• ADŨ LO NA BULU TI: 1941

• KA KƆDƆRƆ TI: BENIN

• DUNGƆ LƐ NGƐ̃́ TƐ LO TI GÃ: LO DUNDÓ NA AWE GBA, TA LO NDO YENDÓ TƐRƐ ATƐMWƐ TƐ YEHOVA MA

SE MƐNDÓ MBI DA:

Adundó mbi ka Cotonou kɔdɔrɔ gbia ti Bénin. Ngoi mɛndó mbi dɛ nyingambi, awa dungɔ mbi ndo handó mbi na tɛnɛ ti sambela ti katolikɛ, kanda ta mbi ndo gwendó da sambela ma. Na lo mɛ ya ka kɔdɔrɔ tɛ e ta Leta dɛ gbanzindó dungɔ na awe gba ma ko, azi gba ti Katolikɛ ndo dundó na awe gba. Ni la lindó ya mbi du na awe siɔ.

Na ngoi mɛndó azi ti kɔdɔrɔ tɛ e tɔmbɔgɔ na bulu ti 1970 ko, mbi dandó bɛ mbi ya ni na hɛ̃ngɔ nzɔ̃ lo ka kɔdɔrɔ tɛ e. Mbi hɛ̃ndó ti mbi hɛ̃ azi mɛ tɔmbɔgɔ wa mbi li ngandó kaya kpale ti politikɛ. Azi mɛndó ndo tɔmbɔgɔ ko, ta ala ndo yendó tɛrɛ Atɛmwɛ tɛ Yehova ma na lo mɛ ya ta ala ndo lindó kaya kpale ti politikɛ ma. Mbi ngandó ka popo tɛ azi mɛ ndo hɛ̃ Atɛmwɛ tɛ Yehova pɛnɔ. Na ngoi mɛndó atoma Atɛmwɛ tɛ Yehova mɛ amisionɛrɛ na bulu ti 1976 ka kɔdɔrɔ tɛ e ko, mbi hũndó ya ta ala na diringɔ gangɔ fãni mɛndɛ̃ ma.

SE MƐNDÓ NGBANGƆ GBINYANGBI NA DUNGƆ LƐ NGƐ̃́ TƐ MBI:

Tɔmbɔgɔngɔ niko awɛndó na bulu ti 1990. Mbi kamwandó gba na lo mɛ ya ta aninga ndó ma amisionɛrɛ niko dirindó ga fãni mɛndɛ̃ ka kɔdɔrɔ tɛ e. Mbi bandandó hũngɔ ya ngoi mɛndɛ̃ Nzapa ndó ndoni kɔi na azi niko. Na ngoi niko ndó ko, mbi luandó kwa mɛndɛ̃. Ta ninga ndó ma kwa mbi kɔi ti kwa mɛndó Tɛmwɛ tɛ Yehova bandandó hangɔ mbi na tɛnɛ tɛ Yehova. Lo fandó mbi na avɛrsɛ ti ya Ngbangɔ mɛ ndo tɛnɛ ya Yehova du Nzapa ti songo nga ti mbilimbili. (Kolimbola Mibeko 32:4; 1 Yoanɛ 4:8) Mbi sepalandó na aseliye niko gba. Mbi ndó na gwɛ̃ ti mandangɔ tɛnɛ tɛ Yehova, na lo ni la mbi yendó mandangɔ Ngbangɔ.

So pɛni mbi bandandó gwengɔ bombi tɛ Atɛmwɛ tɛ Yehova. Songo mɛndó mbi hũ kai akamwisandó mbi, ta sãnga ma ta ala ndo hũ ya pɔrɔ tɛrɛ mɛ ngbondni hɔngɔ apɔrɔ tɛrɛ mɛndɛ̃ da ma, bere awa faranga la du ngbondoni hɔngɔ awa yɛlɛ ma. Na lo mɛ ya mbi ndo gwendó bombi tɛ Atɛmwɛ tɛ Yehova zu ko, mbi hũndó yangondo ya ala du nvɛ̃ni ava Yezo​—Yoanɛ 13:35.

