Dai Bijbel mökt dat leewend aners

WOWEEGEN hät ain fruug mit mër as 60 jåre uld sinlåte falsche godes anbeere? Woweegen hät air xintoísta praister sijne arbëd låte in sijn religion un is Jehovaas Tüügen woore? Wosoo hät ain fruug wat angenåmen woore is as sai kind wäir, oiwerståe kreege dat sai sich forneeme däir as wen eer papa un mama eer forlåte hare? Wiman’s saie wat wek lüür fortele daue.

“Ik dau kain falsche godes mër anbeere.”​-ABA DANSOU

IS GEBOORE WOORE IN: 1938

LAND: BENIN

GESCHICHT: DÄIR FALSCHE GODES ANBEERE

WAT IK BELEEWT HÄW: Ik bün groot woore in So-Tchahoué, up ain klain stel mit sumpig land dicht bij ain dijk. Dai lüür dår daue sich ernääre mit fisch, mit kööch, mit seege, schåp, swijn un huine. Dår sin kain stråte. Dai lüür daue rëse mit wåterschif un kanoo. Mëstümer dai hüüser wäire buugt mit hult, gras un wek mit taigels. Dai lüür dår, wäire sër arm, åwer lijkerst soo wäir dår ni feel steelerig un andrer gefärlige daile as in der andrer stele.

As ik klain wäir hät mij papa, mij un mijn swester, up ain fetichista stel henbröcht, woo wij wijdaf wäire fon andrer lüür. Dår häwe wij lërt oiwer dai religion. As ik groot wäir, häw ik mij uutsöcht aine god dijne wat Dudua (Oduduwa) haite däir, fon dat folk ioruba. Ik häw aine altar buugt tau der god ümer feel daile anbaire, soo as wörtels wat ine ër wasse, uk ööl, huine, un daile fon meer un soo wijrer. Mëstümer däir ik mij gans gild uutgeewe mit dit ales.

DAI BIJBEL HÄT MIJN LEEWEND ANERS MÅKT: As ik anfånge häw dai Bijbel lëre, häw ik lërt dat Jehovaa dai ainsig wår God is un dat hai ni anneeme däit falsche godes anbeere. (Êxodo 20:4, 5 un 1 Coríntios 10:14) Ik häw forståe wat ik måke müst. Soo, häw ik mij ales ruuterbröcht uut mijn huus wat besägen har mit falsche godes anbeere. Ik häw ni mër forlangt dai lüür wat råre däire, ik däir ni mër t’hoopgåe mit dai religion un däir nischt måke wat besägen har mit eer.

Tau mij, ain fruug mit mër as 60 jåre uld, is ni licht wääst dit ales måke. Weegen dai woo ik ümgang mit har, mijn familg un nåwerslüür wäire ale gëgen mij un däire oiwer mij spote. Åwer ik häw tau Jehovaa beert dat hai mij kraft geewe däir taum måke wat richtig is. Dai wöör in Provérbios 18:10 häwe mij sër trööst: “Jehovaa sij nåme is air stark turm. Dai gerecht löpt dår riner un krigt behüüten.”

Anerd dail wat mij sër hulpe hät is up dai forsamlunge fon dai Jehovaas Tüügen gåe. Dår häw ik uk saie dat wår kristlig lijb. Dat wäir taum bewunre, weegen dai lüür däire leewe soo as dai Bijbel eer dat inlëre däir. Dat hät mij sicherhët geewt dat dai Jehovaas Tüügen dai wår religion häwe.

WOO DAI BIJBEL MIJ HULPE HÄT: Dårnå leewe wat dai Bijbel mij inlëre däir, hät mij hulpe beeter ümgang häwe mit mijn kiner. Wäir soo as wen mij ain groot dracht afnåme wäir. Ik däir mij gans gild uutgeewe mit falsche godes wat mij ni helpe däire, åwer nuu dau ik Jehovaa anbeere, wat al oos eelend, almåke däit up ümer. (Apocalipse 21:3, 4) Nuu häw ik groot frööligkët, weegen ik dau kain falsche godes mër anbeere, åwer ik dau Jehovaa anbeere un ik häw wår sicherhët un behüüten.

