Lorraine gwokoAmerika okwa ti: “Omasiku gamwe uuna ndi wete nda gwililwa po, Jehova oha tsu ndje omukumo okupitila mOmaimbilo gokOpolohalama yotiivii JW.”

Aakriste ohaya imbi aluhe “omaimbilo” taga tanga Kalunga. (Kol. 3:16) Ngele omaimbilo ngoka owe ga ilongo momutse, otaga vulu oku ku kwathela nokuli nuuna inoo tala meimbilo nenge koshikwaelektronika. Kambadhala okuninga iinima tayi landula yi ku kwathele wu ilonge omaimbilo gontumba momutse.

• Lesha iitya nawa, opo wu uve ko shoka tayi ti. Ngele owu uvite kutya oshinima otashi ti shike, ohashi kala oshipu oku shi dhimbulukwa. Oohapu dhomaimbilo getu agehe gokOpolohalama yotiivii JW nOmaimbilo gaanona, otadhi adhika kepandja lyetu, jw org. Inda mpoka pwa nyolwa Iileshomwa, e to thindi mpoka pwa nyolwa omusika.

• Nyola oohapu pokambapila. Ngele owe shi ningi, otashi ka thindila mo iitya momadhiladhilo goye. — Deut. 17:18.

• Ga idheula to imbi muule. Lesha nenge wu ga imbe lwiikando.

• Tala ngele oto vulu oku ga dhimbulukwa nuupu. Kambadhala okudhimbulukwa iitya, itoo tala pokambapila, nokonima to tala ngele owe shi enditha ngaa nawa.