1. Omolwashike ompangela yaSiria naIsraeli ya li tayi ka ponya?

POKATI komumvo 762 K.E.N. nomumvo 759 K.E.N., omukwaniilwa gwaIsraeli nogwaSiria oya li ya hingile uukwaniilwa waJuda iita. Mbela onelalakano lyashike? Onelalakano lyokukwata ko Jerusalem, e tayu umbu ko koshipundi omukwaniilwa Ahas, e taye mu pingene po nomulumentu gulwe, tashi vulika ngoka kaali gwomezimo lyomukwaniilwa David. (Jes. 7:5, 6) Omukwaniilwa gwaIsraeli oku na okukala a li e shi kutya ompangela ndjoka otayi ponyo. Jehova okwa adhikile a gandja elombwelo kutya gumwe gwomoluvalo lwaDavid okwa li ta ka kala koshipangelapundi She sigo aluhe, noohapu dhaKalunga ihadhi kala nando inaadhi gwanithwa. — Jos. 23:14; 2 Sam. 7:16.

2-4. Yelitha kutya Jesaja 7:14-16 okwa li a gwanithwa ngiini (a) methelumumvo etihetatu K.E.N. (b) methelumumvo lyotango E.N.

² Petameko, Siria naIsraeli oya li taya monika ya fa ye na oonkondo. Molugodhi owala lumwe, Ahas okwa li a kanitha aakwiita omapenda 120 000! Maaseja, “omuna gwomukwaniilwa,” okwa li a dhipagwa. (2 Ondjal. 28:6, 7) Ihe Jehova okwa li e wete ashihe shoka. Onkee ano, okwa li a dhimbulukwa shoka a li u uvanekele David, nokwa tumu omupolofeti Jesaja a fale etumwalaka tali tsu omukumo.

³ Jesaja okwa ti: “Omukadhona ta ningi omusimba nota vala omumati, nedhina lye oImmanuel. . . . Sigo ta koko a tseye okuhogolola uuyuuki nokweetha uuwinayi. Nokuli manga ethimbo ndyoka inaali ya, iilongo yaakwaniilwa mboka yaali mwe ya tila [Siria naIsraeli], otayi ningi omaputu gowala.” (Jes. 7:14-16) Olundji oshitopolwa shotango shehunganeko ndyoka osha kala hashi ulike kokuvalwa kwaMesiasa, naashoka oshi li mondjila. (Mat. 1:23) Ihe molwaashoka ‘aakwaniilwa mboka yaali,’ gwaSiria nogwaIsraeli, kaya li we taya thiminike Juda methelumumvo lyotango E.N., ehunganeko kombinga yaImmanuel oli na okukala lya li li na egwanitho lyotango pethimbo lyaJesaja.

⁴ Nziya konima yaasho Jesaja a li a popi oohapu ndhoka  oondhindhilikwedhi, omukulukadhi gwe okwa li a ningi omusimba nokwe mu valele okanona okamati Maher-Shalal-Hash-Bas. Otashi vulika okanona haka oko ‘Immanuel’ ngoka a popiwa kuJesaja. * Pethimbo lyOmbiimbeli, okahanona oka li hashi vulika ka lukwe edhina limwe, tashi vulika omolwokudhimbulukwa oshiningwanima shi ikalekelwa, ihe otaka vulu okukala ka tseyika kaavali yako nokaapambele nedhina lilwe. (2 Sam. 12:24, 25) Kapu na uunzapo mboka tawu ulike kutya Jesus oku na esiku i ithanenwe Immanuel. — Lesha Jesaja 7:14; 8:3, 4.

5. Omukwaniilwa Ahas okwa li a ningi etokolo lini lya nika uugoya?

⁵ Manga Siria naIsraeli ya li taya gandja eitulomo kuJuda, oshigwana shilwe shi na etangakwiita enankondo osha li sha hala okukwata ko oshilongo shoka. Osha li epangelo enankondo lyuuyuni lyaAssur ndyoka lya li tali yambuka po. Pakupopya kwaJesaja 8:3, 4, Assur okwa li ta ka yuga ko “uuyamba waDamaskus auhe” “niihakanwa ayihe yaSamaria” manga inaa ponokela uukwaniilwa waJuda wokuumbugantu. Pehala lyokwiinekela moohapu dhaKalunga ndhoka a li a gandja okupitila muJesaja, Ahas ngoka a li kee na eitaalo okwa li a ningi euvathano nAayassur, shoka sha li sha fala sigo omokuthindilwa kongudhi kwaJuda kuyo. (2 Aak. 16:7-10) E li omusita gwoshigunda shaJuda, Ahas ka li tuu a yemateke oshigunda! Otashi vulika tu ipule tatu ti: ‘Uuna ndi na okuninga omatokolo ga simana, mbela ohandi inekele ngaa Kalunga nenge aantu?’ — Omayel. 3:5, 6.

