Woo büst duu uptrekt woore?

Ik bün geboore woore in Itália 1943. Ik, mijn bruirers un mijn swesters däire in ain klain stad wåne woo mij papa land har un daile måke däir mit hult. Oos papa un mama häwe oos uptrekt taum katolisch sin.

Woweegen wust duu katolisch praister ware?

As ik klain wäir, däir ik sër gërn hööre wat dai katolisch praisters säge däire ine kirch un wat sai måke däire. Dårweegen wul ik gërn katolisch praister ware. As ik 13 jåre uld wäir mijn mama hät mij insreewe in ain schaul woo jonges lëre däire taum ain tijd foiruut inlërt ware taum katolisch praisters sin.

Däire jij dai Bijbel lëre in dës schaul?

Ni feel. As ik 15 jåre uld wäir, air schaullërer hät mij air bauk geewt wat fortele däir oiwer Jësus sij leewend un sijne preegarbëd. Dit bauk häw ik sër feelmål leest. As ik 18 jåre uld wäir, häw ik anfånge lëre in wek groote schaule in Roma, wat dai papa oiwersich har. Dår häw ik lërt latim, grego, psicologia, teologia un andrer. Wij däire wek sprüüch fone Bijbel säge un däire hööre dai Bijbel leese ine kirch, åwer, lëre däire wij dai ni.

As duu schef wäirst in dai groot schaul däirst duu inlëre?

Mijne arbëd wäir ales in ordnung hule wat dår måkt ware däir. Åwer wekmåls däir ik schaul hule.

Woweegen wäirst duu dij ni mër soo sicher oiwer dat wat dai kirch inlëre däir?

Weegen drai daile. Sai däire sich mank politik mankmische. Sai däire dai forkërde daile anneeme wat dai katolisch praisters un dai wat tau dai kirch tauhööre däire maike. Tau mij, wek daile wat sai inlëre däire, wäire ni richtig. Soo as, ik däir mij fråge: Woweegen däir air lijb God aine mësch wat dood is, up ümer stråfe? Uk, wil God dat wij schåle ümer werer dai wöör nå säge wen wij beere, uk nog ain keer mit krale benutse? *

Wat häst duu måkt?

Mit tråne in oogen häw ik beert tau God taum mij belërung geewe. Ik häw mij ain katolisch Bijbel köft. Dai wäir sreewe up italiano un däir haite Bíblia de Jerusalém. Ik häw anfånge dai leese. Aine sündag morgen, as dai kirch uut wäir, ik däir mijn talar henhänge, sin twai kërls nå mij kåme. Dai häwe sich bekand måkt soo as Jehovaas Tüügen. Wij häwe oiwer ain stuun lang fortelt oiwer wosoo dai Bijbel oos helpe däit dai wår religion kene.

Wat häst duu maint oiwer dës kërls?

Een sicherhët wäir taum bewunren un woo licht tau eer wäir dai sprüüch fijne in dai katolisch Bijbel. Ain tijd nåheer, air anerd Jehovaas Tüügen is kåme taum mij besuiken, wat Mario haite däir. Hai har groot geduld un däir sij woord hule, dat küün reegen urer sün sin, jërer sunåwend, däir hai mij besuike.

Wat däire dai andrer katolisch praisters dåroiwer maine?

Ik däir eer nööge taum dai Bijbel lëre, åwer sai däire dat kaine wërd geewe. Åwer, mij däir dat sër gefale, weegen dat wat ik lëre däir, wäir sër wat gaures. Ik häw lërt woweegen God dai slechte daile un dai nood erlaube däit. Daile wat ik sër lang waite wul.

Häwe dai andrer katolisch praisters dij taureert taum anhule dai Bijbel lëre?

In 1975, bün ik feelmål nå Roma henrëst taum eer uutdüüren wat ik maine däir. Dai katolisch praisters häwe forsöcht mijn gedanke aners måke, åwer sai häwe dår kain Bijbel tau benutst. Dun, der 9 januar 1976, häw ik aine braif tau Roma hensreewe taum säge dat ik ni mër katolisch wäir. Twai dåg nåheer, bün ik uut dai groot schaul ruutergåe un bün henrëst mite ijserbån tau mijn airst kristlig forsamlung fon Jehovaas Tüügen saie, dat wäir aine dag kongress. Jërer ainsig wat dår wäir har sijn aigen Bijbel, un däire dai upmåke taum dai sprüüch mitleese. Dat wäir gans aners wat ik gewoont wäir.

Wat däir dijn familg dåroiwer denke?

Dai mëste däire mij ni bijståe, åwer ik häw ruuterkreege dat mij air braurer dai Bijbel lëre däir mit Jehovaas Tüügen in nord fon Itália. Ik bün em besuike gåe, un dai Jehovaas Tüügen fon dår häwe mij hulpe aine arbëd krijge un ain stel taum wåne. Spåre hen in dem jår bün ik tauwt woore soo as Jehovaas Tüügen.

Däit dij dat lëd dat’s duu dit ales måkt häst?

Gans sicher ni! Weegen nuu forneem ik mij näiger bij God. Dat wat ik waite dau kümt fone Bijbel un ni fon der lüür eer gedanke. Un nuu krijg ik andrer inlërt mit sicherhët un wårhët.