¿Nochipa noneki se tlanauatijli?

KANAJ ijkuak tikokonej katkaj totajuan otechmakakej miyek tlanauatiltin niman ijkuak otoskaltijkej, otikitakej ika ijkon okichiujkej pampa techtlasojtlaj. Niman aman maski kanaj xok imiuan tichantij ok tikchiujtokej tlen yejuamej technauatiayaj.

Ipan Biblia, toTajtsin noijki techijlia tlenon tikchiuaskej. Yejua techijlia maka matikinueyichiuakan tajtsitsintin, maka matiauilnemikan niman maka matitlachtekikan (Éxodo 20:​1-​17; Hechos 15:​28, 29). Ijkuak toskaltiaj ika “nochi tlen kuajli”, tikasikamatij ika Jehová kineki kuajli matinemikan niman ika itlanauatiluan xyetikej (Efesios 4:​15; Isaías 48:​17, 18; 54:13).

San ika, xnochipa tiknextiskej ipan Biblia se tlanauatijli tlen matechijli tlenon tikchiuaskej. Ika yejon, miyekej kinemiliaj ika uelis kichiuaskej tlen yejuamej kinekij niman kijtouaj ika tla toTajtsin xkuelitaskia ijkon matikchiuakan, kitlaliskia se tlanauatijli.

Akin ijkon tlanemiliaj miyekpa kitlapejpeniaj kichiuaskej tlen xkuajli. Xkasikamatij ika Biblia xsan kipiya tlanauatiltin, noijki techijlia kenon tlanemilia Jehová. Tomachtiskej Biblia niman tikmatiskej ken tlanemilia toTajtsin, techpaleuis matiktlapejpenikan niman matitlanemilikan ijkon ken yejua. Yejuin kichiuas matiyolpakikan niman matikpiyakan miyek tlateochiualistin (Efesios 5:1).

Sekimej akin yeuejkaui onenkej okichiujkej tlen kuajli

Ijkuak tomachtiaj itech tlen okichiujkej yeuejkaui sekimej itekipanojkauan toTajtsin, tikitaj ika okichiujkej ijkon ken Jehová tlanemilia, maski xonkatka se tlanauatijli. José ijkon okichiuj. Ijkuak isiuauj Potifar okijli iuan manoteka, ijkuakon xonkatka se tlanauatijli itech auilnemilistli. Maski ijkon, José okasikamat ika yejuin katka se tlajtlakojli “ixpan toTajtsin” (Génesis 39:9). Nesi ika José kuajli kimatstoya tlen toTajtsin yokijtojka ipan xochitlalpan Edén (Génesis 2:​24).

Ipan Hechos 16:3, kijtoua ika Pablo okijli Timoteo makinochiuili circunsición achto komintlajpaloskiaj tlanechikoltin. San ika, ipan versículo 4 kijtoua ika “ipan on kalpanmej kampa panotiayaj kinmachistijtiayaj on tlanauatiltin yejuan otlanauatijkej on apóstoles niman on ueuetkej tlayekankej itech tokniuan yejuan nemiyaj ne Jerusalén”. Temojkatlachialti ika ipan yejon tlanauatiltin onotlapejpeni ika akin kichiuaj ken Cristo xkinchiualtiskiaj makichiuakan circunsición (Hechos 15:​5, 6, 28, 29). Kuakon, ¿tleka Pablo okinemili ika Timoteo nonekiya makinochiuili circunsición? “Pampa on hebreos yejuan ompa chantiyaj kimatstikatkaj ika yejua itataj sen griego”. Pablo xkinekiya kichiuas itlaj tlen makinyolkoko tokniuan. Ijkon kichiuaya pampa kinekiya ika akin kichiuaj ken Cristo makimixmatikan ika kuajli nouikayaj (2 Corintios 4:2; 1 Corintios 9:​19-​23).