“Fon klain an, häw ik nå God söcht.”​-SHINJI SATO

IS GEBOORE WOORE IN: 1951

LAND: JAPÃO

GESCHICHT: XINTOÍSTA PRAISTER

WAT IK BELEWT HÄW: Ik bün uptrekt woore in Fukuoka stad. Dai religion har groote wërd tau mijn papa un mama. As ik klain wäir, sai häwe mij inlërt dai xintoístas godes ëre. As ik nog jong wäir, ik däir ümer an mij reren andenke un ik wul sër dai lüür helpe wat hülp bruuke däire. Ais ine schaul, dai schaullërer hät oos frågt wat wij måke wule in dai tijd foiruut. Dai wat t’hoop mit mij lëre däire, däire genau waite wat sai måke wule, soo as air uutgelërt mësch is. Ik häw sägt ik wul gërn God dijne. Sai häwe oiwer mij lacht.

Nå dat ik uutlërt har, ik bün rinergåe in ain schaul taum schaullërer sin wat oiwer religion inlëre däit. Dår ik häw aine xintoísta praister kenelërt, wat air bauk leese däir mit aim swarte dekel. Hai hät mij frågt: “Sato, wätst duu wat for bauk dit is?” Dat ik der dekel saie häw, ik häw antwoort: “Dai Bijbel.” Hai hät sägt: “Ale dai wat air xintoísta praister sin wile, muite dit bauk leese.”

Ik bün glijk hengåe un häw ain Bijbel köft. Ik häw dai Bijbel henlegt up ain stel licht taum saien un häw dai genau forwårt. Åwer ik har kain tijd taum dai Bijbel leese, weegen ik har feel taum måken ine schaul. As ik uutlërt häw taum praister sin, ik häw anfånge an arbëre in ain kirch soo as air xintoísta praister. Dat wat ik sër gërn wul is passijrt.

Åwer ik häw glijk saie air xintoísta praister sin, wäir aners as dat wat ik denke däir. Dai mëste praisters däire sich ni oiwer dai lüür bekümre un däire bijnå kair lijb tau dai wijse. Feel hare kaine gloobe. Air kërl wat dai kirch nåsaie däir, hät tau mij sägt: “Wen’s duu hijr foirwärtsgåe wilst, dau bloos fortele oiwer dat wat dai lüür inlëre. Oiwer gloobe fortele is forbåre.”

As ik daile höört häw soo as dës, ik bün sër traurig woore. Ik bün bijbleewe in dai xintoísta kirch arbëre, åwer ik häw anfånge upsuiken måke oiwer andrer religione. Åwer kain fon der däir mij gefale. Jij mër religione as ik upsuike däir, jij mër traurigkët däir ik forneeme. Weegen ik däir ni dai wårhët fijne in dai religione.

DAI BIJBEL HÄT MIJN LEEWEND ANERS MÅKT: In 1988, häw ik aine kërl fon budista religion kenelërt. Hai wul dat ik dai Bijbel leese schul. Ik häw andacht an der xintoísta praister, wat jåre trööguut uk tau mij sägt har dat ik dai Bijbel leese schul. Ik häw anfånge dai Bijbel leese un ik bün fröölig woore. Wekmåls, däir ik dai gans nacht oiwer dai Bijbel leese, bet morgens hen.

Dat wat ik leest häw, hät mij hulpe beere tau der God fone Bijbel. Ik häw anfånge mit dat gebeed in Mateus 6:9 bet 13. Ik däir dit gebeed twai in twai stuune måke, lijkerst dat ik uk nog arbëre däir in dai xintoísta kirch.

Ik har feel frågen oiwer dat wat ik leese däir. In dës tijd wäir ik al forfrigt un ik däir waite dat Jehovaas Tüügen dai Bijbel inlëre däire, weegen sai hare mijn fruug al besöcht. Dun, ik häw ain Jehovaas Tüügen söcht un häw feel frågen tau eer måkt. Dat hät mij bewunert, dat sai mijn frågen antwoore däir mit dai Bijbel. Sai hät rangijrt dat air mij dai Bijbel inlëre däir.

Air bits nåheer ik häw anfunge up dai forsamlunge fon Jehovaas Tüügen gåe. Ik häw ni glijk forspoirt, åwer dår wäire wek lüür wat ik slecht behanelt har. Nog soo, sai häwe mij dai hand raikt un häwe mij gaud upnåme.

In dai forsamlunge häw ik lërt dat God wil dat dai kërl sijn familg lijbe un ëre schal. Bet dun hen dat ik feel arbëd har soo as praister, ik har mijn fruug un mijn twai kiner besijdlåte. Ik häw saie dat ik ümer genau dai lüür hööre däir wat ine kirch gåe däire. Åwer nij ais, häw ik dat mit mijn fruug måkt.

