Neemiya 2:1-20
2 Mu mweji wa Nisani,* mu gore ro makumaviri ro kutonga ka mambo Aritasheshi, pakadihwa vhinyu pamberi pake, inga zvandaidoita kare, inini ndakatora vhinyu ndoipa mambo. Asi ndainga ndicito ndakambocamwa pamberi pa mambo.
2 Mambo wakati kwandiri: “Ngenyi wakacamwa kuveni auripi kuhwaja? Ndiri kuvona kuti uri kuneseka ngo zviri zvese.” Pondhopo, ndakatanga kuthya maningi.
3 Inini ndakati kuna mambo: “Mambo endereranyi mberi mecirarama!* Ngenyi ndingatama kucamwa, kuveni dhorobha rakavigwa majicekuru angu raamathere, musuvo jaro japera kupiswa ngo muriro?
4 Mambo wakandidavira kudari: “Waro ngozvapi zvaunoda?” Pondhopo kamare, inini ndakaita mukumbiro kuna Mwari wo kumatenga.
5 Perapo ndakati kuna mambo: “Kudari zvikamudakajisa mambo, mondizwira unyasha inini muranda wenyu, nditumirenyi ku Judha, ku dhorobha rakavigwa majicekuru angu kuti ndirivakisezve.”
6 Ngo kudaro, mambo paainga no mukaji wake* pamutivi, wakandivhunjisa kudari: “Hwendo hwako hunopeja mukuvo wakadini? Unoviya rini?” Inini ndakavhunja mambo mukuvo wandaizopeja ndiri kondhoyo. Iyena wakatendera kuti ndipinde.
7 Inini ndakati kuna mambo: “Kudari zvecimudakajisa mambo, ndipenyi karata kuitira magovhernadhori anogara ku ndharaundha yo Kumavirira ko Murambo Eufrate, kuti anditendere kwenda ku Judha ndakangwaririka.
8 Ndipekejenyizve karata kuitira Azafi murindiri wo Parki ya Mambo, kuti andipekeje matabwa kuitira musuvo jo Mupfimbiji wo Nyumba,* mupfimbiji jo dhorobha no nyumba yandinozogara.” Ngo kudaro, mambo wakandipekeja karata, ngokuti Mwari wangu wakanaka wainga* neni.
9 Pejisire, ndakazoguma ku ndharaundha yo Kumavirira ko Murambo Eufrate, ndopekeja magovhernadhori karata jandakapuwa ndi mambo. Mambo wakatendera kuti ndiite hwendo no vatungamiriri vo hondo kubatanijavo vapakiri vo haci.
10 Sanibharati Muhoroni na Tobhiya mukuru wo Vaamoni pavakandozvizwa, vakanyangajwa maningi ngo kuziva kuti kwaguma mundhu waizoitira Vaiziraeri zviro zvakanaka.
11 Pejisire ndakaguma ku Jerusarema ndogareyo njiku ndhatu.
12 Ndakamuka co usiku, inini no vanarume vashoma, asi andizivi kuvhunja ari wese zvainga zvadihwa mu mwoyo mwangu ndi Mwari wangu kuti ndiitire Jerusarema. Andizivi kutora cinyama cimweni kunja ko cinyama candaingaya ndakapakira.
13 Ndakabuda co usiku ngo Kumusuvo wo Kumuterero, ndopinda ngo kumbeji ko Ndau yo Nyoka Huru,* mbhera Kumusuvo wo Mututu jo Marota. Ndakavona mupfimbiji jo Jerusarema jainga jaamathere no musuvo jaro jainga jakapera kupiswa ngo muriro.
14 Ndopinda mbhera ku Musuvo wo Mwimbo* no Kupisina* yo Kumwa ya Mambo, kondhoyo kwainga kucina ndau yakakura kuti cinyama candainga ndakapakira ciwane pokunghwina ndipona.
15 Ndakaenderera mberi ndicifamba mu bani co usiku ndecivona mupfimbiji, pejisire ndakahwirira ndonghwina ngo Kumusuvo wo Kumuterero, ngo kudaro ndakaguma kwandaingaya ndakaghwina ndikona.
16 Vatongi avazivi kuziva kwandainga ndaenda nee zvandainga deciita, ngokuti ndainga ndicizivi kuvhunja zviri zvese Vajudha, vapiri, vandhu vanoreremejwa, vatongi nee vashandi vamweni.
17 Pakupejisira ndakati kwavari: “Imwimwi muri kuvona kuti tiri pa mugariro unonesa maningi, Jerusarema raamathere, musuvo jaro japera kupiswa ngo muriro. Viyanyi tivakisezve mupfimbiji jo Jerusarema, kuti tipeje kushohwa uku.”
18 Ngo kudaro, inini ndakavavhunja kuti Mwari wangu wakanaka wainga neni, ndakavavhunjazve zviya zvandainga ndakavhunjwa ndi mambo. Waro ivona vakati: “Ngatende titange kuvakisa mupfimbiji.” Ngo kudaro, vakavangisana umwe no umweni kuti ritange basa iri rakanaka.
19 Sanibharati Muhoroni, Tobhiya mukuru wo Vaamoni na Geshemi Muarabhiya pavakandozvizwa izvi, vakatanga kutiseka no kutishora veciti: “Muri kuitenyi? Amuripi kuvona kuti imwimwi muri kupandukira mambo?”
20 Asi inini ndakavadavira kudari: “Mwari wo kumatenga ndiyena anozoita kuti tibudirire, itusu vashandiri vake tiri kuda kutanga kuvakiswa ko mupfimbiji. Asi imwimwi amuna camunoda kuita mu Jerusarema, amuna ciri cese cenyu nee camunoceukijwa ndicona mu Jerusarema.”
Masoko o Pasi
^ Vonanyi Masoko Okuengejera B15.
^ Kana: “mucipona.”
^ Kana: “naahosi vake.”
^ Kana: “Themberi.”
^ Kana: “nyara yakanaka ya Mwari wangu yainga.”
^ Kangaije, zvinonangira Mwimbo wo ku Eni-rogeri.
^ Kana: “Sime, Dima.”
^ Kana: “Gandhwa ro.”
