1, 2. Omolwashike muuyuni waSatana, mu na okukala aluhe oohepele?

KUNENA aantu yamwe otaya hupu nawa, omanga yalwe taya hupu shokadhila. Aagundjuka ohaya kala taya kongo iilonga, ihe ihaye yi mono nuupu. Oyendji ohaya tula oomwenyo dhawo moshiponga, sho haya tembukile kiilongo mbyoka iiyamba. Oluhepo olu li apuhe, nokuli nomiilongo mbyoka iiyamba. Aayamba otaya yambapala, omanga oohepele tadhi tsikile okukala moluhepo. Omakonakono opo ga zi ko oga tengeneka kutya iimaliwa mbyoka yi niwe kaayamba muuyuni ye thike popelesenda 1, oyi thike pwaambyoka yi niwe kaantu oopelesenda 99 muuyuni. Nonando shoka sha tengenekwa oshidhigu okwiitaala, kehe gumwe ota tsu kumwe kutya aantu omabiliyona oya hepa noonkondo, omanga yalwe ye na iimaliwa ya gwana oku ya kwathela monkalamwenyo. Jesus okwa li e shi ndhindhilike, sho a ti: “Oohepele omu li nadho aluhe.” (Mark. 14:7) Omolwashike shi li ngawo?

² Jesus okwa li e shi shi kutya onkalo yopamahupilo otayi ka lunduluka owala ngele Uukwaniilwa waKalunga we ya. Aayambidhidhi yoopolotika noyomalongelokalunga nosho wo yomahangano omanalwiho mboka taya thanekwa ‘kaahalithi’ mboka ya tumbulwa mEhololo 18:3, oye li oshitopolwa shuuyuni waSatana. Aapiya yaKalunga otaya vulu okumanguluka ko thiluthilu kopolotika nokomalongelokalunga giifundja, ihe oyendji itaya vulu okumanguluka ko thiluthilu koongeshefa dhomuuyuni waSatana.

3. Omapulo geni tatu ka kundathana?

 ³ Tu li Aakriste, otashi ka kala shi li nawa, ngele otwa konakona etaloko lyetu li na ko nasha noongeshefa dhomuuyuni, mokwiipula tatu ti: ‘Ongiini tandi vulu okulongitha iiniwe yandje ndi ulike uudhiginini wandje kuKalunga? Ongiini tandi vulu okukala inaandi pwila moongeshefa dhomuuyuni? Iiholelwa yini tayi ulike kutya aapiya yaKalunga oye mu inekela thiluthilu, nonando opu na eshongo ndyoka?’

4, 5. (a) Elenga ndyoka lya popiwa meyele lyaJesus olya li lyi iyadha monkalo yini? (b) Jesus okwa li a lombwele aalanduli ye ya ninge shike?

⁴ Lesha Lukas 16:1-9. Eyele lyaJesus kombinga yelenga efundja, otali tu ningitha tu dhiladhile. Konima sho elenga lya popiwa kutya olya longitha nayi eliko lyamwene gwalyo, olya katuka ‘pandunge,’ opo li ‘ikongele ookuume’ mboka taya vulu oku li kwathela, ngele lya kanitha uulenga walyo. * Jesus ka li a longitha eyele ndika a ladhipike aalongwa ye ya longe uulingilingi, opo ya vule okuhupa muuyuni mbuka. Okwe li longitha, opo e ya longe oshitsa sha simana, nonando okwa li a tala ko eihumbato lyelenga ndyoka lya fa ‘lyaantu mboka haa ende pauyuni mbuka.’

⁵ Jesus okwa li e shi kutya otashi ka kala oshidhigu kaalanduli ye oyendji okuhupa muuyuni mbuka kaawu li pauyuuki, ngaashi naanaa elenga ndyoka lya li li iyadha monkalo ondhigu. Onkee ano, okwe ya ladhipike a ti: “Ikongeleni ookuume neliko lyomuuyuni mbuka, opo uuna tali hulu po, mu ka taambwe megumbo lyaaluhe.” Oshike tatu vulu okwiilonga meyele ndika?