Mbi hũndó ya ti nɛngɔ ya mbi li kwa hɛ̃ Yehova nzɔ̃ni ko, ayɔndó ya mbi si kaya sambela ti Katolikɛ. Ta lingɔ ni dundɔ́ woni ma, ta sãnga ma mbi ndo kpɛndó mbɛtɔ na lo mɛ ya ta mbi hĩnga dangɔ bɛ mɛ azi mɛndɛ̃ na dungɔ na ni ma. Na pɛ ngoi yɔngɔrɔ ni nga na lisalisi tɛ Yehova mbi luandó ngunu wa mbi si ngandó kaya sambela ni.

A mbanga aye mɛndɛ̃ ti ngbondoni mɛndó ayɔ ya mbi gbinyangbi ni na ya dungɔ lɛ ngɛ̃́ tɛ mbi da. Mandangɔ Ngbangɔ zandó mbi ya, mbi hĩnga ya ta Nzapa ndo ye ya kɔli du na awe gba ma. (Ebandeli 2:18-24; Matie 19:4-6) Ni fa ya Nzapa yendó bo libala tɛ mbi ti uzu. Mbi sundó libala tɛ mbi na ya mbi ti uzu kaya buku tɛ Leta wa mbi ziandó awe mɛndɛ̃, mbi mu ngandó ebongiseli ti nɛngɔ ya mbi ndo kokisa gwɛ̃ tɛ la ti mi. So pɛni awe ti mbi ti ngã sɛ tindó Atɛmwɛ tɛ Yehova.

ANZƆ̃ LO MƐNDÓ MBI LUA:

Abɛse du ya ya mbi dɛ bondó kaya sambela ti Katolikɛ ko, lo ndo tɔndɔndó ekateli tɛ mbi ti vɔrɔngɔ Yehova. Mbi ndo hũ ya mbi ti na aseliye ti nzɔ̃ni, wa ya mbi ndo hũ nga ngaso.

Mbi ndo dandó bɛ mbi ya mbi na lɛkɛngɔ kɔdɔrɔ tɛ e na lége ti politikɛ, kanda ge ge ge niko dundó kwa ti gɛgɛrɛ. Ndɛ lo mɛ ko, mbi hĩnga ya bo Lo-lɛngɔ Gbia tɛ Nzapa la na onzingɔ apɛnɔ tɛ azi. (Matie 6:9, 10) Mbi ndo hɛ̃ Yehova gonda na ndenge mɛ lo fa mbi na se ti dungɔ na dungɔ lɛ ngɛ̃́ ti dengɔ bɛ nvɛ̃ni.

• ADŨNDÓ LO NA BULU TI: 1977

• KA KƆDƆRƆ TI: BRÉZIL

• DUNGƆ LƐ NGƐ̃́ TƐ LO TI GÃ: PASTƐRƐ TI SAMBƐLA TI PANTƐKOTƐ

SE MƐNDÓ MBI DA GÃ:

Mbi maindó ka kartie kɔi ti yakere mɛ yɔngɔrɔ ni na gbata ti Itu, ka prɔvĩsi ti São Paulo. Ahĩngandó kartie niko, ta sãnga ma a ndo lindó mobulu kai gba.

Mbi ndó na dungɔ lɛ ngɛ̃́ ti bi nga ti mobulu nvɛ̃ni. Mbi hɛ̃ ngandó tɛrɛ mbi na kangɔ bangɛ. So pɛni mbi hũndó ya dungɔ lɛ ngɛ̃́ mɛ mbi na ni na lingɔ ya mbi kpi bere mbi li bɔlɔkɔ, ni lindó ya mbi zia mobulu na kangɔ bangɛ. Mbi bandandó sambelangɔ ka sambela ti Pantɛkotɛ, wa na gesi mbi tindó pastɛrɛ kai.

Mbi ndó na dangɔ bɛ ya, mbi na zangɔ nvɛ̃ni azi na ya kwa niko. Mbi ndo gwendó ka radio ti kɔdɔrɔ mɛndó mbi ka da ti nɛngɔ ya mbi ha tɛnɛ tɛ Nzapa, ni lindó ya mbi hĩngangbi gba. Na gesi mbi yendó ya, na ya akpale gba, ta agbia ti sambela ndo gi bɛ yakere nzɔ̃ lo tɛ azi ti sambela tɛ la ma, wa ta ala ndo gi nga nzɔ̃ lo tɛ Nzapa ma. Mbi hũndó ya agbia ti sambela bo na gwɛ̃ ya azi ti sambela ndo hɛ̃ ani falanga. Mbi hũndó nzɔ̃ni ya mbi si kaya sambela niko.

