Dat wij foirwärtsgåe im gloobe, weegen Jehovaa sij groot dag is dicht raner
Dat wij foirwärtsgåe im gloobe, weegen Jehovaa sij groot dag is dicht raner
‘Wij daue foirwärtsgåe.’ (HEBREUS 6:1)
1, 2. Wosoo küüne dai kristen wat wåne däire in Jerusalém un Judeia wegloope nå dai bärg?
AS Jësus hijr, upt Ër, wääst is em sijn jüngers häwe em frågt: “Wat fon saichen wart sin wen’s duu al regijre däist un fon dat ën fone wild?” Dat wat Jësus antwoort hät wäir ain profesijr. Air stük fon dës profesijr is passijrt im airste jårhuunerd. Jësus hät sägt oiwer air bewunrig dail wat wijse däir dat Jerusalém bald uutrote ware däir. Wen dat passijre däir, dai wat in Judeia wäire, müste wegloope nå dai bärg. (Mat 24:1 bet 3 un 15 bet 22) As dat passijrt is, häwe dai jüngers forspoirt dat dat wäir woo Jësus oiwer fortelt har? Häwe sai Jësus horgt?
2 Bijnå 30 jåre nåheer in dat jår 61, apostel Paulo hät stark formånt dai kristen wat wåne däire in Jerusalém un dicht bij dår. Paulo un dai andrer kristen wüste ni, åwer dat wat Jësus sägt hät wat passijre däir, däir bloos 5 jåre nåheer passijre. (Mat 24:21) In dat jår 66, dai röömer soldåte wäire üm Jerusalém rümer. Sai häwe Jerusalém bijnå inbråke. Åwer dun, mit ais, sin sai weggåe. Soo, küüne dai kristen uk wegloope nam anerd stel.
3. Wat fon formånung hät Paulo dai kristen geewt? Woweegen?
3 Dai kristen müste saie un forståe dat dat wat passijre däir, wäir dat woo Jësus oiwer fortelt har. Soo küüne sai wegloope in sicherhët. Åwer wek häwe ni glijk forståe dai daile wat passijre däire. Woweegen? Eer sij gloobe wäir ni stark. Sai wäire soo as klaine kiner wat nog “melk” drinke däire. (Lees Hebreus 5:11 bet 13) Wek fon dai wäire al kristen fon feel jårelang. Åwer däir soo uutsaie dai eer ümgang mit Jehovaa swark woore wäir. (Heb 3:12) Sai wüste dat dai dag woo Jerusalém uutrot ware däir, däir bald ranerkåme. Åwer lijkerst soo wek günge ni upe forsamlunge. (Heb 10:24 un 25) Dårweegen, Paulo hät eer formånt: “Soo, nuu dat wij dai airste lëren oiwer Kristus hijnerlåte häwe, daue wij foirwärtsgåe.” (Heb 6:1)
4. Woweegen muite wij aine starke ümgang mit Jehovaa häwe?
4 Dai profesijr wat Jësus sägt hät däit hüüt passijre. Jehovaa sij groote dag kümt bald raner, dai dag woo hai Satan sijn wild uutrote däit. (Sof 1:14) Dårweegen, muite wij aine starke ümgang mit Jehovaa häwe. (1 Ped 5:8) Häst duu soo’n ümgang? Aine starke gloobe häwe helpt oos forståe dat wij ine lätste dåg sin.
Wosoo koine wij aine starke gloobe häwe?
5, 6. (a) Wosoo koine wij aine starke gloobe häwe? (b) Wat fon twai daile helpe oos foirwärtsgåe im gloobe?
5 Paulo hät tau dai kristen in Jerusalém sägt, sai schule aine starke gloobe häwe. Åwer hai hät uk sägt wosoo küüne sai dat häwe. (Lees Hebreus 5:14) Paulo hät sägt dai ainfacher wårhëte fone Bijbel sin soo as “melk”. Åwer wij bruuke dat “stark eeten” urer dai daile wat ni ainfach sin taum forståen. Wij muite dai studijre taum aine starke gloobe häwe. (1 Cor 2:10) Dai wat aine starke gloobe häwe, strenge sich an leewe nå dat wat sai lëre ine Bijbel. Un dit däit eer helpe forståe wat richtig un forkërd is. Den, wen sai wat uutsuike muite, sai koine benutse wat sai lërt häwe ine Bijbel.
