1, 2. Omolwashike twa pumbwa okukundathana kombinga yankene tu na okuhekeleka mboka ya silwa? (Tala kethano lyopetameko.)

OMUMWAMEME Susi, okwa ti: “Konyala uule womumvo, konima sho omwanamati gwetu a si, otwa kala twa nika oluhodhi olunene.” Omumwatate gumwe okwa popi kutya sho omukulukadhi gwe a si ombadhilila, okwa kwatwa kuuwehame wopalutu wa kwata miiti. Kakele komumwatate ngono, aantu oyendji nayo ohaya kwatwa kuuwehame mboka. Aamwatate naamwameme megongalo, ihaya kala ya hala ya silwe aantu mboka ye hole, manga Armageddon inaa thika. Kutya nduno owa silwa omuntu ngoka wu hole nenge wu shi omuntu ngoka a silwa, otashi vulika wi ipule to ti: ‘Ongiini mboka ya silwa taya vulu okukwathelwa yu ungaunge nuudhigu mboka?’

² Aantu yamwe ohaya ti kutya sho omimvo tadhi humu ko, onkalo yomuntu ngoka a silwa ohayi ende tayi hwepopala. Mbela shono oshoshili ngaa? Omuselekadhi gumwe okwa ti: “Onda mona kutya omukalo moka to longitha ethimbo lyoye, ohagu ku kwathele wu hupule.” Odhoshili kutya iilalo yokomwenyo ohayi ende tayi aluka mokweendela ko kwethimbo, ngaashi naanaa iilalo yopalutu. Oshike nduno tashi vulu okukwathela mboka ya silwa ya hupule?

3, 4. Omolwashike tu na uushili kutya Jehova oku shi kutya mboka ya silwa oya pumbwa ehekeleko?

³ Kapu na omalimbililo kutya Jehova, Kalunga ketu omunahenda, oye onzo yehekeleko alihe. (Lesha 2 Aakorinto 1:3, 4.) Jehova ngoka e li oshiholelwa dhingi shokuulika olukeno, okwa shilipaleka aantu ye a ti: “Ongame, eeno, ongame mwene handi mu hekeleke.” — Jes. 51:12; Eps. 119:50, 52, 76.

⁴ Tate yetu omunahenda, naye okwa li a silwa aantu mboka e hole. Aantu mboka ongaashi: Abraham, Isak, Jakob, Moses nOmukwaniilwa David. (Num. 12:6-8; Mat. 22:31, 32; Iil. 13:22) Oohapu dhaKalunga odhe tu shilipaleka kutya Jehova okwa halelela, sha hala okutya, okwa tegelela nondjuulukwe ethimbo ndyoka ta ka yumudha aantu. (Job 14:14, 15) Otaya ka kala ya nyanyukwa noye na uukolele wu li nawa. Dhiladhila wo kutya Omwana gwaKalunga omuholike, ‘ngoka a li e mu nyanyudha,’ okwa si eso tali uvitha omwenyo omutoye. (Omayel. 8:22, 30) Itatu vulu okuyelitha thiluthilu nkene Jehova a li u uvite, sho Omwana a si. — Joh. 5:20; 10:17.

5, 6. Ongiini Jehova ta vulu oku tu hekeleka?

⁵ Otatu vulu okukala neinekelo lya kola kutya Jehova ote ke tu kwathela. Onkee ano, otu na okukala aluhe twa manguluka oku mu mbumbulila omitima dhetu okupitila megalikano, tatu mu lombwele nkene tu uvite. Itashi tu hekeleke tuu okutseya kutya Jehova oku uvite ko oluhodhi lwetu nohe tu pe ehekeleko ndyoka twa pumbwa! Mbela ohe shi ningi ngiini?

⁶ Omukalo gumwe moka Kalunga he tu kwathele, okupitila ‘mombepo ondjapuki.’ (Iil. 9:31) Oonkondo dhaKalunga odhi li ekwatho enene mokuhekeleka aantu. Jesus oku uvaneka kutya Tate gwomegulu ota ka kala a halelela ‘okugandja ombepo ondjapuki kumboka taye mu indile.’ (Luk. 11:13) Omumwameme Susi, ngoka a popiwa metetekelo, okwa ti: “Omathimbo ogendji, otwa li hatu galikana twa mana mo, tatu pula Jehova e tu hekeleke. Ethimbo kehe, ombili yaKalunga oya kala shili tayi wilike omitima dhetu nomadhiladhilo getu.” — Lesha Aafilippi 4:6, 7.