6. Gandja eyooloko ndyoka li li pokati kelelo lyaAhas nolyaHiskija.

⁶ Ahas okwa si momumvo 746 K.E.N., nomwanamati Hiskija okwa li a thigulula po uukwaniilwa waJuda mboka wa li wa mbangolota pamaliko nosho wo pambepo. Sho omukwaniilwa ngoka omugundjuka a yi koshipundi, oshike a li ta ka pititha komeho? Mbela okwa li ta ka hwepopaleka uuhupilo waJuda mboka wa li tawu shongola? Aawe. Hiskija okwa li omulumentu e na uupambepo uuwanawa, ngoka a li lela a gwana okukala omusita gwoshigwana she. Onkatu ye yotango oya li okutotulula elongelokalunga lyashili nokukwathela oshigwana shoka oshishunimonima shi kale ishewe shi na ekwatathano naJehova. Sho a li u uvu ko kutya Kalunga okwa hala a ninge shike, Hiskija okwa li a katuka oonkatu dha kwata miiti. Ine tu tulila po tuu oshiholelwa oshiwanawa! — 2 Ondjal. 29:1-19.

7. Omolwashike sha li sha simana kAalevi ya shilipalekwe kutya omukwaniilwa ote ke ya ambidhidha?

⁷ Aalevi oya li taya ka dhana onkandangala ya simanenena mokutotulula elongelokalunga lyashili. Onkee ano, Hiskija okwa li a gongala nayo opo e ya shilipaleke kutya ote ke ya ambidhidha. Kala ando wa fa wu wete Aalevi aadhiginini mboka ya li pokugongalo hoka, omahodhi genyanyu taga pononoka miipala yawo sho yu uvu omukwaniilwa gwawo a ti: “Onelela mboka mwa hogololwa kOMUWA, mu mu fikile iitsinino ne mu fale aantu moku mu simaneka.” (2 Ondjal. 29:11) Eeno, Aalevi oya li ye na uuthemba wokuhumitha komeho elongelokalunga lyashili.

8. Hiskija okwa li a katuka oonkatu dhini dha gwedhwa po opo a hwepopaleke uupambepo woshigwana, noshizemo osha li shini?

⁸ Hiskija okwa li a hiya Juda naIsraeli ashihe koshituthi oshinene shOpaasa, shoka sha li sha landulwa kOshituthi shIikwiila Inaayi Tulwa Efulika shomasiku gaheyali. Oshigwana osha li sha nyanyukilwa oshituthi shoka noonkondo nomolwaashoka osha li sha lelepekwa nomasiku gaheyali. Ombiimbeli oya ti: “Oshilando Jerusalem osha li shu udha enyanyu, oshoka iinima ngaambika kayi ningilwe we okuza muuyuni waSalomo yaDavid.” (2 Ondjal. 30:25, 26)  Oshituthi shoka shopambepo kasha li tuu etsomukumo koshigwana ashihe! 2 Ondjalulo 31:1 otayi ti: ‘Oshituthi sho sha hulu, oya kumuna po oongudhimanya e taa teya po iiyelekela e taa yonagula po iiyambelo ayihe nomahala giinonoma yuupagani.’ Mokuninga ngaaka, Juda okwa tameke okugalukila kuJehova. Eyopaleko ndika lyopambepo olya li tali ka kala lya simanenena omolwoshinima shoka sha li tashi ya.

9. (a) Oompangela dhaIsraeli odha li dha piyaganekwa ngiini? (b) Sanherib okwa li a pondola shike petameko muJuda?