6 Paulo hät sreewe: “Dårweegen is nog mër nöörg uppasse an dai daile wat wij hööre daue, dat wij ais ni uutm weeg gåe.” (Heb 2:1) Dat kan mit oos passijre ån dat wij dat forspoire. Åwer dat wart ni mit oos passijre, wen wij nog mër uppasse solang as wij dai Bijbel studijre. Den, jërer ainsig fon oos mut sich fråge: ‘Dau ik bloos ainfach daile studijre? Lees ik dai Bijbel weegen ik lijb dat måke urer bloos weegen ik mut dat måke? Wosoo kan ik mijne gloobe stärke?’ Taum foirwärtsgåe im gloobe wij muite twai daile måke. Airst, wij muite God sij Woord gaud kene. Un twait, wij muite “lëre” wosoo horge.
God sij Woord gaud kene
7. Wosoo helpt oos God sij Woord gaud kene?
7 Paulo hät sreewe: “Dai wat nog melk drinkt, däit ni dat woord kene wat dai gerechtigkët inlërt weegen dai is soo’s air klair kind.” (Heb 5:13) Taum aine starke gloobe häwe, wij muite God sij Woord gaud kene. Dårweegen wij muite God sij Woord, dai Bijbel, studijre un uk dai buiker wat dai “reäl un forständig eskrav” oos giwt. (Mat 24:45 bet 47) Dat måke helpt oos denke soo as Jehovaa denke däit. Dau saie wat passijrt is mit ain swester. Sai hät sägt: “As ik anfånge häw dai Bijbel leese jërer dag, dat hät mij leewend aners måkt. Ik häw in 2 jåre dai Bijbel doirleest. Åwer, tau mij, wäir soo’s ik God wirklig kenelërt har. Ik häw feel oiwer Jehovaa lërt. Ik häw lërt dat wat em gefült urer ni, dat hai macht hät un dat hai sër klauk is. Jërer dag dai Bijbel leese hät mij al hulpe un däit mij nog helpe in dai slimst tijd fon mij leewend.”
8. Wat passijrt wen wij jërer dag dai Bijbel leese?
8 Wen wij God sij Woord jërer dag leese, dai kan ‘kraft häwe’ oiwer oos. (Lees Hebreus 4:12) Dit kan oos helpe aners ware un soo Jehovaa nog mër gefale. Bruukst duu mër tijd ruuterneeme taum dai Bijbel leese un grüüwle?
9, 10. (a) Wat bedüürt God sij Woord gaud kene? (b) Wat lëre wij mit dat wat passijrt is mit swester Kyle?
9 Is sër gaud dai Bijbel kene. Åwer wij muite nog mër måke. In Paulo sijn tijd, dai lüür in Jerusalém däire dai Bijbel kene. Åwer sai däire ni nå dai Bijbel leewe. Tau eer, däir dat ni loone måke wat ine Bijbel stüün. Un wen sai wat uutsuike müste, sai däire ni an dai Bijbel denke.
10 Wij muite God sij Woord gaud kene un nå dai leewe. Wosoo krijge wij dat måkt? Dau saie wat passijrt is mit ain swester wat Kyle hit a. Sai hät sich mit ain fruug fortöönt wat t’hoop mit eer arbëre däir. Dun, wat hät sai måkt? Sai hät sägt: “Ik häw an Romanos 12:18 dacht. Dår stäit: ‘Wen hengiwt, wat up juuch up an kümt, blijwt im freere mit ale.’ Dun, ik häw afreert t’hoop mit eer fortele nå dai arbëd.” Nå dit, sai häwe sich fordrågt. Un dai fruug hät sich bewunret mit dat wat swester Kyle måkt hät.
Woo koine wij “lëre” horge?
11. Wosoo dat wat passijrt is mit dai israeliten däit oos wijse dat ni licht is Jehovaa dijne wen wij slime daile doirsete?
