1. ¿Kenon melak kineltoka naualyotl?

  “Akin chantij África nion xnotlajtoltiaj tla nemij nanaualtin noso brujas”, yejon tlen kijtoua se amoxtli tlen itoka African Traditional Religion (La religion tradicional Africana). Noijki kijtoua ika “nochimej yejuamej melak kineltokaj naualyotl”. Akin xuelij tlaamapouaj niman akin melak kuajli onomachtijkej kineltokaj magia niman nochi naualyotl, noijki hasta cristianos niman akin tlaneltokaj itech islam.

2. ¿Kanon kinemiliaj ualeua yejon poder?

² Miyekej akin chantij África kinemiliaj ika onka se poder tlen xakaj ueli kita, tlen san toTajtsin kitekitiltia. Niman yejuin poder kitekitiltiaj espíritus niman inuejkatajuan. Sekimej kitekitiltiaj yejuin poder para kichiuaskej tlen kuajli, kitokayotiaj magia blanca, niman tla kichiuaj tlen xkuajli, kitokayotiaj magia negra.

3. ¿Tlenon kitokayotiaj magia negra niman tlenon kinemiliaj ueli kichiua?

³ Miyekej kitekitiltiaj magia negra para kinchiuiliskej tlen xkuajli akin kintlauelitaj. Kineltokaj ika komintitlaniliaj murciélagos, totomej, sayolimej, noso okseki yolkamej para itlaj makinchiuilikan. Niman miyekej kineltokaj ika magia negra kichiua manokualanikan, maka mauelikan makinpiyakan inkoneuan, makualokan, niman hasta mamikikan.

4. ¿Tlenon kineltokaj itech nanaualtin niman, tlenon yokijtokej sekimej akin kichiuayaj naualyotl?

⁴ Naualyotl san noijki yeskia ken magia negra. Kijtouaj ika tlayoua nanaualtin kikaujteuaj intlalnakayo, patlani niman ijkon ononextiskej imiuan oksekimej nanaualtin noso para kinmiktiskej akin kintlauelitaj. San ika, intlalnakayo yejon nanaualtin ok kochtika ipan incama. Yejon tlen kijtouaj sekimej akin okikajkaujkej ika kichiuayaj naualyotl. Se revista de África okijkuilo tlen okijtokej sekimej siuamej akin katkaj nanaualtin miyekej san ichpokamej katkaj: “Nejua nikchiuaya maoniakan accidentes ipan carretera ijkon onikinmiktij ciento cincuenta akin yayaj ipan icarro”, “onikinmiktij makuijli kokonej pampa onikonik nochi inyesyo”, “onikinmiktij yeyi no novios pampa onechkaujteujkej”.

5. ¿Tlenon kitokayotiaj magia blanca, niman kenon kichiuaj?

⁵ Niman miyekej kinemiliaj ika magia blanca kintlajpiya itech tlen xkuajli. Akin kitekitiltiaj yejon kinotlaliliaj pulseras noso anillos, koni tlen kinemiliaj kinpajtis noso kinotlaliliaj ipan intlalnakayo. Noijki kiyanaj ipan inkal noso ipan tlajli seki tlemach tlen yejuamej kinemiliaj kintlajpiyas niman kitki seki tlemach kampa ijkuiliujtika seki textos de Corán noso de Biblia.

6. ¿Tlenon yokichiujkej Satanás niman xkuajkualtin espíritus yeuejkaui, niman kenon noneki tikitaskej tlen kichiuaj?

⁶ Satanás niman xkuajkualtin espíritus noso demonios kojtikej niman nochimej techtlauelitaj. Ueli kijtlakouaj itlamachilis yakaj noso hasta inemilis. Yeuejkaui hasta okalajkej ijtik tlakamej niman yolkamej (Mateo 12:​43-​45). San ika, maski xnoneki sajnoye tikinmakasiskej, noijki xuelis tikijtoskej ika xtlaj texchiuiliskej.

7. ¿Tlenon kineki Satanás matiknemilikan niman tlenon techpaleuiya matikasikamatikan?