⁹ Ngaashi oohapu dhaJesaja dha ti shili, Aayassur oya li ya sindi uukwaniilwa waIsraeli wokuumbangalantu e taya kwata po aantu yasho, naashoka osha li sha piyaganeke ompangela yaIsraeli yokuyuga ko oshipundi shaDavid. Ihe mbela Aayassur oya li ye na ompangela yashike? Oya tameke okugandja eitulomo kuJuda. “Momumvo omutimulongo nomutine gwepangelo lyomukwaniilwa Hiskija, Sanherib omupangeli gwaAssur, okwa matukile iilandohote yaJuda e te yi kutha ko.” Sanherib okwa li a kutha ko iilando yaJuda 46. Ipula ando kutya owa kala wu uvite ngiini ando owa li muJerusalem pethimbo mpoka. Omatangakwiita gaAssur oga tameke okukutha ko iilando yaJuda kooshimwe nooshimwe. — 2 Aak. 18:13.

10. Omolwashike tashi vulika oohapu dhaMika 5:5, 6, dha li dha tsu Hiskija omukumo?

¹⁰ Eeno shili, Hiskija okwa li e shi kombinga yoshiponga shoka sha li pokuya, ihe pehala lyokukonga meendelelo ekwatho kiigwana iipagani, ngaashi he omushunimonima, Ahas, a li a ningi, Hiskija okwi inekele muJehova. (2 Ondjal. 28:20, 21) Hiskija oku na okukala a li e shi oohapu dhomupolofeti Mika, ngoka a li ko pethimbo lye ngoka a hunganeke kombinga yaAssur, a ti: “Aayassur . . . otatu ke ya tumina aawiliki yetu aanankondo, ye ke ya kondjithe. Noonkondo dhomatati otaa ka sinda Assur.” (Mika 5:5, 6) Oohapu ndhika dha nwethwa mo odhi na okukala dha li dha tsu Hiskija omukumo, molwaashoka odha li dhu ulike kutya otapu ka holoka etangakwiita ndyoka tali ka matukila nokusinda thiluthilu Assur.

11. Uunake ehunganeko kombinga yaawiliki aanankondo lya li tali ka gwanithwa tango?

¹¹ Ehunganeko kombinga yaawiliki aanankondo olya li li na okugwanithwa tango, nenge momukalo gwa simanenena nalenale konima owala  yokuvalwa kwaJesus, “omuleli gwaIsraeli, oongoka gwomezimo lya za koohekulululwa yomuuyuni wonale.” (Lesha Mika 5:1, 2.) Shika otashi ka ningwa pethimbo mpoka aapiya yaJehova taya ka thindilwa kongudhi ‘kAayassur’ yokunena. Jehova ota ka longekidha po shike okupitila mOmwana ngoka ta pangele ngashingeyi a kondjithe omutondi ngoka? Otatu ke shi mona. Ihe tango, natu tale kutya otatu ilongo shike moonkatu ndhoka Hiskija a li a katuka moshikumungu shAayassur.

12. Hiskija okwa li a katuka oonkatu dhini nosho wo mboka a li nayo opo ya gamene oshigwana shaKalunga?

¹² Jehova oha kala aluhe i ilongekidha oku tu ningila shoka itaatu vulu okwiiningila, ihe oha kala a tegelela tu ninge ngaashi tatu vulu. Hiskija okwa li a kwatathana “nomalenga ge” e taya tokola ayehe pamwe “ya thitike omukanka gwomeya pondje yoshilando, . . . Omukwaniilwa [Hiskija] okwa koleke omagameneno goshilando, sho a tungulula edhingililokuma lya li lya kumunwa po e ta tungile mo ooshungo mulyo e ta tungu edhingililokuma lyokondje. . . . Okwa hambulitha omagonga ogendji niikondekitho.” (2 Ondjal. 32:3-5) Opo a gamene nokulitha oshigwana She pethimbo ndyoka, Jehova okwa li a longitha aalumentu yontumba aanankondo ngaashi Hiskija, omalenga ge, nosho wo aapolofeti mboka ya kola pambepo.

13. Onkatu yini ya simanenena ndjoka Hiskija a li a katuka, opo a longekidhe oshigwana omolwokuponokelwa hoka kwa li pokuya? Shi yelitha.

