Esdhra 7:1-28
7 Pasure pa izvi, mukutonga ka Mambo Aritasheshi mambo wo Persiya, Esdhra* wakahwirira. Iyena wainga mwana wa Seraya. Seraya wainga mwana wa Azariya. Azariya wainga mwana wa Hirikiya.
2 Hirikiya wainga mwana wa Sharumi. Sharumi wainga mwana wa Zadhoki. Zadhoki wainga mwana wa Ahitubhi.
3 Ahitubhi wainga mwana wa Amariya. Amariya wainga mwana wa Azariya. Azariya wainga mwana wa Merayoti.
4 Merayoti wainga mwana wa Zerahiya. Zerahiya wainga mwana wa Uzi. Uzi wainga mwana wa Bhuki.
5 Bhuki wainga mwana wa Abhishuwa. Abhishuwa wainga mwana wa Fineya. Fineya wainga mwana wa Eriyazari. Eriyazari wainga mwana wa Aroni. Aroni wainga mupiri mukuru.
6 Esdhra uwu wakavha ku Bhabhironi. Iyena wainga mutari wainasa kuziva Mutemo wa Mosi* waakapuwa ndi Jehovha, Mwari wo Iziraeri. Mambo wakamupa zvese zvaakakumbira ngokuti nyara ya Jehovha Mwari wake, yainga na iyena.
7 Vaiziraeri vamweni, vapiri, Varevhi, vaimbi, vangwariri vo musuvo no vashandi* vo mu themberi vakaenda ku Jerusarema mu gore rocinomwe ro kutonga ka Mambo Aritasheshi.
8 Esdhra wakaguma ku Jerusarema mu mweji wo cishanu wo gore rocinomwe ro kutonga ka mambo.
9 Iyena wakabuda mu Bhabhironi mu njiku yokutanga yo mweji wokutanga, woguma Jerusarema mu njiku yokutanga yo mweji wocishanu, ngokuti nyara yakanaka ya Mwari wake yainga naye.
10 Esdhra wainga wakanasirira mwoyo wake kuti avone Mutemo wa Jehovha kuti aushandise no kujijisa mupango yake no ndhungamiriro ku Iziraeri.
11 Masoko ainga mu karata ya Mambo Aritasheshi aakapekeja Esdhra mupiri no mutari, wainasa kuziva* ushoni mutemo ja Jehovha no ndhungamiriro jake ku Iziraeri, nga aya:
12 * “Aritasheshi, mambo wo majimambo, kuna Esdhra mupiri no mutari wo Mutemo wa Mwari wo kumatenga. Runyararo ngahuve na iwewe.
13 Ndakadira mutemo, ndecitendera Vaiziraeri vese vari mu umambo hwangu kubatanijavo no vapiri vavo no Varevhi, kuti vaende na iwewe ku Jerusarema kudari vakada.
14 Ngokuti iwewe uri kutumwa ndi mambo no vapangiri vake vanomwe kuti upsakisise mu Mutemo wa Mwari wako uri mu nyara yako, kuti uvone dangani uri kutevejwa mu Judha no mu Jerusarema.
15 Iwewe unodikana kutora sirivha no goridhi zvakapihwa ndi mambo no vapangiri vake ngo kuda kwavo kuna Mwari wo Vaiziraeri anogara mu Jerusarema.
16 Unodikanazve kutora sirivha no goridhi rese rowakaashira* mu porovhinsiya yese yo Bhabhironi pamwepo no zvipo zvakapihwa ngo vandhu no vapiri ngo kuda kwavo ku themberi ya Mwari wavo iri ku Jerusarema.
17 Ngo mare iyo, unodikana kutenga ngo kukasika n’gombe jorume, mavhuta orume, zvimavhuta zvorume zvidoko pamwepo no zvipo zvo mucece no zvipo zvo doro, ozozvipira pa artari mu themberi ya Mwari wenyu iri mu Jerusarema.