Solang as ik foirwärtsgåe däir im lëren, ik häw feel daile oiwer Jehovaa lërt. Un dat hät mij hulpe näig an em kåme. Feel sprüüch häwe mij härts anstöt, soo as Romanos 10:13. Dës spruch sägt soo: “Jërer dai wat Jehovaa sijne nåme anraupe däit, wart rert.” Fon klain an, ik häw nå God söcht, nuu häw ik em fuune!

Ik däir mij ni mër in dai kirch gaud forneeme. Im anfang ik häw feel dacht, oiwer dat wat dai andrer maine däire, wen ik uut der religion ruutergåe däir. Åwer ik har al uutsöcht dit måke, wen ik der wår God fijne däir in anerd stel. Dårweegen in dat jår 1989, ik häw uutsöcht måke dat wat richtig tau mij wäir. Ik bün uut dai kirch ruutergåe un häw mij up Jehovaa forlåte.

Is ni licht wääst dat måke. Dai wat dai kirch nåsaie däire, häwe mij streng formånt, dat ik dår blijwe schul. Is nog slime woore mij uutsuiken tau mijn papa un mama säge. As ik hengåe däir nå eene huus, ik bün sër unruig woore. Mij borst däir wai un mijn bain däire sitre. Feelmåls häw ik anhule un häw beert taum kraft tau Jehovaa forlange.

As ik in eer sij huus wäir, ik häw angst kreege oiwer mijn uutsuiken fortele. Feel stuune sin forbij gåe. Nå dat ik feel beert häw, ik häw ales tau mijn papa uutdüürt. Ik häw tau em sägt dat ik der wår God fuune häw un dat ik ruutergåe däir fon dai xintoísta religion taum God dijne. Mijn papa hät sich forsrekt un is sër traurig woore. Andrer fon mijn familg häwe sich anstrengt taum ümstele wat ik måke wul. Ik wul mijn familg ni traurig låte. Åwer, up dai neemlig tijd, ik däir waite Jehovaa dijne wäir dat richtig. Mite tijd mijn familg hät dat annåme.

Ik wäir ni mër in dai kirch. Åwer ik däir ümer an dat denke, weegen praister sin har groote wërd tau mij. Ik wul sër dat forgeete, åwer feel daile däire måke dat ik werer an dat denke däir.

Twai daile häwe mij hulpe dat ik ni mër an dit denke däir. Airst, ik häw in mijn huus genau söcht ales wat besägen har mit dai xintoísta religion. Dun, ik häw ales forbrent, buiker, bijler un sogår wek düür daile wat groote wërd tau mij hare. Twait, ik wul ümer t’hoop sin mit Jehovaas Tüügen. Dat dai mij bijståe däire un dai ümgang mit eer, häwe mij sër hulpe. Mit langsåm ik häw ni mër andacht an dat leewend wat ik airste har.

WOO DAI BIJBEL MIJ HULPE HÄT: Airste, har ik kain tijd taum mijn fruug un mijn kiner. Dit däir eer traurig låte un sai däire sich alaine befijne. Åwer dai Bijbel sägt dai kërls muite tijd ruuterneeme tau sijn familge. Dat ik dit måkt häw, sai häwe sich ni mër alaine befuune. Mite tijd mijn fruug hät annåme Jehovaa dijne t’hoop mit mij. Nuu, oos jong, oos määke, eer kërl, daue uk Jehovaa dijne t’hoop mit oos.

As ik klain wäir, ik wul God dijne un dai andrer helpe. Ik häw fuune ales wat ik wul un nog mër. Ik bün sër dankbår tau Jehovaa.

“Ik däir waite dat air dail in mij leewend fëgle däir.”​-LYNETTE HOUGHTING

IS GEBOORE WOORE IN: 1958

LAND: ÁFRICA DO SUL

GESCHICHT: SAI DÄIT SICH FORNEEME AS WEN EER PAPA UN MAMA EER FORLÅTE HARE

WAT IK BELEEWT HÄW: Ik bün geboore woore in Germiston, ain stad woo dai lüür ni sër arm wäire un uk ni sër rijk un woo ni feel steelerig un anerd gefärlig daile wäire. Mijn papa un mama däire maine sai krëge mij ni uptrekt, dårweegen häwe sai mij tau ain anerd familg geewt. As ik 14 dåg uld wäir, häwe dai lijb kërl un fruug sich mij annåme un dat wäire mijn papa un mama. As ik dat ruuterkreege häw, häw ik mij fornåme as wen mijn papa un mama mij foracht hare. Ik däir mij ni mër forneeme as wen ik eer kind wäir un däir maine sai däire mij ni forståe.

