Jona 3:1-10
3 Ngo kudaro, Jehovha wakavhunjazve Jona hwocipiri kudari:
2 “Mukai, uende Ninivhe dhorobha guru, uzivise masoko andinoda kukuvhunja.”
3 Jona wakamuka woenda Ninivhe inga zvaakavhunjwa ndi Jehovha. Ninivhe rainga dhorobha rakakura maningi, waitora njiku ndhatu wecifamba mbhera kwarakaperera.
4 Jona wakanghwina mu dhorobha wofamba mumango* wo njiku imwe ecizivisa kudari: “Kwasara makumarongomuna o njiku kuti Ninivhe iparajwe.”
5 Vandhu vo Ninivhe kutangira ku madhodha mbhera ku vana vadoko, vakatenda Mwari. Ivona vakazira vecisimira mapendera o saku.
6 Mambo wo Ninivhe naazwa masoko aya, wakamuka pa cigaro wovhura nguvo yake yo umambo, wosimira mapendera o saku, wogara pa marota.
7 Kusiyapo zvondhozvo, iyena wakazivisa Ninivhe yese kudari:“Ngo mutemo wa mambo no vazivi vake: Apana mundhu kana cinyama, n’gombe kana vhuta zvinodikana kuha zviri zvese. Apana mundhu kana cinyama zvinodikana kuha kana kumwa kumwa.
8 Vandhu ngavasimire mapendera o saku pamwepo no zvinyama. Ngavadaninjire Mwari ngo mwoyo wavo wese. Ngavasiye makwanja avo akashata no zviro zvavari kuita zvicizivi kururama.
9 Kangaije Mwari wokadi anocinja murangariro wake. Ushungu wake unobwaka wopera, itusu totama kufa.”
10 Mwari wokadi paakavona zvavainga vaita vosiya makwanja avo akashata, iyena wakacinja murangariro, wotama kuvaviisira ndambujiko raainga akananga kuti waizovaviisira. Iyena aazivi kuzoriviisa.
Masoko o Pasi
^ Kana: “musango.”
