Neemiya 3:1-32
-
Kuvakiswa ko mupfimbiji (1-32)
3 Eriyashibhi mupiri mukuru no hama jake jainga vapiri, vakatanga kuvakisa Musuvo wo Mavhuta. Ivona vakaucenesa vodira musuvo jawo. Vakaucenesa mbhera ku Ndau Yokurindira yo Meya no ku Ndau Yokurindira yo Hananeri.
2 Pambeji pavo paivakwa ngo vanarume vo ku Jeriko, pambeji pavovo paivakwa ndi Zakuri mwana wa Imiri.
3 Vana va Hasena vakavakisa Musuvo wo Hove. Ivona vakauvakisa ngo matabwa vodira musuvo, feshadhura no mugogo.
4 Pamberi pavo painasirihwa ndi Meremothi mwana wa Urija. Urija wainga mwana wa Akozi, pamberi pavovo painasirihwa ndi Meshuramu mwana wa Bherekiya. Bherekiya wainga mwana wa Meshezabheri, pamberi pavovo painasirihwa ndi Zadhoki mwana wa Bhahana.
5 Pamberi pavo painasirihwa ngo Vatekowa, asi vanarumwe vainga vakakhwirira pakati pavo avazivi kuzvidodokesa kuti vaitevo basa ra patarau wavo.
6 Joyadha mwana wa Paseya na Meshuramu mwana wa Bhesodheya vakanasirira Musuvo wo Dhorobha ro Kare. Ivona vakauvaka ngo matabwa vodira musuvo, feshadhura no mugogo.
7 Kumbeji kwavo kwainasirihwa ndi Meratiya Mugibhiyoni, Jadhoni Mumeronoti no vanarume vo ku Gibhiyoni no Mizipa vaitongwa ndi govhernadhori wo ku ndharaundha yo Kumavirira ko Murambo Eufrate.
8 Kumbeji kwavo kwainasirihwa ndi Uziyeri mwana wa Arihaya, umwe wo vaya vainasirira mujiyo ngo goridhi, pambeji pake painasirihwa ndi Hananiya, umwe wo vaya vaiita mafuta okuzora.* Ivona vakadira mapuwe* mu Jerusarema mbhera kuguma ku Ndau Yokurindira Yakapambhama.
9 Pambeji pavo painasirihwa ndi Refaiya mwana wa Huri, mutongi wo dimbu ro dhistritu yo Jerusarema.
10 Jedhaya mwana wa Arumafi wakanasirira divi raitevera, rainga rakasotana no nyumba yake. Pambeji pakevo painasirihwa ndi Atushu mwana wa Ashabhineya.
11 Marikija mwana wa Harimu na Ashubhi mwana wa Pahati-mowabhi vakanasirira dimbu rimweni, vonasirirazve Ndau Yokurindira yo Coto* Cokubikira Pau.
12 Pamberi pavo, painasirihwazve ndi Sharumi mwana wa Aroheshi mutongi wo dimbu ro dhistritu yo Jerusarema, kubatanijavo no vana vake vokaji.
13 Anuni no vagari vo Zanowa, vakanasirira Musuvo wo Kumuterero. Ivona vakaunasirira vodira musuvo, feshadhura no mugogo. Vakanasirirazve makovhadho* o mutengo anokwana kuita 1.000 o mupfimbiji, mbhera ku Musuvo wo Mututu jo Marota.
14 Marikija mwana wa Rekabhi, mutongi wo dhistritu yo Bheti-hakeremi wakanasirira Musuvo wo Mututu jo Marota. Iyena wakauvakisa wodira musuvo, feshadhura no mugogo.
15 Sharuni mwana wa Korihoze mutongi wo dhistritu yo Mizipa, wakanasirira Musuvo wo Mwimbo.* Iyena wakavakisa musuvo no denga, wodira musuvo, feshadhura no mugogo. Iyena wakanasirirazve mupfimbiji wo Pisina yo Kumwa iri* phedo no Munda wa Mambo, mbhera ku Sikada yaibzuka ku Dhorobha ra Dhavhidhi.
16 Neemiya mwana wa Azibhuki mutongi wo dimbu ro dhistriru yo Bheti-zuri wakanasirira divi raitevera, kutangira kumbeji ko Ndau yo Makuva a Dhavhidhi, woenda mbhera ku pisina yakavakwa mbhera kooguma ku Nyumba yo Vano Simba.