⁷ Satanás melak ueli tekajkayaua. Yejua kichiua ika oksekimej makinemilikan ika kipiya más poder xijkon ken yemelak kipiya. Kichiua ijkon ken okichiujkej seki soldados de se país tlen onka África. Yejuamej okitkikej miyek bocinas para kinmomojtiskej akin imiuan nouijsokiskiaj. Achto kimixnamikiskia okijtlalijke grabaciones kampa kakistiya kenon chikauak tlatoponiya niman kenon tlamotlayaj ika pistola. Ijkon akin kimixnamikiskiaj kinemiliskiaj ika kipiayaj melak miyek uejueyimej armas. Noijki ijkon Satanás kineki makinemilikan ika melak kojtik. Yejua kineki kinmomojtis oksekimej niman ijkon makichiuakan tlen yejua kineki niman maka makitlakamatikan Jehová. Matikitakan kenon Satanás kineki techkajkayauas.

8. ¿Kenon tekajkayaua Satanás?

⁸ Satanás kineki matiknemilikan ika nochi tlen xkuajli topan nochiua yakaj texchiuilia noso technaualuiya. Matikonnemilikan ika se konetsintli miki ipampa se kokolistli tlen itoka malaria. Kanaj inan kimatstika ika yejuin kokolistli mitsajsis ijkuak mitskua se moyotl. San ika, kanaj noijki uelis kinemilis ika se nauajli okuajtitlan yejon moyotl para makikua ikoneuj.

9. ¿Kenon teititia Biblia ika nochi tlen xkuajli xkichiua Satanás?

⁹ Maski Satanás ueli kichiua mapano tlen xkuajli, xkijtosneki tla nochi tlen xkuajli panoua yejua kichiua. Biblia kijtoua: “No onikitak okseki más ipan in tlaltikpaktli: ika ipan sen tlaksalistli xnochipa tetlani on yejuan más tlaksa, nion ipan sen nouijsokilistli xnochipa tetlani on yejuan más tlauelej; ika on tlamatkej xnochipa kipiyaj tlen kuaskej, nion on tlamachilisyejkej xnochipa nochiuaj ricos, nion on tlaixmatkej xnochipa kuajli kiminseliaj. Yej nochimej ajsi tonajli ijkuak kiseliaj tlen kuajli noso xkuajli tla kimelaua noso ka” (Eclesiastés 9:​11). Se akin melak tlaksa noso notlaloua xnochipa uelis tetlanis. Kanaj ijkon panoua pampa onantikis noso peua kikokoua ikxi. Yejuin uelis ipan nochiuas san akinon niman xkijtosneki tla Satanás kichiua noso tla kinaualuiyaj. Yejuin san panoua.

10. ¿Tlenon noijtoua itech nanaualtin, niman tleka tikmatstokej ika xmelauak?

¹⁰ Satanás noijki kinkajkayaua oksekimej ijkuak kijtoua ika nanaualtin kisaj itech intlalnakayo niman ika tlayoua nosentlaliaj imiuan oksekimej nanaualtin noso kisa para kinmiktiskej intlauelikniuan .San ika xmotlajtolti: “Tla nanaualtin ueli kichiuaj yejuin, ¿tlenon kisa itech intlalnakayo?”. Ijkon ken yotikitakej alma kijtosneki inemilis se tlakatl niman espíritu ijyotl noso kojtilistli tlen kichiua matinemikan. Ika yejon tikijtoua ika xtlaj kisa itech totlalnakayo.

11. ¿Kenon tikmatstokej ika nanaualtin xkisaj itech intlalnakayo, niman tejua tikneltoka yejuin?

¹¹ Nion alma nion espíritu xuelis kisaskej itech totlalnakayo niman kichiuaskej tlen kuajli noso tlen xkuajli. Ika yejon tikmati ika nanaualtin xkisaj itech intlalnakayo niman xkichiuaj tlen yejuamej kijtouaj kichiuaj.

12. ¿Kenon kichiuilia Satanás para makinemilikan oksekimej ika yokichiujkej tlemach maski xmelauak kichiuaj?

