Neemiya 4:1-23
4 Sanibharati paakazwa kuti tainga tecivakisa mupfimbiji, wakacamwa wonyangajwa maningi, wotanga kushora Vajudha.
2 Paainga ari pamberi po hama jake no masoca o Samariya, iyena wakati: “Vajudha ava vakarembejekari vari kuitenyi? Vanorangarira kuti vanozokwanisa kuita izvi vega? Vanozoita mupiro? Vanozokwanisa kupeja basa iri pa njiku imwe basi? Kureva kuti vanokwanisa kuronga mapuwe akapsa oita mututu?”
3 Tobhiya mu Amoni wainga pamutivi pake, wakati: “Pikija muhwe waizokwanisa kuphwanya mupfimbiji wo vari kuvakari, kudari ukakhwira panyezuru pawo.”
4 Inini ndakaita mukumbiro ndeciti: Imwimwi Mwari wedu izwanyi, ngokuti tiri kushaishwa kutajwa. Itanyi kuti kushora kwavo kuwire pamusoro javo, ivona ngavatohwe kuendeswa kuuranda inga zviro zvinotohwa kuendeswa ku nyika iri ndhambo.
5 Mucafukija ndava yavo, nee kusiya kuti cishaishi cavo cipfujuhwe pamberi penyu, ngokuti vakatuka vavaki.
6 Ngo kudaro, takaenderera mberi tecivaka mupfimbiji, mupfimbiji wese wakabatana, tovakisa mbhera bindikati ro kureba kwawo, vandhu vakaenderera mberi vecishanda ngo mwoyo wese.
7 Sanibharati, Tobhiya, Vaarabhiya, Vaamoni no Vaashidhodhi, pavakaziva kuti mupfimbiji jo Jerusarema jainga jecienderera mberi jecivakiswa, vozivazve kuti mupfimbiji jainga japera kubatana, vakanyangajwa maningi.
8 Vese vakapangana kuti vaviye kuzohwisa Jerusarema no kuriitisa joweyowe.
9 Asi takaita mukumbiro kuna Mwari wedu, todira varindiri kuti vatijivirire usiku no masikati.
10 Ngo kudaro, Vajudha vamweni vainanga kudari: “Vashandi vapera kuremba, kuno mututu jakawanda, itusu atizokwanisizve kuvakisazve mupfimbiji.”
11 Vavengi vedu vainanga kudari: “Vacito vazviziva no kutivona, itusu tinozonghwina pakati pavo, tovauraya no kuimisa basa.”
12 Vajudha vaigara phedo navo, mukuvo wese povaiviya kwatiri, vainanga kudari: “Ivona vanozotihwisa vecivha ngo mativi ese.”
13 Ndakaenderera mberi ndecidira vangwariri mu ndau jakaderera no jicizivi kungwaririka jo sure ko mupfimbiji. Inini ndakavadira mukuzwirana no mbhuri javo vano mapanga, mukhondo* no uta.
14 Pandakazvivona kuti ivona vainga vecithya ndakakasika koovhunja vandhu vanoreremejwa, vatongi no vandhu vamweni vese kudari: “Mucavathya. Ceujanyi Jehovha, iyena mukuru, anoshamaisa. Ihwanyi kuitira hama jenyu, vana venyu vorume no vokaji, vakaji venyu no muzi jenyu.”
15 Pasure pokuti vavengi vedu vainga vaziva kuti itusu tainga taziva zvavainga veciita, vozivazve kuti Mwari wo cokwadi wainga wavhiringija mazano avo, itusu tese takahwirirazve kobata basa ku mupfimbiji.
16 Kuvhira njiku yondhoyo kwenda mberi, bindikati ro vanarume vangu vaishanda basa rokuvakisa mupfimbiji, bindikati rimweni raigara recingwarira rino mukhondo,* muvhiko, uta no nguvo jo simbi. Vatungamiriri vaibesera vese vo nyumba ya Judha,
17 vaivaka mupfimbiji. Vanarume vaithwara zviro zvinorema, vaibata basa ngo mukono umwe, mukono umweni waibata mukhondo.*
18 Muvaki umwe na umwe wainga ano banga mucihunu* paainga ecishanda. Mwanarume wairija mbhayapaya wainga phedo na inini.
19 Inini ndakati ku vandhu vanoreremejwa, vatongi no ku vandhu vamweni vese: “Basa iguru, pacota kuti pashandwe pakakura, itusu takati ndha-ndha-ndha mu mupfimbiji. Umwe na umwe wedu ari ndhambo no umweni.
20 Mukazwa kurira ko mbhayapaya, ungananyi kwatiri. Mwari wedu anozohwa pandau yedu.”
21 Ngo kudaro, takaenderera mberi tecishanda, bindikati rimweni ro vanarume rainga rino mukhondo* mu nyara, kuvhira kubuda ko zuva mbhera kubuda ko ndhondho.
22 Mu mukuvo wondhowo ndakavhunja vandhu kudari: “Vanarume vese no vabeseri vavo ngavaejehwe mu Jerusarema. Cousiku ivona vanozoshanda inga vangwariri kwatiri, comasikati, vanozobata basa pa mupfimbiji.”
23 Ngo kudaro, inini, hama jangu, vabeseri vangu no vangwariri vaifamba na inini, atizivi kumbocinja nguvo, umwe na umwe wedu waigara no mukhondo* wake munyara yo muho.
Masoko o Pasi
^ Thurusi rinoshandiswa ku hondo.
^ Thurusi rinoshandiswa ku hondo.
^ Thurusi rinoshandiswa ku hondo.
^ Vonanyi Kudurujihwa ko Magama.
^ Thurusi rinoshandiswa ku hondo.
^ Thurusi rinoshandiswa ku hondo.
