Dai Bijbel mökt dat leewend aners

WOWEEGEN hät dai kërl wut trööggåe na sijn papa un mama sijne religion? Woo hät dai kërl aine papa fuune wat hai ümer häwe wul? Lees wat dës lüür sägt häwe.

“Ik müst tröögkåme na Jehovaa.” - ELIE KHALIL

IS GEBOORE WOORE IN: 1976

LAND: CHIPRE

GESCHICHT: IK WÄIR AIR KIND WAT SICH AFLENKT HÄT

WAT IK BELEEWT HÄW: Ik bün geboore woore in Chipre, åwer bün uptrekt in Austrália. Mijn papa un mama sin Jehovaas Tüügen un sai häwe eer best måkt taum mij mithelpe Jehovaa un dai Bijbel lijbe. Åwer as ik nog jong wäir, ik häw mij aflenkt fon Jehovaa. Ik däir haimlig åwends ruutergåe taum mit andrer juugende t’hoop sin. Wij däire wåge urer aute steele un uk andrer slechte daile måke.

Im anfang, ik har angst dat mijn papa un mama ruuterkrijge däire wat ik måke däir, dårweegen däir ik ales haimlig måke. Åwer mit dai tijd häw ik dai angst oiwerståe. Ik bün t’hoopkåme mit lüür wat üler wäire as ik, sai däire ni Jehovaa lijbe un sai häwe mij in gårnischt hulpe. Nåheer, häw ik sägt taum mijne papa un mama ik wul nischt besägen häwe mit eer religion. Mit geduld sai häwe sich sër anstrengt tau mij mithelpe, åwer ik wul nischt waite. Dårweegen, mijn papa un mama sin sër traurig bleewe.

Nåheer as ik for t’huus weggåe bün, ik häw anfånge ane droga rooke, häw sogår feel maconha plant un uk dat forköft. Ik har ain soigisch leewend un ik wäir nachts oiwer ine clubes. Ik bün air wüütend mësch woore. Wen air mij wat säge urer wat måke däir, wat mij ni anståe däir, ik däir sër wüütend ware, srijge un sogår dai andrer slåe. Dat wäir ales wat ik lërt häw wat ik ni måke müst taum air sin wat Jësus någåe däit.

DAI BIJBEL HÄT MIJ LEEWEND ANERS MÅKT: Ik har groot ümgang mit air wat uk drogas benutse däir. Em sijne papa is doodbleewe as hai gans klain wäir. Wij däire ümer fortele bet gans spår hen. Wek måls hai däir uutm härts fortele woo em sijn papa em fëgle däir. Dat ik waite däir fon klain up dat dai lüür werer upståe daue, ik häw glijk anfånge mit em fortele oiwer Jësus, wat lüür upleewt hät, un wat forspråke hät dat werer måke in dai tijd wat nog kümt. (João 5:28 un 29) Aine dag häw ik em sägt: “Denk man’s an dat’s duu dijne papa aine dag noges werer saie kast. Wij ale koine up ümer leewe ine paradijs hijr upe Ër.” Dës wöör häwe em sijn härts anstöt.

Wek måls mij amigo däir daile säge oiwer dai lätste dåg un dai drai godes in aine. Dun, häw ik em sijne Bijbel nåme, häw em feel sprüüch weese wat dai wårhët wijse däire oiwer Jehovaa God, oiwer Jësus un oiwer dai lätste dåg. (João 14:28 un 2 Timóteo 3:1 bet 5) Dun, häw ik forståe ji mër dat ik oiwer Jehovaa fortele däir, ji mër däir ik an em denke.

Mitm tijd, dai såd fone wårhët wat in mijn härts wäire un wat mijn papa un mama sich anstrengt häwe in mijn härts plante, häwe anfånge groot wasse. Soo as, wen ik t’hoop wäir upm fest mit mijne amigos un droga rooke däir, däir ik mit ais an Jehovaa denke. Feel fon mijne amigos däire säge sai däire God lijbe, åwer dat wat sai måke däire, däir dat ni wijse. Ik wul ni soo sin. Ik häw dacht, ik müst wat måke. Ik müst tröögkåme na Jehovaa.

Gans sicher, waite wat wij måke muite un dat wirklig måke, is ni oiwerain. Wek daile oiwerståe is licht wääst, soo as anhule droga rooke. Ik häw ni mër ümgang mit dai amigos hat un ik häw anfånge dai Bijbel lëre mit air ülst.

