Mabasa o Vapostori 12:1-25
12 Pa mukuvowo, mambo Herodhi wakatanga kutambuja vandhu vamweni vainga mu ungano.
2 Iyena wakaitisa kuti Jakobo hama ya Johani iuraiwe ngo banga.
3 Paakavona kuti Vajudha vaidakara ndizvona, wakasungazve Pedhru. (Izvi zvakaitika pa mukuvo wo Pau Jicina Mbijo.)
4 Iyena wakamubata womudira mukadheya, woita kuti angwaririhwe ngo zvikwata zvirongomuna zvo masoca, zvaicinjana. Cikwata cimwe nga cimwe, cainga no masoca marongomuna. Iyena wainga ecida kuzomubudisa pamberi po vandhu pasure po Phasika.
5 Ngo kudaro, Pedhru wakadihwa mukadheya, asi ungano yaienderera mberi yeciita mukumbiro kuna Mwari ngo pamusoro pake.
6 Herodhi wainga ecida kubudisa Pedhru, pa usiku uhu, Pedhru wainga akavata, akasungwa ngo magaragajero, ari pakati po masoca maviri. Masoca amweni ainga akangwarira ngo pamusuvo po kadheya.
7 Asi ngo civhumbu, ngirozi ya Jehovha* yakaguma yoima, ruvheneko hwakavheneka kadheya yese. Iyona yakapsasa pamutivi pa Pedhru, yomuvhunja kuti: “Mukai ngo kukasika!” Magaragajero ainga mu mukono jake, akambhwera.
8 Ngirozi yakamuvhunja kuti: “Nasirirai, perepo usimire magwada ako.” Pedhru wakaita zvondhozvo. Pakupejisira, ngirozi yakamuvhunja kuti: “Simirai nguvo yako yo kunja unditevere.”
9 Iyena wakabuda woitevera, asi aacaizvizivepi kuti zvainga zvokadi kamare zvaaingaro eciitihwa ngo ngirozi. Kunasa kunanga, iyena wairangarira kuti ari kuva no civoniso.
10 Ivona vakapinda ngo painga no vangwariri vo kutanga no vocipiri, voguma pamusuvo wo simbi wainga wakasota kudhorobha, iwona wakafununguka wega. Pasure pokubuda kwavo, vakafamba ngo gwanja rimweni, ngo civhumbu, ngirozi iyana yakangarangaka.
11 Pedhru paakazozvibata zvainga zveciitika, wakati: “Wari, ndaakuzviziva kuti Jehovha* watumira ngirozi yake, iyona yaviya kuzondiponesa mu nyara ja Herodhi no zvese zvainga zvecivetehwa ngo Vajudha kuti zviitike.”
12 Pasure pokuzviziva, iyena wakaenda kumuzi ka Mariya mai wa Johani waidanijwa Marko. Kondhoyo, vandhu vazinji vainga vakaungana veciita mukumbiro.
13 Paakataka musuvo, mushandi kaji wocimusikane anodanijwa Rodha wakaviya kuzovona kuti ndiyani.
14 Paakaziva izwi ra Pedhru, wakadakara maningi zvokuti aazivi kufunungura musuvo, asi wakagogoma ecinghwina mukati. Iyena naaguma, wakananga kuti Pedhru wakaima pamusuvo.
15 Ivona vakamuvhunja kuti: “Uri kupenga kani!” Asi iyena wakaenderera mberi ecinanga zvondhozvo. Ivona vakatanga kunanga kuti: “I ngirozi yake.”
16 Asi Pedhru wainga akagara pondhopo ecitaka musuvo. Pavakafunungura musuvo, vakamuvona vokahamara.
17 Iyena wakavereketa ngo nyara kuti ivona vanyarare, wovaverengera zviro zvese zvaainga aitihwa ndi Jehovha* ngo kuvhiswa kwake mukadheya, eciti: “Vhunjanyivo masoko aya Jakobo no hama jimweni.” Ngo kudaro, iyena wakabuda woenda ku ndau imweni.
18 Kunja no kwaeja, masoca akatanga kunesana ngo cawo, vecivhunjisana kuti zvicinyi zvaitika na Pedhru.
19 Herodhi wakamupsaka no majiso akapsuka, asi aazivi kumuwana. Iyena wakavhurunguja masoca no kuvaita kuti vapanicwe; pasure pazvo, wakavha Judheya woenda Sezareya, wopejeyo mazuva manganani.
20 Iyena wainga akanyangajwa ngo vandhu vo Tiro no Sidhoni. Ivona vakaviya kwaari vakabatana, vokumbira Bhrasto wainga muvonereri wo nyumba ya mambo kuti avabese kuita runyararo na mambo, ngokuti nyika yavo yaipuwa zvokuha ngo nyika ya mambo.
21 Zuva rimweni, Herodhi wakasimira nguvo jo umambo, ogara pacigaro co kutonga, wakatanga kubhuya no vandhu vese.
22 Vandhu vainga vakaungana vakatanga kukhuwa veciti: “Izwi iri asipi ro mundhu, ndha mwari!”
23 Ngo kukasika, ngirozi ya Jehovha* yakamutaka, ngokuti aazivi kukuja Mwari. Iyena wakahiwa ngo honye, wofa.
24 Asi, soko ra Jehovha,* raienderera mberi recikura no kuparajika.
25 Bharnabha na Sauro, pavakapeja kuita basa rokubesera mu Jerusarema, vakahwirira vecitora Johani waidanijwa Marko.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
