Rute 4:1-22
4 Bhowazi wakaenda pa musuvo wo dhorobha, wogarepo. Ukama wo phedo wa Erimereki wakanangwaya ndi Bhowazi wakapindavo ngo pondhopo. Ngo kudaro, Bhowazi wakati: “Nandimwi, viyanyi kuno mugare nga apa.” Iyena wakaviya wogara pasi.
2 Perapo Bhowazi wakadanija gumi ro vakuru vo mudhorobhemo wovavhunja kudari: “Garanyi apa.” Ivona vakagara pasi.
3 Bhowazi wakananga kudari ecivhunja ukama hwo phedo wa Erimereki: “Naomi wakavhaya ku Moabhi, anodikana kutengesa munda wo hama yedu Erimereki.
4 Ngo kudaro, inini ndinoda kukuvhunja kudari: ‘Tengai munda uwu pamberi po vagari vamuno, no vakuru vo vandhu vangu. Zvecivoneka kuti iwewe uri ukama hwake hwo phedo, utengei. Kudari ucikadi kuutenga ndivhunjei ngo kuti inini ndinotevera sure kwako.’” Iyena wakadavira kuti: “Inini ndinoda kuutenga.”
5 Bhowazi wakadavira kudari: “Njiku yaunoda kutenga munda wa Naomi, unodikanavo kutenga munda wa Rute, Mumowabhi, mukaji wa nyakufa kuti umusijire zina rake ngo kubara mwana anozogara utaka munda wake.”
6 Ukama hwo phedo wa Erimereki wakananga kudari: “Inini andikwanisi kuutenga munda uwu, ngokuti zvinozondiitisa murombo. Utengei iwewe ngo zina rangu, ngokuti inini andikwanisi kuutenga.”
7 Cirovejeso cainga ku Iziraeri ngo pamusoro po kubesera mundhu ari wese no kucinja citendehwa cino mundhu kakucipekeja mundhu umweni, cainga ici: Mundhu wiya wainga no citendehwa, waidikana kuvhura sandariya* wopekeja umweni. Kuita kudaroko mu Iziraeri, zvaikhombija kuti ivona vazwirana pa citenderano.
8 Mundhu wiyana paakavhunja Bhowazi kuti: “Utengei iwewe,” iyena wakavhisa sandariya.*
9 Bhowazi wakavhunja vakuru no vandhu vese kudari: “Imwimwi muri kuzvivona nyamasi kuti inini ndiri kutenga na Naomi zviro zvese zva Erimereki no zviro zvese zva Kiriyoni na Maroni.
10 Ndiri kutoravo Rute Mumowabhi, wainga mukaji wa Maroni kuti aite mukaji wangu. Kuti ndimusijire zina ra nyakufa ku zviro zvaakasiya. Kuti zina rake ritame kupfujuhwa, pakati po hama jake no pamusuvo po dhorobha rake. Imwimwi muri kuzvivonavo nyamasi.”
11 Vandhu vese vainga pa musuvo wo dhorobha no vakuru, vakananga kudari: “Tiri kuzvivona. Jehovha ngaaite kuti mukaji wako, ari kunghwina mu nyumba mako, aezane na Rakeri na Riya, vakavangisa nyumba ya Iziraeri. Budirirai ushoni mu Efrata, uve no zina raushoni mu Bheterehema.
12 Vana vaunozopuwa ndi Jehovha ecishandisa musikane uwu, ngavaite kuti nyumba yako iezane no nyumba ya Perezi, mwana wa Judha waakabara na Tamari.”
13 Ngo kudaro, Bhowazi wakatora Rute wova mukaji wake. Iyena wakavata naye, Jehovha womutendera kuti ave no mimba wobara mwana wo rume.
14 Ngo kudaro, vanakaji vakati kuna Naomi: “Ngaakujwe Jehovha, ngokuti aazivi kumukusiya mucina mubeseri nyamasi. Zina ro mwana uwu, ngaritokoteswe mu Iziraeri.
15 Muzukuru uwu, wamunyaraja mu upenyu hwenyu. Iyena anozomuvangisa mu ukarahwa hwenyu. Iyena wabahwa ngo nyamwana yenyu,* wiya anomuda. Iyena wakanaka maningi kwamuri kupinda vana vanomwe vorume.”
16 Naomi wakatora mwana uwu, womubata mu nyara, womurera.
17 Vanakaji vocigarisano vakamudura zina, ivona vakati: “Naomi wabarihwa mwana.” Ivona vakamudura kuti Obhedhi. Ndiyena baba wa Jesi, baba wa Dhavhidhi.
18 Mubarihwa wa Perezi nga uwu: Perezi wakabara Ezironi,
19 Ezironi wakabara Aramu; Aramu wakabara Aminadhabhi.
20 Aminadhabhi wakabara Naasoni; Naasoni wakabara Saremoni;
21 Saremoni wakabara Bhowazi; Bhowazi wakabara Obhedhi;
22 Obhedhi wakabara Jesi; Jesi wakabara Dhavhidhi.
