Onitlakat Acul, se kalpantsin tlen onka Guatemala kampa melak tejtepeyoj. Nofamilia ualeua itech ixiles, se grupo tlen ualeua itech mayas. Oniuel español, san ika, noijki oniuel tlajtojli tlen tlajtouaj ixiles. Oninoskalti ijkuak onkatka guerra ipan nopaís, tlen ouejkauj 36 xiuitl. Ijkuakon melak miyekej ixiles omijkej.

Ijkuak nikpiaya naui xiuitl, nokniuj akin kipiaya chikome xiuitl nauiltijtoya ika se pitentsin bomba tlen otopon. Ipampa yejon, nejua onikpolo notlachialis, san ika, nokniuj omik. Kuakon, onechontitlankej Ciudad de Guatemala ipan se kajli kampa kintlajpiyaj akin xtlachiaj, ompa oniuel braille. Xkeman onikasikamat tleka akin ompa nechtlajpiayaj xkeman onechkauilijkej manikinnotsa oksekimej kokonej, niman yejuamej noijki xnechnotsayaj. Nochipa san noselti ninemiya, ika yejon, san nikchiatoya nias iuan nonan pampa yejua kema nechtlasojtlaya. Nonan omik ijkuak nikpiaya majtlaktli xiuitl. Yejon melak onechyolkoko, pampa aman xok yakaj nechtlasojtlaskia.

Ijkuak nikpiaya 11 xiuitl, onichantito iuan notlakpaikniuj iuan ifamilia. Yejuamej onechmakakej nochi tlen nechpolouaya, san ika, maski ijkon, ok noselti ninomachiliaya. Melak niktlajtlakoltiaya toTajtsin niman niktlajtoltiaya: “Tleka omik nonan niman tleka xok nitlachia”. Miyekej nechijliayaj ika toTajtsin ijkon kinekiya nopan manochiua, ika yejon, niknemiliaya ika toTajtsin xtetlasojtla niman xteiknelia. Tla ueliskia ninomiktiskia, nikchiuaskia.

Melak onitlajyoui pampa xnitlachiaya. Ijkuak nikonetl katka, miyekpa onechnajnauiltijkej, san ika, xakaj onikijli pampa oniknemili ika xakaj kinekiskia nechpaleuis. Xmás yakaj nechnotsaya. Xkuajli ninomachiliaya niman xnikuelitaya ninouikas imiuan oksekimej pampa xintech nitlaneltokaya.

Ijkuak nikpiaya 13 xiuitl, se tlakatl iuan isiuauj akin iteixpantijkauan Jehová katkaj, onechnojnotskej ipan noescuela. Se maestra akin nechikneliaya okimijli manechnojnotsakan. Yejuamej onechijlikej ika ipan Biblia kijtoua ika akin xtlachiaj oksejpa tlachiaskej niman akin yomijkej yoliuiskej (Isaías 35:5; Juan 5:28, 29). Nikuelitaya nikinkakis, san ika, pampa xmás nitlajtlajto katka, xnitlajtouaya. Maski ijkon, yejuamej xokikajkaujkej ika nechnojnotsaj, onechititijkej ika nechtlasojtlaj niman nechontlajpalouayaj para nechmachtiskej Biblia. Yejuamej melak miyek horas nejnemiyaj kampa tejtepeyoj para ijkon ajsiskej nochan.

Ijkuak nokniuj onechijli kenijki tlajtlachiayaj, okijto ika yejuamej xkipiayaj tomin, san ika, kuajli notlakentiayaj. Nesiya ika nechtlasojtlayaj pampa miyekpa itlaj nechtlayokoliayaj. Nikmatstoya ika san akin yemelak kichiuaj ken Cristo kinektoskiaj tepaleuiskej.

Ninomachtiaya Biblia ika amatlajkuiloltin tlen onkatkaj ika braille. Maski nikasikamatiya tlen ninomachtijtoya, xueliya nikseliaya seki tlen nechmachtiayaj. Xueliya nikneltokaya ika toTajtsin nechtlasojtlaya niman ika oksekimej nechitayaj ijkon ken yejua nechita. Onikasikamat tleka aman toTajtsin kitekauilia manochiua tlen xkuajli, san ika, xueliya nikitaya toTajtsin ken se tajtli. *

Biblia melak yonechpaleui ika yolik manikpatlatiuj ken nitlanemiliaya. Oniuel ika toTajtsin kiyolkokoua ijkuak kita ika titlajyouiyaj. Niman ijkuak kita ika itekipanojkauan tlajyouiyaj, yejua kijtoua: “Nikitstikaj kenijki tlajyouiyaj nokoneuan [...]. Nikinmiknelia pampa sanoyej tlajyouiyaj” (Éxodo 3:7). Ijkuak onikasikamat ika Jehová melak tetlasojtla, itech oninosentemakak para niktekichiuilis. Oninoapolakti ipan 1998 ken iteixpantijkauj Jehová.

Uajsextli, oninomachtito ipan ueyikalpan Escuintla, ompa okinmachtijkej akin xtlachiayaj. Se tokniuj tlayekanketl de se tlanechikojli tlen ompa nisiuj onkatka, okitekakili ika nejua xmás ueliya niaya tlanechikoltin kampa nichantiya, pampa nonekiya nikinpanouis tepemej tlen tokniuan akin nechonmachtiayaj noijki kinpanouiayaj. Pampa tokniuj noijki kinekiya nechpaleuis, okimijli sekimej tokniuan tla ueliskia ninokauas inchan niman nechpaleuiskej maniuiya tlanechikoltin. Hasta aman, yejuamej nechtlajpiyaj niman nechitaj ken inchanejkauj.

Melak miyek ken yonechititijkej tokniuan ika nechtlasojtlaj. Kuajli nikmatstika ika san iteixpantijkauan Jehová melauak kichiuaj ken Cristo (Juan 13:34, 35).

Aman melak niyolpaki pampa nikmachilia ika nitepaleuij niman nikmatstika tlenon panos ika tlayekapan. Nikinpaleuiya oksekimej makimatikan tlen Biblia temachtia niman ijkon xsan nitlanemilijtika itech tlen xueli nikchiua. Nitlayekanketl ipan se tlanechikojli niman nikinpanoltia tlamachtiltin itech Biblia ipan okseki tlanechikoltin. Noijki melak niktlasojkamati ika ueli nikinpanoltia tlamachtiltin itech Biblia ipan uejueyimej tlanechikoltin kampa melak miyekej ontlakakij.

Ipan 2010, oniajka ipan Escuela de Entrenamiento Ministerial (tlen aman noixmati ken Tlamachtijli tlen kiseliaj Akin Tenojnotsaj itech iTekiuajyo toTajtsin) tlen onopanolti El Salvador. Yejuin tlamachtijli yonechpaleui kuajli manikinpaleui tokniuan, yonechititi ika Jehová nechpatiojkaita niman nechtlasojtla. Yonikitak ika san akinon uelis kikuis para kichiuas itekiyo.

Jesucristo okijto: “Más paki yejuan kitemaka xken on yejuan kiselia” (Hechos 20:35). Melak niyolpaki niman, maski xkeman oniknemili ika uelis nitepaleuis, aman nikmachilia ika kema uelis nikinpaleuis oksekimej.