PaLukas 5:1-39
5 Pompito yimwe, sho Jesus a li a thikama petale lyaGenesaret,* ongundu yaantu oya li tayi ithininike muye, yi hedhe popepi naye, opo yi pulakene koohapu dhaKalunga.
2 Opo nduno okwa mono oowato mbali dha thikama pomunkulo gwetale, ihe aayuli yoohi kaya li mo, oshoka oya li taya yogo oonete dhawo.
3 Okwa londo muyimwe yomoowato ndhoka e ta lombwele mwene gwayo, Simon, e yi hedhithe kashona momeya. Opo nduno Jesus okwa kuutumba e ta tameke okulonga ongundu yaantu e li mowato.
4 Sho a mana okupopya nongundu yaantu, okwa ti kuSimon: “Dhugila owato pokati ketale e tamu umbile oonete dheni momeya, mu tameke okuyula.”
5 Simon okwe mu yamukula ta ti: “Muhongi, otwa kala nokuumbila oonete dhetu momeya uusiku awuhe, ihe inatu kwata nando osha, ihe otandi dhi umbile mo ngaa ngaashi wa ti.”
6 Sho ye shi ningi, oya kwata oohi odhindji noonkondo, oonete dhawo e tadhi tameke nokuli okutuuka.
7 Onkee ano oya lapa aayuli ooyakwawo, mboka ya li mowato onkwawo, ye ye ye ya kwathele, naasho ye ya, oya udha oowato adhihe noohi, noowato adhihe odha tameke okuningina kondjundo yoohi.
8 Sho Simon Petrus a mono shoka sha ningwa po, okwa tsu oongolo e ta sizimike oshipala she poongolo dhaJesus, ta ti: “Omuwa, za po pungame, oshoka ngame omulumentu omulunde.
9 Petrus nooyakwawo oya li ya kumwa noonkondo omolwoohi ndhoka ya kwata,
10 noyana yaSebedeus, Jakob naJohannes, mboka ya li haya yulu oohi pamwe naSimon, oya li wo ya kumwa. Ihe Jesus okwa ti kuSimon: “Ino tila, okuza ngashingeyi oto ningi omuyuli gwaantu.”
11 Onkee ano oya eta oowato dhawo komunkulo noya thigi po ayihe e taye mu landula.
12 Pompito yilwe, sho Jesus a li mushimwe shomiilando, omwa li mu na omulumentu a kanyata oshilundu. Okwa inyongamene Jesus e te mu hehela ta ti: “Omuwa, ngele owa hala, oto vulu okwaaludha ndje.”*
13 Onkee ano Jesus okwa yelutha oshikaha she, nokwe mu gumu, ta ti: “Onda hala, aluka.”* Mbalambala, uuvu woshilundu owe mu zi.
14 Opo nduno Jesus okwa lombwele omulumentu ngoka kee shi lombwele nando omuntu, a ti: “Inda wu ka iyulike komuyambi e to gandja omayambo goye gealuko ngaashi sha popiwa kuMoses, shi kale uumbangi kutya owa aluka.”
15 Ihe ehokololo kombinga yaJesus olya tsikile nokutaandela, noongundu oonene dhaantu odha kala noku mu ngundumanena, opo ya pulakene kuye noku ya aludhe.
16 Nonando ongawo, okwa li ha yi olundji komahala ga ikalela a ka galikane.
17 Esiku limwe, manga a li ta longo aantu, Aafarisayi naalongimpango ya za komikunda adhihe dhaGalilea, dhaJudea nosho wo okuza kuJerusalem, oya li ya kuutumba mpoka, na Jehova okwa li e mu pe oonkondo dhokwaaludha.
18 Ihe tala, opwa li aalumentu ya inda omulumentu kontala a sa ombanda, noya li taya kambadhala oku mu eta meni kuJesus.
19 Molwaashoka kaya li ya vulu oku mu eta meni, oshoka megumbo omwa li mwa udha aantu noonkondo, oya londo pombanda e taya ulula po ombululu, noya kulukithile ontala mokati kaantu, mboka ya li komeho gaJesus.