As ik bijnå 16 jåre uld wäir, häw ik anfånge up stele hengåe taum dansen, drinke un musik hööre. Mit 17 jåre, häw ik anfånge an rooken. Ik wul måger sin, soo as dai fruuges wat dai cigare bekandmåke däir. As ik 19 jåre uld wäir, bün ik nå Johanesburgo hentrekt taum arbëre un häw anfånge slecht ümgang häwe. Ain kord tijd nåheer, häw ik anfånge slecht rere un uk slecht ümgang häwe, feel drinke un rooke.

Bij al den, däir ik ümer nå academia hengåe, däir ik båle smijte t’hoop mit fruuges un andrer daile. Ik däir mij uk sër anstrenge in mijn arbëd taum computadores måke un sër bekand ware, dårweegen däir ik feel gild fordaine. Lijkerst soo, ik wäir ni fröölig. Ik däir mij forneeme as wen ik forlåre wäir, traurig mit mij leewend. Ik däir waite dat air dail in mij leewend fëgle däir.

DAI BIJBEL HÄT MIJN LEEWEND ANERS MÅKT: As ik anfånge häw dai Bijbel lëre, häw ik lërt dat Jehovaa God, lijb is. Un häw uk lërt dat hai sij lijb weese hät doir tau oos sij Woord dai Bijbel geewe. Is soo as wen hai aine braif tau oos sreewe hät taum oose weeg lenke. (Isaías 48:17, 18) Ik häw saie wen ik Jehovaa sijn lijb belërung krijge wul, müst ik groot ümstelen måke in mij leewend.

Air dail wäir, ik müst ümstele måke mit dai woo ik ümgang mit har. Dårweegen häw ik sër in acht nåme dat wat stäit in Provérbios 13:20, sägt soo: “Wee t’hoop mit dai klauke gäit, wart klauk. Åwer wee t’hoop mit dai dume gäit, gäit dat slecht.” Dës spruch hät mij weese dat ik müst sin låte slecht ümgang häwe, åwer gaur ümgang häwe mit dai wat Jehovaas Tüügen sin.

Air dail wat ni licht wääst is tau mij, dat rooken låte, weegen dat wäir sër stark. Åwer mit dai tijd, häw ik dat gewune kreege, dun is anerswat slechte woore. As ik dat rooken låte häw, bün ik 13 kilo fet woore un dat hät mij sër traurig måkt un sin bijnå tëgen jåre lang forbij gåe bet ik werer afmågert bün. Soo, anhule an rooken, is ni licht wääst, åwer ik däir waite dat, dat richtig dail wäir wat ik måke müst. Dårtau, häw ik ümer beert tau Jehovaa dat hai mij helpe däir dat sin låte.

WOO DAI BIJBEL MIJ HULPE HÄT: Hüüt ik bün feel gesuuner. Nuu bün uk fröölig, weegen ik dau ni mër frööligkët suike doir arbëd un rijkhët. Gans aners, ik bün sër fröölig dat ik dai wårhët fone Bijbel tau dai lüür preege kan. Nuu drai fruuges, wat airste mit mij t’hooparbëre däire, daue Jehovaa dijne, t’hoop mit mij un mijn kërl. Airer dat mijn papa un mama doodbleewe sin, häw ik küüt tau eer fortele oiwer dai hofnung wat dai Bijbel oos giwt oiwer dat upleewen fom dood un up ümer leewe in paradijs upe Ër.

Näig an Jehovaa kåme hät mij hulpe ni mër mij soo forneeme as wen ik foracht wäir. Nuu dau ik forneeme dat ik tauhööre dau, tau ain familg ine ganse wild, mit bruirers un swesters ine gloobe. In dës familg häw ik, feel mamas, papas, bruirers un swesters. (Marcos 10:29, 30)

[Bijld upe sijr]

Mank Jehovaas Tüügen, häw ik saie dat wår kristlig lijb

[Bijld upe sijr]

Dai xintoísta kirch woo ik tauhööre däir