1, 2. (a) Omolwashike sha simanenena tu kale twa “tonata, opo tu vule okugalikana”? (b) Otashi ka kala shi li nawa twi ipule omapulo geni gokwiikonakona ge na ko nasha negalikano?

OMUNIILONGA gumwe ngoka a li ha longo uusiku ota ti: “Ethimbo ndyoka hali kala edhigu okukala wa tonata, okoongulasha.” Otashi vulika yalwe mboka ye na okukala ya tonata uusiku awuhe taye shi zimine. Aakriste yokunena oya taalela eshongo lya faathana oshoka onkalelo ndjika yaSatana ya kolokosha ngashingeyi oya fa yi li pethimbo lyuusiku uule mpoka kwa luudha thokothoko. (Rom. 13:12) Itashi ka kala tuu sha nika oshiponga kutse ngele otwa kotha pethimbo ndika! Osha simanenena tu ‘kale tu na omadhiladhilo gu uka’ nokutula miilonga ekumagidho ndyoka lyopamanyolo tu kale twa “tonata, opo tu vule okugalikana.” — 1 Pet. 4:7, yelekanitha NW.

² Omolwethimbo ndyoka tu li mulyo, oshi li pandunge twi ipule tatu ti: ‘Onda tonata shi thike peni uuna tashi ya pokugalikana? Mbela ohandi galikana ngaa omagalikano gi ili nogi ili, nohandi kala ngaa nokugalikana? Mbela ondi na ngaa omukalondjigilile gwokugalikanena yalwe, nenge ohandi galikana owala kombinga yoompumbwe dhandje naashoka nda hala? Negalikano olya simana shi thike peni opo ndi vule oku ka hupithwa?’

3. Omagalikano gamwe ogeni?

³ Montumwafo ye ndjoka a nyolele Aaefeso, omuyapostoli Paulus okwa li a popi kombinga ‘yomagalikano gi ili nogi ili.’ (Ef. 6:18, NW) Olundji momagalikano getu ohatu pula Jehova e tu gwanithile po oompumbwe dhetu noku tu kwathele tu taaguluke omandangalati. ‘Omuuvi gwomagalikano’ oha pulakene pahole sho tatu mu pula ekwatho. (Eps. 65:2) Ihe otu na wo okulonga nuudhiginini tu kale tatu gandja eitulomo komagalikano galwe. Omagalikano ngaka oga kwatela mo ngoka gomahambelelo, gomapandulo nogomaindilo.

4. Omolwashike tu na okuhambelela Jehova olwindji momagalikano getu?

 ⁴ Opu na omatompelo ogendji kutya omolwashike tu na okukwatela mo omahambelelo momagalikano getu kuJehova. Pashiholelwa, sho tatu dhiladhila kombinga ‘yiilongankondo ye’ nosho wo ‘yuunene we waa shi kutumbulwa’ ohashi tu inyengitha tu mu hambelele. (Lesha Episalomi 150:1-6.) Omolwashike mbela? Omolwaashoka oovelise hamano dhEpisalomi 150 otadhi tu kumagidha lwiikando 12 tu hambelele Jehova. Nesimaneko enene lyokusimaneka Kalunga, omunyoli gwepisalomi lilwe okwi imbi a ti: “Otandi ku hambelele luheyali mesiku omolwomapangulo goye omayuuki.” (Eps. 119:164) Jehova okwa gwana shili okuhambelelwa. Onkee ano, mbela katu na oku mu hambelela “luheyali mesiku,” ano olwindjilwindji momagalikano getu?

5. Ongiini okukala hatu pandula megalikano ku li egameno?

⁵ Okugandja omapandulo oku li omukalo gulwe gwa simana gwokugalikana. Paulus okwa li a kumagidha Aakriste yomoshilando shaFilippi a ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo [“omapandulo,” NW].” (Fil. 4:6) Okupandula Jehova nomutima aguhe megalikano ohaku tu gamene. Shika oshi li ngeyi unene tuu molwaashoka otu li momasiku gahugunina moka aantu “ihaa pandula.” (2 Tim. 3:1, 2) Eeno shili, uuyuni owu udha ombepo yokwaapandula. Ngele inatu kotoka, otatu vulu okunwethwa mo nuupu kombepo ndjoka. Okupandula Kalunga megalikano ohaku tu kaleke twa gwanenwa nohaku tu keelele kaatu ninge ‘aangungutuli naagandji yuusama.’ (Jud. 16) Natango, uuna aasamane mboka ye li omitse dhomaukwanegumbo taya kwatele mo omapandulo momagalikano gawo sho taya galikana pamwe naaholike yawo, ohaya ningitha aakulukadhi yawo noyana ya kale nombepo yokupandula.

