YEHOVA aahimveerela murummwa Paulo orepa mikhalelo mithanu naxexe seiho sinooniherya sookhumelela sa munepa waweela. (Galasya 5:22, 23) Mikhalelo soothene seiha, siniichaniwa “sawima sa munepa.” * (Moone masu avathi.) Sawiima seiyatho makupa a “mutxhu ahihano” yoowo Akristu anaphwanelaaya onwara. (Kolosi 3:10) Hiiha ntoko mwiri onahaala ovaha sawiima vaavaa onaheliwaaya maahi awaakhwanela, muchu onanwerya okhalano mikhalelo seiha saphaama vaavaa onahooleliweiye ni munepa waweela mu okumi awe.​—Salumu 1:1-3.

Mukhalelo woopacerya yoowo Paulo aalonceiye ti okhwela. Ophiyerya mweeryo taani mukhalelo yoola oryaaya woochuneya? Paulo aahiloca wi voohikhala okhwela, owo ‘haari etxhu.’ (1 Korinto 13:2) Nyenya okhwela tiheeni, nave nni nunnuwihe hai ni wooniherya nihiku ti nihiku?

Naamwi okhalaka woovila othariha mookwakwaleya okhwela, Piipiliya onnaloca mukhalelo muchu ookhwela onuupuweleiye ni oneereiye. Ntoko yootakiherya, muchu okhwela ‘tovilela, torèra murima’ nave “onahakalala ni eparipari.” Vaavaa muchu onakhaleiyeno okhwela, owo “onnalevelela sothene, onnaroromela sothene, onnawehererya sothene, nave onnavilela sothene.” Owo onnaathokororya akhweiye mwawiiseela, onnaakhapelela yaawo, nave owo onnakhala nthamwene oororomeleya. Nyenya wakhala wi muchu haanono okhwela, owo onakhala a nrima, awiirumiha, oonanara murima, awiisoona, ni ohikhurumuwela. Ohiya wooniherya mikhalelo soonanara ntoko seiha, nnaachuna owooniherya akina okhwela weeparipari akina, mukhalelo wa okhwela yoowo ‘ohinasya ophura waya.’​—1 Korinto 13:4-8.

“Muluku ti okhwela.” (1 Yohani 4:8) Miteko ni saweera sawe sinnooniherya yeela. Yaweera awe etokotoko ya waakhwela achu yaari omurumiha Yesu veelaponi wi akhwe ntakhara hiyo. Murummwa Yohani aahiloca: “Muluku ononiha onikhwela wawe, vomurumihela Mwana awe mmoharu mwelaponi wi hiyo nikhale mwa yowo. Okhwela wa Muluku ti wu: tahi hiyo nimukhwenle Muluku, nto ti yowo onikhwenle ni anrumihela Mwanawe, ntoko yawopolano sotxheka sahu.” (1 Yohani 4:9, 10) Nthowa na okhwela wa Muluku, soocheka sahu sinanwerya okhurumuweliwa nave nnanwerya okhalano ewehereryo ni okumi.

Yesu ohooniherya wi aanaakhwela achu moorweela wa oveleela okumi awe ntoko mukucho wi eere yookhwela ya Muluku. Murummwa Paulo onnanleela: “Ti mwa okhwela weiwo hiyo nelihiwahu wa nthowa na mukutxho wa mwili wa Yesu Kristu, ovahiwe etila emoha mwa itila sothene.” (Ahebri 10:9, 10) Haavo muchu owenrye wooniherya okhwela otokotoko. Yesu aahiloca: “Havo mutxhu orino okhwela otokotoko ompwaha yowo onavaha ekumi awe wa nthowa na asinthamwene  awe.” (Yohani 15:13) Apwanne achu oohiphaameya nnawerya otakiherya okhwela Yehova ni Yesu yoonihenryaaya? Aai! Hankooni nthokororye mukhalelo wa weerano yeela.