6. Otu shi shi ngiini kutya okungeshefa kakwa li elalakano lyaKalunga?

⁶ Nonando Jesus ina yelitha kutya omolwashike a tile eliko ‘olyomuuyuni,’ Ombiimbeli oye shi yelitha nawa kutya okungeshefa kakwa li elalakano lyaKalunga. Jehova okwa li a gwanithile po Adam naEva oompumbwe dhawo adhihe. (Gen. 2:15, 16) Konima sho Kalunga a pe aagwayekwa ombepo ondjapuki “kapwa li nando ogumwe ngoka a vulu okutumbula kutya oshinima shontumba shomeliko lye oshe, ihe oya topolelathana shaa shoka ya li ye shi na.” (Iil. 4:32) Omuhunganeki Jesaja okwa li tu ulike kethimbo sho aantu ayehe taya ka kala ye na iiniwe ya gwana. (Jes. 25:6-9; 65:21, 22) Ihe methimbo ndino tu li, aalanduli yaJesus oye na okulongitha “oondunge” yi ikongele uuhupilo ‘neliko lyomuuyuni.’ Pethimbo opo tuu mpono, otaya kambadhala wo yo opalele Kalunga.

7. Omayele geni taga adhika muLukas 16:10-13?

⁷ Lesha Lukas 16:10-13. Meyele lyaJesus, elenga olyi ikongele ookuume, omolwuuwanawa walyo lyene. Onkee ano, Jesus okwa li a ladhipike aalongwa ye yi ikongele ookuume megulu, ihe hanelalakano lyokwiihola mwene. Okwa li a hala tu uve ko kutya omukalo moka tatu longitha ‘eliko lyomuuyuni,’ otagu vulu okuulika ngele tse aadhiginini kuKalunga. Oshitsa shaJesus osho kutya otatu vulu okuulika kutya tse “aainekelwa,” sho tatu longitha nawa eliko lyetu ndyoka tu na. Ongiini tatu vulu oku shi ulika?

8, 9. Gandja iiholelwa yankene yamwe hayu ulike uudhiginini wawo mokulongitha eliko lyomuuyuni.

⁸ Omukalo gumwe moka tatu vulu okuulika kutya tse aainekelwa mokulongitha iiniwe yetu, ongele tatu ambidhidha pashimaliwa iilonga yokuuvitha mbyoka ya hunganekwa kuJesus. (Mat. 24:14) Okakadhona kamwe komoIndia oka li haka pungula aluhe iimaliwa iikukutu mokaketha kako, mbyoka ka li taka vulu oku yi landa po uudhanitho wako. Sho okaketha ku udha, iimaliwa oke yi gandja yi ka longithwe miilonga yokuuvitha. MoIndia omu na omumwatate e na oshikunino shiiyimati hayi ithanwa  ookokonata. Oha gandja omayambidhidho gookokonata odhindji kombelewa yokutoloka yaMalayalam. Molwaashoka ohadhi kala dha pumbiwa ko, okwa li e wete kutya oku dhi gandja otashi ka kwathela unene shi vulithe okugandja iimaliwa. Ndhoka oonkatu dhopandunge shili. Aamwatate moGreka nayo ohaya faalele aluhe Aabetel omagadhi gooholivi, ehini (cheese) niikulya yilwe.

⁹ Omumwatate gwokoSri Lanka, ngoka ngashingeyi e li kondje yiilongo, okwa gandja ehala negumbo lye mu kale hamu ningilwa okugongala, iigongi iishona nomu kale aalongi yethimbo lyu udha. Omumwatate okwa yamba po egumbo nehala lye moka a li ta vulu okumona iimaliwa oyindji. Okwe li gandja li longithwe kaauvithi mboka ye na iimaliwa iishona. Miilongo moka iilonga yetu yokuuvitha yi indikwa, aamwatate ohaya gandja omagumbo gawo mu gongalelwe. Ohaya pitike wo aakokolindjila nayalwe mboka ye na iimaliwa iishona, ya gongalele mo nopwaahe na okufuta.

