1-2. Omolwashike tashi vulika tu kale tu uvite kutya Jehova iha yamukula omagalikano getu?

 OMBIIMBELI otayi ti kutya “konga uulinawa pOmuwa, note ku pe shoka wa yuulukwa.” (Eps. 37:4) Euvaneko ndyoka ekumithi shili. Mbela otu na okukala twa tegelela Jehova e tu pe nziya kehe shimwe shoka tatu mu pula? Omolwashike sha simana tu pule epulo ndyono? Tala koonkalo tadhi landula. Omumwameme inaa hokanwa okwa galikana a mone ompito yokuya kOsikola yAauvithi yUukwaniilwa. Opwa li pwa piti omimvo odhindji, ihe ina hiywa. Omumwatate omugundjuka okwa kala ta galikana Jehova e mu aludhe kuuvu we wa kwata miiti, opo a vule okukala ta kwathele oshindji megongalo. Ihe onkalo ye inayi hwepopala. Aavali Aakriste oya kala taya galikana omwana a kale moshili, ihe okwa tokola owala a etha po okulongela Jehova.

² Otashi vulika nangoye wa kala nokupula Jehova e ku ningile sha, ihe sigo onena owa tala owala kondjila. Omolwoshinima shono, otashi vulika wu kale wu uvite kutya Jehova oha yamukula owala omagalikano gayamwe, ihe hagoye. Nenge tashi vulika wu dhiladhile kutya pamwe owu na shoka wa ninga sha puka. Omumwameme Janice b naye osho a li e uvite ngawo. Ye nomusamane gwe oya li ya galikana ya mone ompito yokuya miilonga yaBetel. Janice okwa ti: “Onda li tandi dhiladhila kutya meni lyokathimbo okafupi otatu yi koBetel.” Ihe opwa piti omimvo odhindji inaaya ithanwa. Janice okwa ti: “Onda li nda yemata nonda ngwangwana. Onda li tandi ipula kutya oshike nda ninga sha uvitha nayi Jehova. Onda kala tandi galikana kondandalunde a wilike ndje moshinima shika. Omolwashike inaa yamukula egalikano lyandje?”

3. Oshike tatu ka kundathana moshitopolwa shika?

 ³ Omathimbo gamwe otashi vulika tu kale tatu ipula ngele Jehova oha pulakene ngaa komagalikano getu. Aalumentu yamwe aadhiginini mboka ya li ko nale nayo osho ya li taya dhiladhila ngawo. (Job 30:20; Eps. 22:2; Hab. 1:2) Oshike she ku tompa kutya Jehova ota ka yamukula omagalikano goye? (Eps. 65:2) Opo tu yamukule epulo ndyoka, tango natu tale ngaka taga landula: (1) Oshike tu na okukala twa tegelela kuJehova? (2) Jehova okwa tegelela shike kutse? (3) Omolwashike twa pumbwa okuninga omalunduluko miinima mbyoka twa pula momagalikano getu?

4. Ngaashi sha popiwa muJeremia 29:12, Jehova okwa uvaneka kutya ota ka ninga shike?

⁴ Jehova okwa uvaneka kutya ota ka pulakena komagalikano getu. (Lesha Jeremia 29:12.) Tate yetu oku hole aapiya ye aadhiginini, onkene ota ka pulakena aluhe komagalikano gawo. (Eps. 10:17; 37:28) Ihe shoka itashi ti kutya ote ke tu pa owala kehe shimwe shoka tatu mu pula. Otashi vulika tu na okutegelela sigo uuyuni uupe we ya, opo tu ka mone iinima yimwe mbyoka hatu mu pula momagalikano getu.

5. Oshike Jehova ha kala e na momadhiladhilo, uuna ta pulakene komagalikano getu? Shi yelitha.

⁵ Jehova oha tala kutya shoka tatu pula osha pambathana ngiini nelalakano lye. (Jes. 55:8, 9) Elalakano lye limwe olyo kutya kombanda yevi ku kale kwa udha aalumentu nosho wo aakiintu yahangana noya nyanyukwa kohi yuunamapangelo we. Satana ota ti kutya aantu otaye ke shi enditha nawa ngele otaya ipangele yo yene. (Gen. 3:1-5) Opo Jehova a ulike kutya shoka Ondiyapoli ya popya iifundja, okwa pitika aantu ya ipangele yo yene. Ihe nonando ongawo, omapangelo gopantu oga etitha omaupyakadhi ngoka tage tu hepeke kunena. (Omuuv. 8:9) Otu shi kutya Jehova ita ka kutha po omaupyakadhi getu agehe, ngoka ge tu kundukidha ngashingeyi. Oshoka ngele okwe shi ningi, otashi ka ningitha aantu yamwe ya thike pehulithodhiladhilo kutya omapangelo gopantu nago otaga vulu okukandula po omaupyakadhi ngoka aantu ye na kunena.

