Sara Korindro 1:1-31
1 Moroi khö Waulo nikaoni tobali sinenge+ Keriso Yesu moloʼö ohitö dödö Lowalangi ba moroi khö dalifusöda Sotene,
2 nifaʼema ba mbanua niha Keriso si so ba Gorindro,+ si no laʼamoniʼö ba si ha sambua ba khö Keriso Yesu+ nikaoni tobali niha niʼamoniʼö, ba fefu niha soʼangaröfili töi Zoʼaya Yesu Keriso+ gofu hezo misa, Soʼaya ba khöda fefu.
3 Yamitema waʼasökhi dödö sebua* ba faʼohahau dödö moroi khö Lowalangi, Amada, ba moroi khö Zoʼaya yaʼita Yesu Keriso.
4 Lö uböhöli wangandrö saohagölö khö Lowalangi börö me no iʼamualagö khömi waʼasökhi dödönia sebua* ba khö Keriso Yesu.
5 Börö me soloʼö khö Keriso ami, andrö wa fahöna khömi fefu hadia ia, simane faʼatua-tua ba wahuhuosa ba afönu waʼaboto ba dödömi,+
6 börö me no mowaʼa ba dödömi wamaduhuʼö sanandrösa khö Keriso.+
7 Lua-luania, gasa-gasa wombaloimi na iforomaʼö waʼabölönia Soʼaya yaʼita Yesu Keriso,+ lö moʼamböta khömi howu-howu.
8 Iʼabeʼeʼö ami Lowalangi irugi gamozua, enaʼö lö hadöi si tola mamobahulu yaʼami ba luo Zoʼaya yaʼita Yesu Keriso andrö dania.+
9 Lö faröi Lowalangi,+ ba yaʼia zogaoni yaʼami wefao khö Nononia Yesu Keriso Soʼaya yaʼita.
10 Yaʼami ira talifusö, ba döi Zoʼaya yaʼita Yesu Keriso uʼandrö khömi enaʼö hasara limi fefu, ba lö fabali gera-erami.+ Enaʼö hasara dödömi ba ha sambua gera-erami.+
11 Yaʼami ira talifusö, niha moroi ba nösi nomo Kheloʼe no lafatunö khögu wa so watötöisa ba gotaluami.
12 Eluaha niwaʼögu simane daʼa, so zangumaʼö, ”Khö Waulo ndraʼo.” Imane si samösa, ”Khö Afolo ndraʼo.”+ So zui zangumaʼö, ”Khö Gefa* ndraʼo.” Tanö böʼö lamane, ”Khö Keriso ndraʼo.”
13 Hadia no aboto mbanua niha Keriso? Hadia Faulo nibunu salahimi ba döla geu famakao? Mazui, hadia ba döi Waulo tebayagö ami idanö?
14 Uʼandrö sibai saohagölö börö me tenga yaʼo zombayagö yaʼami idanö baero Gerifo+ hegöi Gayo,+
15 irege lö hadöi sangumaʼö wa no tebayagö ami idanö ba döigu.
16 Baero daʼö, no ubayagö idanö nösi nomo Zitefana,+ ba lö uʼila na so niha böʼö nibayagögu idanö.
17 Ifatenge ndraʼo Keriso ba wanuriaigö turia somuso dödö,+ tenga ba wamayagö idanö, tenga göi ba wangogunaʼö fehede faʼatua-tua,* faböi tobali zaya-zaya gölö waʼamate Keriso ba döla geu famakao.*
18 Ba niha si numalö ba waʼatekiko, lö faduhu dödöra duria sanandrösa ba döla geu famakao* Keriso,+ hizaʼi khöda yaʼita niʼorifi, tandra waʼabölö Lowalangi daʼö.+
19 So ba zura, ”Uhori dania waʼatua-tua niha satua-tua ba utimba* waʼaboto ba dödö niha sagatua-tua.”+
20 Hezo so niha satua-tua? Hezo so zangila amakhoita? Hezo so niha sonekhe fabuʼa-buʼa ba gulidanö* daʼa? Hadia lö niʼoromaʼö Lowalangi wa zaya-zaya gölö waʼatua-tua ba gulidanö andre?
21 Tebai itolo niha faʼatua-tua ba gulidanö andre+ enaʼö aboto ba dödöra Lowalangi,+ hizaʼi omasi Lowalangi wangorifi niha si faduhu tödö börö duria andrö hewaʼae faʼabodo daʼö moloʼö niha.+ Ba daʼö oroma waʼatua-tua Lowalangi.
22 Niha Yahudi laʼalui dandra sahöli-höli dödö,*+ ba niha Yunani laʼalui waʼatua-tua,
23 ba yaʼita taturiaigö duria sanandrösa khö Keriso nibunu ba döla geu famakao. Turia andrö tobali fangala ba niha Yahudi ba faʼabodo daʼö moloʼö soi böʼö.+
24 Hewaʼae simanö, ba niha nikaoni he niha Yahudi hegöi niha Yunani, Keriso andrö zi tobali tandra waʼabölö ba faʼatua-tua Lowalangi.+
25 Lö faduhu dödöra ba ngawalö zi otarai khö Lowalangi ba faʼabodo daʼö lawaʼö tödöra, sindruhunia atua-tua daʼö ba abölö moroi ba niha.+
26 Yaʼami ira talifusö nikaoni, miʼila samösa wa moroi ba gotaluami lö ato zatua-tua moloʼö famaigi niha,+ lö ato zebua kuaso ba lö ato zi otarai ba nösi nomo si tehöngö.+
27 Hizaʼi, ifili Lowalangi zi bodo ba wamaigi niha ba gulidanö andre ba wangailasi sagatua-tua. Ifili Lowalangi zambö faʼabölö ba gulidanö andre ba wangailasi sabölö.+
28 Ifili zi lö moguna ba gulidanö andre Lowalangi, niʼosiwawöi ba si lö eluaha ba wamakiko hadia zoguna,+
29 irege lö hadöi sangosebua yaʼia föna Lowalangi.
30 Börö ia wa ha sambua ami khö Keriso Yesu iadaʼa. Tandra waʼatua-tua Lowalangi Keriso andrö ba khöda, tobali ita niha satulö+ ba niʼamoniʼö+ ba iʼefaʼö ita börö höli.+
31 Simane si so ba zura, ”Na so zomasi manuno yaʼia, yamusuno ia ba khö Yehowa.”*+
Nisura ba gahe zura
^ Faigi Geluaha Ngawua Wehede.
^ Faigi Geluaha Ngawua Wehede.
^ Töi böʼö khö Wetero.
^ Mazui ”fehede niha sagatua-tua”.
^ Faigi Geluaha Ngawua Wehede.
^ Faigi Geluaha Ngawua Wehede.
^ Mazui ”uheta”.
^ Mazui ”götö”. Faigi Geluaha Ngawua Wehede.
^ Sin.: ”tandra”.
