Neemiya 13:1-31
13 Mu njikuyo bhuku ra Mosi rakaverengwa pamberi po vandhu, mukatimo makawanika pakatahwa kuti Vaamoni no Vamowabhi avacaizoita divi ro ungano ya Mwari wo cokwadi,
2 ngokuti vainga vacizivi kwenda koosongana no Vaiziraeri vano pau no kumwa. Kusiyapo izvo, ivona vakatenga Bharamu kuti atuke Vaiziraeri. Ngo kudaro, Mwari wedu wakacinja kutuka uku koita makomborero.
3 Pavakazwa Mutemo, vandhu vese vo nyikanja vakatanga kubuda pakati po Vaiziraeri.
4 Izvi zvicito zvaitika, Eriyashibhi hama ya Tobhiya ndiyena wainga mupiri waivonerera ndau inovigihwa zviro mu nyumba* ya Mwari wedu.
5 Iyena wainga akapa Tobhiya ndau huru inovigihwa zviro, yaimbodirihwa mupiro yo zvokuha, mafuta anonuhira, mujiyo, cogumi co mucece, vhinyu imbza no mafuta kubatanijavo no mupiro yo vapiri. Zviro izvi zvaipuwa Varevhi, vaimbi no vangwariri vo musuvo.
6 Pa mukuvo wese uwu andicaingazve ku Jerusarema, ngokuti ndainga ndakahwirira kuna mambo mugore ro makumatatu na maviri o kutonga kwa Aritasheshi mambo wo Bhabhironi. No papera mukuvo mushoma, ndakakumbira mambo kuti anditendere kumbobuda.
7 Ndakaguma ku Jerusarema ndovona zviro zvakashatisisa zvainga zvakaithwa ndi Eriyashibhi. Iyena wainga akapa Tobhiya ndau yokuvigira zviro pa ruvanje wo nyumba ya Mwari wo cokwadi.
8 Ndakanyangajwa maningi ndizvona. Ngo kudaro, ndakasveja kunja ko ndau inovigihwa zviro mujiyo jese ja Tobhiya.
9 Perapo, ndakapa ndhungamiriro kuti ndau inovigihwa zviro iceneswe. Ndakahwirija pondhopo mujiyo yo nyumba ya Mwari wo cokwadi, kubatanijavo zvipo zvo mucece no mafuta anonuhira.
10 Ndakavonavo kuti Varevhi vainga vacikapuwi zvokuha zvavo. Izvi zvakaita kuti vasiye mabasa avaiita, umwe na umwe woenda ku munda wake.
11 Ngo kudaro, ndakapangira vatongi ndecivavhunja kudari: “Ngenyi nyumba ya Mwari wo cokwadi iri kushaishwa kutajwa?” Inini ndakaunganija Varevhi ndovagajazve mu mabasa avo.
12 Vajudha vese vakaviisa cogumi co mucece, co vhinyu imbza no co mafuta mu ndau inovigihwa zviro.
13 Ndakagaja Sheremiya wainga mupiri, Zadhoki wainga mutari na Pedhaya umwe wo Varevhi inga vavonereri vo ndau jinovigihwa zviro. Ndoita kuti Hanaa mwana wa Zakuri ave mubeseri wavo, ngokuti ivona vaivoniwa inga vandhu vanothembeka. Zakuri wainga mwana wa Mataniya. Ivona vainga vano basa ro kupa zvokuha hama javo.
14 Ndakaita mukumbiro ndeciti: Mwari wangu, ceukijanyi zvandakaita. Mucakanganwa zviito zvo rudo hucikacinji zvandakaitira nyumba ya Mwari wangu no kunasa kutaja kwandakaita mabasa anoithwa mondhomo.
15 Mu njikujo, ndakavona vandhu vo Judha vecicika-cika uvha mu ndau inosvinihwa vhinyu ngo mu Sabudu. Ivona vaikotora mututu yo mucece no kuithwarisa ngo mbongoyo. Vaiviya no vhinyu, uvha, mafigu no mushovo wese wo zviro ku Jerusarema mu njiku yo Sabudu. Inini ndakavapangira kuti vatame kutengesa zviro izvi mu njiku iyi.
16 Vandhu vo Tiro vaigara mu dhorobha vaiviisa hove no mushovo wese wo nyagoso, vecitengesera vandhu vo Juda mu Jerusarema mu njiku yo Sabudu.