Paulo onnanilipiha ni masu ala: “Asinnaka, mukhale omutakiherya Muluku ntoko anamwane òkhweleyasa. Mwetxeke mokhwelani, ntoko Kristu onikhwenleiye ni ivan’heiye wa nthowa na hiyo.” (Éfeso 5:1, 2) Masu awi “mwetxeke mokhwelani” anataphulela eheeni? Anataphulela wooniherya okhwela ilukuluku soothene. Tahi pahiru oloca wi ninnaakhwela akina. Ninnooniherya moorweela wa yeeyo nneeraahu. Yohani aahirepa: “Anàka, nihikhwelaneke ni masu a nlumiru, nto ni miteko ni eparipari.” (1 Yohani 3:18) Ntoko yootakiherya, ninnalaleerya “Mutxhaka ola wa omwene” nthowa na omusivela Yehova ni mwaacamani ahu. (Mateu 24:14; Luka 10:27) Hiyaano tho ‘ninnetxa mokhwelani’ vaavaa nnakhalaahu oovilela, ooreera murima ni ookhurumuwela. Ninnapharihela ekano ya Piipiliya enaloca: “Ntoko Apwiya olevelenlayani, ni nyuwotho mwaleveleleke akhwinyu.”​—Kolosi 3:13.

Wakhala wi nnaavaha ekano akina naari owookolola, eyo henooniherya wi naachu oohikhwela. Ntoko yootakiherya, wi emmaalihe mwanaya oninla, asitiithi akina pahiru aneerano echu vyakala mwaana owo onachuneiye. Nyenya tiithi yoowo onamukhwela mwanawe mweeparipari, onahaala okhala aweemeleleya wakhala woochuneya. Moolikana, naamwi Apwiya Muluku eri ookhwela, “anamulaka yole anamukhwelaya.” (Ahebri 12:6) Mwawiihiiha, ti yoosivela ovaha ekano wakhala woochuneya. (Masiposipo 3:11, 12) Nyenya muupuwele, oothene ahu naachu oocheka nave ilukuluku sincipale ninnahesa wooniherya okhwela. Mwawiihiiha oothene ahu nnaphwanela wiilipixerya wooniherya okhwela. Nni niwerye hai weerano yeela? Hankooni nthokororye mikhalelo miraru.

Woopacerya, mumveke Muluku wi oovaheeni munepa awe waweela, yoowo onavaha okhwela. Yesu aahiloca wi Yehova onaavaha “Munepa Wawela yawo ananveka.” (Luka 11:13) Mwawiihiiha nnanwerya ororomela wi wakhala wi nooveka munepa waweela ni weemererya wi onikhaviherye, nnahaala okhala ookhwelaxa. (Galasya 5:16) Ntoko yootakiherya, waakhanle wi mwa mutokweene, munaphwanela oveka munepa waweela wi wookhaviheryeeni okhala ookhwela vaavaa munachunaanyu waavaha ekano akina orweela Mpiipiliyani. Naari waakhanle wi mwa tiithi, munanwerya oveka munepa waweela wa Muluku wi wookhaviheryeeni waalaka aniinyu, ohiya moowali, nyenya mookhwela.

Wanaawiili, muupuwele mwawiiseela mukhalelo Yesu oonihenryeiye okhwela naamwi akina yamukhaliha moonanara. (1 Pedro 2:21, 23) Vaavaa muchu onoolikeiyeeni naari munahoolelaanyu ohookololowa, mwiikohe: ‘Tiheeni Yesu aahaaleiye weera?’ Murokora mmoha oniichaniwa Leigh aahoona wi wiipakela nikoho nenla yaahimukhaviherya wuupuwelela ahaakumve weera echu. Owo onnaloca: “Ekwaha emoha, nthamwene oomutekoni aahimurumihela michaka soonanara nthamwene aka vooloca sa miyaano ni muteko kaapharaaka. Ela yaahikithananiha vancipale. Nyenya kaahiikoha, ‘Kini kimutakiherye hai Yesu mu orehererya mwaha ni muchu yoola?’ Kimanle wuupuwelela yeeyo Yesu aahaaleiye opaka, kaahilakelela ohipwacha mwaha yoole ni oheera echu. Ohoolo waya, kaahisuwela wi nthamwene aka aahikhalano makacamiho a ekumi nave aari awuukhuwa. Kaahisuwela wi akhweya tahi yeeyo owo aachuneiye orepa. Wuupuwelela yootakiherya ya Yesu ya wooniherya okhwela naamwi kirosiwaaka yaahikikhaviherya wooniherya okhwela woolikana wa nthamwene aka omutekoni.” Wakhala wi noomutakiherya Yesu, nnahaala wooniherya waakhwela akina.

