1. Teevi eri yookhwela ya Muluku wa achu?

MULUKU ookhalano yookhwela yoohakalaliha wa achu. Owo aampatuxa mulopwana ni muthiyana oopacerya, Aatamu ni Haava wi ekhaleke mu emaca yooreera. Yookhwela awe yaari wi ekhalekeno anamwane, ni opaka elapo yoothene okhala parataiso, nave wi yaakhapeleleke asinama.—Maphatxuwelo 1:28; 2:8, 9, 15; moone Yooleeliherya 6.

2. (a) Nnasuwela hai wi Muluku onahaala waakhwaniherya yookhwela awe? (b) Tiheeni Piipiliya onaloceiye sa okhala elukuluku yoothene?

² Nyuwaano munuupuwela wi hamurwa mukhala mparataiso? Yehova onnanleela: “Kólotxa ni kinamwera.” (Isaiya 46:9-11; 55:11) Aai, owo onahaala opaka soothene olakelenleiye, nave hiyaavo enii emuhiihe. Yehova aakhalano yoolakelela apatuxaka elapo. Owo “hapatunse elapo yavathi wi ehikhaleno etxhu.” (Isaiya 45:18) Owo onakhwela wi achu ekhalekemo. Achu a mukhalelo taani Muluku onakhweleiye wi ekhaleke veelaponi yavathi, nave anahala okhala ophiyerya liini? Piipiliya oni: “Atxhu awokololowa [naari awiwelela] anamwakhela elapo, anamukhala wa mahiku othene.”—Salumu 37:29; Wupulula 21:3, 4.

3. Woona wi achu anniiceliwa ni annakhwa, tiheeni munahaalaanyu okoha?

³ Nyenya olelo achu anniiceliwa ni annakhwa. Mmapuro mancipale, achu annawana nave anniiphana. Mweeparipari tahi yeeyo Muluku aakhweleiye. Vano ntakhara heeni, tiheeni yeeren’ye? Pahiru Piipiliya tonawerya waakhula.

4, 5. (a) Mu emaca ya Eeteni taani aalonce ni Haava moorweela wa enowa? (b) Onaweryeya hai muchu aphaama okhala mpava?

⁴ Piipiliya onnanleela wi Muluku ookhalano mwiicani yoowo oniichaniwa “Musaserya nari Satana.” Satana aapharihela enowa wi aloce ni Haava mu emaca ya Eeteni. (Wupulula 12:9; Maphatxuwelo 3:1) Owo aheeriha wi ekhaleke ntoko yaari enowa yaaloca.—Moone Yooleeliherya 7.

⁵ Apwanne Muluku tompatunxe Musaserya? Hooye! Munkeelo yoowo aari wirimu Muluku apatuxaka elapo ntakhara Aatamu ni Haava, ti yoowo aatoroken’ye akhala Musaserya. (Yobi 38:4, 7) Eyo yeeren’ye hai? Onaweryeya hai muchu aphaama okhala mpava? Owo hanayariwa ari mpava. Eyo eneereya wakhala wi onnachuna echu ehiri yawawe. Wakhala wi onnatitelela wuupuwelela sa yeeyo, nchuno nlo noonanara ninnannuwa. Nave vaavaa onakhaleiyeno ekari, owo onniiya. Mwa yeeyo onnakhala mpava.—Mwaalakhanye Tiyako 1:13-15; moone Yooleeliherya 8.

6. Tiheeni yeeren’ye wi munkeelo akhala mwiicani a Muluku?

⁶ Ti yeeyo yeeren’ye ni Munkeelo yoola. Yehova amanle ompatuxa Aatamu ni Haava, owo aahaalamulela wi ekhalekeno anamwane wi ‘esareye mw’elapo ya vathi.’ (Maphatxuwelo 1:27, 28) Munkeelo owo akhweya ahuupuwela ‘Achu oothene ala yaaphwanela okicicimiha miyaano omuhiya Yehova!’ Nthowa na wuupuwelela yeela ilukuluku soothene, nchuno nawe na echu yeeyo yaari ya Yehova naanannuwa. Munkeelo owo aachuna wi achu emucicimiheke. Mwawiihiiha owo aaloca sawootha wa Haava ni amuwoka. (Mwaalakhanye Maphatxuwelo 3:1-5.) Nthowa na weerano yeela, owo aatorokeya akhala Satana Musaserya, mwiicani a Muluku.

