1. Ti woowi nnahaalaahu ohuseryawo sa omwaahiyu?

NYUWAANO montoko onwiriyana raatio nave mwiikoha: ‘Apwanne ichu sinahaala otitelela okhala hiiha?’ Sookhalavo ipahu sincipale ni onamaahita, ela ennaweeriha ancipale wuupuwela wi makuchuwelo a elapo ari vakhiviru. Apwanne eparipari? Wookhalavo mukhalelo wa osuwela yeeyo enahaala weereya omwaahiyu? Aai. Achu hanawerya olaiherya sa muhoolo, nyenya Yehova Muluku onnawerya. Owo onnanleela orweela Mpiipiliyani omwaahiyu ahu ni wa elapo.—Isaiya 46:10; Tiyako 4:14.

2, 3. Tiheeni oohuserya a Yesu yaachunaaya osuwela, nave Yesu aalonce heeni?

² Vaavaa nnaalakhanyaahu Mpiipiliyani vooloca sa makuchuwelo a elapo, eyo enataphulela ohiya makuchuwelo a echaya, nyenya makuchuwelo a achu aweera soonanara. Yesu aahusiha wi Omwene wa Muluku waahaala olamulela elapo yavathi. (Luka 4:43) Oohuserya awe yaanachuna osuwela ti liini Omwene wa Muluku waahaalaaya orwa, nave awo yaamukoha Yesu: “Etxhu yeyo enaya wereya lini? Nave t’evi eneneryo ya orwa wà, ni yomaliha elapo?” (Mateu 24:3) Yesu haalonce nihiku nene, nyenya ahaaleela yeeyo yaahaala weereya yaacamelaka makuchuwelo a elapo ela. Yeeyo Yesu olonceiye enahaala weereya nave tho enneereya hiihaano.

³ Mmwaha yoola nnahaala othokororya ichu sinooniherya wi nnakhala mmahiku ookuchula a elapo ela. Woopacerya, nnaphwanela osuwela vooloca sa ekhoco yeeyo yeeren’ye wirimu wi niiwexexe ntakhara heeni ichu soonanara sinneereya veelaponi yavathi.

4, 5. (a) Tiheeni yeeren’ye wirimu Yesu amanle okhala Mwene? (b) Mwawiiwanana ni Wupulula 12:12, tiheeni yaahaala weereya veelaponi yavathi Satana amanle ovonyiwa wirimu?

⁴ Mmwaha 8 noohuserya wi Yesu ookhala Mwene ovinyerya mu 1914. (Daniyeli 7:13, 14) Liivuru a Wupulula onnanleela yeeyo yeeren’ye: “Wàkhalawo ekhotxo wirimu. Miguel [onaahiwa Yesu] ni ankelo awe yàwana ekhotxo ni enama yawopiha [Satana], nave yeyo ni ankelo aya yàwanano.” * Satana ni masololo awe yaavoothiwa nave eriheliwa veelaponi yavathi. Mwaanyiherye ohakalala ankeelo yaaryaayano wirimu! Nyenya hanka vooloca sa achu veelaponi yavathi? Piipiliya onnaloca wi yaahala okhala elukuluku ya makacamiho wa achu oothene. Ntakhara heeni? Ntakhara Musaserya ootepano owali, “vosuwela wi elukuluku awe ehanle vakhani.”—Wupulula 12:7, 9, 12.

⁵ Musaserya onneera yeeyo onaweryeiye wi atannye makacamiho veelaponi yavathi. Owo ookhalano owali otokweene nthowa nawi “elukuluku awe ehanle vakhani” wi Muluku omutoloxe. Hankooni noone yeeyo Yesu aalonceiye wi yaahaala weereyaka mmahiku ookuchula.—Moone Yooleeliherya 24.

6, 7. Tiheeni eneereya vooloca sa ikhoco ni etala olelo?

⁶ Ekhoco. Yesu aaloca: “Nloko nnamurosa nloko nikina, nave omwene onamurosa omwene.” (Mateu 24:7) Achu ancipale aatholowa variyari va ekhoco opwaha khalai. Sooleeliherya sa Worldwatch Institute (Nikhuuru na Ovareryela Saweereya sa Mulaponi) nohooniherya  wi ovinyerya 1914, ekhoco yoowiipha achu opwaha macikhwi 100. Achu ancipale wuuluulela ikwaha raru aahiiphiwa mu iyaakha 100 variyari va 1.900 ophiyerya 2.000 opwaha achu akhwile ovinyerya iyaakha 1.900 sivinre muculi. Mwaanyiherye wiicela otokweene ni ohaawa ekhoco yaaruuhenlaaya achu!

⁷ Etala. Yesu aaloca: “Mmapuroni mothene onamukhalano etala.” (Mateu 24:7) Naamwi eriwo yoolya yincipale hiihaano opwaha khalai, achu ancipale haanono yoolya. Ntakhara heeni? Ntakhara awo haano ikhorowa soothumano yoolya naari imaca soolima. Macikhwi macikhweene aachu hanawerya okhalano ekhorowa. The World Health Organization (Nikhuuru Neekumi na Elapo Yoothene) nooloca wi macikhwi a anamwane annakhwa eyaakha ti eyaakha, nthowa na ohikhalano yoolya yoophwanelela wi ekhaviherye ekumi.