7, 8. Omolwashike tatu vulu okukala neinekelo kutya Jesus ote ke tu hekeleka?

⁷ Jesus, Omwana gwaJehova, okwa li u ulike olukeno lwaHe moohapu nomiilonga, sho a li kombanda yevi. (Joh. 5:19) Jesus okwa tumwa kombanda yevi, opo a hekeleke “mboka ye na omwenyo gwa nyanyagulwa” nosho wo “ayehe mboka taa lili.” (Jes. 61:1, 2; Luk. 4:17-21) Aantu oya li ye shi kutya Jesus oku na ko nasha noonkalo dhawo nonokutya okwa hala lela a kandule po uupyakadhi wawo. — Heb. 2:17.

⁸ Osha yela kutya sho Jesus a li omugundjuka, naye okwa li a taalelwa kuudhigu weso lyaakwanezimo naashiwikile ye. Osha fa shi li ngeyi kutya he ngoka e mu putudha, Josef, okwa si pethimbo Jesus e li omugundjuka. * Dhiladhila kunkene Jesus a li u uvite, tashi vulika pethimbo ndyono e na owala omimvo 20 nasha. Okwa li e na okwiidhidhimikila onkalo ndjoka yinikitha oluhodhi nosho wo okukwathela yina, aamwayina aamati naakadhona.

9. Jesus okwa li u ulike ngiini olukeno, sho Lasarus a si?

⁹ Sho Jesus a tameke okuya muukalele, okwa li e na uunongo wi iwetikile nokwa li hu ulike uukwawo wanakali. Pashiholelwa, natu tale nkene a li i inyenge, sho kuume ke kopothingo, Lasarus, a si. Nonando Jesus okwa li e  shi shi kutya ote ke mu yumudha, okwa li a nika oluhodhi noonkondo, ndoka lwa li lwa gwilila po wo Maria naMarta. Omolwolukeno ndoka a li uvite, okwa li a hendwa lela komutima, shoka she mu lilitha nokuli. — Joh. 11:33-36.

10. Omolwashike tatu vulu okukala neinekelo kutya Jesus oku shi nkene hatu kala tu uvite, uuna twa nika oluhodhi?

¹⁰ Ongiini olukeno ndoka Jesus a li u ulike nosho wo oohapu dhe dhehekeleko tayi vulu oku tu kwathela kunena? Ombiimbeli otayi ti kutya “Jesus Kristus iha lunduluka, oku li ngaashi a li ohela, nosho ta kala nena nosigo aluhe.” (Heb. 13:8) Molwaashono ‘Omugandji gwomwenyo’ oku shi nkene omuntu ha kala u uvite, uuna a nika oluhodhi, “ota vulu okukwatha mboka taa makelwa.” (Iil. 3:15; Heb. 2:10, 18) Onkee ano, otatu vulu okukala neinekelo kutya Kristus oha kala natango u uvite nayi, uuna yalwe ya nika oluhodhi. Oku uvite ko oluhodhi lwawo nohe ya hekeleke “pethimbo lyo opala.” — Lesha Aahebeli 4:15, 16.

11. Omanyolo geni ho mono hage ku hekeleke unene?

¹¹ Ehokololo kombinga yokunika oluhodhi kwaJesus, omolweso lyaLasarus, olyo limwe lyomomahokololo taga hekeleke, ngoka ga popiwa mOmbiimbeli. Shoka itashi tu kumitha, “oshoka ashihe shoka sha nyolwa mOmanyolo, osha nyolwa, shi tu longe, opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.” (Rom. 15:4) Ngele owa nika oluhodhi, nangoye oto vulu wo okuhekelekwa komanyolo taga landula:

• “Omuwa oku li popepi naamboka ya dhengwa pevi; ota hupitha mbo ya kanitha etegameno.” — Eps. 34:18, 19.

• “Uuna nda tila nonda sa iimpwiyu, [Jehova] oto hekeleke ndje e to nyanyudha ndje.” — Eps. 94:19.