¹³ Oshinima sha landula ko shoka Hiskija a ningi osha li nokuli sha simanenena shi vulithe okuthitika omukanka gwomeya nenge okutunga omadhingililokuma goshilando. Molwaashoka okwa li omusita e na ko nasha, Hiskija okwa gongaleke oshigwana e te shi ladhipike noohapu ndhika: “Kaleni mwa tokola nomu na einekelo, inamu tila omupangeli gwaAssur. . . . Otu neni oonkondo tu ya vule. Oku na oonkondo dhopantu, ihe tse otu na ekwatho lyOMUWA, Kalunga ketu, te tu kwatha molugodhi lwetu.” Edhimbulukitho ndyoka kutya Jehova okwa li ta ka kondjela oshigwana she kalya li tuu tali koleke eitaalo! Sho Aajuda yu uvu oshinima shika, “oya pendapala pahapu dhomukwaniilwa gwawo.” Ndhindhilika kutya ‘oohapu dhomukwaniilwa’ odho dha li dhe ya kumike. Ye nomalenga ge, nosho wo omuhunganeki Mika na Jesaja, oya li yu ulike kutya oye li aasita ya pyokoka, ngaashi owala Jehova a li a hunganeke okupitila momupolofeti gwe. — 2 Ondjal. 32:7, 8; lesha Mika 5:5, 6.

14. Onkandangala yini elenga ekuluntu lya li lya dhana, noshigwana osha li shi inyenge ngiini?

¹⁴ Omukwaniilwa gwaAssur okwa li a yungu ontanda puLakish, kuuningininolukadhi waJerusalem. Okuza mpoka, okwa li a gandja elombwelo okupitila maatumwa yatatu kutya oshilando nashi igandje. Omupopikalelipo gwe, ngoka a li elenga ekuluntu, okwa li a longitha omikalo odhindji. Okwa li a popi mOshihebeli ta ladhipike oshigwana shi kengelele omukwaniilwa noshi igandje kAayassur, ye te shi fundju kutya ote ke shi tembudhila koshilongo hoka tashi ka kala shi na onkalamwenyo ombwanawa. (Lesha 2 Aakwaniilwa 18:31, 32.) Elenga ndyoka ekuluntu olya li lya ti kutya ngaashi owala ookalunga yiigwana yilwe inaaya vula okugamena aagalikani yawo, osho wo naJehova ita ka vula okuhupitha Aajuda miikaha yAayassur. Shoka shi li pandunge, oshigwana inashi kambadhala okuyamukula omapopyo ngoka gomalundilo, oshinima shoka hashi ningwa olundji kaapiya yaJehova pethimbo lyetu. — Lesha 2 Aakwaniilwa 18:35, 36.

15. Aakalimo yomuJerusalem oya li ya tegelelwa ya ninge shike, na Jehova okwa li a hupitha ngiini oshilando shoka?

¹⁵ Oshi uvitikiwe ko sho Hiskija a li a geya, ihe pehala lyoku ka konga ekwatho koshigwana shilwe, okwa tumu omupolofeti Jesaja e ye kuye. Jesaja okwa lombwele Hiskija a ti: “[Sanherib] ite ya mo, a hite meni lyoshilando shika nenge a umbile mo nando oshikuti shimwe molugodhi.”  (2 Aak. 19:32) Oshinima shoka aakalimo yomuJerusalem ya li ye na okuninga okukakatela owala uudhiginini wawo. Jehova okwa li ta ka kondjela Juda. Okukondja okwa kondja tuu shili! “Uusiku mbwiyaka omuyengeli gwOMUWA okwa yi kontanda yAayassur e ta dhipagele ko aakwiita 185 000.” (2 Aak. 19:35) Juda ka li a hupithwa molwaashoka Hiskija a thitike oothithiya dhoshilando nenge ando molwaashoka a tungu edhingililokuma lyoshilando, ihe omolwaashoka Kalunga a yi mo olunyala.