Åwer andrer daile ümstele is sër slim wääst. For mij is dat sër slim wääst mij selwst hule krijge un ni wüütend ware. Wek måls krëg ik dat måkt, åwer nåheer, däir ik werer wüütend ware. Ik däir mij sër slecht befijne, däir denke ik krëg dat ni måkt. Wen ik mij traurig befijne däir, ik däir dai ülst suike wat mij dai Bijbel inlëre däir. Mit geduld un gaurigkët, hai däir mij ümer koråsch geewe. Ais, hät hai mij sägt taum air lëren fon dai Wat Bekandmökt leese wat fortele däir oiwer ni nålåte. a Wij häwe wek daile t’hoop nåsaie wat ik måke küün wen ik wüütend ware däir. Im langsåm mit dat wat ik leest häw un for sër dul tau Jehovaa beere, häw ik dat wuut oiwerståe kreege. Dun, in april fon dai jår 2000, bün ik tauwt woore soo as Tüüge fon Jehovaa. Mijn papa un mama sin soo fröölig woore dat gans uutsich bleewe sin.

WOO DAI BIJBEL MIJ HULPE HÄT: Hüüt, häw ik inwarts freere un ain rëgen forstand weegen ik wait dat ni mër mij körper drekig måke dau mit drogas un soigisch daile. Hät nischt sägen, wen ik arbëre dau, upe forsamlung bün urer mij tijdfordrijwe dau, hüüt bün ik frööliger. Nuu, häw ik gaure gedanke wen ik denke dau in dai tijd wat nog kümt.

Ik dau Jehovaa danke dat mijn papa un mama nij ais mij forgeete häwe. Ik dau uk andenke an Jësus sijne wöör in João 6:44, dår stäit: “Kair kan nå mij kåme, wen dai Fåter, wat mij schikt hät, ni der nå mij henlenkt.” Stöt mij härts an wen ik denke dau dat ik tröögkåme kreege bün na Jehovaa weegen hai mij na em trööglenkt hät.

“Ik wul soo gërn aine papa häwe.” - MARCO ANTONIO ALVAREZ SOTO

IS GEBOORE WOORE IN: 1977

LAND: CHILE

GESCHICHT: DÄIR TAUHÖÖRE TAUM AIN HEAVY METAL BANDA

WAT IK BELEEWT HÄW: Mijn mama hät mij in Punta Arenas uptrekt. Ain gaure stad in sul fon América do Sul. Mijn papa un mama sin uutananergåe as ik 5 jår har, un dårweegen häw ik mij forlåre befuune. Ik wul soo gërn aine papa häwe.

Mijn mama däir dai Bijbel studijre mit Jehovaas Tüügen un däir mij mitneeme nam forsamlung. Åwer ik däir dai forsamlung hasse, un wäir dikköpig bet ik dår henkåme däir. As ik 13 jår har bün ik ni mër nam forsamlung gåe.

In dere tijd, häw ik lërt dai musik lijbe un ik häw saie dai ik schik dårtau har. Mit 15 jår däir ik heavy metal un death metal speele, in klain un groot feste un stele woo dai lüür drinke daue. Dai tijd lang wat ik blijwe däir mit andrer lüür wat uk gaud speele däire, hät måkt dat ik uk andrer sort musik lëre wul. Dun, bün ik hengåe taum musik lëre in dai stel woo dat inlërt wart. Mit 20 jår, bün ik hentrekt taum dai haupt stad, Santiago, taum wijrer lëre un häw uk wijrer speelt in heavy metal un death metal bandas.

Doir dai tijd lang, däir ik forneeme dat wat fëgle däir in mij. Taum mij beeter befijne däir ik drogas benutse un drinke t’hoop mit dai wat mit mij speele däire, sai wäire soo as ain familg taum mij. Ik wäir dikköpig un dat wäir saien an mij, ik däir bloos düüster tüüg antreke. Ik har groot bård un häw mijn hår lang wasse låte.

Ik wäir ümer mank strijrerig un har feel problems mit dai poliss. Ais as ik besåpen wäir häw ik mij oiwerheer måkt ain grup slechte lüür wat drogas forkööpe däire, wat mijn amigos un mij schåre däire. Dai häwe mij sodul slåe dat mijn kinbak kaputbråke häwe.

Åwer dai slimst dail wat ik doirset häw is kåme fon dai lüür woo ik mij upforlåte däir. Ik häw ruuterfuune dat mijn bruud hijnerlistig wääst is mit mij un dat sai lang t’hoop mit mij best amigo wäir. Mijn ganse amigos däire dat waite, åwer kair hät mij wat sägt. Dat hät mij sër traurig låte!

Ik bün tröögkåme na Punta Arenas stad, woo ik anfånge häw musik inlëre un arbëre mit violoncelo. Häw uk wijrer heavy metal un death metal speelt un upgrawret. Ik häw ain fain määke kent, wat Sussan hit, un wij häwe anfånge t’hoop wåne. Mitm tijd hät Sussan saie dat ik ni glööwe däir an drai godes in aine soo as eer mama glööwe däir. Sai hät frågt: “Wat fon is dai wårhët?” Ik häw eer sägt dat ik wüst dat drai godes in aine, ain loigen wäir, åwer ik krëg eer dat ni ine Bijbel weese. Åwer ik wüst wee dat måke küün. Ik häw eer sägt dat Jehovaas Tüügen eer dai wårhët ine Bijbel wijse küüne. Dun, häw ik taum God beert un hülp forlangt, air dail wat ik al feel jåre lang ni mër måkt har.