8, 9. Tiheeni enooniherya wi yooloherya ya Yesu vooloca sa mwaacikinye ni ipahu ennaakhwanela?

⁸ Mwaacikinye. Yesu aaloherya wi waahaala okhalavo “otxikinyeya wa elapo.” (Luka 21:11)  Mwaacikinye mutokotoko onnavira eyaakha ti eyaakha mmahiku ahu. Ovinyerya eyaakha ya 1900, opwaha macikhwi meeli a achu aakhwa nthowa na mwaacikinye. Naamwi irivo ikhankoonya inawerya omoona mwaacikinye woosiilo opwaha khalai, nlelo achu ancipale annakhwa.

⁹ Ireca. Yesu aaloherya wi saahaala okhalavo “ipahu.” Ipahu sincipale sinnakhumelela ni waatoloxa achu ancipale. (Luka 21:11) Naamwi matotore ehusenrye mukhalelo wa oloola ireca sincipale, nlelo sookhalavo ireca sihinaweryeya oloola. Otholathola weeriweno, wohooniherya wi eyaakha ti eyaakha, achu oohaalakhanyeya annakhwa nthowa na ereca yookothomola, malariya, ni nammirimani. Ohiya yeeyoru, matotore tho ahoona ireca ivyaani sawaakhwana 30, nave ikina sa seiho hisaano murece.

10. 2 Timóteo 3:1-5 onaakhwanela hai mmahiku ahu?

¹⁰ Mu 2 Timóteo 3:1-5, ninnaalakhanya: “Okhaleòsuwela wi,  mahiku òmaliherya inamphiya ilukuluku sokatxamiha.” Murummwa Paulo aaloca mukhalelo wa achu mmahiku oomaliherya. Owo aaloca wi achu yaahaala okhala

• a miiko

• oosiveliwa ikhorowa

• ohiwiiwelela asitiithi aya

• awiikuxererya

• oohaasivela amusi aya

• oohiihiiha

• oowali ni eesara

• oosiveliwanoxa oopuha omuhiya Muluku

• a wiisooneiha wi annavekela eniiha ehimwiiwelelaka Muluku

11. Mwawiiwanana ni Salumu 92:7, 8 tiheeni enahaala weereya ni achu oonanara?

¹¹ Makupa munakhalaanyuwo achu annooniherya makhalelo yaala? Achu mu elapo yoothene, tawiihiiha. Nyenya Muluku moohilekela onahaala weeravo echu. Owo onnalaiherya: “Namwi amutakhali emelaka ntoko manasi, nave ethapuluwaka yale anera sonanara, anawehererya otolosiwa wa mahiku òhimala.”—Salumu 92:7, 8.

12, 13. Tiheeni Yehova onanihusiheiye variyari va mahiku yaala ookuchula?

¹² Piipiliya aalaiherya wi variyari va mahiku ookuchula, elapo yaahaala osareya sawiicela ni makacamiho. Nyenya tho Piipiliya onnaloca wi ichu saphaama saahaala weereryaka.

¹³ Omwiiwexexa phaama Piipiliya. Mulipa a miririmu Taniyeli aarepa vooloca sa mahiku ookuchula. Owo aaloca wi “osuwela phama” waahaala osareya. (Daniyeli 12:4) Muluku ahaala waakhaviherya achu awe wi emwiiwexexeke phaama Piipiliya opwaha khalai. Yehova onneerano yeeyo xaxaxa ovinyerya mu 1914. Ntoko yootakiherya, Yehova onnanihusiha ochuneya wa nsina nawe, yookhwela awe ntakhara elapo ya vathi, eparipari vooloca sa woopola, yeeyo eneereya vaavaa nnakhwaahu, ni ovinya mookhwani. Noohuserya wi pahiru Omwene wa Muluku tonahaala omaliha makacamiho ahu oothene. Noohuserya tho mukhalelo wa okhala oohakalala ni okhala mmukhalelo onamuhakalaliha Muluku. Nyenya tiheeni akapuro a Muluku aneeraaya ni yeeyo anahuseryaaya? Yooloherya ekina ennavaha naakhulo.—Moone Yooleeliherya 21 ni 25.

14. Michaka yaphaama ya Omwene inalaleeryiwa ophiyerya woowi, nave taani onalaleerya?

¹⁴ Muteko wa olaleerya elapo yoothene. Alocaka sa mahiku ookuchula, Yesu aahi: “Mutxaka ola wa omwene onamulaleyiwa mwelaponi yothene.” (Mateu 24:3, 14) Michaka yaphaama ya Omwene sinnalaleeryiwa opwaha ilapo 230 mu ilocelo opwaha 700. Aai, mu elapo yoothene, Anamoona a Yehova orweela “ilapo, mahimo, maloko ni ilotxelo sothene” annaakhaviherya achu wiiwexexa vooloca sa Omwene ni yeeyo onahaalaaya oweerela achu.  (Wupulula 7:9) Nave awo aneerano yeeyomahaleene. Naamwiyiikariwaka naari wiiciwa ni ancipale, hiyaavo enahaala omaaliha muteko wa olaleerya, hiiha ntoko Yesu aalonceiye.—Luka 21:17.