SE MƐNDÓ NGBANGƆ GBINYANGBI DUNGƆ LƐ NGƐ̃́ TƐ MBI:

Ngoi mɛndó Atɛmwɛ tɛ Yehova banda mandangɔ mbi na Ngbangɔ ko, mbi hũndó nvɛ̃ni ya ala ɔngbi na asambela mɛndɛ̃. Mbi hũndó kpale sɛ mɛ akamwisa mbi. Ti uzu, ta Atɛmwɛ tɛ Yehova ndo ngbã bo hangɔ na azi ya ala ye Nzapa bere azi mɛndɛ̃ ma, kanda ala ndo fa nga ni. Ti sɛ ta ala ndo li na ya kpale ti politikɛ bere to ma (Yisaya 2:4) Akpale niko sɛ lindó ya mbi ye ya, mbi lua bɛta sambela​—Lége ti pɛnɔ mɛ ndo li ya zo lua dungɔ lɛ ngɛ̃́ ti kaka.​—Matie 7:13, 14.

Mbi hũndó ya ti nɛngɔ ya mbi hɛ̃ Nzapa dengɔ bɛ ko, ayɔ ya mbi zia akpale mɛndɛ̃. Ayɔ ngandó ya mbi kpã lɛ mbi na ndo azi ti ndasewa tɛ mbi. Ayɔ ngandó ya mbi du nvɛ̃ni na zungɔ tɛrɛ. Ta dundó woni ya mbi li alo niko zu ma, kanda na lisalisi tɛ Yehova ko, mbi longandó lingɔ ni. Ya mbi kamwandó na gbinyangbingɔ ti lo niko. Lo bandandó mandangɔ Ngbangɔ uzu tɛ mbi, bo na ngoi nikondó la lo banda maingɔ na ya nyingɔ. Ta ningandó ma, mbi na ya mbi e hũndó ya, ayɔ ya e ti Atɛmwɛ tɛ Yehova. E mundó batisimɔ lá kɔi.

ANZƆ̃ LO MƐ MBI LUA:

Mbi na ya mbi na dengɔ bɛ ti zangɔ ayangambi tɛ e taa ya ala ti akwa Yehova. E na dengɔ bɛ ka ndasewa tɛ e. Mbi ndo hɛ̃ Yehova gonda na ndenge mɛndó lo li ya mbi hĩnga bɛta tɛnɛ tɛ lo mɛ kaya Ngbangɔ. Ni ndo gbinyangbi dungɔ lɛ ngɛ̃́ tɛ azi! Ni fa ngandó nvɛ̃ni na ya dungɔ lɛ ngɛ̃́ tɛ mbi.

• ADŨNDÓ LO NA BULU TI: 1957

• KA KƆDƆRƆ TI: AUSTRALIA

• DUNGƆ LƐ NGƐ̃́ TƐ LO TI GÃ: A HƐ̃NDÓ LO PƐNƆ GBA NA NGOI MƐNDÓ LO DƐ NYIMGAMBI

SE MƐNDÓ MBI DA GÃ:

Mbi maindó ka gbata ti Newcastle, ka prɔvĩsi ti Nouvelle-Galles ti Sudi. Mbi ndó nyingambi ti uzu ka ndasewa tɛ ayangambi mbalambala to e ndó wa mobulu nga wa nyɔngɔ samba ɔngɔ ndoni wa ta e ngandó wa mobulu. Mama ndo sɔ̃ndó mbi wa lo ndó tɛnɛ ngandó siɔ̃ tɛnɛ hɛ̃ mbi. Lo ndó tɛnɛ ngandó ngoi zu hɛ̃ mbi ya mbi du siɔ nyingambi wa mbi na hũngɔ pɛnɔ kaya wá ti lifɛlo. Tɛnɛ niko ndo hɛ̃ndó mbi mbɛtɔ.

Ngoi gba mbi ndo ngbãndó kalasi na lo mɛ ya mama ndo sɔ̃ndó mbi wa mbi ndo hɔ̃ ngandó akã. Ngoi mɛndó mbi ti na bulu 11 ko, agbia tɛ Leta mundó mbi ka tɛ awa dũngɔ mbi wa ala kpãndó mbi ka ndo mɛ ndo bata na ayangambi, na pɛni ala tondó mbi ka tɛ amamɛlo. Na ngoi mɛndó mbi ti na bulu 14 ko, Mbi kpɛndó ka ti amamɛlo. Mbi kɛ̃ ngandó diringɔ kaya da, mbi bandandó dungɔ so talége ti Kings Cross, ka kartie kɔi mɛ kaya gbata ti Sydney.