Ijkon kichiuayaj Pablo niman Timoteo. Ipan Romanos 14:15, 20, 21 niman 1 Corintios 8:​9-​13; 10:23-​33, tikitaj ika Pablo kinekiya kitlajpiyas intlaneltokil oksekimej, más ipampa akin nimantsin noyolkokouayaj ika itlaj tlen kinemiliayaj ika xkuajli. Noijki, Pablo okijkuilo yejuin itech Timoteo: “Xnikpiya okse yejuan no ijki kinemilia ken nejua, yejuan melauak notekimakas kichiuas tlen kuajli para nemejuamej. Oksekimej kitejtemouaj tlen kuajli san para yejuamej, niman xejuan para Cristo Jesús. Pero nemejuamej nenkimatstokej ika Timoteo sanoyej kuajli nechpaleuiya. Nenkimatstokej kenijki otekit ken nokoneu yeskia para tikteijliaj on kuajli tlajtojli” (Filipenses 2:​20-​22). ¡Melak kuajli tlen yejuamej okichiujkej! Ijkon ken Jehová niman iKoneuj, okiteititijkej ika tetlasojtlaj, pampa maski xonkatka se tlanauatijli kampa kimijliskia tlen kichiuaskej, yejuamej xokichiujkej tlen san yejuamej kinekiyaj nion xokitlapejpenijkej itlaj tlen ueliskia kimijtlakoskia oksekimej.

Matitlanemilikan itech Jesucristo, akin okichiuj nochi tlen kuajli ipan inemilis. Ipan Tlamachtijli ipan Tepetl, kuajli okijto ika akin kasikamati tlen kijtosneki itlanauatiluan toTajtsin, xsan kichiua tlen ompa kinauatia, yej tlanemilia itech tlen kijtosneki (Mateo 5:​21, 22, 27, 28). Nion se itech akin yotikominteneujkej, ken José, Pablo, Timoteo niman Jesús, xokinemilijkej ika pampa xonkatka se tlanauatijli, ueliskiaj kichiuaskiaj tlen yejuamej kinekiskiaj. Yejuamej onokojtilijkej tlanemiliskej ijkon ken toTajtsin, onoyekankej ika yejuin tlanauatiltin tlen Jesús okijto ika melak ueyi kijtosnekij: tiktlasojtlas toTajtsin niman tikintlasojtlas oksekimej (Mateo 22:36-​40).

Akin kichiuaj ken Cristo ipan yejuin tonaltin

Kuajli nesi ika xnoneki tikitaskej Biblia ken se amatl kampa matechijli tlenon noneki niman tlenon xnoneki tikchiuaskej. Melak tikyolpaktiskej Jehová tla tikchiuaj tlen yejua kuelita, maski xonias se tlanauatijli tlen matechijli tlenon tikchiuaskej. Yejuin kijtosneki ika xnochipa noneki techijliskej tlenon toTajtsin kineki matikchiuakan, tejuamej uelis tikasikamatiskej tlen yejua kineki matikchiuakan (Efesios 5:​17; Romanos 12:2). ¿Tleka yejuin melak kiyolpaktia Jehová? Pampa ijkon tikteititiaj ika tiknekij tikyolpaktiskej niman xsan tiknekij tikchiuaskej tlen tejuamej tikuelitaj niman ika tiknekij tiktlasojkamachiliskej ika techtlasojtla, ika yejon, tokojtiliaj noijki titetlasojtlaskej (Proverbios 23:15; 27:11). Kuakon, maka matikilkauakan ika tla tikchiuaj tlen Biblia kijtoua, kichiuas kuajli matomachilikan niman machikaujto totlaneltok.

Matikitakan kenon uelis tikchiuaskej yejon ipan tonemilis.

Tiktlapejpeniskej tlen ika toyolpaktiaj

Matikonnemilikan ika se telpochtli kineki kitas se película. Ijkuak kita tlen ompa nesis, melak kuelita, san ika, kitlanemililtia ijkuak kita ika ipan yejon película onias auilnemilistli niman kichiuaj tlen xkuajli. Niman ika akin ompa uajnesis, miyekpa yokichiujka películas kampa noijki auilnemij niman kichiuaj tlen xkuajli. Pampa yejua kitlasojtla Jehová, melak kipatiojkaita ken tlanemilia niman kenon nomachilia toTajtsin. Kuakon, ¿kenon uelis kimatis tlenon kineki toTajtsin makichiua?