15. (a) Nyuwaano munneemererya wi nnakhala mmahiku ookuchula, ntakhara heeni? (b) Tiheeni enii yeereye ni yaale ahinamwiiwelela Yehova ni yaale anamwiiwelela?

¹⁵ Nyuwaano hamuneemererya wi nnakhala mmahiku ookuchula? Sooloherya sincipale vooloca sa mahiku ookuchula sohaakhwanela. Moohilekela Yehova onahaala omaaliha muteko wa olaleerya michaka yaphaama, nave ‘okutxhuwa w’elapo’ onahaala ophiya. (Mateu 24:14) Makuchuwelo anahaala ophiya liini? Anahaala ophiya mu Armaketo, vaavaa Muluku onahaaleiye omaliha makacamiho oothene. Yehova onahaala ompharihela Yesu vamoha ni ankeelo akuru wi yaatoloxe oothene yaale anakhooca omwiiwelela Owo vamoha ni Mwanawe. (2 Tesalónika 1:6-9) Voocharela, Satana ni masololo awe herwa tho yaahuweliha achu. Nave oothene yaale anachuna omwiiwelela Muluku ni weemererya Omwene awe anahaala woona waakhwanela wa soolaiherya sa Muluku.—Wupulula 20:1-3; 21:3-5.

16. Woona wi ‘okutxhuwa w’elapo’ ori vakhiviru, tiheeni munaphwanelaanyu weera?

¹⁶ Elapo ela enalamuleliwa ni Satana moohilekela enahaala ophiya omakuchuwelo. Mwawiihiiha ti woochuneya wiikoha: ‘Tiheeni kinaphwanelaaka weera?’ Yehova onachuna wi mutitelele omuhuserya Piipiliya. Munaphwanela ohuserya moowetha. (Yohani 17:3) Anamoona a Yehova onnathukumana isumana soothene wi yaakhaviherye achu omwiiwexexa Piipiliya. Mwiilipixerye ophiya mmithukumano iho moohihiyererya. (Mwaalakhanye Ahebri  10:24, 25.) Wakhala wi mohoona wi munnaphwanela opaka matorokelo, muhoovelele weerano. Weerano hiiha onamweeriha wi onthamwene anyu ni Yehova okhale woolipa.—Tiyako 4:8.

17. Ntakhara heeni achu ancipale anahaala otuthuwa vaavaa makuchuwelo anahaalaaya ophiya?

¹⁷ Murummwa Paulo aaloca wi otoloxiwa wa amutakhali onahaala ophiya elukuluku yeeyo achu ancipale ahinaanyiheryaaya, “ntoko mpava, ohiyu.” (1 Tesalónika 5:2) Yesu aaloherya wi achu ancipale hiyi epwache ineneeryo inooniherya wi nnakhala mahiku ookuchula. Owo aaloca: “Ntoko saphatxun’waya khalai wa elukuluku ya Noé, hihatho enahawela wereye elukuluku ya orwa va Mwana a mutxhu [naari mahiku ookuchula]. Ntoko seren’yaya mwa elukuluku ya mahi òsasa ehiphiyale atxhu yànalya, yànawurya, yànathela, ni yànatheliwa ophiyerya nihiku Noé avolon’weiye mmwatxeyani, ni hiyasuwela etxhu ophiyerya orwa wa mahi yatolonse atxhu othene; oni wereye hihatho orwa wa Mwana a mutxhu.”—Mateu 24:37-39.

18. Olopola taani Yesu onivanheiye?

¹⁸ Yesu oolopola wi hannaphwanela oweiwa ni “sotxapaheya, ni oteteiwa wa ekumi.” Owo aaloca wi makuchuwelo anahaala orwa mootutuxa, “ntoko murakho.” Owo tho aaloca wi “oni ophiye wa atxhu othene amanke mwelapo yavathi.” Nave owo ahaaceererya: “Mwiwehereryeke ni mvekeleke elukuluku yothene wi mukhale ni ikuru sotxhawano sothene seiho inahawela ophatxuwa, nave wi mphwanele wemela vamithoni va Mwana a mutxhu.” (Luka 21:34-36) Ntakhara heeni ti yaphaama wiiwelela olopola wa Yesu? Ntakhara moohilekela elapo ela yoonanara ya Satana enahaala otoloxiwa. Pahiru yaale aneemereryiwa ti Yehova ni Yesu tanahaala ovuluwa omakuchuwelo ni okhala mahiku oothene mu elapo evyaani.—Yohani 3:16; 2 Pedro 3:13.