Na ngoi mɛndó mbi ndo du ka talége ko, mbi hɛ̃ndó tɛrɛ mbi na nyɔngɔ bangɛ, nyɔngɔ samba, bangɔ pɔrnɔgrafi, nga na lingɔ ngbabo. Mbi tengbindó na kpale kɔi mɛ ahɛ̃ndó mbi mbɛtɔ nvɛ̃ni. Mbi ndo dundó ka apartɛma tɛ zo kɔi mɛ lo na nganda ti bí. Na ndɔ kɔi akɔli sɛ gandó ka tɛ lo. Lo tɛnɛndó hɛ̃ mbi ya mbi li kaya da kanda mbi ndo mandó tɛnɛ mɛ ala ndo tɛnɛ. Nvɛ̃ nganda niko ndo mangbindó na ala ya, ni tɛkɛ mbi hɛ̃ la. Gwɛ̃ tɛ la dundó ya ani hɔndɛ mbi kaya masuwa wa ani gwe na mbi ka Japan ti nɛngɔ ya mbi banda lingɔ kwa ka nganda kɔi mɛ kai. mbi mandó mbɛtɔ, wa mbi kpɛndó kaya balcon mbi si so gingɔ lisalisi.

Mbi hũndó kɔli kɔi mɛ ga ba gbata ti Sydney, wa mbi kambisandó hɛ̃ lo kpale tɛ mbi na dangɔ bɛ ya lo na hɛ̃ngɔ mbi falanga. Kanda zo niko gwendó na mbi ka ndo mɛ lo ndo du na ni ti nɛngɔ ya mbi gbɔ̃ ngu wa mbi tɛ nga ye. Kpale gbinyangbindó, wa mbi ngbã bondó so ndoko. Bulu kɔi na pɛni, e lindó libala.

SE MƐNDÓ NGBANGƆ GBINYANGBI DUNGƆ LƐ NGƐ̃́ TƐ MBI:

Mbi tindó na abingangɔli ndɛ̃ ndɛ̃ ndɛ̃ na ngoi mɛndó mbi banda mandangɔ Ngbangɔ na Atɛmwɛ tɛ Yehova. Mbi mandó ngɔnzɔ na ngoi mɛndó mbi hĩnga ya Satana la ndo hɛ̃ azi pɛnɔ; Ndó uzu andó handó na e ya, Nzapa la ndo hɛ̃ azi pɛnɔ. Na ngoi mɛndó mbi hĩnga ya ta Nzapa la ndo hɛ̃ azi pɛnɔ kaya wá ti lifɛlo ma ko, bɛ mbi zu ndó nvɛ̃ni, tɛnɛ niko ndo hɛ̃ndó mbi mbɛtɔ na pɛ abulu gba.

Mbi kamwandó na hũngɔ ya Atɛmwɛ tɛ Yehova ndo mu ekateli na landangɔ andia ti ya Ngbangɔ. ala ndo tɔndɔ akpale mɛ ala ndo ha na ya dungɔ lɛ ngɛ̃́ tɛ la. Mbi ndó wa kakululo, kanda abɛse tɛnɛ mɛndó mbi ndo tɛnɛ nga na aye mɛndó mbi ndó li ko, Atɛmwɛ tɛ Yehova ndo lindó lo tɛrɛ mbi na songo nga na tɔndɔngɔ.

Kpengba kpale tɛ mbi du dangɔ bɛ mɛndó mbi na ni ya mbi ndo hũndó tɛrɛ mbi mabere mbi zanga tina. Bɛ mbi ndo sĩndó na tɛrɛ mbi, wa siɔ dangɔ niko ngbãndo na pɛ angoi gba abɛse na pɛ batisimɔ tɛ mbi, na ngoi mɛndó mbi ti Tɛmwɛ tɛ Yehova. Mbi hĩngandó ya mbi ndo ye Yehova, kanda ta mbi ndo yendó ya Yehova lengbi ti yengɔ zo mabere mbi ma.