10. Omayambeko gamwe geni tatu vulu okumona, ngele otwa kala hatu gandja nehalo ewanawa?

¹⁰ Iiholelwa mbyoka otayi ulike kutya aapiya yaKalunga ‘aayinekelwa miinima iishona,’ sho haya longitha omaliko gawo ngoka itaaga vulu okuyelekanithwa nomaliko gopambepo. (Luk. 16:10) Ookuume kaJehova mboka oyu uvite ngiini, sho ya ninga omaiyambo ge thike mpono? Oyu uvite kutya okugandja oku li omukalo gwokumona eliko “lyashili.” (Luk. 16:11) Omumwameme gumwe ngoka ha gandja omayambidhidho miilonga yUukwaniilwa pandjigilile, okwa popi kombinga yeyambeko ndyoka a mona. Okwa ti: “Uule womimvo, onda mona uuwanawa owundji, sho nda kala handi gandja. Mpoka ngaa pu thike okugandja iiniwe yandje, opo ngaa pu thike ekwatathano lyandje ewanawa nayalwe tali koko. Ohandi dhimine po yalwe, ohandi idhidhimikile yalwe, nuuna ndu uvithwa nayi nenge tandi pewa omayele ohandi shi taamba ko.” Oyendji oya mona kutya okugandja ohaku etele omuntu enyanyu. — Eps. 112:5; Omayel. 22:9.

11. (a) Okugandja nehalo ewanawa otaku ulike ngiini kutya otu na “oondunge”? (b) Ehangano lyaJehova ohali ningi po shike li ningile ayehe shi thike pamwe? (Tala kethano lyopetameko.)

¹¹ Uuna tatu longitha iiniwe yetu, opo tu humithe komeho iilonga yUukwaniilwa otashi ulike kutya otu na “oondunge.” Otashi tu pe ompito tu kwathele yalwe. Mboka ye na omaliko gomuuyuni, ihe itaya vulu okuya miilonga yethimbo lyu udha nenge oku ka longa hoka ku na ompumbwe, otaya vulu okukala nuushili kutya omayambidhidho gawo otaga humitha komeho uukalele wayalwe. (Omayel. 19:17) Omayambidhidho ngoka hatu gandja, ohaga kwathele mokunyanyangidha iileshomwa nohaga ambidhidha iilonga yokuuvitha miitopolwa mbyoka ya hepa, moka mu na aantu oyendji taye ya moshili. Uule womimvo, miilongo ngaashi Kongo, Madagascar naRwanda, Ombiimbeli omathimbo gamwe oya kala hayi kotha oshimaliwa shi thike pondjambi yokoshiwike nenge yokomwedhi. Onkee ano, aamwatate olundji ohaya hogolola pokati kiikulya nokukala ye na Ombiimbeli. Ngashingeyi, omolwomayambidhidho goyendji nosho wo ‘okuningila ayehe shi thike pamwe,’ ehangano lyaJehova ohali ambidhidha iilonga yokutoloka nokwaandjaganeka Oombiimbeli kaauvithi ayehe nosho wo  kaakonakonimbiimbeli. (Lesha 2 Aakorinto 8:13-15.) Ayehe mboka ya gandja naamboka ya pewa, otaya vulu okuninga ookuume kaJehova.

12. Abraham okwa li u ulike ngiini kutya okwiinekela muKalunga?

¹² Omukalo gulwe tatu vulu okuninga ookuume kaJehova, omokukala inaatu pwila mokungeshefa hoka taku dhana onkandangala muuyuni mbuka. Pehala lyaashono, otu na okulongitha oompito dhetu tu konge eliko “lyashili.” Tatekulululwa Abraham, ngoka a li ko nalenale okwa li e na eitaalo lya kola. Okwa thigi po uuyamba awuhe muUr, opo a ka kale momatsali a koleke uukuume we naJehova. (Heb. 11:8-10) Okwa li i inekela thiluthilu muKalunga ngoka e li onzo yeliko lyashili. Ka li i ikongele omaliko, shoka ando she ku ulika kutya ini inekela muKalunga. (Gen. 14:22, 23) Jesus okwa ladhipike aapiya yaKalunga ya kale ye na eitaalo lya fa lyaAbraham. Okwa lombwele omulumentu omuyamba a ti: “Ngele owa hala, u kale wa gwana wa pwa, inda, u ka landithe po ayihe mbyoka u na, iimaliwa e to yi pe oohepele, ngoye e to kala u na eliko megulu. Ila ihe, u landule ndje.” (Mat. 19:21) Omulumentu ngoka ka li e na eitaalo lya fa lyaAbraham. Mbela opwa li ngaa yamwe mboka yi inekela muKalunga? Eeno.