7. (a) Ntakhara heeni Aatamu ni Haava aakhwa? (b) Ntakhara heeni ninnuuluvala ni okhwa?

 ⁷ Aatamu ni Haava hiyaamwiiwelenle Muluku nave elya yawiima. (Maphatxuwelo 2:17; 3:6) Yaamuchekela Yehova, nave moovira wa elukuluku yaakhwa, hiiha ntoko Yehova aalonceiye. (Maphatxuwelo 3:17-19) Anamwane a Aatamu ni Haava yaari oochekeene, mwawiihiiha awo annakhwa. (Mwaalakhanye Aroma 5:12.) Wi niiwexexe phaama ntakhara heeni anamwane a Aatamu ni Haava aryaaya oocheka, moone niphwanaphwaniho nla: Mwaanyiherye eforma yoohenyekeya. Itixolu soothene inakhuma mummo sinahaala tho okhala soohenyekeya ntoko eforma. Vaavaa Aatamu ahaamwiwelenleiye Muluku, owo aacheka. Woona wi hiyaano na anamwane a Aatamu oothene nookhalano “ohenyekeya” omohamoha wa Aatamu, nave noocheka. Nave nthowa na yeeyo, ninnuuluvala ni okhwa.—Aroma 3:23; moone Yooleeliherya 9.

8, 9. (a) Satana aachuna wi Aatamu ni Haava yeemererye eheeni? (b) Ntakhara heeni Yehova haatolonxe alipa oomwarerya mwawaakuveya?

⁸ Satana aapaceryiha ommwaryeela Yehova vaavaa aamuwonkeiye Aatamu ni Haava ohimwiiwelela Muluku. Owo achuna wi Aatamu ni Haava emooneke Yehova okhala mulipa awootha, mulamuleli oonanara ohinachuna ichu saphaama wa yaawo. Satana aaloca wi achu hanachuna wi Muluku aaleeleke echu yaweera, wi awo yaaphwanela olakelelaka mukhataaya yeeyo eri yoonanara ni yaphaama. Nave tiheeni Yehova aahaaleiye weera? Owo aakhalano owerya wa owiipha alipa oomwaryeya oothene. Apwanne eyo yaahaala wooniherya wi Satana mulipa awootha? Hooye. Eyo hekaawenrye wooniherya.

⁹ Mwawiihiiha, Yehova haatolonxe alipa oomwaryeya mwawaakuveya. Ohiya yeeyo, owo oohiya elukuluku wi achu yiilamuleleke mukhataaya. Ela ennanikhaviherya  osuwela wi Satana mulipa a wootha nave wi Yehova tosuwenle yeeyo eri yaphaama wa achu. Nnahaala ohuserya sincipale vooloca sa yeela Mmwaha 11. Nyenya munoona hai vooloca sa yoolakelela ya Aatamu ni Haava? Apwanne yaari yaphaama omweemererya Satana ni ohimwiiwelela Muluku? Yehova ahaavaha soothene awo yaaryaayano. Ahaavaha ekumi yoophaameya, nipuro naphaama, ni muteko woohakalaliha. Nyenya hiyaavo yaphaama Satana aaweerenleiye. Mwaari weiwo, tiheeni mwaahaalaanyu weera?

10. Yoothanla taani mmoha ti mmoha a hiyo oreiyeno?

 ¹⁰ Olelo, muchu ti muchu a hiyo ookhalano yoothanla yoolikana, nave ekumi ahu eri mwa yeeyo nnathanlaahu. Nnanwerya othanla omwiiwelela Yehova ntoko mulamuleli ahu ni okhaviherya wooniherya wi Satana mulipa awootha. Naari nnawerya omuthanla Satana ntoko mulamuleli ahu. (Salumu 73:28; mwaalakhanye Masiposipo 27:11.) Achu avakhaani tanathanla omwiiwelela Muluku. Chiryene, owo tahi mulamuleli a elapo. Vano taani ori mulamuleli?

11, 12. (a) Echu taani nnahuseryaahu orweela wa yoovaha ya Satana? (b) Soorepa taani sinooniherya wi Satana mulamuleli a elapo?