Kɔdɛ tɛ mbi gbinyangbindó nvɛ̃ni bulu 15 na pɛ batisimɔ tɛ mbi. Diskur kɔi mɛndó li tɛrɛ lo ka Da ti Lo-lɛngɔ Gbia ko, wa lingɔ ni dindó mbɛti ti Yakobo 1:23, 24. Avɛrsɛ niko ndo tɛnɛ ya Tɛnɛ tɛ Nzapa du mabere talatala mɛ ndo za e ya e hũ tɛrɛ e nga ma se mɛ Yehova ndo hũ na e. Mbi bandandó hũndangɔ tɛrɛ mbi na ndo ya se mɛ mbi ndo ba na tɛrɛ mbi akɛsɛnɛ na se mɛ Yehova ndo ba na mbi. mbi kɛ̃ndó yengɔ dangɔ bɛ niko. ta mbi ndo yendó ya Yehova lengbindó ti sepalangɔ na zo mabere mbi ma.

Na pɛ bí yakere mbi dindó vɛrsɛ kɔi mɛ agbinyangbi dungɔ lɛ ngɛ̃́ tɛ mbi. Ni dundó Yisaya 1:18, kai Yehova ndo tɛnɛ ya: “Ĩ ga wa e lɛkɛ kpale na popo tɛ e. . . . Abɛse siɔ kpale tɛ ĩ adu bengbani nvɛ̃ni ko, ni na tingɔ mbufuni mabere mbi ndã; abɛse ni du bengbani mabere bengba bɔngɔ ko, ni na tingɔ nga ma lɛnɛ.” Mbi mandó mabere Yehova ndo tɛnɛ hɛ̃ mbi ya: “Vicky ga e lɛkɛ kpale na popo tɛ e. Mbi hĩnga mɔ, mbi hĩnga siɔ kpale tɛ mɔ, mbi hĩnga lo mɛ ka bɛ mɔ, wa mbi ndo ye nga mɔ.”

Ta mbi la bɛ ndó langɔ na bí niko ma. Ta mbi ndo ye bondó ya Yehova lengbi ti yengɔ mbi ma, kanda mbi bandandó dangɔ bɛ mbi na tɔ̃ngɔ mɛndó Yezo tɔ̃ na e. Mbi hũndó ya Yehova bandandó fangɔ yɔngɔlɔ bɛ tɛ lo ge mbage tɛ mbi ndó gã, lo ndo fandó na alége ndɛ̃ ndɛ̃ ndɛ̃ ya lo ndo ye mbi. Kanda mbi ndo tɛnɛndó hɛ̃ lo ya: “Ta mbi du zo mɛ mɔ lengbi ti fangɔ songo tɛ mɔ ge mbage tɛ mbi ma. Ta mɛnɛ̃ tɛrɛ Nyi mɔ lengbi ti vĩngɔ siɔ kpale tɛ mbi ma.” A lindó mabere mbi kɛ̃ tɔ̃ngɔ mɛndó Yehova tɔ̃ na e. Kanda na ngoi mɛndó mbi gbɔ̃ li mbi na ndo tɔ̃ngɔ azi ko, mbi hũndó ya Yehova ndo ye mbi nvɛ̃ni.

ANZƆ̃ LO MƐ MBI LUA:

Mbi ti na dungɔ lɛ ngɛ̃́ ti nzɔ̃ni nga ti dengɔ bɛ. Libala tɛ mbi dɛ̃ndó wa mbi ti na dengɔ bɛ na lo mɛ ya mbi lengbi ti kambisangɔ alo mɛ mbi tɛngbi na ni ti nɛngɔ ya mbi za na azi mɛndɛ̃. Mbi hũndó ya mbi ndo dɔ dã na Yehova ngoi zu.

• ADŨNDÓ LO NA BULU TI: 1974

• KA KƆDƆRƆ TI: RUSSIE

• DUNGƆ LƐ NGƐ̃́ TƐ LO TI GÃ: LO NDO SEPALANDÓ NA MIZIKI TI HEAVY-METAL

DUNGƆ LƐ NGƐ̃́ TƐ MBI TI GÃ:

Adũndó mbi ka kɔdɔrɔ ti Votkinsk, ni du ngandó kɔdɔrɔ mɛ adũ na Pyotr Ilich Tchaikovsky mɛ wa yengɔ bia. Endó ka ndasewa tɛ awa yɛlɛ. To mbi ndó na aseliye ti nzɔ̃ni kanda lo ndo nyɔndó samba ɔ nyɔ kpɔ̃ ni ni la ando pandó pa ngoi zu ka ndasewa.

