Mabasa o Vapostori 18:1-28
18 Pasure pa izvi, iyena wakavha Atena woenda Korinte.
2 Kondhoyo kwainga kuno Mujudha umweni anodanijwa Akira, wakabarihwa Ponto no mukaji wake Prisira. Iyena wainga eciguma kuvha Itariya ngokuti Kraudhiyo wainga akananga kuti Vajudha vese vaidikana kubuda mu Roma. Ngo kudaro, iyena wakaenda kovavona.
3 Zvecivoneka kuti vainga no mabasa akaezana okuita tende, wakagara pa nyumba pavo ecishanda navo, ngokuti vainga vaiti vo matende.
4 Ngo musabudu mwese, iyena waiita hurukuro* mu sinagoga, ecikhohwesa Vajudha no Vagiriki.
5 Sira na Timoti pavakazoguma ku Masedhoniya, Pauro wakatanga kubatikana pa kucumaira soko ra Mwari, ecipa ucapupu ku Vajudha ngo kuvakhombija kuti Jesu ndiyena Kristu.
6 Asi pavaienderera mberi vecimunyenya no kumutuka, iyena wakavhuruza nguvo jake, ecivavhunja kuti: “Ngazi yenyu ngaiwire pa musoro penyu. Andina ndava pa shwiro iyi. Kuvhira wari, inini ndiri kuenda ku vandhu vo majinja.”
7 Ngo kudaro, iyena wakavheyo, woenda kumuzi ko mwanarume waidanijwa kuti Titiyo Jhustu, munamati wa Mwari, ano nyumba iri pamutivi po sinagoga.
8 Asi Krispo, mutungamiriri wo sinagoga, wakava mutendi wa Mambo no vandhu vese vo pamuzi pake. Vakorinte vazinji vakazwa soko vakatanga kutenda, vobhabhatijwa.
9 Kusiyapo izvo, Mambo wakavhunja Pauro mu civoniso co usiku kuti: “Ucadothya, asi endererai mberi wecivereketa, ucanyararisa,
10 ngokuti ndina iwewe, akuna mundhu anozokuhwisa kuti akukhuvaze; ngokuti ndino vandhu vakawanda vari mu dhorobha iri.”
11 Ngo kudaro, iyena wakagareyo gore no mweji mutandhatu, ecijijisa soko ra Mwari pakati pavo.
12 Gariyo paainga govhernadhori wo porovhinsiya yo Akaya, Vajudha vakazwirana kuti vahwise Pauro no kumuendesa ku vatongi,
13 veciti: “Mundhu uwu ari kukhohwesa vandhu kuti vanamate Mwari ngo maitiro anohwisana no mutemo.”
14 Asi Pauro paaida kuvereketa, Gariyo wakavhunja Vajudha kuti: “Kudari nocaingadi ciro cakashata kana kuti cishaishi cikuru, ndaizomupurutana ngo kusengerera.
15 Asi kudari mecitama kuzwana ngo ndava yo magama, mazina no mutemo wenyu, izvo ngozvenyu. Andidi kuva mutongi wo zviro izvi.”
16 Ngo kudaro, iyena wakavabudisa pamberi po vatongi.
17 Vese vakabata Sostene wainga mutungamiriri wo sinagoga, votanga kumutaka pamberi po vatongi. Asi Gariyo wainga acikadi kungwinira shwiro iyi.
18 Pasure po kugareyo njiku jakawanda, Pauro wakaeneka hama, wopakira piketi kuenda Siriya, eciperekejwa ndi Prisira na Akira. Iyena wakagundhwa* vhuji rake mu Kenkreya, ngokuti wainga aita mbhiko.
19 Ngo kudaro, ivona vakaguma ku Efeso, wovasiya kondhoyo. Iyena wakanghwina mu sinagoga, wobesera Vajudha kuzwisisa Matahwa.
20 Pikija kuti vaindomukumbira kuti agareyo mukuvo wakareba, iyena wakaramba
21 asi wakavaeneka, wovavhunja kuti: “Ndinozoviyazve komuvona kudari Jehovha* akada.” Iyena wakapakira ngarava kuvha Efeso,
22 woenda Sezareya. Iyena wakaenda,* wocungamija ungano perapo woenda Antiyokiya.
23 Paakapeja mukuvo munganani ari kondhoyo, wakavheyo, woenda ndau ngo ndau yo mutundhu wese wo Garatiya no Frijiya, ecivangisa vajiji vese.
24 Mujudha umweni anodanijwa kuti Aporo, wakabarihwa Areshandriya, wakaguma Efeso; iyena wainga no cipo co kuvereketa, ecinasa kuziva Matahwa.
25 Mundhu uwu, wainga akajijiswa gwanja ra Jehovha,* waivangisira maningi ecibesehwa ngo mujimu mucena, iyena wainasa kuvereketa no kujijisa zviro ngo pamusoro pa Jesu, asi waiziva rubhabhatijo hwa Johani basi.
26 Iyena wakatanga kuvereketa akacunga mu sinagoga, Prisira na Akira pavakamuzwa, vakamudanijira pamutivi vonasa kumudurujira gwanja ra Mwari.
27 Kusiyapo izvo, zvecivoneka kuti Aporo waida kuenda Akaya, hama jo Efeso jakatarira karata ku vajiji vo Akaya kuti vaashire Aporo ngo kunaka mwoyo. Ngo kudaro, paakagumeyo, wakabesera maningi vaya vakava vatendi ngo unyasha hucikaezaniswi hwa Mwari;
28 ngokuti iyena wainasa kukhombija pambhene, ngo simba rese kuti jijiso yo Vajudha, yainga yakashata, ecivatatija mu Matahwa kuti Jesu uwu ndiyena Kristu.
Masoko o Pasi
^ Kana: “iyena wairangarira no vapurutani vake.”
^ Kana: “wakacekwa.”
^ Vonanyi Kudurujihwa ko Magama.
^ Wakaenda Jerusarema.
^ Vonanyi Kudurujihwa ko Magama.
