Neemiya 1:1-11
1 Masoko a Neemiya* mwana wa Akariya: Mu gore ro cimakumaviri mu mweji wa Kishirevhi* ndainga mu nyumba ya mambo ku Shushani.*
2 Pa nguva yondhoyo, Hanani umwe o hama jangu wakaguma no vanarume vamweni vaivha ku Judha, inini ndakavavhunjisa ngo pamusoro po Vajudha vakasara, vaya vainga vakapona kuvha kuuranda. Ndakavhunjisazve ngo pamusoro po Jerusarema.
3 Ivona vakandidavira kudari: “Vaya vakasara vari ku porovhinsiya, vakapona kuvha ku uranda, vari kutambujika maningi no kushohwa. Mupfimbiji jo Jerusarema jaamathere, musuvo jaro jakapiswa ngo muriro.”
4 Pandakazwa masoko aya, ndakagara pasi ndotanga kucema,* ndakaita ciriro co njiku jakawanda. Ndakazira no kuita mukumbiro kuna Mwari wo kumatenga.
5 Ndakati: “Jehovha, Mwari wo kumatenga, Mwari mukuru, anoshamaisa, anongwarira citenderano cake no kukhombija rudo hucikacinji ku vaya vanomuda na vaya vanoteveja mupango yake,
6 ndapota, itanyi kuti majiso enyu avone, njeve jenyu jizwe mukumbiro wo mushandiri wenyu wandiri kumuitira nyamasi. Ndinoita mukumbiro kwamuri usiku no masikati ngo pamusoro po vashandiri venyu Vaiziraeri, no kudekeca zvishaishi zvakaizwa ngo vandhu venyu Vaiziraeri. Takashaisha, inini kubatanijavo no vandhu vo nyumba ya baba wangu.
7 Kunasa kunanga, takamuitira zvakashata, ngo kutama kuzwira mupango, mutemo no matongero amakapa Mosi mushandiri wenyu.
8 “Ndapota, ceujanyi masoko amakavhunja Mosi mushandiri wenyu meciti: ‘Kudari mukatama kuva makagondeka, inini ndinozomudhandhanisa pakati po majinja.
9 Asi kudari mukahwirira kwandiri, mozwira mupango yangu no kuiviga, pikija vandhu venyu vakandhandhaniswa mbhera ku magumo o nyika, ndinozovaunganija kuvha kwavari waro ndovaviisa pa ndau yandakasana kuti zina rangu rigare riripo.’
10 Ivona vashandiri venyu no vandhu venyu, vaya vamakaponesa ngo simba renyu guru no nyara yenyu inoshamaisa.
11 Jehovha, ndapota, njeve jenyu ngajizwe mukumbiro wo mushandiri wenyu no mukumbiro jo vashandiri venyu vanodakarira kuthya zina renyu. Ndapota, itanyi kuti mushandiri wenyu abudirire nyamasi, itanyizve kuti mambo andiitire pena.”
Pa mukuvo uwu, inini ndainga muperekeri wo doro ra mambo.
Masoko o Pasi
^ Zvinoreva: “Jah anonyaraja.” Jah ikugurisihwa ko zina ra Jehovha.
^ Vonanyi Masoko Okuengejera B15.
^ Kana : “Suza.”
^ Kana: “kurira.”