6. Omolwashike tu na okukala twa tompwa kutya Jehova ota ka ninga shoka shi li pahole nopauyuuki?

⁶ Jehova otashi vulika a yamukule omagalikano getu momikalo dha yoolokathana. Pashiholelwa, sho omukwaniilwa Hiskia a li ta ehama ta ehamenene, okwa pula Jehova e mu kwathele a aluke. Jehova okwa li e mu aludha. (2 Aak. 20:1-6) Sho omuyapostoli Paulus a li a pula Jehova a kuthe po ‘uuwehame we uunene wopalutu,’ Jehova ine shi ninga. (2 Kor. 12:7-9) Natu taleni ishewe koshiholelwa shomuyapostoli Jakob nosho wo Petrus. Omukwaniilwa Herodes okwa li a tokola okudhipaga aalumentu mboka yaali. Egongalo olya li tali galikanene Petrus naJakob. Ihe nonando ongawo, Jakob okwa dhipagwa, ye Petrus okwa hupithwa pashikumithalonga. (Iil. 12:1-11) Otashi vulika tu ipule tatu ti: ‘Omolwashike Jehova a hupitha Petrus, e ta etha Jakob a dhipagwe?’ Ombiimbeli inayi tu pa eyamukulo. c Shoka tu na uushili musho osho kutya Jehova ‘ke na uugoyoki’ washa. (Deut. 32:4) Otu shi wo kutya Jehova okwa li e hole Petrus naJakob shi thike pamwe. (Eh. 21:14) Omathimbo gamwe otashi vulika Jehova kaa yamukule omagalikano getu ngaashi twa li twa tegelela. Molwaashoka otu na einekelo kutya Jehova oha yamukula omagalikano getu, ta inyengithwa kohole nosho wo kuuyuuki. Onkee ano ihatu pula kutya oshike e tu yamukula momukalo ngono a hogolola oku ga yamukula. — Job 33:13.

7. Oshike tu na okuhenuka, nomolwashike?

⁷ Ohatu kambadhala opo kaatu yelekanithe onkalo moka tu li naandhoka dhayalwe.  Pashiholelwa, otashi vulika twa pula Jehova e tu kwathele moshinima shontumba noshongandi, ihe sigo onena ine tu yamukula. Otashi vulika konima yethimbo tu ka ndhindhilike kutya opu na gumwe ngoka naye a pula oshinima sha faathana, ihe Jehova okwe mu yamukula nale. Omumwameme Anna okwa ningilwa oshinima sha faathana. Okwa li a galikana, opo omusamane gwe, Matthew, a aluke kokankela. Pethimbo ndyono opwa li aamwameme aakokele yaali nayo ye na okankela. Omumwameme Anna okwa galikanene Matthew nosho wo aamwameme mboka yaali a mana mo. Aamwameme oya aluka, ihe omumwatate Matthew okwa hulitha. Petameko, Anna okwa li ta dhiladhila kutya aamwameme oya aluka sho Jehova a yi mo olunyala moshinima. Ngele osho, omolwashike inaa yamukula egalikano lye, opo omusamane gwe a kale nawa? Eeno, katu shi kutya osha ende ngiini aamwameme mboka yaali ya aluke. Ihe otu shi owala kutya Jehova ota ka hulitha po thiluthilu okumona iihuna koludhi kehe, nokwa halelela okuyumudha ookuume ke mboka ya sa. — Job 14:15.

8. (a) Ngaashi sha popiwa muJesaja 43:2, Jehova ohe tu yambidhidha ngiini? (b) Egalikano ohali tu kwathele ngiini uuna tu li moonkalo oondhigu. (Tala okavidio Egalikano ohali tu kwathele tu idhidhimike.)

⁸ Jehova ote ke tu kwathela aluhe. E li Tate yetu omunahole, Jehova ke hole oku tu tala tatu mono iihuna. (Jes. 63:9) Shono itashi ti kutya oha keelele omamakelo getu agehe, ngoka taga vulu okuyelekanithwa nomilonga nenge nomililo. (Lesha Jesaja 43:2.) Ihe ohe tu kwathele tu ‘pite mo’ mugo. Ye ita ka etha omamakelo ngoka hage tu adha ge tu etele uuwinayi tawu kalelele. Jehova ohe tu pe natango ombepo ondjapuki yi tu kwathele tu idhidhimike. (Luk. 11:13; Fil. 4:13) Oshizemo, otatu vulu okukala neinekelo kutya otatu kala tu na shoka twa pumbwa, opo tu idhidhimike noku mu longela nuudhiginini. d