16. Oolye kunena taya thaneke (a) aakalimo yomuJerusalem (b) “Aayassur” (c) aawiliki aanankondo?

¹⁶ Ehunganeko kombinga yaawiliki aanankondo otali gwanithwa momukalo omundhindhilikwedhi pethimbo lyetu. Aakalimo yomuJerusalem shonale oya li ya ponokelwa kAayassur. Monakuyiwa yi li popepi, oshigwana shaJehova shoka tashi monika anuwa sha fa itaashi vulu okwiigamena otashi ka ponokelwa ‘kAayassur’ yokunena mboka elalakano lyawo oku ya hulitha po ayehe. Omanyolo otaga ulike kokuponokelwa hoka nosho wo kokuponoka ‘kwaGog yaMagog,’ okuponoka ‘kwomukwaniilwa gwokuumbangalantu,’ nosho wo okuponoka ‘kwaakwaniilwa yokombanda yevi.’ (Hes. 38:2, 10-13; Dan. 11:40, 44, 45; Eh. 17:14; 19:19) Mbela iiponokela mbika oya yoolokathana? Hasho lela. Otashi vulika Ombiimbeli tayi longitha omadhina ga yoolokathana ihe otayi ulike owala koshiponokela shimwe. Ehunganeko lyaMika otali popi ‘iilwitho yini yomeholamo’ mbyoka Jehova ta ka longitha a kondjithe omutondi ngoka kee na ohenda ‘Assur’? Oombyoka tuu omuntu itoo hala oku yi itaala, ano ‘aawiliki aanankondo’! (Mika 5:5) Aawiliki aanankondo yetangakwiita ndika enankondo oyo aakuluntugongalo. (1 Pet. 5:2) Kunena, Jehova okwa tula po aamwatate oyendji ya pyokoka pambepo ya lithe oonzi dhe dhi na ondilo, ya nkondopaleke oshigwana she shi kale shi ilongekidhila eponokelo lyomonakuyiwa ndyoka tali ka za ‘kAayassur’ yokunena. Ehunganeko lyaMika olya ti kutya “noonkondo dhomatati otaa ka sinda Assur.” (Mika 5:6) Eeno, ‘miikondjitho mbyoka taya longitha molugodhi nduka,’ omu na ‘egongamwele lyombepo,’ Oohapu dhaKalunga. — 2 Kor. 10:4; Ef. 6:17.

17. Aakuluntugongalo otaya vulu okuthika pomahulithodhiladhilo gane geni okuza mehokololo ndyoka twa kundathana?

¹⁷ Aakuluntugongalo mboka taya lesha oshitopolwa shika otaya vulu okumona iitsa yontumba mbyoka taya vulu okulongitha mehokololo ndyoka twa zi nokukundathana: (1) Onkatu ya simanenena ndjoka tatu vulu okukatuka opo tu ilongekidhile oshiponokela ‘shAayassur’ shoka shi li pokuya, okukoleka eitaalo lyetu muKalunga nokukwathela aamwatate ya ninge sha faathana. (2) Sho ‘Aayassur’ taya ponoka, aakuluntugongalo oye na okukala yi itaala thiluthilu kutya Jehova ote ke tu hupitha. (3) Pethimbo mpoka, ewiliko tali hupitha oomwenyo ndyoka tatu pewa kehangano lyaJehova otashi vulika li kale tali monika lya fa kaali na oshilonga pataloko lyopantu. Atuheni otu na okukala twi ilongekidha okuvulika kelombwelo kehe ndyoka tatu pewa, nonando oli kale tali monika lya fa li na oshilonga pataloko lyopantu nenge hasho. (4) Ngashingeyi olyo ethimbo kukehe mboka tashi vulika yi inekela melongo lyopombanda, miinima yopamaliko, nenge momahangano gopantu ya lundulule okudhiladhila kwawo. Aakuluntugongalo oye na okukala yi ilongekidha okukwathela kehe ngoka ngashingeyi tashi vulika eitaalo lye tali tengauka.

18. Ongiini okutedhatedha kehokololo ndika taku ke tu etela uuwanawa monakuyiwa?

¹⁸ Ethimbo otali ke ya uuna aapiya yaKalunga yokunena taya ka kala taya monika ya fa kaaye na ngoka te ya kwatha ngaashi Aajuda ya li ya kondekelwa muJerusalem pethimbo lyaHiskija. Pethimbo mpoka, oohapu dhaHiskija nadhi tu tse omukumo. Natu dhimbulukwe kutya aatondi yetu oye “na oonkondo dhopantu, ihe tse otu na ekwatho lyOMUWA, Kalunga ketu, te tu kwatha molugodhi lwetu.” — 2 Ondjal. 32:8.