¹¹ Yesu aamusuwela mulamuleli a elapo. Ekwaha emoha, Satana “amoniha [Yesu] somwene sothene sa mwelaponi ni ovuwa waya.” Voocharela Satana aamuroromeliha: “Kinahawela wovaha itxhu sothene iha, wakokhorà okepesa.” (Mateu 4:8, 9; Luka 4:5, 6) Mwiikohe, ‘Waakhanle wi soomwene soothene hisaari sa Satana, ahaala omvaha Yesu?’ Hooye. Olamulelo woothene onarweela wa Satana.

¹² Akhweya munanwerya okoha: ‘Onaweryeya hai Satana okhala mulamuleli a elapo? Tahi Muluku a Ikuru Soothene yoowo ori mpatuxa a elapo?’ (Wupulula 4:11) Aai, owo mpatuxa, nyenya Yesu aaloca wi Satana tori “mutokwene a elapo ela.” (Yohani 12:31; 14:30; 16:11) Murummwa Paulo aamwiichana Satana Musaserya ntoko “muluku a elapo ela.” (2 Korinto 4:3, 4) Nave murummwa Yohani aarepa wi “elapo yothene ennatxhonkiwa ni mutakhali.”—1 Yohani 5:19.

13. Ntakhara heeni ninnachuna elapo esyaani?

¹³ Elapo ela enamvira ekhalaka yawoopiha. Ninnoona  ikhoco, makhwankwa, wiisootherya, ni nlala mmapuro oothene. Achu hanawerya omaliha makacamiho oothene yaala, moohipwacha wiilipixerya waya. Nyenya Muluku moohilekela onahaala otoloxa elapo ela yoonanara variyari va ekhoco awe ya Armaketo ni otikitherya elapo esyaani.—Wupulula 16:14-16; moone Yooleeliherya 10.

14. Taani Muluku omuthanlileiye wi akhale Mwene a Omwene awe? Piipiliya aalohenrye hai vooloca sa Yesu?

¹⁴ Yehova oomuthanla Yesu wi akhale Mwene a olamulelo Awe wa wirimu. Yesu onahaala olamulela elapo yoothene. Iyaakha macikhwi macikhweene ivirale, Piipiliya aaloherya wi Yesu ahaala olamulela ntoko “Mwene a Murecele” nave wi olamulelo awe horwa omala. (Isaiya 9:6, 7, Tradução do Novo Mundo) Yesu aahaahusiha oomuchara awe oveka Omwene owo vaavaa aalonceiye: “Omwene anyu orwe. Okhwela wanyu wereye, ntoko wirimu hiha vathiva.” (Mateu 6:10) Mmwaha 8, nnahaala ohuserye mukhalelo Omwene wa Muluku onahaalaaya oraceela olamulela wa elapo ela. (Mwaalakhanye Daniyeli 2:44.) Voocharela Omwene wa Muluku onahaala otatuxa elapo ela okhala parataiso ooreera.—Moone Yooleeliherya 11.

15. “Elapo esya” tiheeni?

¹⁵ Piipiliya onnaloca: “Ninnawehererya erimu esya ni elapo esya, oryayamo wokololowa.” (2 Pedro 3:13; Isaiya 65:17) Ikwaha ikina, Piipiliya aalocaka sa “elapo” onachuna oloca sa achu anakhala mu elapo. (Maphatxuwelo 11:1) Mwawiihiiha “elapo esya,” anaahiwa achu yaawo anamwiiwelela Muluku yaawo anahaala oreelihiwa ni yoowo.

16. Yamahala taani yoohakalaliha Muluku onahaaleiye waavaha yaale anahaala okhala mu elapo esyaani, nave tiheeni nnaphwanelaahu weera wi naakhele yamahala yeela?

¹⁶ Yesu aaloherya wi yaale anahaala okhala mu elapo  esyaani ya Muluku anahaala ovahiwa “ekumi yohimala” (Marko 10:30) Tiheeni nnaphwanelaahu weera wi naakhele yamahala yeela? Khwoo mwaalakhanye Yohani 3:16 ni 17:3 wi mphwanye naakhulo. Vano hankooni noone tiheeni Piipiliya onaloceiye sa ekumi mu Parataiso.

17, 18. Nnasuwela hai wi onahaala okhalavo murecele veelaponi yoothene ya vathi?

