Sura Yohane Siföföna 5:1-21
5 Niha si faduhu tödö wa Yesu andrö Keriso, daʼö nono Lowalangi.+ Ba dozi sangomasiʼö Ama, iʼomasiʼö göi nono.
2 Aboto ba dödöda wa no taʼomasiʼö nono Lowalangi+ na taʼomasiʼö Lowalangi ba taʼoʼö goroisania.
3 Daʼa dandra wa taʼomasiʼö Lowalangi na taʼoʼö goroisania,+ ba tenga safökhö woloʼö oroisania.+
4 Fefu nono Lowalangi tola lakalaisi gulidanö.+ Börö wamatida wa tola takalaisi gulidanö.+
5 Haniha zi tola mokalaisi ulidanö?+ Hadia tenga niha samati wa Yesu andrö Ono Lowalangi?+
6 Tohare Yesu Keriso si fao idanö ba do, tenga ha idanö,+ hizaʼi idanö faoma do.+ No ifaduhuʼö daʼa eheha niʼamoniʼö,+ börö me sindruhu geheha andrö.
7 So tölu zamaduhuʼö sanandrösa ba daʼö:
8 eheha niʼamoniʼö,+ idanö,+ ba do.+ Fagölö-gölö wamaduhuʼöra.
9 Na tatema wamaduhuʼö moroi ba niha, ebua nasa wamaduhuʼö Lowalangi. No ifaduhuʼö samösa Nononia andrö Lowalangi.
10 Niha samati khö Nono Lowalangi, no itema wamaduhuʼö andrö ba dödönia. Niha si lö mamati khö Nono Lowalangi, no ibaliʼö si falimo Lowalangi+ börö me lö mamati ia ba wamaduhuʼö nibeʼe Lowalangi sanandrösa khö Nononia.
11 Daʼa wamaduhuʼönia: No ibeʼe khöda waʼauri si lö aetu Lowalangi,+ ba tasöndra daʼö börö Nononia.+
12 Niha sanemaʼö Ono isöndra waʼauri andrö, hizaʼi lö isöndra daʼö niha si lö manemaʼö Ono Lowalangi.+
13 Usura daʼa khömi yaʼami samati ba döi Nono Lowalangi,+ enaʼö aboto ba dödömi wa miʼokhögö waʼauri si lö aetu.+
14 Daʼa zi faduhu dödöda:*+ Ifondrondrongo gofu hadia ia niʼandröda si faudu ba zomasi ia.+
15 Na taʼila wa ifondrondrongo hadia ia niʼandröda, faduhu dödöda wa hasambalö tatema niʼandröda andrö börö me no taʼandrö khönia.+
16 Na so zangila no mamalua horö dalifusönia, hizaʼi tenga horö si möi börö waʼamate, enaʼö iʼohe ba wangandrö dalifusönia andrö, ba ibeʼe khönia waʼauri Lowalangi.+ Moguna daʼa ba niha samalua horö si lö möi börö waʼamate. Hizaʼi, so horö si möi börö waʼamate,+ ba lö uʼandrö enaʼö mangandrö ami salahi niha samalua horö simane daʼö.
17 Horö fefu zi lö atulö,+ hizaʼi so horö si lö möi börö waʼamate.
18 No aboto ba dödöda wa fefu niha si no tobali ono Lowalangi lö latohugö wamalua horö. Ilumöʼö ira Ono Lowalangi ba tebai ibabaya ira Satana.*+
19 No aboto ba dödöda wa moroi khö Lowalangi ita, ba Satana zamatörö ulidanö andre maʼasagörö.+
20 Hewaʼae simanö, aboto ba dödöda wa no tohare Nono Lowalangi,+ ba no ibeʼe khöda waʼaboto ba dödö irege taʼila sanandrösa khö Lowalangi sindruhu.+ Hasara dödöda khö Lowalangi sindruhu ba khö Nononia Yesu Keriso. Daʼö Lowalangi sindruhu ba umbu waʼauri si lö aetu.+
21 He yaʼami iraono, miʼaröuʼö ami moroi ba nadu andrö.+