6, 7. Okuninga omaindilo okwa kwatela mo shike, notatu vulu okwiindila Jehova shike?

⁶ Omaindilo ogo omagalikano haga zi komutima ngoka haga ningwa nomaiyuvo gomuule. Mbela otatu vulu okwiindila Jehova kombinga yashike? Otatu vulu oku mu indila uuna tatu hepekwa nenge ngele tu na uuwehame wa kwata miiti. Pomathimbo ngoka, omagalikano getu gokupula ekwatho kuKalunga ohaga ningi omaindilo. Ihe mbela otu na owala okwiindila Jehova pomathimbo ngaka?

⁷ Tala koshiholelwa shaJesus shegalikano, ngoye to ndhindhilike shoka a ti kombinga yedhina lyaKalunga, yUukwaniilwa We nosho wo yehalo Lye. (Lesha Mateus 6:9, 10.) Uuyuni mbuka owu udha uukolokoshi, nomapangelo gopantu otaga nyengwa nokuli okugwanitha po oompumbwe dhakehe esiku dhaapangelwa yago. Onkee ano otu na okugalikana shili opo edhina lyaTate yetu gwomegulu li yapulwe, nUukwaniilwa we wu hulithe po epangelo lyaSatana kombanda yevi. Ndika olyo wo ethimbo lyokwiindila Jehova opo ehalo lye li gwanithwe kombanda yevi wo ngashika megulu. Natu kale ano twa tonata, nokukala tatu galikana omagalikano gi ili nogi ili.

8, 9. Omolwashike tu na okukala twa kotoka opo kaatu pangule Petrus nosho wo aayapostoli ooyakwawo molwaashoka ya li ya kotha meyana lyaGetsemane?

⁸ Nonando omuyapastoli Petrus okwa li a kumagidha Aakriste ya kale ya “tonata, opo ya vule okugalikana,” oshikando shimwe ka li e shi ningi. Okwa li gumwe gomaalongwa mboka ya li ya kotha manga Jesus ta galikana meyana lyaGetsemane. Nokuli naasho Jesus e ya lombwele ya kale ya ‘tonata, noya kale nokugalikana,’ kaya li ye shi ningi. — Lesha Mateus 26:40-45.

⁹ Pehala lyokupangula Petrus nosho wo aayapostoli  ooyakwawo molwaashoka inaaya kala ya tonata, oshi li nawa tu dhimbulukwe kutya esiku olya li lye ya lolodha. Oya adhika yi ilongekidhila Opaasa noye yi dhana wo ongulohi ndjoka. Nokonima yaashono, Jesus okwa dhike po Uulalelo wOmuwa, shoka sha ka kala oshiholelwa shankene Edhimbuluko lyeso lye li na okudhanwa. (1 Kor. 11:23-25) “Sho yi imbi eimbilo lyehambelelo, oya yi kOndundu yooholivi,” ye ende oshinano shontumba momapandaanda ga thinana gaJerusalem. (Mat. 26:30, 36) Pethimbo ndyoka otashi vulika sha li nale pokati kuusiku. Ngele ando natse otwa li meyana lyaGetsemane ongulohi ndjoka, otashi vulika natse ando twa kotha. Pehala lyokupa uusama aayapostoli ye mboka ya loloka, Jesus okwa li a popi kutya, “ombepo yomuntu oya hala, ihe onyama onkundi.”

10, 11. (a) Petrus okwa li i ilongo shike moshimoniwa she sho a li meyana lyaGetsemane? (b) Oshimoniwa shaPetrus oshe ku guma ngiini?

¹⁰ Oshimoniwa shoka shomeyana lyaGetsemane osha li sha gumu Petrus. Okwa li i ilongo oshiilongomwa shinikitha oluhodhi mokukala kwe inaa tonata. Manga shono inaashi ningwa, Jesus okwa adhikile a popya a ti: “Uusiku wonena one amuhe otamu yi ontuku e tamu etha ndje.” Ye Petrus okwe mu yamukula a ti: “Nando ayehe oya ye ontuku, ngame itandi yi ontuku.” Jesus okwa li a yamukula kutya Petrus okwa li te ke mu idhimbika lutatu. Molwaashoka Petrus ka li a gumwa kwaashoka, okwa ti: “Nando ondi ka se pamwe nangoye, itandi ku idhimbike.” (Mat. 26:31-35) Nonando ongawo, Petrus okwa li e mu idhimbike ngaashi naanaa Jesus a li e shi popi. Molwaashoka okwa li a gwilililwa po sho i idhimbike Jesus lwahugunina, Petrus okwa “lili nokulililila.” — Luk. 22:60-62.