¹⁷ Onanara, ikhoco, wiiphana ni nlala hikhalavo. Haavo muchu oonanara onahaala ohala veelaponi yavathi. (Salumu 37:10, 11) Muluku onahaala omaliha “ikhotxo ophiyerya onakomelawo elapo.” (Salumu 46:10; Isaiya 2:4) Elapo enahaala osareya ni achu anamusivela ni omwiiwelela Muluku. Onamukhalavo murecele woohimala.—Salumu 72:7.

¹⁸ Achu a Yehova anamukhala ookhapeleleya. Mmahiku a khalai, vaavaa Aisarayeli yamwiiwelelaaya Muluku, awo yaanakhala oolipiheya, ntakhara Muluku aanaakhapelela. (Onamukutxho 25:18, 19) Mu Parataiso, hinnahaala woovaka echu naari muchu. Ilukuluku soothene nnahaala okhalaka ookhapeleleya!—Mwaalakhanye Isaiya 32:18; Mikeya 4:4.

19. Ntakhara heeni nnaphwanelaahu ororomela wi enamukhalavo yoolya yawaaca mu elapo esyaani ya Muluku?

¹⁹ Enamukhalavo yoolya yawaaca. “Mmatxani onamukhalamo solya sintxipale, mmiyakoni onamwatxamo sawima.” (Salumu 72:16) Yehova Muluku onahaala ‘orèliha’ nave ‘ematxa enamvaha sawima.’—Salumu 67:7.

20. Nnasuwela hai wi elapo yoothene enahaala okhala Parataiso?

²⁰ Elapo yoothene enamukhala Parataiso. Achu anahaala okhalakano ipa saphaama ni kapinka ooreera. (Mwaalakhanye Isaiya 65:21-24; Wupulula 11:18.) Elapo yoothene enahaala okhala yooreera hiiha ntoko yaakhanlaaya emaca ya Eeteni. Yehova onahaala onivahaka echu  eri yoothene nnachunaahu. Piipiliya onnaloca sa Yehova ariki: “Nyuwo mwakumiharu ntata nanyu, munnavoniha sothene iri ni ekumi.”—Salumu 145:16.

21. Nnasuwela hai wi onahaala okhalavo murecele variyari va achu ni axinama?

²¹ Onamukhalavo murecele variyari va axinama ni achu. Axinama herwa enaaphara achu. Mwaana mukhaani hanii ooveke, naamwi ari variyari va axinama yaawo ari awoopiha olelo.—Mwaalakhanye Isaiya 11:6-9; 65:25.

22. Tiheeni Yesu onahaaleiye weera ni awiiceliwa?

²² Haavo onii iceliweke. Vaavaa Yesu aareiye veelapo ya vathi, owo aahaapenuxa achu awiiceliwa. (Mateu 9:35; Marko 1:40-42; Yohani 5:5-9) Nyenya ntoko Mwene a Omwene wa Muluku, Yesu onahaala omaliha ireca soothene. “Havo oni ikhupanyeryeke wa nthowa na witxeliwa.”—Isaiya 33:24; 35:5, 6.

23. Tiheeni Muluku onahaleiye weera ni alipa ookhwa?

²³ Akhwile anamukookela okhala akumi. Muluku oororomeliha wi onahaala waaviiha macikhwi macikhweene a achu akhwile nave anamukhala okhala wookhala. “Onarwa-okhala ovinyatho wa ékhaikhai ni óhikhala ékhaikhai.”—Mwaalakhanye Yohani 5:28, 29; Saweriwa T’arummwa 24:15, Nlakano Nahihano.

24. Munoona hai vooloca sa ekumi mparataiso?

²⁴ Oothene hiyo nookhalano yoothanla. Nnanwerya othanla ohuserya sa Yehova ni omurumeela yoowo, naari weera echu nnakhwelaahu. Nathanla omurumeela Yehova, nnahaala okhalano omwaahiyu waphaama. Vaavaa mulopwana mmoha aavenkeiye Yesu wi amuupuwelele amanle okhwa, Yesu aamuroromeliha owo: ‘Onamukhala ni miyo m’Paradaiso.’ (Luka 23:43, NN) Nnahaala ohuserya sincipale vooloca sa Yesu ni mukhalelo owo onahaleiye waakhwaniherya soolaiherya sa Yehova.