Ipan Gálatas, Pablo okiteneuj tlen kichiuaj akin kileuiyaj intlalnakayo niman noijki kijtoua katlejua on itlakilyo espíritu santo. Kanaj tikmatij seki itech itlakilyo espíritu santo, ken: tlasojtlalistli, pakilistli, yolseuilistli, ijyouilistli, iknelilistli, yolkuajlilistli, tlaneltokijli niman yolyemanilistli. San ika, ¿tlenon kichiuaj akin kileuiyaj intlalnakayo? Pablo okijto: “On yejuan kichiuaj tlen xkuajli keleuiya intlalnakayo, ixmachyojkej, yejua ika on tlajtlamach tlen xkuajli kichiuaj. Yejuamej auilnemij, kichiuaj tlen xkuajli niman xchipauak. Kinmauistiliaj ídolos, niman kichiuaj nauajlotl. Tlauelnemij, nokuajkualaniaj niman chauatij. San itlaj ikatsin nimantsin kualanij niman kichiuaj itlaj san para yejuamej. Texexelouaj niman ojonkuaj tesentlaliaj. Nexikolejkej, temiktianimej, tlauantinemij, kichiuaj iluitl yejuan tepinajtij, niman kichiuaj okseki tlajtlamach más yejuan sano ijki xkuajli. Nemechijlia oksejpa ijkon ken yonemechijlijka, ika on yejuan kichiuaj in tlajtlamach, xuelis kalakiskej kampa Dios tlamandaroua” (Gálatas 5:​19-​23).

Pablo xokiteneuj nochi tlen xkuajli kileuiya totlalnakayo, san ika, kema okijto ika noijki onka okseki tlen san noijki xkuajli, ika yejon, xakaj uelis kijtos: “Uelis nikchiuas yejuin, pampa Pablo xokiteneuj ijkuak otlajto itech tlen xkuajli kileuiya totlalnakayo”. Nochia ika akin kipouaj yejuin, makitekitiltikan intlamachilis, ijkon kitaskej katlejua okseki tlemach san noijki xkuajli maski xompa onoteneujkej. Akin kichiuaj itlaj tlen xonoteneuj, san ika, tlen san noijki xkuajli, xkiseliskej tlateochiualistin tlen kitemakas iTekiuajyo toTajtsin.

Ijkon tej, noneki tikitaskej niman tikmatiskej tlen xkuajli niman tlen xkuelita Jehová. ¿Ouijtika yejuin? Matikonnemilikan ika se tlapajtijketl mitsijlia xkua frutas niman verduras, niman maka sa xkua pastel, helados niman okseki ken yejuin. ¿Ouijtika tikmatis tla uelis tijkuas pan? Oksejpa matikonnemilikan itech itlakilyo espíritu santo niman tlen kileuiya totlalnakayo, ¿kanon tiktlaliskiaj yejon película tlen yotikteneujkaj? Nimantsin nesi ika yejon película xkiteititia tetlasojtlalistli, teiknelilistli niman okseki tlen noteneua ipan itlakilyo espíritu santo. Xnoneki onias se tlanauatijli kampa makijto ika yejon película xkiteititia tlen toTajtsin kinemilia. Noijki ijkon panoua ika tlen tikamapouaj, tlen tijkakij, tlen tikitaj ipan televisión, tlen ika tauiltiaj niman tlen uajnesi ipan Internet.

Ken kuajli totlakentiaj niman tokualnextiaj

Biblia noijki techmaka tlajtolyekanalistin itech kenon toyektlaliskej niman kenon totlakentiskej. Yejuin kinpaleuiya akin kichiuaj ken Cristo ijkuak kitlapejpeniaj kenon notlakentiskej niman kenon noyektlaliskej. Se akin kitlasojtla Jehová xkineki kichiuas tlen san yejua kineki, yej kichiua tlen kiyolpaktis Jehová. Ken yotikitakej, maski Biblia xkintlalia tlanauatiltin itech seki tlemach, xkijtosneki ika toTajtsin xkipatiojkaita tlen kichiuaj itekipanojkauan. Melak sejneka kenon notlakentiaj niman kenon noyektlaliaj ipan seki países noso ipan seki kalpamej, maski ijkon, iTlajtol toTajtsin kinpaleuiya itekipanojkauan makimatikan kenon notlakentiskej maski san kanon machantikan.