Waneeraru, muhuserye wooniherya okhwela weeparipari. Ola mukhalelo wa okhwela onaasuwanyeiha oomuchara eeparipari a Yesu. (Yohani 13:34, 35) Yesu mwaneene aahikhalano mukhalelo yoola wa okhwela, nave owo ootikitherya yootakiherya yoophaameya wa hiyaano. Mwawiihai? Moorweela wa ohiya erimu, owo “àhiyeviha  mukhateiye” ntakhara hiyo “mpaka okhwa.” (Filipi 2:5-8) Vaavaa nnatakiheryaahu okhwela weeparipari wa Yesu, muupuwelo ni miyoonelo sahu inahaala okhala soolikana ni yoowo, nave hinikathokororya sawihuru.

Sookhalavo miphurelo sawaaca mu wooniherya okhwela. Hankooni nthokororye sootakiherya piili.

• ONNAAHU WA ELAPO YOOTHENE: Nthowa na okhwelana wahu, ninnasuwela wi anna ni arokora mmiloko vyakala akhweya nneeraahu nxekurye anahaala onaakhela phaama. Mareeliho oohakalaliha osuwela wi munnasiveliwa ni “asinninyu amwalamwanle mwelaponi”! (1 Pedro 5:9) Osivela ntoko yoowo onaphwanyeya pahiru variyari va achu a Muluku.

• MURECELE: ‘Ovilelana mukina ni mukhwawe mokhwelani’ ennaneeriha opuha ‘olutxelelana wa muretxele.’ (Éfeso 4:2, 3) Ninnalawiha murecele yoola mmithukumano sahu sa muloko, mmithukumano sa ekulucu ni sa miceche. Apwanne hamuneemererya wi murecele ntoko yoola ti wa vameekhaaya mu elapo yeela yookawanyeya? (Salumu 119:165; Isaiya 54:13) Vaavaa nnaavyaahu okhala a murecele ni akina, ninnooniherya wi ninnaasivela chiryene, nave eyo ennamuhakalaliha Tiithi ahu a wirimu.​—Salumu 133:1-3; Mateu 5:9.

Paulo aarepa: “Okhwelana onnanteka.” (1 Korinto 8:1) Mano ela enataphulela eheeni? Mu 1 Korinto ecima ya 13, yeeyo akina aniichanaaya “Salumu a “Okhwela,” owo onnathariha mukhalelo okhwela onantekaaya. Okhwela onnaavya ophaama wa akina. Okhwela onnathokororya soothowa sa akina. (1 Korinto 10:24; 13:5) Nave woona wi okhwela ti woothokororya, woopisa murima, ni wooreera murima, onnateka imusi soosivela ni wiiwanana mmulokoni.​—Kolosi 3: 14.

Sookhalavo mikhalelo mincipale sa wooniherya okhwela, nyenya omukhwela wahu Muluku ti wa esisapo etokweene ni woolipiha. Ntakhara heeni? Nthowa nawi omukhwela wahu yoowo onnaniiwananiha! Achu a ilapo soothene, maloko, ni ilocelo soohiyanahiyana, annamulapela Yehova vamoha, emurumeelaka yoowo “ni murima mmoha.” (Sofoniya 3:9) Hankooni nikhale oolakelela wooniherya mukhalelo yoola wasisapo wa yawiima ya munepa waweela wa Muluku nihiku ti nihiku.