13. (a) Omayele geni Paulus a li a pe Timoteus? (b) Ongiini tatu vulu okutula miilonga omayele gaPaulus kunena?

¹³ Timoteus naye okwa li e na eitaalo lya kola. Paulus okwi ithana Timoteus ‘omukwiita ofule gwaJesus Kristus.’ Konima okwe mu lombwele a ti: “Omukwiita ngoka e li molugodhi, ihi ipyakidhile noompumbwe dhilwe, oshoka okwa hala okwoopalela aluhe omuwiliki gwe.” (2 Tim. 2:3, 4) Mokati kaalanduli yaJesus kunena, omu na aalongi yethimbo lyu udha ya konda pomiliyona yimwe. Aauvithi mboka oya tula miilonga omayele ngoka Paulus e tu pa. Ihaya kala yi itula momatseyitho gopaipindi nomiinima mbyoka tayi ningwa muuyuni. Pehala lyaashono, ohaya kaleke momadhiladhilo ekotampango ndyoka tali ti: ‘Omunangunga ota ningi omupika gwomulilwangunga.’ (Omayel. 22:7) Satana okwa hala tu mane po ethimbo lyetu noonkondo dhetu mokukala twa pwila moongeshefa dhomuuyuni mbuka. Omatokolo gamwe ngoka hatu ningi otashi vulika ge tu ninge aapika yoongunga, uule womimvo. Aakriste yamwe ohaya li omikuli dhiimaliwa oyindji, opo ya lande omagumbo guuzeko, iihauto yondilo noya fute elongo lyopombanda nenge ya ninge oohango dha tata dhaindula. Ohatu ulike uunongo, uuna itaatu indumbile iinima yopamaliko noongunga monkalamwenyo. Ngele tatu shi ningi, otatu ka longela Kalunga twa manguluka, pehala lyokukala aapika yoongeshefa ndhoka tadhi dhana onkandangala muuyuni mbuka. — 1 Tim. 6:10.

14. Etokolotoko lini twa pumbwa okuninga? Gandja iiholelwa.

¹⁴ Otwa pumbwa okupititha komeho Uukwaniilwa waKalunga, opo onkalamwenyo yetu yi kale inaayi kitakana. Opu na aaihokani yamwe ya li ye na ongeshefa onene hayi eta po oshimaliwa shimwe to nyengwa. Oya li miilonga yethimbo lyu udha e taya zi mo. Oya kala ya hala okushuna mo, onkee oya landitha po ongeshefa yawo, ombautu yawo niinima yilwe yopamaliko. Oyi iyamba ya ka kwathele miilonga yokutunga oombelewa oonene moWarwick, moNew York. Omayambeko geni ya li ya mono? Oya longo pamwe nomwanakadhona noshitenya shawo moBetel. Oya longo wo pamwe naavali yomusamane, uule wiiwike yontumba, mboka nayo ya li taya kwathele miilonga yokutunga moWarwick. Omumwameme gumwe omukokolindjila moColorado, moAmerika, okwa li a mono iilonga yetatasiku mombaanga. Aawiliki mombaanga oya li ya panda iilonga ye. Oya tokola ye mu kutilile nokwiindjipaleka ondjambi ye lutatu. Omumwameme okwa ningi po shike? Okwa tindi, oshoka iilonga mbyoka oya li tayi  ke mu imba a kale omukokolindjila. Mbika iiholelwa owala iishona yomaiyambo ogendjigendji, ngoka ga ningwa kaapiya yaJehova. Etokolotoko lyokupititha komeho iinima yUukwaniilwa, otali ulike kutya otwa lenga uukuume wetu naKalunga. Otali ulike wo kutya otwa lenga omaliko gopambepo, shi vulithe shoka oongeshefa dhomuuyuni tadhi vulu oku tu ningila.

