Mabasa o Vapostori 14:1-28
14 Ivona vakanghwina mu sinagoga yo Vajudha ku Ikoniyo vobhuya mu njira yo kuti vandhu vazinji, Vajudha no Vagiriki, vakatenda.
2 Vajudha vainga vacizivi kutenda vakakukumijira vandhu vo majinja kuti vamukire hama jedu.
3 Ngo kudaro, ivona vakapeja nguva yakawanda vecibhuya vakacunga ngo simba ra Jehovha.* Iyena waitendera soko ro unyasha hwake hucikaezaniswi no kuita kuti vaite zvitatijo no zvishamaiso.
4 Vandhu vo mudhorobha avacaingepi pamwepo; vamweni vaibesera Vajudha, vamweni vecibesera vapostori.
5 Vandhu vo majinja no Vajudha pomwe no vatungamiriri vavo, vakaeja kuvatambuja no kuvafura ngo mapuwe.
6 Pavakavhunjwa izvi, ivona vakatiza voenda ku madhorobha o Rikaoniya, Ristra, Dherbhe no nyika jaimatendeneja.
7 Mondhomo ivona vakaenderera mberi vecitokotesa masoko akanaka.
8 Mu Ristra, mainga no mundhu wainga akaremara makumbo. Iyena wakabahwa akaremara, wainga acizivi kumbofamba cingozvo.
9 Mundhu uwu wainga ecipurutana, Pauro paainga ecivereketa. Pauro, paakamusotesesa, wovona kuti mundhu uwu wainga ano rutendo hwokuti avange,
10 wakamuvhunja ngo izwi guru kuti: “Imai ngo murenje.” Mwanarume wiya wakaphuka woima perapo wotanga kufamba.
11 Mbungano payakavona zvakaithwa ndi Pauro, yakatanga kukhuwa ngo ndimi yo Cirikaoniya, yeciti: “Zvimwari zvaezana no vandhu, zvoviya kwatiri!”
12 Ivona vakatanga kudanija Bharnabha kuti ndi Zeu, vodanija Pauro kuti ndi Herme ngokuti ndiyena waitungamirira pa kuvereketa.
13 Mupiri wa Zeu wainga no themberi yainga ngo pa musuvo po dhorobha, wakaviisa n’gombe no hata jo maruva ecida kuita cipo pamwepo no mbungano.
14 Asi mupostori Bharnabha na Pauro pavakazvizwa, vakamwesa nguvo javo, vogogoma vecienda pakati po mbungano vecikhuwa kuti:
15 “Nandi, zvicinyi zvamuri kuitari? Itusu titorivo vandhu inga ndimwi. Tiri kutotambujikavo. Itusu tiri kumuzivisa masoko akanaka kuti mutendeuke kuvha ku zviro zvicikashandi kuti muviye ka Mwari anopona, wakaita denga, nyika no jombe no zviro zvese zviri mukati mazvo.
16 Iyena wakatendera ku mubarihwana yakapera kuti majinja ese afambe mu makwanja avo.
17 Mwari aazivi kuregera kujiitira ucapupu hwake kamare ngokuti wakakhombijira unyasha hwake ecinisa nvura kuti kuve no nguva yo kubara mucero no kuvapa zvokuha no kuzaja mwoyo yenyu ngo mudakaro.”
18 Ivona vainanga zvese izvi asi zvainesa kuti vakwanise kukamisa vandhu kuti vatame kuvaitira mupiro.
19 Asi vakaguma Vajudha vaivha ku Antiyokiya no Ikoniyo, vocengeja vandhu, vofura Pauro ngo mapuwe vomukhwekhwereja mbhera kunja ko dhorobha, vomusiya vecirangarira kuti wafa.
20 Vajiji pavakamuzenengera,* iyena wakamuka wonghwinazve mudhorobha miya. Pa njiku yakatevera, wakapinda na Bharnabha kwenda Dherbhe.
21 Pavakapera kutokotesa masoko akanaka mu dhorobha rondhoro no kubesera vandhu vakawanda kuti vave vajiji, ivona vakahwirira ku Ristra, Ikoniyo no Antiyokiya.
22 Vakavangisa vajiji kondhoyo no kuvavhunja kuti vagare mu rutendo, veciti: “Tinodikana kunghwina mu Umambo hwa Mwari ngo matambujiko mazinji.”
23 Kusiyapo izvo, ivona vakagaja vakuru mu ungano imwe na imwe, veciita mukumbiro no kuzira kuti vangwarihwe ndi Jehovha,* wavaingaya vootenda.
24 Perapo vakapinda ngo Pisidhiya, voguma Pamfiriya.
25 Pavakapera kutokotesa soko mu Perga, vakaenda ku Atariya.
26 Ivona vakapakira piketi kondhoyo, voenda Antiyokiya, kwavakaitihwa unyasha hucikaezaniswi hwa Mwari ngo basa ravakaita.
27 Pavakapera kuguma no kuunganija ungano, vakananga zviro zvizinji zvakaithwa ndi Mwari ecivashandisa no mafunungurire aakaita musuvo ku vandhu vo majinja kuti vatende.
28 Ngo kudaro, ivona vakagareyo no vajiji mazuva akawanda.