20 Sho a mono kutya oye na eitaalo, okwa ti: “Mulumentu ngoye, oondjo dhoye odha dhimwa po.”
21 Opo nduno aalongimpango nAafarisayi oya tameke okukundathana taya ti: “Olye nguka ta sheke Kalunga? Olye ta vulu okudhima po oondjo kee shi owala Kalunga?”
22 Ihe sho Jesus a ndhindhilike shoka taya dhiladhila, okwa ti kuyo: “Omolwashike mu na omadhiladhilo ga tya ngawo momitima dheni?
23 Oshinipo oshipu koshikwawo, okutya: ‘Oondjo dhoye odha dhimwa po,’ nenge okutya: ‘Yambuka po e to ende’?
24 Ihe opo mu kale mu shi kutya Omuna gwomuntu okwa pewa oonkondopangelo kombanda yevi dhokudhima po oondjo . . . ,” okwa ti komulumentu ngoka a sa ombanda: “Yambuka po, kutha ontala yoye e to yi kegumbo.”
25 Nena okwa yambuka po montaneho yawo, nokwa kutha po ontala, hoka a li a lala, e ta yi kegumbo, ta hambelele Kalunga.
26 Opo nduno aantu ayehe oya li ya kumwa noya tameke okuhambelela Kalunga. Molwaashoka oya li wo ya tila, oya ti: “Otwa mona iinima iikumithi nena!”
27 Konima yaashono, Jesus okwa yi pondje nokwa mono omufendelithi gwedhina Levi, a kuutumba pombelewa yiifendela e ta ti kuye: “Ninga omulanduli gwandje.”
28 Opo nduno Levi okwa thigi po iinima ayihe, ta thikama e ta tameke oku mu landula.
29 Nena okwa ningile Jesus oshituthi oshinene megumbo lye, nomwa li ongundu onene yaafendelithi nayalwe, mboka ya li ye ya okulya pamwe nayo.
30 Opo nduno Aafarisayi naalongimpango oya tameke okungungutulila aalongwa yaJesus, taya ti: “Omolwashike tamu li nokunwa pamwe naafendelithi naalunde?”
31 Jesus okwe ya yamukula ta ti: “Mboka ye na uukolele inaya pumbwa omupangi, ihe oomboka owala taya ehama.
32 Ngame inandi endela aayuuki, ihe aalunde, opo ya itedhulule.”
33 Oya ti kuye: “Aalongwa yaJohannes nosho wo Aafarisayi ohaya idhilike olundji iikulya nohaya galikana, ihe yoye ohaya li nokunwa.”
34 Jesus okwa ti kuyo: “Mbela oto vulu ngaa okuningitha ookuume kombushiki* ya idhilike iikulya, omanga ombushiki yi li pamwe nayo?
35 Ihe ethimbo otali ya, uuna ombushiki* tayi ka za po puyo, opo nduno taya idhilike iikulya pethimbo ndyoka.”
36 Okwe ya lombwele wo ethaneko ta ti: “Kapu na ngoka ha tete oshaando konguwo ompe e te shi hondjele konguwo onkulu. Ngele okwe shi ningi, oshaando shoka oshipe otashi ka tuula onguwo ndjoka onkulu, noshaando shoka itashi ka kala sha faathana nonguwo ndjoka onkulu.
37 Shimwe ishewe, kapu na ngoka ha tula omaviinu omape moompunda oonkulu. Ngele okwe shi ningi, omaviinu omape otaga tuula oompunda e taga tika, oompunda e tadhi yonuka.
38 Ihe omaviinu omape oge na okuzilwa moompunda oompe.
39 Kapu na ngoka, konima ngele a nu omaviinu omakulu, ta hala ngoka omape, oshoka ota ti: ‘Ngoka omakulu omawanawa.’”
Omanyolo gopevi
^ Sha hala okutya, pefuta lyaGalilea.
^ Eln., “okuyeleka ndje.”
^ Eln., “yela.”
^ Nenge “komufuko gwomumati.”
^ Nenge “omufuko gwomumati.”
