Achijtsin xtechnojnotsa motech.

Onitlakat ipan 1979, ne Estados Unidos. Ijkuak nikpiaya yeyi xiuitl, notajuan onokaujkej. Nonan onechiskalti ijkon ken tlaneltokayaj judíos niman nochipa oniaj ipan escuelas judías, tlen notokayotiaj yeshivás. Ijkuak nikpiaya chikome xiuitl otichantitoj Israel, ompa oninomachti ipan se escuela tlen nokauaya ipan se kalpantsin kampa tokalo tlen itoka katka kibutz. Ijkuak yopanoka se xiuitl otiajkej México.

Maski kampa nichantiya xonkatka se sinagoga ok nikchiuaya ijkon ken onechmachtijkej, nikintlikuiltiaya velas ijkuak sábado, nikamapouaya Torá [noso tlajkuiloltin tlen kinpouayaj judíos], nikchiuaya teoyotl ika se sidur, noso se libro de oraciones. Nikuelitaya nikimijlis akin imiuan ninomachtiaya ika nejua ninemiya ipan religión tlen melauak. Nejua xkeman nikamapouaya on Nuevo Testamento, kampa tlajtoua itech kenon Jesucristo otenojnots niman otemachti. Nonan nechijliaya maka manikinamapoua pampa xkinekiya maniometlamati.

¿Tleka opeuj tikamapoua on Nuevo Testamento?

Ijkuak onikajxilti 17 xiuitl, oksejpa oniaj Estados Unidos para ninomachtis. Se noamigo onechijli ika yejua tlaneltokaya itech Jesucristo niman ika tla nejua xnitlaneltokaskia itech Jesús xkeman niyolpakiskia.

Onikijli ika nochimej akin tlaneltokayaj itech Jesús san kinkajkayaujtoyaj.

Niman yejua onechijli: “¿Yotikamapoujka on Nuevo Testamento?”.

Niman nejua oniknankili: “Ka”.

Yejua onechijli: “Kuakon, ¿tleka ijkon titlanemilia tla nion xkeman tikamapoua?”.

Tlen onechijli melak onechmojkatlachialti, pampa nejua noijki ijkon niknemiliaya, ika xuelis itlaj tikijtos tla nion xtikmati de tlenon tlajtoua. Ika yejon, onikselilij iBiblia niman onikitkik nochan para nikamapouas on Nuevo Testamento.

¿Tlenon otiknemili itech tlen otikamapouj?

Kachtopa, melak onitlamojkaitak ijkuak onikmat ika on Nuevo Testamento okijkuilojkej judíos. Niman ijkuak nikamapoujtiaya nikitstiaya kenon Jesús melak tetlasojtlaya, yolyemanki katka niman kenon kinekiya kinpaleuis oksekimej. Hasta onikinkuito seki libros tlen tlajtouayaj itech Jesús, ipan se biblioteca. San ika, maski ijkon, nion se de yejon libros xokichiuj manikneltoka ika Jesús yejua katka Mesías. Seki kijtouayaj ika Jesús katka toTajtsin, san ika, nejua xijkon nikneltokaya. Pampa niknemiliaya: “¿Akinon kinotsaya Jesús ijkuak kichiuaya teoyotl? ¿San noyejua nonotsaya?”. Niman noijki, Jesús omik, san ika, Biblia ijkin kijtoua itech toTajtsin: “Tejua xkeman timikis”. a

¿Tlenon otikchiuj niman ijkon tikmatis tlen timotlajtoltiaya?

Nejua nikmatstoya ika tlen melauak notlajtolnamiki, niman nejua niknekiya nikmatis tlen melauak. Kuakon onikchiuili teoyotl toTajtsin ika nochi noyojlo niman ixpan onichokak, niman aman xok onikuik sidur. Ijkuak onitlan nikchiua teoyotl, omemej iteixpantijkauan Jehová ouajtlatetsotsonkej ipan nopuerta. Otonojnotskej niman onechkauilijteujkej se folleto, yejuin tlen onechkauilijteujkej niman itech tlen otonojnotskej, onechpaleui manikneltoka ika tlen yejuamej kineltokayaj yemelak uajnestiuj ipan Biblia. Iteixpantijkauan Jehová xkineltokaj ika Jesús se Trinidad, yejuamej kineltoka ika Jesús “ikoneuj toTajtsin” b niman “ika itechkopa yejua Dios okichijchiuj nochi tlen onkaj”. c

Sakin oninokuep México, niman ompa más opeuj ninomachtia teotlajtoltin tlen tlajtoua itech Mesías imiuan iteixpantijkauan Jehová. !Melak miyek onka! Maski ijkon, ok niometlamatiya. Ninotlajtoltiaya: “¿San ipan Jesús onochiujkej yejuin teotlajtoltin? ¿San otekajkayauj para makineltokakan ika yejua katka Mesías?”.

¿Tlenon omitspaleui niman ijkon kuajli tikneltokas ika Jesús yejua Mesías?

Iteixpantijkauan Jehová onechimititijkej seki teotlajtoltin tlen xueliskiaj nochiuaskej ipan se tekajkayaujketl. San matikonteneuakan yejuin, setecientos xiuitl ika tlakuitlapan teotlajtoketl Miqueas okijto ika Mesías tlakatiskia Belén. d ¿Xmelak ika xakaj ueli kitlapejpenia kanon uajtlakatis? Niman teotlajtoketl Isaías okijkuilo ika Mesías kimiktiskiaj ken se tlachtejketl niman ika kitokaskiaj imiuan akin kipiyaj tomin, e nochi yejuin teotlajtoltin onochiujkej ipan Jesús.

Ijkuak onikmat kanon ualeuaya Jesús, kuajli onikneltokak ika yejua katka Mesías. Biblia kijtoua ika Mesías ualeuaskia itech tekiuaj David. f Judíos nochipa kijkuilouayaj kanon ualeuayaj cada se, ika yejon, tla Jesús xualeuaskia itech David, itlauelikniuan nimantsin teijliskiaj. San ika, xkeman itlaj okijtojkej pampa kimatstoyaj ika kema ualeuaya itech David. Niman miyekej hasta kijliayaj ika yejua katka “teuejkakoneu itech rey David”. g

Ipan xiuitl 70, ijkuak yopanoka 37 xiuitl ika yomijka Jesús, romanos okinotlatkitijkej Jerusalén, niman on amamej kampa tlajkuilolnestoyaj tribus niman familias judías opopoliujkej. Kuakon, para ueliskia nomatis kanon ualeuaskia Mesías nonekiya yejkos achto panoskia yejuin.

¿Tlenon otiuel itech nochi tlen otikamapouj?

Ipan Deuteronomio 18:18 niman 19, toTajtsin okijto ika nemiskia se teotlajtoketl ipan Israel ken Moisés, niman okijto: “Tla yakaj xkineki kakis notlajtoltsin ijkuak tlajtos on tiotlajtojketl niman xkitlakamatis, nejua nikyolkuitis”. Ijkuak más kuajli oninomachti nochi Biblia, onikasikamat ika Jesús akin ualeuaya Nazaret yejua katka on teotlajtoketl.