15. Uuyamba wuni hawu eta enyanyu lyashili?

¹⁵ Ngele omuntu oku na sha, itashi ti naanaa kutya okwa yambekwa kuJehova. Ye oha yambeke “aayamba yiilonga iiwanawa.” (Lesha 1 Timoteus 6:17-19.) Pashiholelwa, Lucia * gwokoItalia, sho a mono kutya moAlbania omu na ompumbwe yaauvithi, okwa tembukile ko mo 1993. Mbela opu na ngoka a li te mu ambidhidha? Aawe, okwa li owala i inekela thiluthilu muJehova. Okwi ilongo nawa elaka lyOshialbania nokwa kwathela aantu ya konda po 60, yi iyapulile Jehova. Oyendji yomutse ihatu uvitha miitopolwa moka aantu haya taamba ko oshili nuupu. Ihe kehe shimwe tatu ningi tu kwathele yalwe ya mone noya kale mondjila ndjoka tayi fala komwenyo, otatu ka kala twe shi lenga pamwe nayo sigo aluhe. — Mat. 6:20.

16. (a) Oshike tashi ka ningilwa eliko lyomuuyuni? (b) Shoka tu shi kombinga yonakuyiwa oshi na okuguma ngiini etaloko lyetu lyiinima yopamaliko?

¹⁶ Sho Jesus a ti: “Uuna [eliko lyomuuyuni] tali hulu po,” ye mwene okwa li ta ti kutya iinima yopamaliko otayi ka hula po. (Luk. 16:9) Momasiku ngaka gahugunina, oombaanga miilongo yimwe odha mbangolota, wo uuhupilo otawu shongola. Masiku onkalo ndjono otayi ka nayipala muuyuni awuhe. Uuyuni waSatana awuhe, mwa kwatelwa oopolotika, omalongelokalunga noongeshefa otayi ka hula po. Omupolofeti Hesekiel naSefania oya li ya hunganeke kutya oshingoli noshisiliveli mbyoka ya talika ko eliko lya simana muuyuni, otayi ka kala yaa na ongushu. (Hes. 7:19; Sef. 1:18) Otatu ka kala tu uvite ngiini, ngele twa thiki pehulilo lyonkalamwenyo yetu muuyuni mbuno, e tatu mono nani kutya otwa yamba po uuyamba washili ‘neliko lyuuyuni’ mbuka? Otatu ka kala twa fa omulumentu a kala ta longo onkalamwenyo ye ayihe a pewe iimaliwa oyindji, ihe hugunina okwa ka pewa iimaliwa yiifundja. (Omayel. 18:11) Odhoshili kutya omaliko gomuuyuni otaga ka hula po. Onkee ano, ga longitha manga pu na ompito wu ‘ikongele ookuume’ kashili, ano Jehova naJesus. Kehe shoka tatu ningi tu humithe komeho iinima yUukwaniilwa, otashi ke tu yambapaleka pambepo.

17, 18. Ookuume yaKalunga otaya ka mona uuwanawa wuni?

¹⁷ Uuna Uukwaniilwa waKalunga we ya, aantu itaya ka kala we momagumbo ngoka haga futilwa nenge ya lye omikuli. Iikulya otayi ka kala ya ha notayi ka liwa oshali nokapu na ngoka ta ka pumbwa okuya koshipangelo. Oyana yaKalunga yokombanda yevi otaya ka nyanyukilwa iinima ayihe mOparadisa. Iingoli, iisiliveli nosho wo uuwe itayi ka landithwa, ihe otayi ka zalwa nokumonikitha nawa momagumbo. Iilongitho yongushu ngaashi iipilangi, omamanya nosho wo iitenda otayi ka monika oshali, opo yi longithwe mokutunga omagumbo omawanawa. Aantu otaya ka kwathelathana, nokapu na ngoka taka futitha mukwawo. Onkalamwenyo yetu ayihe, otatu ka kala tatu topolelathana iilikolomwa mbyoka tayi ka kala muuyuni uupe.

¹⁸ Mboka taya panga uukuume naKalunga nosho wo naJesus, otaya ka mona uuwanawa mboka. Kapu na shoka tashi ki imba aapiya yaJehova kombanda yevi ya kale ya nyanyukwa, sho yu uvite oohapu dhaJesus ndhoka tadhi ti: “Ileni, mu ka thigulule oshilongo mwe shi longekidhilwa okuza keshito lyuuyuni.” — Mat. 25:34.