¹¹ Petrus okwa li shili i ilongo oshiilongomwa moshimoniwa shika e ta etha po iikala ye yokukala i inekela muye mwene. Odhoshili kutya egalikano olyo lya li lya kwathele Petrus moshinima shika. Oshi li oshindhindhilikwedhi sho omayele gokukala twa ‘tonata, opo tu vule okugalikana’ ga zi kuPetrus. Mbela otatu tula ngaa miilonga omayele ngoka ga nwethwa mo? Oshikwawo, mbela ohatu ‘kala ngaa nokugalikana’ nokuulika kutya otwi inekela muJehova? (Eps. 78:7) Natu kaleke wo momadhiladhilo ekumagidho lyomuyapostoli Paulus ndyoka tali ti: “Ngoka ta dhiladhila kutya okwa thikama, na kotoke, kaa gwile po.” — 1 Kor. 10:12.

12. Omolwashike Nehemia e li oshiholelwa oshiwanawa kutse?

¹² Dhiladhila kuNehemia ngoka a li omupindili gwaArtakserkses, omukwaniilwa gwaPersia methelemumvo etitano K.E.N. Nehemia oku li oshiholelwa oshiwanawa shaangoka a li a galikana a mana mo. Okwa kala omasiku  ogendji i ‘idhilika iikulya nokugalikana Kalunga’ omolwonkalo ondhigu yAajuda mboka ya li muJerusalem. (Neh. 1:4) Sho Artakserkses e mu pula kutya omolwashike a sa oluhodhi, ‘Nehemia okwa galikana Kalunga komegulu.’ (Neh. 2:2-4) Oshizemo? Jehova okwa li a yamukula omagalikano ge e ta wilike iinima momukalo ngoka gwa li gwe etele oshigwana She uuwanawa. (Neh. 2:5, 6) Shika kasha li tuu sha koleke eitaalo lyaNehemia!

13, 14. Otu na okuninga shike opo eitaalo lyetu li kale lya kola nokusinda oonkambadhala dhaSatana dhoku tu teya omukumo?

¹³ Okukala hatu galikana ngaashi Nehemia a ningile, ohaku tu kwathele tu kale neitaalo lya kola. Satana ke na ohenda nolundji ohe tu ponokele uuna twa nkundipala. Pashiholelwa, ngele otatu kondjo nuuvu wontumba nenge nepolimano, otashi vulika tu tameke okukala tu uvite kutya ethimbo ndyoka hatu kala muukalele omwedhi kehe ihali ti sha kuKalunga. Yamwe yomutse otashi vulika tu kale tu uvite nayi, pamwe molwiimoniwa yetu iiwininayi yomonakuziwa. Satana okwa hala tu kale tu uvite kutya katu na oshilonga shasha. Omamakelo ge ohe ga ningi olundji nelalakano lyoku tu teya omukumo nokunkundipaleka eitaalo lyetu. Ihe okukala twa ‘tonata, opo tu vule okugalikana’ otaku vulu oku tu kwathela tu kale tu na eitaalo lya kola. Eeno shili, okukala ‘neitaalo ongehuuyanza, otaku ke tu kwathela tu wape okudhima nalyo iikuti ayihe ya hwama omulilo mbyoka tayi umbwa kuMwiinayi.’ — Ef. 6:16.

¹⁴ Ngele otwa kala twa ‘tonata, opo tu vule okugalikana,’ otatu ka kala twi ilongekidha noitatu ka etha po eitaalo lyetu ngele otwa adhika ombaadhilila komayeleko. Uuna twa adhika komayeleko nokomamakelo, natu dhimbulukwe oshiholelwa shaNehemia tse tatu galikana nziya kuKalunga. Okekwatho owala lyaJehova tatu vulu okupondola mokukondjitha omamakelo nokukala aadhiginini sho eitaalo lyetu tali yelekwa.

