Neemiya 5:1-19
5 Tevere, vanarume no vakaji vavo vakacema* maningi vecin’gun’gutira Vajudha hama javo.
2 Vamweni vainanga kudari: “Itusu no vana vedu vorume no vokaji takawanda. Tinoda zvokuha kuti tihe, kuti tienderere mberi tecipona.”
3 Vamwenivo vainanga kudari: “Tiri kupa vandhu munda jedu, muuvha jedu no nyumba jedu kuti tizokwanise kuwana zvokuha ngo ndava yo njara.”
4 Kuveni vamweni vainanga kudari: “Takafiyari mare kuti tishabire mambo, tecipa vandhu munda yedu no muuvha yedu.
5 Asi itusu no hama jedu tiri sangi imwe no nyama imwe, vana vedu vakaezana no vana vavo. Asi pikija zvakadaro, itusu tinodikana kupira vana vedu vorume no vokaji kuti vaithwe varanda. Vana vedu vamweni vokaji vavaranda. Itusu aticakwanisi kuita ciri cese kuti tizvikamise, ngokuti munda yedu no muuvha yedu zva zvovamweni.”
6 Pandakazwa kucema* kwavo no kuzwa masoko aya, ndakanyangajwa maningi.
7 Ngo kudaro, ndakanasa kurangarijisisa ngo pamusoro po shwiro iyi, ndotanga kuvereketa no vandhu vanoreremejwa no vatongi ngo pamusoro pazvo, ndovavhunja kudari: “Imwimwi mwese muri kukumbira hama jenyu kamare kuti jimubarise mare.”
Kusiyapo zvondhozvo, ndakadaninja vandhu vakawanda ngo ndava yo zviro zvavaiitaro.
8 Inini ndakavavhunja kudari: “Itusu takaita zvese zvataikwanisa kuti tiponese Vajudha hama jedu vainga vakatengesehwa majinja. Asi waro ngenyi imwimwi mungatengesa hama jenyu kamare? Kureva kuti tinozodikanavo kuvatenga kuti vaviyezve kwatiri?” Ngo kuzwa masoko aya, vakanyarara vokonehwa zvokunanga.
9 Ndakaenderera mberi ndecivavhunja kudari: “Zvamuri kuitari azvizivi kunaka. Amucaidikanepi kufamba mecithya Mwari wedu, kuti majinja awo ari vavengi vedu atame kutishora here?
10 Inini no hama jangu no vabeseri vangu takavafiyarisivo mare no zvokuha. Ndapota, ngatikame kufiyarisi mare tecivetera kuzowana yakawanda.
11 Ndapota vahwirijirenyi nyamasi kamare munda javo, muuvha javo, muorivhe javo no nyumba javo. Vahwirijirenyizve mare* yavo, zvokuha zvavo, vhinyu yavo imbza no mafuta avo zvamakavaita kuti vabarise.”
12 Ivona vakadavira kudari: “Itusu tinozovahwirijira zviro izvi, atizovakumbirizve ciri cese. Tinozoita mukuzwirana no zvamananga.” Ngo kudaro, ndakadaninja vapiri ndoita kuti vanarume ava vapike kuti vanozoita zvavakagondesa.
13 Kusarepo, ndakavhuruza nguvo yangu ndoti: “Inga zvandavhuruzari, mundhu wese acingaiti zvaagondesa, anozovhuruzihwa kunja ko nyumba yake no ko zviro zvake ndi Mwari wo cokwadi. Iyena anozoitihwa zvondhozvo ozosara acina ciro.” Ungano yese yakadavira kudari: “Ameni!” Ivona vakasimba Jehovha. Vandhu vakaita zvavakagondesa.
14 Kusiyapo izvi, kuvhira pa njiku yaakandigaja inga govhernadhori wo nyika yo Judha, mu gore romakumaviri mbhera mu gore ro makumatatu na maviri o kutonga ka mambo Aritasheshi, pa gumi ro makore no makore maviri, inini no hama jangu atizivi kuha zvokuha zvaifanera kupuwa govhernadhori.
15 Asi magovhernadhori akatanga kutonga, akapekeja vandhu muthwaro unorema. Kunja kwa izvi, njiku jese aikumbira vandhu makumarongomuna o mashekeri* o sirivha kuti vatenge zvokuha no vhinyu. Pikija vabeseri vavo vaibzinyiriravo vandhu. Asi inini andizivi kuita kudaro, ngokuti ndaithya Mwari.
16 Kusiyapo zvondhozvo, inini ndakashanda pa basa ro kuvakisa mupfimbiji. Itusu atizivi kuwana munda uri wese hawo. Vabeseri vangu vainga vakaungana pondhopo kuti vabate basa.
17 Painga no mutengo unokwana kuita 150 wo Vajudha no vatongi vaiha pa meza yangu, kubatanijavo no vandhu vamweni vaivha kumajinja ainga akatitendeneja.
18 Njiku jese paiuraiwa n’gombe yorume, mavhuta matandhatu akanaka no shiri kuitira inini. Pa gumi ro njiku tainga tino vhinyu yakawanda maningi yo mushovo wese. Pikija pa zvese izvi, andizivi kukumbira vandhu zviro zvokuha zvaifanera kupuwa govhernadhori, ngokuti vandhu vainga veciremehwa ngo basa.
19 Ngo kudaro, ndakakumbira ndeciti: “Mwari wangu, ndiceukijenyivo mundikomborere, ngo zvese zvandakaita kuti ndibesere vandhu ava.”
Masoko o Pasi
^ Kana: “vakarira.”
^ Kana: “kurira.”
^ Gama ngo Gama: “1%.” Kana kuti 1% yo mare yamakavaita kuti vabarise mweji ngo mweji.
^ Shekeri imwe yairema 11,4 g. Vonanyi Masoko Okuengejera B14.