Wek dåg nåheer häw ik air kërl saie, wat uutsaie däir soo’s wen ik em al kene däir un ik häw em frågt wen hai Tüüge fon Jehovaa wäir. Lijkerst dat gans klår saien wäir, dat hai sich forfërt har mit mij weegen woo ik uutsaie däir, hai hät al mijn frågen oiwer dai forsamlunge mit gaurigkët antwoort. Ik wäir mij sicher dat ik dai braurer trufe har, dat wäir dai antwoort taum mijn gebeed. Ik bün nam forsamlung gåe un häw mij in dai lätste stuil henset dat andrer ni mij saie schule. Åwer, feel häwe mij kent weegen as ik klain wäir, güng ik nam forsamlung. Sai häwe mij sër gaud upnåme, sin soo lijb wääst mit mij un dårweegen häw ik ain groot freere fornåme. Dat wäir soo’s wen ik na huus tröögkåme däir. As ik dai braurer saie häw, wat mij dai Bijbel inlërt hät as ik klain wäir, häw ik em forlangt taum mij dai Bijbel werer inlëre.

DAI BIJBEL HÄT MIJ LEEWEND ANERS MÅKT: Ais häw ik Provérbios 27:11 leest. Dår sägt: “Wäs klauk, mij kind, un måk mij härts fröölig.” Hät mijn härts anstöt waite dat air mësch soo as ik, ful fëgels, frööge kan dai wat ales upbröcht hät!

Dun, häw ik saie dat Jehovaa dai papa wäir wat ik mijn gans leewend söcht häw. Ik wul mijn himlisch Fåter gefale un em sijne wile måke. Åwer up feel jåre lang har ik drogas un gedränk benutst. Dun, häw ik forståe wat Jësus sägt hät in Mateus 6:24: “Kair kan eskrav sin fon twai here.” Solang as ik mij anstrenge däir taum aners ware, 1 Coríntios 15:33 hät mijn härts anstöt: “Slechte ümgang häwe, foråst gaure moors.” Ik häw saie dat ni anhule krëg mit dai drogas un gedränk wen ik nam dai selwig stele hengüng un mit dai selwig lüür gåe däir. Wat dai Bijbel säge däir wäir licht taum forståe: Ik müst mij sër anstrenge taum wijd wegblijwe fon dës daile wat mij forhåke måke däire. (Mateus 5:30)

Dat ik dai musik sodul lijbe däir, dai heavy metal besijdlåte is dai slimst dail wat ik måkt häw in mijn leewend. Åwer, mit dai hülp fon mijn amigos ine gemaind, bün ik dårfon frai woore. Häw dai drogas un dai drinkerig besijdlåte. Häw mijne hår afsneere, dai bård afmåkt un häw anfunge tüüg mit andrer farwe antreeke, ni bloos swart. As ik Sussan sägt häw dat ik mijn hår afsnijre wul, is sai sër nijglig dåroiwer woore un hät sägt: “Ik dau mit dij nam forsamlung gåe taum saie wat dår passijre däit!” Wat sai dår saie hät, hät eer sër gefale un glijk hät sai anfånge dai Bijbel uk lëre. Mitm tijd häwe wij oos frijgt. In 2008, häwe wij oos tauwt soo as Tüügen fon Jehovaa. Nuu, wij bëd daue Jehovaa dijne t’hoop mit mijn mama. Dat giwt oos groot fruir.

WOO DAI BIJBEL MIJ HULPE HÄT: Ine wild koine dai amigos hijnerlistig sin un wij koine öftens ni wirklig fröölig sin, åwer ik bün dårfon wegkåme. Ik dau nog dai musik lijbe, åwer nuu, dau ik gaud uutsuike dat wat ik hööre dau. Mit dat wat ik beleewt hät ine leewend, krijg ik mij familg un andrer hulpe, uphaupt dai juugende. Ik wil eer helpe saie dat dai daile wat dës wild hät, lijkerst wen dai fain uutsaie daue, dat is bloos drek. (Filipenses 3:8)

Ik häw reäl amigos ine gemaind fuune woo lijb un freere is. Uphaupt dat ik an Jehovaa ranerkåme bün, nuu jå, häw ik aine Fåter fuune, aine Fåter wat ik soo gërn häwe wul.

[Nåt]

[Groot sriwt]

“Ik bün tröögkåme kreege na Jehovaa weegen hai mij na em trööglenkt hät”