Ipan 1 Timoteo 2:​9, 10 kijtoua: “No ijki nikneki on siuamej maka ma texixikoltikan ken notlakentiaj, nion ken kualnextikaj intson. Maka ma notlajmachyotikan ikan oro nion ikan perlas, nion maka ma kitlalikan tlakentli yejuan sanoyej patioj. Yej, ma kichiuakan kuajli tekitl ijkon ken kitocaroua kichiuaskej on siuamej yejuan kitlakaitaj Dios”. Ika yejon, akin kichiuaj ken Cristo noneki kuajli kitaskej tla ipampa ken notlakentiaj, kiteititiaj ika yemelak kichiuaj ken Cristo niman ika kitlakaitaj toTajtsin (2 Corintios 6:3). Yejuin melak noneki matikmatstokan, pampa ken totlakentiskej niman ken tokualnextiskej kichiuas ika oksekimej makinekikan kikakiskej iTlajtol toTajtsin (Mateo 18:6; Filipenses 1:​10).

Tla akin kichiua ken Cristo kita ika ipampa ken notlakentia kinyolkokoua oksekimej, melak kuajli tla kichiua ijkon ken apóstol Pablo, tla xsan yejua noyolpaktia niman kintlajpiya intlaneltokil oksekimej. Pablo okijto: “Nemejuamej xtokakan noejemplo ijkon ken nejua niktoka iejemplo Cristo” (1 Corintios 11:1). Niman itech Jesús okijkuilo: “Cristo xsanno yejua onopaktij”. Kuajli tikasikamatij tlen noneki tikchiuaskej: “Tejuamej yejuan tikojtikej ipan totlaneltok noneki tikimpaleuiskej on yejuan xkojtikej ipan intlaneltok. Maka tej, sano tejuamej ma titopaktikan. Yej noneki tikinchiuiliskej tlen kuajli on tokniuan para tikimpaktiskej niman ijkon noskaltis intlaneltok” (Romanos 15:​1-3).

Matokojtilikan más kuajli matitlanemilikan

¿Kenon uelis tikmatiskej tlenon kuelita Jehová tla xonka se tlanauatijli? Noneki tikpouaskej mojmostla Biblia, tomachtiskej niman itech tiknemiliskej. San ika, xnimantsin nesis tla inoskaltijtika totlaneltok, ijkon ken se konetl xnimantsin nesi kenon noskaltijtiuj. Kuakon noneki titlamachiaskej niman maka nimantsin tikualaniskej tla tikitaj ika xtiuelij. Maka matiknemilikan ika pampa itiuejueyimej, nochi itikmatij. Ken yotikitakej, noneki kuajli tiktekitiltiskej totiempo niman tomajmachtiskej iTlajtol toTajtsin niman noneki tokojtiliskej tikchiuaskej tlen tiueltiuej (Hebreos 5:​14).

Ijkuak tikchiuaj tlen kijtoua itlanauatiluan toTajtsin, tikteititiaj ika titetlakamatij, niman ijkuak toyekanaj ika tlajtolyekanalistin, tikteititiaj ika tiknekij touikaskej iuan toTajtsin niman tikyolpaktiskej. Ijkuak chikaujtias totlaneltokil, tiknekiskej tikchiuaskej ijkon ken Jehová niman iKoneuj. Niman ijkuak itlaj tiktlapejpeniskej, toyekanaskej ika tlen kijtoua Biblia. Ijkon, tikyolpaktiskej Jehová ika tlen tikchiuaj niman tejuamej más tiyolpakiskej.

[Tlaixkopinaltin]

Maski xsan noijki ken notlakentiaj nochiuiyan, noneki toyekanaskej ika tlajtolyekanalistin niman ijkon kuajli totlakentiskej