Desde yeuejkaui, melak nikuelita nochi tlen toTajtsin okichijchiuj. Nikan ipan ueyikalpan Jyväskylä tlen onka Finlandia melak kojyoj niman onka atl. Miyekpa, nejua iuan nochanejkauan tonpaxalouayaj kampa tlakualtsinkan katka. Nejua noijki melak nikinuelita yolkamej. Ijkuak nipitentsin katka, niknekiya nikinnapalos chichimej niman mistomej tlen nikimitaya. San ika, ijkuak oninoskalti, melak nechyolkokouaya ijkuak nikitaya kenon melak kintlajyouiltiayaj yolkamej. Ika yejon, oninokalakti ipan se grupo kampa kinmanauiayaj. Ompa onikimixmat miyekej akin noijki kinekiyaj kichiuaskej ken nejua.

Nochiuiyan tikteijlijtinemiyaj maka sa makintlajyouiltikan yolkamej. Tikteijliayaj tlen miyekej kinchiuiliayaj yolkamej. Xtikuelitayaj ika sekimej kinmiktiayaj yolkamej niman ijkon kichijchiuaskej seki tlemach. Sakin, otikchiujkej se grupo akin kinmanauiaya yolkamej. San ika, melak opeuj tokalaktiaj ipan tlauejli ipampa tlen tikchiuayaj. Miyekpa onechtlateluilijkej niman onechtsajkej.

Noijki xnikuelitaya manochiua tlen xkuajli. Ika yejon, oninokalakti ipan se grupo tlen itoka katka Amnistía Internacional niman ipan Greenpeace. Noijki niknekiya nikinpaleuis akin xkipiayaj tomintsin niman akin xkipiayaj tlen kikuaskej.

Sakin onikitak ika maski niknekiya nitepaleuis, xueliskia nochimej nikinpaleuis. Maski achijtsin titepaleuiayaj, tlen xkuajli más miyekixtiaya. Nesiya kentla tla xakaj kajmanaskia nochi tlen panotoya. Nikmachiliaya ika xtepaleuiaya tlen nikchiujtoya.

Pampa ijkon ninomachiliaya, oksejpa opeuj nikneki nikixmatis toTajtsin niman ninomachtis Biblia. Maski yeuejkaui yoninomachtijka imiuan iteixpantijkauan Jehová, ijkuakon nejua xniknekiya ninopatlas. San ika, aman kema niknekiya ninopatlas.

Oniktejtemo noBiblia niman opeuj nikamapoua. Melak onechyolseui. Onikinamapouj miyek tlaxeloltin kampa kijtouaj ika noneki tikintlajpiyaskej yolkamej. Onikuelitak Proverbios 12:10, tlen kijtoua: “Sen tlakatl yolmelajki kintlajsojtla iyolkauan”. Noijki onikasikamat ika toTajtsin xyejua akin kichiua matitlajyouikan. Onikasikamat ika titlajyouiyaj pampa miyekej xkichiuaj tlen Jehová kineki. Melak onechmojkatlachialti ijkuak onikitak ika toTajtsin melak techtlasojtla niman techijyouiya (Salmo 103:​8-14).

Ijkuakon oniknexti se amatl kampa kijtouaya ika uelis niktlajtlanis ipan correo libro ¿Tlenon melauak temachtia Biblia? Kuakon, ijkon onikchiuj. Xuejkaujtipan, onechtlajpalokoj sekimej iteixpantijkauan Jehová niman opeuj nechmachtiaj. Noijki opeuj niauj kampa nosentlaliaj. Ika yolik onikasikamatstia tlen temachtia Biblia.

Biblia onechpaleui maninopatla. Onijkajkauj ika nipoki niman ika nitlauani. Onikpatlak ken ninotlakentiaya, ken nitlajtouaya niman xok nikintlauelitaya tekiuajkej (Romanos 13:⁠1). Onikitak ika toTajtsin xkineki matiauilnemikan, ika yejon, oninopatlak.

San ika, ok xueliya nikinkauaya grupos kampa nitlapaleuiaya. Ok niknemiliaya ika yejuamej ueliskia tlapaleuiskej manoyektlali tlen xkuajli. San ika, kuajli onikasikamat ika san iTekiuajyo toTajtsin uelis techpaleuis kuajli matinemikan. Kuakon, chikauak opeuj nitenojnotsa itech yejon (Mateo 6:33, TNM).

Yeuejkaui, nikinpaleuiaya akin kuajkualtin niman nikinchiuiliaya tlen xkuajli akin xkuajkualtin. San ika, Biblia yonechpaleui maka sa manitetlauelita (Mateo 5:44). Nitenojnotsa itech iTekiuajyo toTajtsin pampa aman nochimej nikintlasojtla. Melak nechyolpaktia nikmatis ika yejuin tekitl kinpaleuiya oksekimej manemikan ika inyojlo niman makimatstokan ika toTajtsin kineki kinpaleuis.

Aman nipaki pampa yonikasikamat ika san Jehová uelis techpaleuis. Kuajli nikmatstika ika Jehová kichiuas maka sa makintlajyouiltikan yolkamej niman maka sa manochiua tlen xkuajli ipan tlaltikpaktli. Nochi yejon kichiuas itechkopa iTekiuajyo (Isaías 11:1⁠-9). Melak niyolpaki xsan pampa nikmati yejuin, noijki pampa ueli nikimijlia oksekimej. Yonikasikamat ika san toTajtsin uelis tlayektlalis.