11 Wekmåls kan ni licht sin måke wat ine Bijbel stäit, uphaupt wen wij slime daile doirsete. Denk an dai israeliten. Air bits nåheer dat Jehovaa eer fraimåkt hät fon Egito, sai häwe sich mit Moisés fortöönt un wäire sich ni mër sicher dat Jehovaa eer helpe küün. Woweegen? Weegen sai hare kair wåter taum drinken. (Êxo 17:1 bet 4) Dai israeliten häwe forspråke ales måke wat Jehovaa eer sägt har. Åwer bloos 2 månate nåheer sai häwe ni Jehovaa horgt un häwe air gemåkt dail anbeert. (Êxo 24:3, 12 bet 18 un 32:1, 2 un 7 bet 9) Dat Moisés lang tijd wegbleewe is, kan sin sai häwe angst fornåme. Urer sai häwe dacht eer fainde küüne gëgen eer kåme, weegen Moisés wäir ni bij eer taum eer helpe un eer behüüte. (Êxo 17:8 bet 16) Kan sin wat is, åwer dai israeliten häwe ni wuut Jehovaa horge. (Atos 7:39 bet 41) Paulo hät dai kristen formånt dat sai schule sij best måke taum ni dai neemlige forkërde daile måke wat dai israeliten måkt häwe as sai ni Jehovaa horgt häwe. (Heb 4:3 un 11)
12. (a) Wosoo hät Jësus “lërt” Jehovaa horge? (b) Woweegen is dat gaud wääst tau em?
12 Wen’s duu wilst aine starke gloobe häwe, duu must dij anstrenge taum Jehovaa horge. Genau soo as Jësus, wen wij swår daile doirsete, wij lëre wosoo Jehovaa horge. (Lees Hebreus 5:8 un 9) Airer as hijr upt Ër wääst is, Jësus däir sijn fåter horge. Åwer, is slime wääst tau em Jehovaa horge as hai hijr upt Ër wääst is. Woweegen? Weegen hai däir feel slime daile doirsete. Åwer dit hät Jësus “trecht” måkt taum köönig un oiwerst praister sin.
13. Wat däit wijse of wij “lërt” häwe Jehovaa horge urer ni?
13 Un duu, däist duu Jehovaa horge lijkerst wen dat ni licht is? (Lees 1 Pedro 1:6 un 7) God giwt oos klår formånungs oiwer dat wat richtig un forkërd is, reäl sin, gaure daile fortele, dai Bijbel leese un studijre, up dai forsamlunge gåe un oiwer preegarbëd. (Jos 1:8, Mat 28:19 un 20, Efé 4:25, 28 un 29 un 5:3 bet 5 un Heb 10:24 un 25) Daue wij dës formånungs horge lijkerst wen dat ni licht is? Wen wij dat måke, dat wijst wij häwe aine starke gloobe.
Woweegen is dat gaud tau oos aine stark gloobe häwe?
14. Wat is passijrt mit braurer James?
14 Denke soo as Jehovaa denkt oiwer dat wat richtig un forkërd is, dat däit oos behüüte fon dai slechtigkët fon dai lüür ine wild. (Efé 4:19) Sai as wat passijrt is mit air braurer wat James hit. Hai däir sich anstrenge oos buiker oiwer dai Bijbel leese un däir dat wërd geewe. Mitm tijd, hai hät anfånge arbëre up ain stel woo bloos fruuges arbëre däire. Braurer James hät sägt: “Dai mëste fon eer däire denke wäir kair forkërd dail huurerig måke. Åwer, ain fon dai wäir aners un saigt soo uut, sai wul mër oiwer dai Bijbel waite. Åwer, aine dag as wij alaine wäire, sai wul seks mit mij måke. Ik häw dacht dat wäir ni wår, åwer sai wul wirklig dit måke. Åwer, ik häw glijk andacht wat passijrt is mit air braurer soo as stäit in ain Wat Bekandmökt. Dat neemlig dail wat passijrt is mit em däir passijre mit mij. In dës Wat Bekandmökt stäit uk oiwer José un Potifar sijn fruug. b As ik andacht häw wat ik leest har, ik häw eer glijk wegschåwe un sai is wegloope.” (Gên 39:7 bet 12) James hät sich licht fornåme dat hai ni air forkërd dail måkt hät. (1 Tim 1:5)
