hama javo, ijo jaingavo Varevhi.
10 Vavaki pavakadira maambo o themberi ya Jehovha no vakasimira nguvo javo jo basa no mbhayapaya, pamwepo no Varevhi vana va Azafi pavainga vakabata simbaro,* vakaima vokuja Jehovha mukuzwirana no ndhungamiriro jakanangwa ndi Dhavhidhi mambo wo Iziraeri.
11 Vakatanga kusimba vecibonga Jehovha vecinanga kudari: “Ngokuti iyena wakanaka; rudo hwake hucikacinji ku Vaiziraeri ahuna magumo. Pondhopo vandhu vese vakakhuwa vecisimba Jehovha ngokuti maambo o themberi ya Jehovha ainga apera kudihwa.
12 Vazinji pakati po vapiri, Varevhi, musoro jo mbhuri jo nyumba jo ku divi ro ku majibaba no madhodha ainga akavona themberi yokare, vakacema pavakavona maambo o themberi ecidihwa, kuveni vandhu vamweni vazinji vaikhuwisisa vecidakara.
13 Ngo kudaro, apana waikwanisa kusiyanisa kukhuwa ko kudakara no kukhuwa ko kucema, ngokuti vandhu vaikhuwa maningi kamare zvokuti kukhuwa kwavo kwaizika ndhambo.
Masoko o Pasi
^ Uwu ndienazve anodaninjwa kuti “Hodhavhiya” pana Esdhra 2:40, pana Neemiya 7:43 anodanijwa kuti “Hodhevha.”
^ Zvinorijwa ngo simbi zveciita ngo kutakaniswana.