15. Otu na okwiipula omapulo geni ngele tashi ya pokugalikanena yalwe?

¹⁵ Jesus okwa li a galikanene omuyapostoli Petrus opo eitaalo lye lyaa kane. (Luk. 22:32) Epafras, Omukriste omudhiginini gwomethelemumvo lyotango, okwa li a holele Jesus moshinima shika nokugalikanena nuudhiginini aamwahe yomuKolossa. Paulus okwa li e ya nyolele a ti: “Oye he mú galikanene aluhe nuudhiginini noti indile Kalunga, mu wape okukala mwa kola meitaalo nohamu vulika kehalo lyaKalunga miinima ayihe.” (Kol. 4:12) Oshi li nawa twi ipule tatu ti: ‘Mbela ohandi galikanene ngaa nuudhiginini aamwatate muuyuni awuhe? Momagalikano gandje ohandi kwatele mo lungapi aamwatate mboka ya dhengwa ya lila kiiponga yopaunshitwe? Ondi ihula uunake okugalikanena nuudhiginini mboka ye na oshinakugwanithwa oshinene mehangano lyaJehova? Mbela omathimbo opo ga zi ko onda li ngaa nda galikanene oohandimwe megongalo mboka ya taalela omaudhigu?’

16. Mbela okugalikanena yalwe okwa simana ngaa shili? Shi yelitha.

¹⁶ Omagalikano getu ngoka hatu galikanene yalwe kuJehova Kalunga otaga vulu shili oku ya kwathela. (Lesha 2 Aakorinto 1:11.) Nonando Jehova ina tegelelwa a katuke onkatu molwaashoka aapiya ye oyendji taya ningi omaindilo ogendji megalikano, oha ndhindhilike okukala kwaapiya ye ye na ko nasha lela nayakwawo sho ta yamukula omagalikano gawo. Onkee ano, otu na okutala ko uuthembahenda nosho wo oshinakugwanithwa shokugalikanena yalwe ku li oshinima sha kwata miiti. Ngaashi Epafras, natu ulike kutya otu hole aamwatate naamwameme Aakriste nomutima aguhe notu na ko nasha nayo moku ya galikanena nuudhiginini. Okuninga ngawo otaku ka gwedha ko kenyanyu lyetu, oshoka “okugandja oku na elago ku vule okutaamba.” — Iil. 20:35.

17, 18. Okukala twa ‘tonata, opo tu vule okugalikana’ otaku tu kwathele ngiini?

¹⁷ Manga owala inaa popya kutya “uusiku owa tya koongulasha, netango oli li pokupita,” Paulus okwa nyola a ti: “Omwa tseya ethimbo ndika kutya olyo ethimbo lyokupenduka moomposi. Ngashingeyi ehupitho lyetu oli li popepi li vule lyuuna ndoka twa tameke okwiitaala.” (Rom. 13:11, 12) Uuyuni uupe mboka Kalunga u uvaneka owu li popepi, nehupitho lyetu oli li popepyeelela shi vulithe pwaashoka tatu dhiladhila. Inatu kotha pambepo, noina tu etha nando omapiyaganeko guuyuni ga kuthe po ethimbo lyetu lyokupopya naJehova megalikano. Pehala lyaashono, natu kale twa ‘tonata, opo tu vule okugalikana.’ Okuninga ngawo otaku ke tu kwathela tu kale “moondjenda oondjapuki nometilokalunga” sho twa tegelela esiku lyaJehova. (2 Pet. 3:11, 12, OB-1954) Onkalamwenyo yetu otayi ku ulika shili kutya otwa tonata pambepo nonokutya otwi itaala shili kutya ehulilo lyonkalelo ndjika ya kolokosha oli li popepi. Onkee ano, natu “galikaneni aluhe.” (1 Tes. 5:17) Natu holele Jesus mokukala hatu kongo omahala gokwiikalela tu galikane. Ngele otwa kala nokugalikana paumwene kuJehova, otatu ka hedha popepyeelela naye. (Jak. 4:7, 8) Shoka itashi ka kala tuu elaleko nuuyamba!

¹⁸ Omanyolo otaga ti: “Jesus mokukalamwenyo kwe kombanda yevi okwa galikana nokwi indile Kalunga nokulila nokukuga pombanda Kalunga, ngoka ta vulu oku mu hupitha meso. Kalunga okwe mu uvu omolweifupipiko nevuliko lye.” (Heb. 5:7) Jesus okwa li i indile megalikano e ta kala omudhiginini kuKalunga sigo opehulilo lyonkalamwenyo ye kombanda yevi. Noshizemo, Jehova okwa li a hupitha Omwana omuholike meso e te mu pe ondjambi yomwenyo kaagu na ehulilo megulu. Natse otatu vulu okukala aadhiginini kuTate yetu gwomegulu nonando onatu ka adhike komayeleko nokomamakelo geni monakuyiwa. Eeno shili, otatu vulu okumona ondjambi yomwenyo gwaaluhe ngele owala twa kala twa ‘tonata, opo tu vule okugalikana.’