FAOSATÖ 3
Lala ba Wo’asiwaisi Abula Dödö
”Moroi si’aikö ba dödömi mi’omasi’ö nawömi, me oya ibalugö horö fa’omasi andrö.”
Me awena mongambatö ami, ibörötaigö so gabula dödö. Alua da’a, börö me fabö’ö lala wangera-ngerami, ösi dödömi, mazui lala wangebua ya’ami me iraono. So göi gabula dödö moroi ba niha bö’ö mazui salua si lö mudöna-döna.
Te itaria omasi ita moloi moroi ba gabula dödö, hiza’i, i’o’ou ita Sura Ni’amoni’ö ena’ö ta’asiwaisi gabula dödö salua. (Matai’o 5:23, 24) Ö’ila samösa wa ha famalua mene-mene moroi ba Zura Ni’amoni’ö zanolo ya’ita ba wo’asiwaisi abula dödö.
1 MIFATUNÖ GABULA DÖDÖ SALUA
HADIA NIWA’Ö ZURA NI’AMONI’Ö: ”So . . . ginötö ba wehede.” (Zangombakha 3:1, 7) Moguna öbe’e ginötöu ba wamatunö abula dödö salua. Böi bini’ö hewisa wangera-ngerau sanandrösa ba gabula dödö salua andrö. ’Faoma si duhu miwa’ö khö nawömi’. (Efeso 4:25) Na ibörötaigö aukhu dödöu, angenanöi faböi fa’udu ndra’ugö. Fanema li nihaogö, tola i’alösi wönu. —Gamaedola 15:4; 26:20.
Hewa’ae lö khömi fahasara dödö, böi miböhöli wangehao fehedemi khö nawömi, fangomasi’ö ba famosumange ngambatömi. (Kolose 4:6) Mi’aliokö wangasiwai abula dödö salua khömi, ba böi zi lö fahede ami.—Efeso 4:26.
SI TOLA ÖFALUA:
-
Faigi ginötö si tefaudu ba wamatunö abula dödö salua
-
Na ya’ugö zamondrongo, böi tuyu dalu huhuonia. So ginötö dania ya’ugö zi fahuhuo göi
2 HAOGÖ FONDRO-NDRONGO ENA’Ö Ö’ILA GELUAHA
HADIA NIWA’Ö ZURA NI’AMONI’Ö: ”Fangomasi’ö talifusö andrö, ba ya moroi ba dödömi. Faoma mihulö nawömi, wamosumange ya’ia.” (Roma 12:10) Moguna sibai öfondro-ndrongo wehedenia. Angeraigö hadia zi so ba gera-era ngambatöu, ena’ö ”faoma afökhö khömi zafökhö khö nawömi . . . ba böi fayawa ami”. (I Fetero 3:8; Yakobo 1:19) Böi osilömamondrongogö huhuonia. Na tola, bato halöwöu, ba haogö wamondro-ndrongo hadia niwa’ö ngambatöu. Mazui, wa’ö khönia dania tafatunö. Na si falulu fohalöwö khöu wo’omou ba wamaigiu, ”lö alio-lio abao dödöu” khönia.—Zangombakha 7:9.
SI TOLA ÖFALUA:
-
Haogö wamondrongo niwa’önia, hewa’ae lö omasi ndra’ugö huhuonia andrö
-
Faigi hadia geluaha wehedenia andrö. Faigi lagu mbotonia, ba note linia
3 FALUA ZI NO MIHALÖ ANGETULA
HADIA NIWA’Ö ZURA NI’AMONI’Ö: ”Fefu ngawalö wa’erege dödö ba mofozu, ba tea-tea mbewe andrö ba isawa wa’anumana.” (Gamaedola 14:23) Ambö na ha fangila lala wangasiwai abula dödö. Tobali, moguna mifalua zi no mihalö angetula. Atulö wa abua wamalua da’a, hiza’i tenga zaya-zaya gölö. (Gamaedola 10:4) Na falulu fohalöwö ami, ’misöndra mböli gölö si sökhi ba wa’erege dödömi.’—Zangombakha 4:9.
SI TOLA ÖFALUA:
-
Angeraigö hadia zi tola mifalua ba wangasiwai na so gabula dödö salua
-
Böi miböhöli wamareso hadia zi no mikhamö