9. Metsokumwe naJakob 1:6, 7, omolwashike tu na okwiinekela kutya Jehova ote ke tu kwathela?

⁹ Jehova okwa tegelela tu kale twe mu inekela. (Heb. 11:6) Omathimbo gamwe ohashi vulika tu kale tu wete kutya otu li muudhigu wu vule oonkondo dhetu. Ohashi vulika nokuli tu tameke okukala twa limbililwa ngele Jehova ote ke tu kwathela ngaa. Ombiimbeli oye tu shilipaleka kutya kekwatho lyombepo yaKalunga otatu vulu “okunuka ekuma.” (Eps. 18:29, NW) Pehala lyokukala twa limbililwa, otu na okugalikana twa mana mo, tu na einekelo kutya Jehova ota ka yamukula omagalikano getu. — Lesha Jakob 1:6, 7.

10. Gandja oshiholelwa shankene tatu vulu okukala metsokumwe nomagalikano getu.

¹⁰ Jehova okwa tegele tu katuke metsokumwe nomagalikano getu. Pashiholelwa, omumwatate otashi vulika a pule Jehova e mu kwathele, opo a pewe omasiku gefudho kiilonga a vule okuya koshigongi shoshitopolwa. Mbela otashi vulika Jehova a yamukule egalikano lye momukalo guni? Otashi vulika a pe omumwatate uulaadhi mboka a pumbwa a ka popye nomugandji gwiilonga. Ihe omumwatate oye e na oku ka pula epitikilo ye mwene. Otashi vulika e na oku li pula lwiikando. Otashi vulika nokuli a pumbwa okupula omuniilonga omukwawo a ka longe pehala lye uusiku nenge omutenya. Ngele osha pumbiwa, omumwatate ota vulu okutula mo efudho, nonando ita ka futwa.

11. Omolwashike tu na okugalikana lwiikando kombinga yiinima mbyoka tatu ipula nayo?

¹¹ Jehova okwa hala tu galikane lwiikando kombinga yaashoka tatu ipula nasho. (1 Tes. 5:17) Jesus okwa ti kutya omaindilo getu gamwe itaga ka yamukulwa mepathimo lyeho. (Luk. 11:9) Onkee ano ino teka omukumo. Pehala lyaashono, galikana wa mana mo, to shi ningi lwiikando. (Luk. 18:1-7) Uuna tatu tsikile nokugalikana kombinga yoshinima shontumba, otatu ulukile Jehova kutya shoka tatu pula otwe shi halelela  noonkondo. Shono otashi ulike wo kutya otu na eitaalo moonkondo dhe oku tu kwathela.

12. (a) Epulo lini tu na okupula kombinga yomagalikano getu, nomolwashike? (b) Omolwashike tu na okushilipaleka kutya omagalikano getu otaga ulike kutya otwa simaneke Jehova? (Tala oshimpungu “ Mbela omagalikano gandje otaga ulike ngaa kutya onda simaneka Jehova?”)

¹² Ngele inatu mona shoka twa pula momagalikano getu, otatu vulu okwiipula omapulo gatatu taga landula. Lyotango, ‘Mbela otandi pula ngaa oshinima shi li mondjila?’ Olundji ohatu kala tu wete tu shi shoka tashi tu opalele. Ihe iinima mbyoka tatu pula, otashi vulika kaayi ke tu etele uuwanawa washa momukokomoko gwethimbo. Uuna tatu galikana kombinga yuupyakadhi wontumba, otashi vulika pu kale ekandulopo lyomukundu li ili, kaali shi ndyoka tatu pula. Iinima yimwe mbyoka hatu pula otashi vulika yi kale ompinge nehalo lyaJehova. (1 Joh. 5:14) Natu shune koshiholelwa shaavali mboka ya popiwa metetekelo. Oya kala nokupula Jehova a kwathele omwana kaa ze mo moshili. Otashi vulika eindilo lyawo li kale tali monika lya fa li li nawa. Ihe Jehova iha thiminike nando ogumwe gwomutse e mu longele. Okwa hala kehe gumwe gwomutse, mwa kwatelwa aanona, a hogolole ye mwene kutya ote ke mu longela. (Deut. 10:12, 13; 30:19, 20) Onkee ano aavali oya li taya vulu okupula Jehova e ya kwathele ya vule okwaadha omutima gwomwana, opo a vule okukala e hole Jehova nokuninga kuume ke. — Omayel. 22:6; Ef. 6:4.