17 Pambeji pake painasirihwa ngo Varevhi vecitungamirihwa ndi Rehumi mwana wa Bhani. Pambeji pavo painasirihwa ndi Ashabhiya mutongi wo dimbu ro dhistritu yo Keira, eciimirira dhistritu yake.
18 Pambeji pake painasirihwa ngo hama jake, jecitungamirihwa ndi Bhavhai mwana wa Enadhadhi mutongi wo dimbu ro dhistritu yo Keira.
19 Ezeri mwana wa Jeshuwa mutongi wo ku Mizipa wakanasirira divi rainga pamberi pavo, rakasotana no Pamakhwiriro po Nyumba Inovigihwa Mathurusi o Hondo, phedo no Pacicijikiro co Njiki.
20 Bharuki mwana wa Zabhai wakashanda ngo simba onasirira divi raitevera, kuvhira ku macijikiro o njiki mbhera kumanghwiniro ko nyumba ya Eriyashibhi mupiri mukuru.
21 Meremothi mwana wa Urija mwana wa Akozi wakanasirira divi raitevera, kuvhira kumanghwiniro ko nyumba ya Eriyashibhi mbhera kumaperero ko nyumba ya Eriyashibhi.
22 Pamberi pavo painasirihwa ngo vapiri no vanarume vo ku dhistritu yo ku Jordhani.
23 Bhenjamini na Ashubhi ndivona vakanasirira divi raitevera, pambeji po nyumba javo. Azariya mwana wa Maaseya, wakanasirira divi raitevera, phedo no nyumba yake. Maaseya wainga mwana wa Ananiya.
24 Bhinuyi mwana wa Enadhadhi, ndiyena wakanasirira divi raitevera, kuvhira ku nyumba ya Azariya mbhera ku Cicijikiro co Njiki, woenda mbhera pa cikhona co mupfimbiji.
25 Parari mwana wa Uzai wakanasirira divi raitevera, phedo no pacicijikiro co njiki pambeji po ndau yokurindira yainga pa Nyumba yo Mudenga ya Mambo, yainga pa Ruvanje wo Murindiri. Pedhaya mwana wa Paroshi, wakanasirira divi raitevera.
26 Vashandi* vo muthemberi vaigara mu Oferi, vakaita nasiriro mbhera phedo po Musuvo wo Kumwa ku divi ro kumavhazuva, ndau yakarebesesa yo ndau yokurindira.
27 Vandhu vo Tekowa vainasirira ngo divi rimweni, kutangira phedo po ndau yokurindira yakakurisisa mbhera kumupfimbiji wo Oferi.
28 Vapiri vainasirira divi ro panyezuru po Musuvo wo Haci, umwe nga umwe pambeji po nyumba yake.
29 Zadhoki mwana wa Imeri wakanasirira divi rimweni, pambeji po nyumba yake.
Shemaya mwana wa Shekaniya mungwariri wo Musuvo wo Kumavhazuva wakanasirira divi rimwenivo.
30 Hananiya mwana wa Sheremiya na Anuni, vakanasirira divi rimweni. Anuni wainga mwana wo citandhatu wa Zarafi.
Meshuramu mwana wa Bherekiya wakanasiriravo divi rimweni, pambeji po nyumba yake.
31 Marikija umwe wo vaya vainasirira mujiyo ngo goridhi, wakanasirira divi rimweni mbhera ku nyumba yo vashandi* vo muthemberi no yo vatengesi, yainga iri phedo no Kumusuvo wo Vavonereri mbhera ku sara yainga panyezuru po cikhona co mupfimbiji.
32 Vandhu vainasirira mujiyo ngo goridhi no vatengesi, vakanasirira divi rainga pakati po nyumba yo mudenga phedo no pacikhona no Musuvo wo Mavhuta.
Masoko o Pasi
^ Kana: “anonuhira.”
^ Zvinonangira kudira pavhimento yo mapuwe.
^ Kana: “Forno Yokubikira.”
^ Mametru anokwana kuita 445. Vonanyi Masoko Okuengejera B14.
^ Kana: “Sime, Dima.”
^ Kana: “Gandhwa ro Kumwa riri.”
^ Kana: “Vanetinimi.” Gama ngo Gama: “Vandhu vakapekejwa Mwari kuti vamushandire.”
^ Kana: “Vanetinimi.” Gama ngo Gama: “Vandhu vakapekejwa Mwari kuti vamushandire.”