17 Ngo kudaro, ndakapangira vandhu vanoreremejwa vo Judha, ndecivavhunja kudari: “Ngenyi muri kuita zviro zvakashata kudari, mecisvipisa njiku yo Sabudu?
18 Andizvopi izvi zvakaizwa ngo majicekuru edu, zvoita kuti Mwari wedu aviise dambujiko kwatiri no ku dhorobha iri? Wari, imwimwi muri kuengejerazve ushungu hunobwakira Iziraeri, ngo kusvipisa kwamuri kuitari Sabudu.”
19 Ngo kudaro, munvuriri pawakatanga kuguma pa musuvo wo Jerusarema, Sabudu ricito ratanga, inini ndakaita kuti musuvo jifungwe. Ndonangazve kuti musuvo ajivhiri kufununguhwa Sabudu ricito rapera. Ndodira vabeseri vangu pa musuvo kuti patame kunghwina ciri cese mu njiku yo Sabudu.
20 Ngo kudaro, vandhu vo nyagoso no vatengesi vo mushovo wese wo nyagoso vakavata kunja ko Jerusarema, kamwe kana kaviri.
21 Inini ndakavapangira ndeciti: “Ngenyi munopeja usiku hwese muri phedo po mupfimbiji? Mukazviitazve, inini ndinozomuvhisa ngo simba.” Kuvhira pa njiku yondhoyo mbhera kwenda mberi, avazivi kuzoviyazve ngo njiku yo Sabudu.
22 Ndakavhunja Varevhi kuti vazvicenese mukuvo wese no kuviya kuzodira vangwariri pa musuvo kuti njiku yo Sabudu ivoniwe inga njiku yakacena. Ngo kudaro, ndakaita mukumbiro ndeciti: Imwimwi Mwari wangu, mucandikanganwa ngo pamusoro pa izvi, ndiitirenyivo pena mukuzwirana no rudo hwenyu hukuru hucikacinji.
23 Mu njiku jondhojo, ndakavonavo Vajudha vakarovora vanakaji vo Ashidhodhi, vo Vaamoni no vo Mowabhi.
24 Bindikati ro vana vavo vaibhuya ndumi yo va Ashidhodhi. Bindikati rimweni raibhuya ndumi jimweni jo nyikanja, asi apana na umwe wavo waikwanisa kubhuya ndumi yo Vajudha.
25 Ngo kudaro, inini ndakavapangira no kuvangwaja kuti vaizotongwa ndi Mwari. Vamweni ndakavataka no kuvavhita vhuji ravo. Ndovaita kuti vapike ngo zina ra Mwari ndeciti: “Imwimwi amuvhiri kurovoresa vana venyu vokaji ku vana vavo vorume, nee amuvhiri kutendera kuti vana vavo vokaji varovohwe ngo vana venyu vorume kana vatohwe ndimwi.
26 Andizvopi zvakaita kuti Soromona, mambo wo Iziraeri ashaishe? Pakati po majinja mazinji painga pacina mambo wakaezana na iyena. Iyena waidiwa ndi Mwari, zvoita kuti Mwari wake amuite mambo wo Iziraeri yese. Asi vanakaji vo nyikanja vakamuita kuti ashaishe.
27 Ngenyi imwimwi makwanisa kuita cishaishi cikuru ici, mova mucikagondeki kuna Mwari wedu ngo kurovora vanakaji vo nyikanja?
28 Umwe wo vana va Joyadha, mwana wo mupiri mukuru Eriyashibhi, wainga mukwambo wa Sanibharati Muhoroni. Ngo kudaro, ndakamugogomera pamberi pangu.
29 Ngo kudaro, ndakaita mukumbiro ndeciti: Mwari wangu, mucakanganwa kusvipisa kovakaita upiri no citenderano co upiri no co Varevhi.
30 Ndakavacenesa pa zviro zvese zvinosvipisa zvo nyikanja, ndopa vapiri no Varevhi zviro zvavaidikana kuita, umwe na umwe pa basa rake,
31 ndoronga manera aidikana kuviiswa huni pa mukuvo wakagajwa no mucero inotanga kuivha.
Ngo kudaro, ndakaita mukumbiro ndeciti: Mwari wangu mucandikanganwa, ndiitirenyivo zvakanaka.
Masoko o Pasi
^ Kana: “themberi.”