• “Omuwa gwetu Jesus Kristus mwene naKalunga Tate yetu, ngoka e tu hole nokwe tu pa kesilohenda lye omukumo gwaaluhe netegameno ewanawa, ne mu tse omukumo ye ne mu koleke.” — 2 Tes. 2:16, 17. *

12. Omomukalo gumwe guni gwa simana tatu vulu okuhekeleka yalwe?

¹² Egongalo lyopaKriste oli li oshinima shimwe shoka tashi vulu okuhekeleka mboka ya nika oluhodhi. (Lesha 1 Aatessalonika 5:11.) Ongiini to vulu okutsa omukumo nokuhekeleka mboka ye na “omwenyo gwa nyanyagulwa”? (Omayel. 17:22) Kaleka momadhiladhilo kutya opu na “ethimbo lyokumwena, nethimbo lyokupopya.” (Omuuv. 3:7) Omuselekadhi gwedhina Dalene, okwa ti: “Mboka ya silwa oya pumbwa okuholola omadhiladhilo nomaiyuvo gawo. Onkee ano, oshinima shoka sha simana to vulu okuningila nakusilwa, oku mu pulakena wi itula mo.” Omumwameme Junia, ngoka omumwayinamati i idhipaga, okwa ti: “Nonando ito vulu okuuva ko thiluthilu nkene mboka ya silwa yu uvite, shoka sha simana osho kutya owa hala okuuva ko nkene yu uvite.”

13. Oshike tu na okudhimbulukwa kombinga yomuntu ngoka a nika oluhodhi?

¹³ Dhimbulukwa kutya haantu ayehe haya kala yu uvite sha faathana nenge hayi inyenge momukalo gwa faathana, uuna ya nika oluhodhi. Omathimbo gamwe, omuntu ngoka a nika oluhodhi oye owala ha kala e shi nkene u uvite. Otashi vulika shi kale oshidhigu kuye okupopya thiluthilu nkene u uvite. Ombiimbeli otayi ti: “Omwenyo ogu shi uudhigu wagwo, nomenyanyu lyagwo egumbo lilwe itali vulu  okwiidhopa mo.” (Omayel. 14:10) Nonando gumwe oku holole nkene u uvite, haaluhe hashi kala oshipu kuyalwe okuuva ko shoka ta kambadhala okutya.

14. Oshike tatu vulu okuninga tu hekeleke mboka ye li moluhodhi?

¹⁴ Otashi vulu wo okukala oshidhigu okutseya shoka tu na okupopya nomuntu ngoka a gwililwa po koluhodhi. Ombiimbeli otayi ti: “Elaka lyaanawino olyo ealudho.” (Omayel. 12:18) Mokambo Uuna gumwe ngoka wu hole a sa, aantu oyendji oya mona mo oohapu tadhi hekeleke. * Olundji, oshinima shimwe shoka to vulu okuninga nohashi kwathele unene osho ‘okulila pamwe naamboka taa lili.’ (Rom. 12:15) Omuselekadhi gwedhina Gaby, okwa ti: “Ohandi uvu nda pepelelwa, ngele nda lili. Onkee ano, ohashi hekeleke ndje, uuna ookuume kandje taya lili pamwe nangame. Kungawo, ihandi kala ndu uvite uuwike.”

15. Omomikalo dhini ishewe tatu vulu okuhekeleka omuntu, ngele oshidhigu kutse okupopya naye shu ukilila? (Tala okampungu “ Oohapu oombwanawa dhehekeleko.”)

¹⁵ Ngele oho mono oshidhigu okuhekeleka omuntu shu ukilila, onawa wu mu tumine okakalata ta ka hekeleke, oe-mail, etumwalaka nenge ontumwafo. Oto vulu okutotha enyolo tali hekeleke, okudhimbulukwa uukwatya uuwanawa wanakusa nenge ethimbo lyontumba ndyoka mwa li mwa nyanyukilwa pamwe. Omumwameme Junia okwa ti: “Okutuminwa etumwalaka efupi tali tsu omukumo nenge okuhiwa komumwameme tu ka menekele po, ohashi kwathele ndje noonkondo. Iinima mbyoka ohayi ningitha ndje ndi kale ndu uvite ndi holike nonokutya aantu oye na ko nasha nangame.”