Ta mbi ndó na kɔdɛ ka kalasi ma, na pɛ abulu gba ko, mbi hũndó ya azi mɛndɛ̃ ɔ mbi na ya alo zu. Mbi bandandó kpɛngɔ azi wa mbi ti ngandó na siɔ dangɔ bɛ ndo la. Mbi bandandó kpɛngɔ mbɛtɔ ti gwengɔ kalasi. Na ndakisa na ngoi mɛ ayɔ ge ti mbi ya mbi kambisa tɛnɛ na gbɛlɛ afɔ̃ mbi ko, ta mbi ndo koka singɔ na tɛnɛ bɛ ya kere nga ma se mɛ mbi lengbi ti tɛnɛngɔ na ni ka ndo mɛndɛ̃ ma. Na ngoi mɛndó mbi onzi bulu siɔ ti sɛgɔndɛrɛ ko, asundó ka lɛ bulletin tɛ mbi ya: “Ta lo lengbi ti tɛnɛngɔ tɛnɛ bere singɔ na dangɔ bɛ tɛ lo ma.” Tɛnɛ niko nzɛ̃ndó na mbi wa mbi hũndó ya ta mbi di dɛ na tina ma. Mbi bandandó hũndangɔ tɛrɛ mbi na ndo ya dungɔ lɛ ngɛ̃́ tɛ mbi dɛ bo na tina?

Mbi bandandó nyɔngɔ samba gba na ngoi mɛndó mbi dɛ palanga. Mbi ndo hũndó ni nzɔ̃ni na ngoi mɛ mbi banda nyɔngɔ ni. Kanda na ngoi mɛndó mbi ndo nyɔ ni gba ko, ni ndo giandó bingangɔ li tɛ mbi. Mbi bandandó hũngɔ ya ta dungɔ lɛ ngɛ̃́ tɛ mbi a dɛ na tina ma. Bingangɔ li tɛ mbi bandandó giangɔ mbi gba, na ya ngoi mɛndɛ̃ ta mbi ndo londó kaya da mbi si ma na pɛ abí gba. Mbi tindó na dangɔ bɛ ti hongɔ tɛrɛ mbi.

Na ngoi mɛndó mbi ti na bulu 20 ko, na ya ndunu ngoi lo kɔi ti fãnani sandó ngunu bɛ mbi. Mbi hĩngandó ya miziki mɛ ndo ili ni ya heavy-metal ndó da. Mbi sepalandó na miziki niko gba wa mbi gi ngandó hĩngangɔ azi mɛ ndo ye ni. Mbi ziandó kwali mbi gbɔ̃, mbi kolondó ma mbi wa mbi ndo yu ngandó bɔngɔ nga ma tɛ awa dɛngɔ miziki mɛ mbi ndo ye la. Mbi tindó na seliye ti mafumafu, mobulu wa mbi na ayata mbi e ndo pandó pa ngoi zu.

Mbi ndo hũndó ya mangɔ miziki ti heavy-metal na hɛ̃ngɔ mbi dengɔ bɛ, kanda ta seni la ma. Mbi ndo gbɛ̃ bondó gbɛ̃ngɔ! Na ngoi mɛndó mbi ma tɛnɛ ti siɔ ye mɛ awa yengɔ bia mɛ mbi ndo ye la ndo li ko, mbi nzɛ̃ndó nvɛ̃ni.

Mbi tindó na dangɔ bɛ ti hongɔ tɛrɛ mbi fãni mɛndɛ̃, ta mbi mundó ni na wele ma. Ye kɔi mɛndó ndo gbanzi mbi adu dangɔ bɛ mbi na pɛnɔ mɛ ta mbi na hũngɔ. Lo ndo yendó mbi gba wa lo ndo li ngandó zu na lo tɛ mbi. Lo niko ndo hɛ̃ndó mbi pɛnɔ nvɛ̃ni. Ta mbi yendó dungɔ na dungɔ lɛ ngɛ̃́ fãni mɛndɛ̃ ma, kanda ta mbi lengbi ngandó ti hongɔ tɛrɛ mbi ma.