13. Uunake Jehova he tu kwathele ngaashi sha popiwa mAahebeli 4:16? Shi yelitha.

¹³ Epulo etiyali olyo kutya ‘Mbela ndino ethimbo ngaa lyaJehova a yamukule eindilo lyandje?’ Ohashi vulika tu kale tu uvite kutya Jehova okwa pumbwa okuyamukula omagalikano getu nziya ngaashi tashi vulika. Mbela osho ngaa shili? Jehova ohe tu kwathele pethimbo  lya opala. (Lesha Aahebeli 4:16.) Uuna inaatu pewa nziya shoka twa pula, otashi vulika tu kale tu uvite kutya Jehova ina zimina shoka twa pula. Ihe eyamukulo otali vulu okukala ‘tegelela ko manga.’ Pashiholelwa, dhiladhila komumwatate omugundjuka ngoka a pula megalikano a aludhwe kuuvu we. Andola Jehova okwe mu aludhile pashikumithalonga, nena Satana ota vulu okutompathana kutya omumwatate ota tsikile okulongela owala Jehova, molwaashoka e mu aludha. (Job 1:9-11; 2:4) Shimwe ishewe, Jehova okwa tula po nale ethimbo ndyoka ta ka aludha omikithi adhihe. (Jes. 33:24; Eh. 21:3, 4) Omanga tali thiki, inatu kala twa tegelela tu aludhwe pashikumithalonga. Onkee ano omumwatate ngoka ota vulu okupula Jehova e mu pe oonkondo nosho wo ombili yopamadhiladhilo, opo a vule okwiidhidhimikila omukithi ngoka e na nokutsikila oku mu longela nuudhiginini. — Eps. 29:11.

14. Oshike tatu ilongo moshimoniwa shaJanice?

¹⁴ Dhiladhila owala koshimoniwa shomumwameme Janice ngoka a li a galikana kombinga yokuya miilonga yaBetel. Konima yomimvo ntano, okwe ke shi mona kutya Jehova okwa yamukula egalikano lye, ihe omomukalo gulwe gwi ili. Janice okwa ti: “Jehova okwa kala ta longitha ethimbo ndyoka a longe ndje nokuzula ndje. Einekelo lyandje muye olya li lya pumbwa okukoka. Ekonakono lyandje lyopaumwene nalyo olya li lya pumbwa okuhwepopala. Onda li wo nda pumbwa oku shi uva ko kutya otandi vulu okukala nda nyanyukwa kutya nduno otandi longele Jehova ndi li peni.” Lwanima, omumwameme Janice nomusamane gwe oya li ya pulwa ya ye miilonga yuutonatelishikandjo. Konima yaashono, Janice okwa ti: “Jehova okwa yamukula omagalikano gandje, nonando okwe shi ningi momukalo ngoka nda li inaandi tegelela. Osha pula ndje ethimbo ndi mone uuwanawa weyamukulo ndyoka a pe ndje, ihe otandi pandula sho a ulukile ndje ohole nosho wo olukeno.”

15. Omolwashike omagalikano getu kaage na aluhe okukala gokondandalunde? (Tala wo omathano.)

 ¹⁵ Epulo etitatu olyo kutya ‘Mbela nandi galikane kombinga yoshinima shilwe?’ Nonando oshi li nawa okupula iinima yokondandalunde momagalikano getu, otu na okukala hatu tala kutya Jehova okwa hala tu ninge shike mokukala ihaatu pula iinima yokondandalunde. Natu tale koshiholelwa shomumwameme inaa hokanwa ngoka a kala nokugalikana kombinga yokuya kOsikola yAauvithi yUukwaniilwa. Okwa li a hala a ye kosikola ndjoka, opo a ka longe kiitopolwa hoka ku na ompumbwe onene. Omanga ta tsikile nokugalikana a hiywe kosikola, ota vulu okupula Jehova e mu kwathele a mone oompito dhilwe a tamunune mo uukalele we. (Iil. 16:9, 10) Ota vulu okukatuka metsokumwe negalikano lye, mokupula omutonatelishikandjo ngele opu na egongalo lyopopepi lya pumbwa aakokolindjila. Nenge a nyolele koshitayimbelewa ta pula kutya openi pu na ompumbwe onene yaauvithi yUukwaniilwa. e

16. Otu na okukala twa tompwa koshike?

¹⁶ Ngaashi twa zi nokwiilonga, otu na okukala twa tompwa kutya Jehova ota ka yamukula omagalikano getu momukalo gwopahole nogu li pauyuuki. (Eps. 4:3; Jes. 30:18) Omathimbo gamwe otashi vulika tu mone omayamukulo ngoka haago twa li twa tegelela. Ihe Jehova ke na siku a ka ipwililikile omagalikano getu. Oku tu hole tagu pu mo. Ye ke na siku e ke tu ethe. (Eps. 9:10) Onkee ano natu “inekeleni aluhe Kalunga” ketu mokutsikila oku mu mbumbulila omitima dhetu megalikano. — Eps. 62:8.