16. Omukalo gulwe omwaanawa guni tatu vulu okulongitha tu hekeleke yalwe?

¹⁶ Omagalikano getu otaga vulu okukwathela  ooitaali ooyakwetu mboka ya silwa. Otatu vulu oku ya kwatela momagalikano getu nenge tu galikane pamwe nayo. Nonando otashi vulika shi kale oshidhigu okugalikana momukalo moka tu ulike kutya owa nika oluhodhi, egalikano lyoye tali zi komutima kutya nduno oto galikana to lili nenge to hekumuna, otali vulu okukala ekwatho enene kwaangoka a nika oluhodhi. Omumwameme Dalene ota ti: “Omathimbo gamwe, uuna aamwameme ye ya okuhekeleka ndje, ohandi ya pula ngele otaya vulu okugalikana pamwe nangame. Olundji ngele ya tameke okugalikana, ihaya kala naanaa ye shi kutya naya popye shike, ihe ngele egalikano lya yi mokati, ohaya kala ya manguluka e taya popi shoka tashi gumu omutima. Eitaalo lyawo lya kola, ohole yawo nokunakonasha kwawo oya kala nokukoleka eitaalo lyandje.”

17-19. Omolwashike twa pumbwa okutsikila okuhekeleka yalwe?

¹⁷ Itatu vulu naanaa okutseya kutya uule wethimbo li thike peni omuntu ngoka a silwa ta kala a nika oluhodhi. Onkee ano, kambadhala oku mu hekeleka, ihe kashi shi owala pethimbo opo a silwa, uuna ookuume naakwanezimo ye li po. Owa pumbwa wo oku mu hekeleka nomoomwedhi tadhi landula ko, uuna aantu ya shuna komagumbo gawo. Ombiimbeli otayi ti: “Kuume oku na ohole aluhe, nomumwayina okwa valwa, opo a kwathe moluhepo.” (Omayel. 17:17) Aamwatate naamwameme oya pumbwa okuhekeleka mboka ya silwa sigo ya hupula. — Lesha 1 Aatessalonika 3:7.

¹⁸ Dhimbulukwa kutya mboka ya silwa otashi vulika ya kale ya nika oluhodhi ethimbo kehe, omolwiituthidhimbuluko, oomusika dhontumba, omathano, omaipyakidhilo, ezimba lyontumba, ewi nosho wo oomwedhi dhontumba momumvo. Iinima oyindji mbyoka omuselekadhi nenge omusilwalume ha tameke okuninga oye awike, ngaashi okuya kiigongi nenge kEdhimbuluko, otashi vulika yi mu nikithe oluhodhi. Omumwatate gumwe okwa ti: “Onda li nda tegelela okukala nda nika oluhodhi mesiku lyoshituthidhimbuluko shotango shohango yetu, okuza sho omukulukadhi gwandje a si. Ihe aamwatate naamwameme yamwe oya ningile ndje okatuthi pamwe nookuume kandje kopothingo, opo ndaa kale ndu uvite uuwike.”

¹⁹ Otu na okukaleka momadhiladhilo kutya mboka ya silwa inaya pumbwa owala etsomukumo poompito dhi ikalekelwa. Omumwameme Junia okwa yelitha a ti: “Okugandja ekwatho nokuulika okunakonasha ethimbo kehe, ohashi kwathele noonkondo ngoka a silwa. Okuninga ngawo okwa simana nohaku hekeleke omuntu noonkondo.” Odhoshili kutya itatu vulu okukutha po uuwehame awuhe mboka nakusilwa u uvite, ihe otatu vulu oku mu hekeleka ngaashi tatu vulu mokukatuka oonkatu tu mu kwathele. (1 Joh. 3:18) Omumwameme Gaby ota ti: “Onda pandula shili Jehova, sho aakuluntugongalo yamwe ya kala nokukwathela ndje ndi pite moonkalo oondhigu. Oya kwathela ndje ndi kale ndu uvite ndi li megameno lyaJehova.”

20. Omolwashike omauvaneko gaJehova ge li ekwatho enene mokuhekeleka?

²⁰ Otashi tu hekeleke okutseya kutya Jehova, Kalunga kehekeleko alihe, ota ka kutha po oluhodhi. Ota ka gandja ehekeleko tali kalelele, “uuna oonakusa ayehe mboka ye li moombila, taa ka uva ewi [lyaKristus]. Yo notaa ka za mo moombila dhawo.” (Joh. 5:28, 29) Kalunga, “Omuwa Omupangeliawike,” oku uvaneka kutya “ota ka hanagula po eso sigo aluhe. Ota ka theta po omahodhi momeho gaayehe.” (Jes. 25:8) Onkee ano, pehala lyoku ka ‘lila pamwe naamboka taya lili,’ ayehe mboka taya ka kala kombanda yevi otaya ka ‘nyanyukwa pamwe naamboka ya nyanyukwa.’ — Rom. 12:15.