Mbi bandandó dingɔ abuku mɛ asu ni na yanga ti Russe ti nɛngɔ ya mbi gele na ngoi. Mbi dindó tɛnɛ tɛ zo kɔi mɛ ndo li kwa ka da nzapa. Mbi tindó na gwɛ̃ kpengbani ti lingɔ kwa hɛ̃ Nzapa nga na zangɔ azi mɛndɛ̃. Mbi lindó sambela hɛ̃ Nzapa na bɛ mbi zu, ni du ye mɛ ta mbi dɛndó mbi li ni ma. Mbi yɔndó ka ti Nzapa ya lo fa na mbi se mɛ mbi lengbi ti dungɔ na dungɔ lɛ ngɛ̃́ mɛ na tina. Mbi mandó bɛ mbi zu na ngoi mɛndó mbi dɛ mbi li sambela. Aye mɛndó li tɛrɛ lo na gesi akamwisandó mbi gba. Na pɛ hola sɛ Tɛmwɛ tɛ Yehova kɔi gɔngɔndó nyɔ da tɛ mbi wa lo yɔ ngandó ge ti mbi ya ni manda mbi na Ngbangɔ. Mbi yendó ya ni du gbinya ti sambela tɛ mbi. Ni dundó bí ti uzu ti dengɔ bɛ na ya dungɔ lɛ ngɛ̃́ tɛ mbi.

SE MƐNDÓ NGBANGƆ GBINYANGBI DUNGƆ LƐ NGƐ̃́ TƐ MBI:

Abɛse dundó pɛnɔ nvɛ̃ni ko, mbi ziandó aye tɛ mbi zu mɛ na mangbi na miziki ti heavy-metal. Abɛse ngaso ko, amiziki niko ngbã bondó ge ya bingangɔ li tɛ mbi na pɛ yɔngɔlɔ ngoi. Ngoi zu mɛndó mbi ndo ɔ ka lége wa se mbi ndo ma azi mɛndɛ̃ ndo dɛ miziki ni ko, mbi ndo dandó bɛ mbi na dungɔ lɛ ngɛ̃́ tɛ mbi ti gã. Ta mbi yendó bombingɔ alo ti gã na alo ti fãnani ti nzɔ̃ni mɛ mbi ndo manda kaya bingangɔ li tɛ mbi bere ge bɛ mbi ma. Na lo ni la mbi ndo kɛ̃ndó ando ti ngaso. Mbi ndo lindó sambela kpengbani na ngoi mɛndó mbi ndo da bɛ mbi na dungɔ lɛ ngɛ̃́ tɛ mbi ti gã. Lingɔ ngaso zandó mbi ya mbi lua “bɛ pii [mɛ] aɔ kɔdɛ tɛ azi.”​—Filipɛ 4:7.

Na ngoi mɛndó mbi banda mandangɔ Ngbangɔ ko, mbi hũndó ya ayɔ ya awakristo kambisa tɛnɛ mɛ ala ndo manda hɛ̃ azi mɛndɛ̃. (Matie 28:19, 20) Mbi hũndó ya ta mbi na kokangɔ lingɔ ni bɛ yakere ma. Aye ti fãnani mɛndó mbi banda mandangɔ, a hɛ̃ndó mbi dengɔ bɛ gba nga na siriri. Mbi hũndó ya ayɔ ya azi mɛndɛ̃ ahĩnga nga bɛta tɛnɛ niko. Abɛse du ya mbi ndo kpɛndó mbɛtɔ ko, mbi bandandó kambisangɔ tɛnɛ mɛ mbi ndo manda hɛ̃ azi mɛndɛ̃. Ye mɛndó kamwisa mbi gba adu ya kambisangɔ tɛnɛ ti ya Ngbangɔ hɛ̃ azi mɛndɛ̃ lindó ya mbi hũ ya mbi na tina. Ni lindó ya bɛta tɛnɛ mɛ mbi ndo manda alua nvɛ̃ni ndo ka bɛ mbi.

ANZƆ̃ LO MƐ MBI LUA:

Ndɛ lo mɛ ko, mbi na dengɔ bɛ ka libala tɛ mbi wa mbi za nga azi gba ti nɛngɔ ya ala hĩnga bɛta tɛnɛ ti ya Ngbangɔ, ngambi mbi ti wali na ta mbi nga ka popo tɛ azi niko. Lingɔ kwa hɛ̃ Nzapa nga na zangɔ azi mɛndɛ̃ ya ala hĩnga lo ali ya dungɔ lɛ ngɛ̃́ tɛ mbi ati nvɛ̃ni na tina.