15. Wat krijge wij wen wij aine starke gloobe häwe?
15 Aine starke gloobe häwe helpt oos nog düler reäl sin tau Jehovaa. Helpt oos uk dat wij ni oos bedraige låte fon inlëren wat ni wår sin. (Lees Hebreus 13:9) Wij daue der oiwerste daile mëre wërd geewe wen wij oos anstrenge aine starke gloobe häwe. (Fil 1:9 un 10) Wij daue uk nog düler dankbår sin for ales wat God oos geewt hät un for ales wat hai al måkt hät for oos. (Rom 3:24) Air krist wat dai daile genau forståe däit, däit Jehovaa danke un däit aine starke ümgang mit em häwe. (1 Cor 14:20)
16. Wat hät swester Louise hulpe Jehovaa dijne mit eene ganse härts?
16 Swester Louise hät sägt dat nå dat sai sich tauwe låte har, sai däir sich soo dul ankëre wat dai andrer oiwer eer denke däire. Sai hät sägt: “Ik däir nischt forkërd måke, åwer ik har kain groot lust taum Jehovaa dijne. Ik wüst, ik müst wek daile aners måke taum mij best tau Jehovaa måke. Dai slimst dail tau mij wäir Jehovaa dijne mit mijne ganse härts.” Swester Louise hät sich anstrengt dit måke un dit hät eer hulpe as sai ain slim krankhët doirset hät. (Tia 5:8) Sai hät uk sägt: “Ik häw mij sër dul anstrengt, åwer ik häw mijne ümgang mit Jehovaa stärkt.”
‘Dau mitm ganse härts horge’
17. Wosoo is dat gaud wääst dat dai kristen in Jerusalém un Judeia horgt häwe?
17 Paulo hät dai kristen fon Jerusalém un Judeia formånt sai schule aine starke gloobe häwe. Dës formånen hät eer leewend reert. Dai wat dit måkt häwe, häwe genau forståe wat Jësus sägt hät oiwer wegloope nå dai bärg. As sai saie häwe dat dai soldåte fon Roma üm Jerusalém rümer wäire, sai häwe glijk forståe sai müste wegloope. (Mat 24:15 un 16) Dai kristen wat Jësus horgt häwe sin fon Jerusalém wegloope airer as sai uutrot ware däire. Air uutgelërt mësch wat Eusébio haite däir hät sägt dai kristen sin wegloope nå Pela stad wat mank dai bärg fon Gileade wäir. Dårweegen sai sin wegkåme fon dat slimst dail wat passijrt is in Jerusalém.
18, 19. (a) Woweegen is gaud tau oos dat wij hüüt al horge? (b) Wat daue wij anerd week lëre?
18 Aine starke gloobe häwe helpt oos horge, un horge däit oos leewend reere wen passijre däit wat Jësus sägt hät oiwer dai “groot nood”. (Mat 24:21) Denk hijr oiwer: Wart dij gefale horge air dail wat dai reäl un forständig eskrav säge däit in dai tijd wat nog kümt? (Luc 12:42) Wij muite nuu lëre ‘mit oos ganse härts’ horge. (Rom 6:17)
19 Taum ain starke gloobe häwe wij muite oos anstrenge forståe wat richtig un forkërd is. Wosoo krijge wij dit måkt? Gaud dai Bijbel kene un “lëre” wosoo horge. Åwer, aine starke gloobe häwe kan ni licht sin uphaupt tau dai juugende. Dai anerd artikel däit wijse wosoo koine dai juugende dit oiwerståe un soo aine starke gloobe häwe.
[Nåt]
a Wek nåmen sin ümstelt woore.
b Sai der artikel “Fortalecidos para rejeitar a transgressão” fon Wat Bekandmökt, 1 Oktober 1999.
Wat häst duu lërt?
• Wat is aine starke gloobe häwe un wosoo koine wij der häwe?
• Wosoo God sij Woord gaud kene helpt oos aine starke gloobe häwe?
• Wosoo “lëre” wij horge?
• Wosoo is dat gaud tau oos aine starke gloobe häwe?
[Frågen taum Lëren]
[Bijld upm sijr 10]
Dai Bijbel kan oos helpe oos problems int raich bringe
[Bijld upm sijrer 12 un 13]
Jësus sijn formånung horge hät der kristen eer leewend in Jerusalém un Judeia rert