Ombiimbeli otayi ti ngiini?
Mbela Kalunga oha yamukula omagalikano gaantu ayehe?
UUNA WA PULWA EPULO NDYONO, MBELA OTO TI OHA YAMUKULA OMAGALIKANO . . .
Gaantu ayehe
Nenge ogaantu yamwe
Nenge iha yamukula sha
SHOKA OMBIIMBELI TAYI TI
“Omuwa oku li popepi naayehe mboka . . . taye mu galikana moshili.” — Episalomi 145:18.
OSHIKE ISHEWE TATU VULU OKWIILONGA MOMBIIMBELI?
Kalunga iha yamukula omagalikano gaamboka ihaaya vulika kuye. (Jesaja 1:15) Nonando ongawo, otaya vulu ‘okutamanana’ nenge okuukitha iinima naye, mokulundulula oondjila dhawo. — Jesaja 1:18.
Opo Kalunga a yamukule egalikano lyomuntu, oli na okukala metsokumwe niitegelelwa ye, mbyoka yi li mOmbiimbeli. — 1 Johannes 5:14.
Mbela otu na okukala momukalo gwontumba, uuna tatu galikana?
AANTU YAMWE OYI ITAALA kutya uuna taya galikana, oye na okukala aluhe ya tsa oongolo, ya sizimana nenge ya tula iikaha kumwe. Ngoye oto ti ngiini?
SHOKA OMBIIMBELI TAYI TI
Kalunga oha pulakene komagalikano gaamboka ya ‘kuutumba,’ ya ‘thikama,’ ya ‘lala’ nenge ya ‘tsa oongolo.’ (1 Ondjalulo 17:16, OB-1954; 2 Ondjalulo 30:27, OB-1954; Esra 10:1, OB-1954; Iilonga 9:40) Ina tegelela tu kale owala momukalo gwontumba, uuna tatu galikana.
OSHIKE ISHEWE TATU VULU OKWIILONGA MOMBIIMBELI?
Kalunga oha pulakene omagalikano gaaifupipiki. — Episalomi 138:6.
Oto vulu oku mu galikana melaka kehe nenge meimweneneno. — 2 Ondjalulo 6:32, 33; Nehemia 2:1-6.
