Isaya 58:1-14
58 “Khuwanyi ngo izwi guru; mucaregera!
Khwijanyi izwi renyu inga mbhayapaya.
Zivisanyi vandhu vangu kupanduka kwavo,No nyumba ya Jakobe zvishaishi zvayo.
2 Ivona vanondipsaka njiku jese,Vecinanga kuti vanodakarira kuziva makwanja angu,Inga jinja ronoenderera mberi reciita zvakanaka,Ricizivi kusiya ururami hwa Mwari waro.
Ivona vanondikumbira matongero akarurama,Vecidakarira kukhwedera phedo na Mwari, vecinanga kudari:
3 ‘Ngenyi mucikativoni patinozira?
Ngenyi mucikativoni patinozvihwajisa?’
Ngokuti pa njiku yamunozira, imwimwi munopsanga zvamunoda basi,Mecitambuja vaya vanomushandira.
4 Kuzira kwenyu kunopera ngo mapope no kuhwisana,Imwimwi munotakana umwe no umweni ngo zvibhakera.
Izwi renyu aringaziki kudenga, imwimwi mecizira ngo maitiro akadari.
5 Kureva kuti kuzira kunondidakajisa kunodikana kuithwa kudaro?Inga njiku yokuti mundhu anojihwajisa ega?Inga njiku yokukotamisa musoro inga sora rakareba?No yokuvata pamapendera o saku no pamarota?
Ndiyona njiku yamunodaninjari kuti ngo yokuzira no inodakajisa kuitira Jehovha?
6 Kuzira kunondidakajisa nga uku:
Kusujunura magaragajero o cishaishi,Kusujunura mapote o kanga,Kusujunura vandhu vari kushuphwa,Kugura ngo pakati kanga jese;
7 Kupa zvokuha zvako ku mundhu ano njara,Kuashira pamuzi pako varombo no vandhu vacina pokugara,Kusimija wiya waunovona kuti ari mitu,No kutama kufuratira hama jako.
8 Ukaita kudaro, ruvheneko hwako unozoita inga maambakueja,Kuraphwa kwako kunozoguma ngo kukasika.
Urungami hwako unozoenda kumbeji kwako,Rukujo hwa Jehovha unozokungwarira ngo sure.
9 Ngo kudaro, iwewe unozodaninja, Jehovha anozokudavira;Iwewe unozokumbira kubeswa, iyena anozonanga kudari: ‘Ndiri pano!’
Kudari ukavhisa kanga pakati pakoOregera kutatija ngo cikunwe no kubhuya zviro zvakashata.
10 Kudari ukapa mundhu ano njara zviro zvaunoda maningiNo kugutisa vandhu vari kutambujika,Ruvheneko hwako unozovheneka pikija pacidima,Cidima cako cinozoita inga masikati.
11 Jehovha mukuvo wese anozokutungamiriraOzokupa zvokuha pikija mu nyika yakaoma;Iyena anozovangisa maphondo ako,Iwewe unozoita inga ndhonve inowana kumwa yakakwana,No ndau inobuda kumwa icikaperi.
12 Ngo ndava yako, mathere okare anozovakiswazve,Iwewe unozomusazve njiki jo mubarihwana wokare.
Iwewe unozodaninjwa kuti munasiririsi wo mupfimbiji,No muvakisi wo makwanja ari phedo no nyumba.
13 Kudari iwewe ukanghwarira Sabudu, oregera kupsaka zviro zvaunoda basi pa njiku yangu yakacenaWodaninja Sabudu kuti injiku yo mudakaro mukuru, njiku yakacena ya Jehovha, njiku inodikana kukujwa,Oikuja kusiyapo kupsaka zviro zvaunoda basi, otama kubhuya masoko acikabeseri,
14 Iwewe unozodakara maningi ndi Jehovha,Inini ndinozokukhwija pa ndau jakakhwira jo nyika.
Ndozokuita kuti ubuse ndhaka ya Jakobe, cekuru wako,Ngokuti muromo wa Jehovha wakazvinanga.”