18 “Iwewe no hama jako mungaita zvamunoda, mecishandisa sirivha no goridhi rinonga rasara mukuzwirana no kuda ka Mwari wenyu.
19 Mujiyo yese yaunopuwa yo basa ro mu themberi ya Mwari wako, unodikana kuidira pamberi pa Mwari, mu Jerusarema.
20 Zviro zvimweni zvese zvinodiwa pa themberi ya Mwari wako zvaunofanera kupa, unozozvitenga ngo upfumi hwo mu nyumba ya mambo.
21 “Inini Mambo Aritasheshi, ndinopa mutemo kuti vangwariri vo upfumi vari mu ndharaundha yo Mwombera wo Murambo Eufrate, vakasike kutendera zvese zvinokumbihwa ndi Esdhra mupiri no mutari wo Mutemo wa Mwari wo kumatenga.
22 Mupenyi matarenta o sirivha anokwana kuita 100, makiro* o tirigu anokwana kuita 16.000, maritru* o vhinyu anokwana kuita 2.200, maritru o mafuta anokwana kuita 2.200 no munyu ngo kuteveja kuda kwake.
23 Zvese zvinonangwa ndi Mwari wo kumatenga ngo pamusoro po themberi ya Mwari wo kumatenga, zvinodikana kuitwa ngo mwoyo wese, kuti vandhu vo umambo wa mambo no vana vake vatame kucamwihwa.
24 Zivanyivo kuti amutendehwi kuita kuti mupiri ariwese, Murevhi, muimbi, mungwariri wo musuvo, mushandiri* wo pa themberi no mushandi wo pa nyumba ya Mwari, vashabe, vapagari muhengo no kupagari mushabo wo muzvitaka.
25 “Iwewe Esdhra mukuzwirana no uzivi hwowakapuwa ndi Mwari wako, gajai maadhiministradhori no vatongi kuti vatonge vandhu vese vari mundharaundha yo Mwombera wo Murambo Eufrate, zvinoreva, vandhu vese vanoziva mutemo wa Mwari wako. Imwimwi munodikana kujijisa vandhu vese vacikauzivi.
26 Mundhu wese anoramba kuzwira Mutemo wa Mwari wako no mutemo wa mambo, ngo kukasika anodikana kutongwa, kungava kutongehwa rufu, kugogomehwa, kupagariswi kana kudihwa mukadheya.”
27 Jehovha, Mwari wo majicekuru edu, ngaakujwe, uwo wakadira mu mwoyo mwa mambo cido cokusejesa themberi ya Jehovha iri mu Jerusarema!
28 Ngo rudo hwake hucikacinji hwaakandikhombijira, iyena wakaita kuti ndiwane unyasha pamberi pa mambo no pamberi po vapangiri va mambo vano simba. Ngo kudaro, zvecivoneka kuti nyara ya Jehovha, Mwari wangu yainga na inini, ndakava no cicunge ndounganija vatungamiriri vo Vaiziraeri kuti vaende na inini.
Masoko o Pasi
^ Zvinoreva: “Kubesa.”
^ Kana: “Iyena wainasa kukopiyari mutemo wa Mosi.”
^ Kana: “Netinimi.” Gama ngo Gama: “vandhu vakapuwa Mwari kuti vamushandire.”
^ Kana: “kukopiyari masoko.”
^ Esdhra 7:12 mbhera 7:26 yakatahwa ngo ndhumi yo Ciaramaiki.
^ Gama ngo Gama: “rowakawana.”
^ Gama ngo Gama: “100 koro.” Koro imwe inoita 220 R. Vonanyi Masoko Okuengejera B14.
^ Gama ngo Gama: “100 bhati.” Bhati rimwe rinoita 22 R. Vonanyi Masoko Okuengejera B14.
^ Kana: “Munetinimi.” Mundhu wakapuwa Mwari kuti amushandire.