¹² ¿Kuakon tleka kijtouaj nanaualtin ika yemelak okichiujkej tlen kijtouaj? Pampa Satanás ueli kichiua ika yejuamej makineltokakan ika yejon yemelak opanok maski xpanoua. Ipampa tlatlachalistli ueli kichiua ika yejuamej makinemilikan ika yokitakej, yokikakej niman yokichiujkej tlemach tlen xkeman panouaj. Ijkon kichiua ika makitlalkauikan Jehová niman makinemilikan ika tlen Biblia kijtoua xmelauak.

13. a) ¿Yemelak kuajli magia blanca? b) ¿Tlenon kijtoua Biblia itech magia?

¹³ Satanás noijki tekajkayaua ijkuak kijtoua ika magia blanca kuajli xijkon ken magia negra. San ika, Biblia kijtoua ika nochi magia xkuajli. Xkita tlenon okimijli Jehová ikalpan Israel itech magia niman itech akin ijkon kichiuayaj.

•   “Maka xtetlatejtemouilijkan nion maka xchiuakan kanika para nenkimatiskej tlenon nochiuas sakin” (Levítico 19:26).

•   “Nochi tlakatl noso siuatl yejuan kinojtsa ajakamej noso tetlatejtemouilis xkintetemomotlakan asta kaman mamikikan” (Levítico 20:27).

•   “Maka kaman yakaj kejekos para tetlatejtemouilis nion maka kinekis kiteijlis on tlen nochiuas sakin , nion maka kejekos on nauajlotl, maka yakaj kejekos xkuajli tlaixkajkayaualistli, nion maka kintejtemos on tetlatejtemouilijkej  niman on yejuan kiminnotsaj ajakamej” (Deuteronomio 18:10-14).

14. ¿Tleka Jehová okitlali tlanauatiltin kampa okijto ika xnoneki nochiuas naualyotl?

¹⁴ Yejuin tlanauatiltin tlen otikomintakej kuajli techititia ika toTajtsin xkinekiya ika itekipanojkauan makichiuakan naualyotl. Jehová okinmakak yejuin tlanauatiltin pampa kintlasojtlaya. Noijki pampa xkinekiya makinmakasikan noso makinemilikan ika xkuajkualtin espíritus kinchiuiliskiaj tlen xkuajli.

15. ¿Kenon teititia Biblia ika Jehová más kojtik xijkon ken Satanás?

¹⁵ Maski Biblia xtechijlia nochi tlenon ueli kichiua xkuajkualtin espíritus noso tlenon ka, kema kijtoua ika Jehová más kojtik xijkon ken Satanás niman xkuajkualtin espíritus. Tikmatstokej yejuin pampa Jehová okuajtlajkal Satanás nikan ipan tlaltikpaktli (Apocalipsis 12:⁠9). Noijki tikitaj ika Satanás okitlajtlanili toTajtsin ika makikauili makitlajyouilti Job niman ijkuak toTajtsin okijli ika maka makimikti yejua otetlakamat (Job 2:​4-6).

16. ¿Itech akinon uelis topaleuiskej?

¹⁶ Proverbios 18:10 kijtoua: “ToTEKO ken sen torre yejuan ueyi niman kojtik yejuan itech yauij para nomanauiyaj on yolmelajkej”. Ika yejon tla tiknekij ika Jehová matechpaleui noneki tiknotsaskej. Itekipanojkauan toTajtsin xkikuij amuletos noso itlaj okse para notlajpiyaskej itech Satanás niman xkuajkualtin espíritus nion xnomojtia tla itlaj xkuajli kinchiuiliskej nanaualtin. Yejuamej kineltoka tlen Biblia kijtoua:“ToTEKO kitstika nochi tlen nochiua ipan in tlaltikpaktli, niman kinkojtilia on yejuan itech kitlaliaj nochi inyojlo” (2 Crónicas 16:9).

17. ¿Tlenon techijlia Santiago 4:7, san ika, tlenon noneki tikchiuaskej?

¹⁷ Tla tejua tiktekichiuilia Jehová noijki uelis itech titlaneltokas. Santiago 4:7 kijtoua: “Yejua ika tej, xmotemakakan itech Dios niman xkixnamikikan on diablo, niman ijkon yejua mechtlalkauis”. Tla tiktekichiuilia Jehová toTajtsin akin melauak niman tikchiua tlen yejua kineki, kuajli xmatsto ika yejua mitstlajpiyas.